Nú er hún Snorrabúð stekkur.

  Og þrasað um kennara á Akureyri á

  Alþingi.

  Ofbeldi og valdníðsla?

  Neipp, hæpið.

  Bara vesen á kennara, sem hefur of mörg orð um

  sína skoðun á samkynhneigðum.

  Þurfti að senda kennarann í leyfi vegna orða sinna?

  Varla.

  Nema hann hafi verið orðinn mjög þreyttur....eða

  samstarfsmenn hans mjög þreyttir á honum.

  Fínt að ræða við manninn, áminna hann um að gæta virðingu

  er hann ræðir samkynhneigða...aðgát skal höfð í nærveru sálar osfr.

  Þarf að ræða um kennarann og málæði hans á þingi

  þjóðarinnar?

  Varla.

  Menn hafa komið sér í vandræði áður vegna óvarkárra orða,

  munnræpu og málæðis.

  Ekki þurft að taka upp umræðu á Alþingi um þess háttar vesen,

  enda nóg af mun brýnni málum sem þarf að ræða þar.

  Til dæmis:

  Blönk og atvinnulaus ungmenni, sem eiga ekki sjens á að

  koma sér upp þaki yfir höfuðið.

  Helvíska verðtrygginguna á lánum Frónbúa, sem er að

  hrekja þá marga öreiga til Noregs.

  Djö... niðurskurðinn í heilbrigðiskerfinu og verri þjónustu þar með

  til handa sjúkum, öryrkjum og öldruðum.

  Niðurskurð í menntakerfinu með verri kennslu til handa börnum okkar.

  Og svo mætti lengi halda áfram.

  Vesen á kennara fyrir norðan inn á Alþingi?

   HÚMBÚKK!

  Góðar stundir.

„Ofbeldi og valdníðsla“

Verðtryggt réttlæti.

  Sighvatur Björgvinsson snjall maður og vís,

  var í spjalli hjá Agli í Silfri Egils nú eftir hádegið.

  Verðtrygging rædd.

  Sighvati mikið niðri fyrir og fór grimmt í dæmisögur.

  Ein var einhvern veginn svona:

  Ef þú lánar manni 10.000 krónur,

  en daginn eftir fellur krónan um 40%,

  og maðurinn greiðir þér svo aðeins 10.000 krónur

  þremur dögum seinna, er það réttlátt?

  Þú ert ekki að fá sama verððgildi fyrir

  þessar 10.000 krónur lengur, og átt þú þá

  að bera þetta fjögur þúsund króna tjón...það er

  svo fráleitt, að varla er hægt að tala um það,

  var álit Sighvatar.

  Jamm.

  Húsfreyja hefur gaman að dæmisögum.

  Hér er ein um bullandi verðtryggt réttlæti:

  Hann Jói er 37 ára og er lesblindur, en fór í iðnám,

  og vinnur nú á bifreiðaverkstæði

  frá 08-18 alla daga.

  Hann býr í 5 herbergja íbúð í blokk.

  Hann á fjögur börn undir 12 ára aldri

  með Dísu, sinni ektaspúsu,

  yngsta barnið, hann Gulli litli er aðeins 3 ára.

  Dísa er leikskólakennari og vinnur alla daga

  frá 08 -17.

  Jói varð fyrir því óhappi á dögunum að

  heimilisþvottavélin (brúðkaupsgjöf frá tengdó)

  hreinlega gaf upp öndina í miðjum smábarnaþvotti.

  Nú voru góð ráð dýr.

  Þau hjón voru samhent og sparsöm á tímum

  kreppu og bankahruns, (höfðu meira að segja ekki keypt sér

  flatskjá í góðærinu)og áttu því merkilegt nokk

  30.000 krónur aukreitis í handraðanum.

  En útlitsgallaða þvottavélin á lækkaða verðinu,

  kostaði samt 40.000 krónur, og það var 10.000 krónum

  meira en efnin leyfðu.

  Þá fékk Jói brilliant hugmynd.

  Góðvinur  hans, ...ööö segjum bara að

  hann heiti Sighvatur, hafði það bísna gott,

  var vel menntaður, átti einbýlishús, jeppa, sumarbústað

  og var í vel launaðri vinnu, og nýbúinn að fá afskrifað

  lán upp á einhverja milljarða.

  Jói bað Sighvat að lána sér tíu þúsund kallinn

  sem upp á vantaði fram að mánaðarmótum.

  Ekki málið.

  Jói fékk 10.000 krónurnar að láni hjá Sighvati á

  mánudegi.

  Daginn eftir féll bévítans krónuræfillinn um 40%.

  Á föstudegi þegar Jói hafði fengið frí frá vinnu kl. 17 til að

  kaupa nýju þvottavélina, kom babb í bátinn.

  Vélin kostaði nú 44.044 krónur í versluninni.

  Jói bjallaði í Dísu, sem var nýkomin heim úr vinnu.

  Dísa tæmdi sparibauk Gulla litla í einum hvínandi hvelli.

  Sjúkkit! 

  Hann átti sem betur fer 5.o44 krónur í bauknum.

  Jói brunaði heim eftir sparipeningum sonarins,

  og rétt náði aftur fyrir lokun, að kaupa nýju

  þvottavélina.

  Næsta mánudag voru mánaðamót og útborgunar-

  dagur hjá Dísu.

  Jói fékk 10.000 krónur hjá konu sinni og skundaði

  eftir kvöldmat til góðvinar síns, Sighvats að

  endurgreiða honum lánið.

  En Sighvatur varð ekki þakklátur skilvísri endurgreiðslu.

  Sei, sei, nei.

  Hann sagði þetta ekki fulla endurgreiðslu.

  Krónan hefði fallið, svo nú skuldaði Jói honum

  4.000 krónur aukreitis.

  Og þar sem lánið væri nú gjaldfallið, yrði hann að krefjast

  5% vaxta á dag, þar til lánið væri að fullu greitt.

  Annað væri ekki réttlátt.

  Ekki átt hann sem lánaði af góðmennsku sinni,

  að bera neitt tjón af gengisfellingu

  þessara 10.000 króna.

  Og Jói blessaður greiddi Sighvati 4.500 krónur

  daginn eftir, peninga sem áttu að fara í sparibaukinn

  hans Gulla litla.

  Tjón Jóa: 8.044 krónur ofan á

  upphaflega verð þvottavélarinnar.

  En það er auðvitað bara réttlátt.

  Honum var nær að standa uppi með ónýta þvottavél

  rétt fyrir gegnisfellingu.

  Svona er sagan þessi.

  Og af henni má læra eftirfarandi:

  1.  ÞAÐ ERU LÖG að eingöngu þeir sem TAKA lán, verði

  fyrir tjóni af gengisfellingu krónu.  Þeir sem lána, MEGA

  ekki verða fyrir neinu tjóni af gengisfellingu, því það er ekki réttlátt.

  Skiptir engu þó lántakendur eigi enga sök á gegnisfellingunni,

  standi ætíð í skilum með greiðslur af láninu og séu fyrirmyndar

  þegnar á litla Fróni.  Kemur ekki einu sinn til greina að lánveitandi

  taki á sig 50% af gengisfellingu krónunnar svona á móti lántaka.

  Skiptir engu að lántakar eru iðulega þeir þegnar, sem síst mega

  við því fjárhagslega að taka á sig tjón af völdum gengisfellingar.

  Þeir skulu BORGA!   Nú eða flytja öreiga til Noregs öðrum kosti.

  2. Lán skulu AÐ EILÍFU vera verðtryggð uppi á litla Fróni og

  ALDREI afskrifuð, nema þú sért "pappírspeningapési" búinn að

  taka milljarða lán hjá þínu eigin fyritæki eða banka,

  sjálfum þér, vini þínum eða bróður,

  þá AÐ SJÁLFSÖGÐU verður lán þitt afskrifað.

  En skutla 11 ára djásninu í sund næst.

  Góðar stundir.

Verðbólgan er innbyggð í kerfið

KREPPAN BÚIN!

  Alveg er húsfreyja úti að skíta með alla hluti.

  Hjálpi henni allir heilagir.

  Jeminn og jedúddamía, eins og fínu frúrnar sögðu í gamla daga.

  Missti af sjálfum "kreppulokunum", húsfreyja.

  AF KREPPULOKUNUM!

  Kreppan er ekki bara búin, heldur er hún "NEFNILEGA búin",

   og sjálfsagt ekki seinna en korter yfir sjö í morgun.

  Og húsfreyja veit ekki neitt.

  Minna en ekki neitt.

  Hélt í allan dag í vinnunni að hún væri stödd í miðjum

  djö... kreppuniðurskurði í heilbrigðiskerfinu.

  Væri að vinna fleiri og fleiri verk um leið og hún

  sligaðist af auknu álagi og ábyrgð á

  mun lægri launum en fyrir kreppu.

  Hljóp hraðar og hraðar svo svitinn rann í lækjum niður eftir baki hennar.

  Fékk korter í mat, og aðeins skammtað hálft hrogn og 1/6 af lifur með einu

  þunnum bita af fiski....fór aftur að matarpottunum

  og lét sig ekki fyrr en hún fékk annan skammt aukalega...mínus fiskur...

  var búinn.

  Hrikalega erfitt að hlaupa glorsoltinn.

  Upp á deild aftur.

  Landlæknisembættið mætt í pillueftirlit ofan á stofugang!

  Húsfreyja með marga ljúfa heimilismenn á sínum snærum

  með ýmis mál í gangi:

  Tvo hjartabilaða, tvo órólega, tvo kallandi, tvo með harðlífi,

  tvo með niðurgang, þrjá slappa og syfjaða og vildu ekki í æfingar,

  þrjá með húðvandamál, einn sem var pottþéttur á því að

  "elding hefði skemmt rafmagnskapal inni á vakt",

  einn með símavandamál, einn með dauða peru í loftljósi,

  önnur pera blikkandi á vegg, þrír ættingjar í símanum,

  einn ættingi mættur í eigin persónu, læknirinn í RAI-inu,

  húsfreyja að leysa úr málum heimilismanna og ættingja,

  sinna skráningarskyldu, panta rannsóknir,

  redda mönnun vegna veikinda næsta dag

  og skrifa meðmælabréf.

  Svona "þokkalega ROSALEGA mikið" að gera, en húsfreyja hjóp bara hraðar,

  enda taldi hún víst að ekkert þýddi annað, þar sem hún væri stödd í

  myljandi kreppu og niðurskurði.

  Neipp!

  Kreppan er nefnilega búin!

  Húsfreyja er vesalings fáráður og utangátta hænuhaus sem

  VEIT nákvæmlega ekki neitt um það sem er að gerast í kringum hana.

  Nada!

  Nichts!

  Ingenting!

  Núll og nix!

  Missti af kreppulokunum sjálfum!

  Bara sisona!

  Flaggaði ekki einu sinni í tilefni dagsins.

  Því síður að hún skálaði.

  Sendi ekki einu sinni ríkisstjórninni og Dabba skeyti

  með hamingjuóskum.

  Neipp!

  Vissi ekki neitt!

  Hélt að Páll Óskar og Eurovision út, væri aðalfrétt dagsins!

  Húsfreyja hneigir höfuð sitt að bringu, yfirbuguð af skömm yfir

  eigin sauðheimsku og fávísi.

  Getur vart horft framan í nokkurn mann framar.

  Kreppan er nefnilega búin.

  Hallelúja og Amen.

  Góðar stundir.

„Kreppan er nefnilega búin“

Ærleg mistök þetta.

  Og er að kosta þjóðina ellilífeyririnn hennar.

  Í ljósi reynslunnar er alveg klárt, að

  uppi á litla Fróni kunni nánast "enginn" sem átti að ávaxta fé þjóðarinnar,

  með peninga að fara.

  Hvorki stjórnendur lífeyrissjóða, bankastjórar gömlu

  bankanna né heldur útrásarpésar með  FÍN fyrirtæki til húsa

  í póstkössum á Tortóla.

  Þetta gat aumingja þingmaðurinn, Blöndal ekki vitað, þegar hann sleppti

  hendinni af bandsjóðandi vitlausum stjórnum sparisjóðanna,

  og jók heimildir þeirra til að kaupa hlutabréf.

  Þeir lífeyrisvænu í stjórn óðu í villu og svíma líkt og allir hinir,

  og fjárfestu villt og galið, tvist og bast með

  peningum sem þjóðin hafði aflað.

  Ekki þingmanninum að kenna hvernig fór.

  Vitlaus lagabreyting og óráðleg?

  Neipp.

  Lífeyrissjóðirnir voru hvort eð er í djúpum skít fyrir hrun,

  skipti engu þó þeir töpuðu einhverju "smotteríi" af aurum

  aukreitis í hruninu.

  Fólkið sem borgaði í lífeyrissjóðina?

  Hvað með það?

  Ekki við Alþingi, alþingismenn og stjórnendur lífeyrissjóða að saka, þó

  fólk taki upp á því að verða hundgamalt á "alvitlausum" tímum.

  KOLRÖNGUM!

  Tímum kreppu og hruns, sem "engum" er að kenna, og allra síst þingmönnum,

  fjármálastofnunum, útrásarliði og stjórnendum lífeyrissjóða.

  Bara tilætlunarsemi að vilja fá greiddan lífeyri á krepputímum.

  Getur fólk ekki frestað því að gamlast um nokkur ár, á meðan

  þjóðin grefur sig upp úr spillingarforaði banka og fjármála, hruns og kreppu.

  Skást væri ef það sæi aumur á Alþingi og stjórnendum lífeyrissjóða, og

  sæi sóma sinn í að fá eitt herlegt og banvænt slag

   á 72 ára afmæli sínu.....ein jarðarför...piff paff og lífeyrir óþarfur.

   Jamm, en tarna er ljóta endaleysan í lífeyrismálum og húsfreyja sér fyrir sér

   á sínum svörtustu stundum er hún íhugar framtíð sína,

  að það verði jafnvel gefið út á hana "skotveiðileyfi",

  þegar hún verður "löglegt" gamalmenni.....ja svona til minnka

  "áreiti" á stjórnir lífeyrissjóðanna, og í leiðinni nota tækifærið

  og bæta skotveiðimönnum í landinu upp "bannið á rjúpnaveiði".

  En íhuga hvað afganga beri að snæða í kvölverð næst,

  og megið þið öll eiga "huggulega" elli.....með eða án lífeyris.

Í ljósi reynslunnar voru þetta mistök

Langlundargeði...

  ...Eyjamanna er viðbrugðið,

  þegar kemur að fingralöngum

  einstaklingum, sem skemmta sér á

  veitingastöðum þeirra "léttir í lund".

  Enda "lundarfar" Eyjamanna með ágætum og þeir yfirleitt

  taldir "lundgóðir" og sjaldan "lundhastir".

  Þykir húsfreyju næsta einsýnt, að lundaþjófur þessi,

  hafi verið með afspyrnu slæm "fráhvarfseinkenni"

  eftir "lundaveiðilaust" sumar enn og aftur, og hafi

  talið að EINN uppstoppaður lundi væri skárri en enginn.....

  og þó...!

  Gæti verið að sá "lundaelski" þjófur hafi verið orðinn af víni svo

  lundgóður og jafnvel í meira lagi góðglaður, að hann í skyndilegri

  "ölvaðri svegnd" sinni,  eftir að hafa aðeins snöflað í sig

  rýrum hamborgara, hafi talið uppstoppaðan lunda þennan vera

   "eðallundir" eða jafnvel vel súrsaðan "lundabagga".

  Hefur séð það í hendi sér að að þarna væri vænn biti "óétinn".

  Hann hefur þá  lundýgur ( ákafur) og lundrakkur (hugrakkur),

  gripið uppstoppaðan lundaræfilinn traustu taki, og sest að

  snæðingi....ergo skemmdirnar sem urðu á lundagreyinu.

  Eða þannig getur húsfreyja ímyndað sér atburðarrásina.

  Hehehehe...skondin frétt atarna og stóðst húsfreyja ekki mátið

  að sýna sitt rétta "lundlag" ( lundarfar), enda fædd og

  uppalin í Eyjum.

  Góðar stundir og létt steiktar lundir.

Stal uppstoppuðum lunda

Þrjú hundruð áttatíu og sjö þúsund....

  ....manns af erlendu bergi brotnir með atvinnu í Noregi.

  Heil 15% af þeim sem "jobba" í Noregi.

  Erlent vinnuafl!

  Jaso.

  Það hlýtur að vera rífandi uppgangur í landinu.

  Stóru póstarnir, samgöngur, menntun og heilbrigðisþjónusta hljóta þá að vera

   tipp topp og í fínu lagi.

  Menn jafnvel að "vinna" statt og stöðugt að því að bæta þessa

  mikilvægu þjónustu.

  Grafin göng út og suður í gegnum norsk fjöll og fjallagarða...

  og öll með fjórfaldar akgreinar, vel merktar aðreinar og jafnvel

  HRINGTORG á vel staðsettum "gatnamótum" innan fjalla.

  Og sífelld uppbygging í menntakerfinu með færum kennurum

  hvaðanæva að úr heiminum.

  Skólar þeirra norsku þar með orðnir þeir bestu í heimi,

  eineltislausir, framsæknir, einstaklingsmiðaðir og með

  flotta kennslu fyrir börn með sérþarfir í kennslu.

  Norskan, þeirra eðal tunga, tær, hrein og "slettulaus".

  Langbest hlýtur svo heilbrigðiskerfið hinna norsku frænda okkar að vera.

  Hátækni sjúkrahús, heilsugæsla og logandi fín öldrunarheimili byggð

  í hverju krummaskuði sem og stærri bæjum og borgum.

  Gamlingi með harðlífi í Noregi, þarf þá ekki að stynja nema einu sinni á

  salerninu í sinni herlegu 120 fermetra þjónustuíbúð, þegar

  ung stælt stúlka frá Litháen kemur skokkandi með

  Mikrólaxtúpu, sveskjupoka og Sorbitólmixtúru.

  Einstaklingar norskra með geðræna sjúkdóma hvílast allir sem einn á fögrum

  heilsuspítölum, sérstaklega hannaða fyrir þeirra þarfir, þegar þeir þurfa þess með...

  ....biðlistar?   

  Dautt mál! 

  Ekki sést í Noregi síðan korteri fyrir "hrun"  annarra Evrópuríkja.

  Á meðan eru skurðsjúklingar bornir um hrikalega tæknilega

  fína og flotta spítalaganga, skornir upp með öruggum og

  hátæknivæddum höndum og "vafðir í bómull" eftir aðgerð

  og látnir jafna sig í lágmark 18 daga á sjúkrahúsinu.

  Jamm, 387 þúsund erlendir að störfum í Noregi.

  Húsfreyju verður hugsað til Morgunblaðs þeirra norsku (Morgenbladet) sem

  var með frétt þ. 11. september í fyrra.

  Þar var gamansamur blaðamaður að lýsa yfir áhyggjum sínum

  yfir hroðalegri fjölgun Íslenskra á norskri grund.

  Var búinn að framreikna fjölgun Frónbúa í Noregi fram til 2068,

  og komst að þeirri vísu niðurstöðu, að þá yrðu Frónbúar orðnir

  7 milljarðar  í gamla landinu.

  Nú veit húsfreyja, að Frónbúar fara seint í það að fjölga sér

  líkt og kanínur....sjáið bara hve lengi við höfum verið að koma okkur

  upp í 300.000 hræður upp á litla Fróni.

  En svo getur nú margt breytt háttum fólks á erlendri grund.

  Máske leiðist Frónbúum svo hroðalega í fögrum fjallasölum Norska kóngsins,

  vegna vöntunar á afþreyingu, að "dodo" verður að tómstundagamni númer eitt....

  tvö.....og þrjú......fjögur....fimm og

  SEX?

  Hvað veit húsfreyja?

  En þá vill hún nú stinga því að hinum gamansama blaðamanni Morgenbladets,

  að framreikna fjölgun þessara "387 þúsunda einstaklinga", sem nú

  eru búandi og að störfum í hinu mikla veldi Noregskonungs.

  Fjölgi Frónbúum úr einhverjum þrjú þúsundum  í 7 milljarða til ársins 2068,

  hvað má reikna með að 387 þúsundir hafi þá fjölgað sér mikið?

  Verða Norsarar máske fleiri en Kínverjar á næstu áratugum?

  Fá þeir þá einnig skásett augu og fallegt gult litaraft?

  Allir firðir fullir af fólki?

  Mannabyggð komin upp á efstu fjallatoppa?

  Ná norsku borgirnar "saman" af mannmergð?

  Sekkur ef til vill Noregur undir mannfargi þessu?

  Nei, bara smá pæling hjá húsfreyju á laugardegi.

  En skreppa austur næst í kaffi til systur.

  Góðar stundir.

 

 

15% vinnuaflsins útlendingar

Fram í heiðanna ró....

  .....fann ég bólstað og bjó,

  gróf mína bifreið í snjóóóhó"....!

  Húsfreyja söng hástöfum í "ófastri og laflausri"

  bifreið sinni, yfir fréttum af vondum málum á Hellisheiði,

   á leið heim úr vinnu.

  Allt var í tjóni og tjöru uppi á Hellisheiði með snjómokstur vegna

  einhverra snilla sem höfðu ætt upp á "LOKAÐA" heiðina,

  sagði í fréttum.

  Þar voru nú bifreiðar þeirra fastar tvist og bast, þvers og kruss

  snjómokurum til angurs og ama, taugatrekkings og mergjaðrar gremju.

  Snaggaralega snarvitlaust veður hafði orðið til þess að

  Hellisheiði var lokað.

  Lokunin vel auglýst á stórum "upplýstum skiltum" 

  og stórum búkkum komið fyrir á akstursleiðinni.

  Menn lögðu SAMT á heiðina.

  Enda liggur í hlutarins eðli, að "heiðarsnillar" kunna að

  lesa "á milli línanna" á vegaskiltum sem stendur á stórum stöfum:

  LOKAÐ!

  Auðvitað túlka þeir það hárétt, að á skilti þessu standi:

  "LOKAÐ...nema fyrir þig og þína herlegu bifreið, því þú ert svo

  hrikalega góður bílstjóri og bíllinn þinn frábær".

  Og framhjá búkkum sneiða þeir með "blindandi ljósið" af

  orðinu LOKAÐ í augunum, og dvelja síðan "löngum" stundum

  upp til heiða.

  Á kafi í snjó.

  Góður tími í bláköldum snjó, skítakulda og fárviðri þar efra,

  til að hugleiða tilgang lífsins eða hvort

  gott sé að láta landið skjálfa af mannavöldum eða

  hvort Óli ætli að bjóða sig fram aftur til forsetaembættis...nú eða

  til að rifja upp það sem þarf að kaupa í Bónus...vantar

  pottþétt tómatsósu, lauk, bland í poka og skeinipappír....

  vel á minnst...er ekkert helv....salerni hér uppi á Hellisheiði,

  svona ef mönnum skyldi verða brátt í brók?

  Og tíminn líður.

  Samkvæmt fréttum er enn verið að moka Hellisheiði nú

  undir ellefu að kveldi.

  Húsfreyja vonar samt innilega að verðandi feður,

  með eiginkonur á steypinum hafi ekki farið sér

  að voða á heiðinni í dag, né heldur fólk með hjartasjúkdóma

 og önnur bráð veikindi.

  Þá er betra að leita sér hjálpar frá heilbrigðisþjónustu litla Fróns,

  hversu léleg sem hún er orðin vegna niðurskurðar,

  og sleppa því að láta vaða á heiðina upp á von og óvon.

  Góðar stundir og megi öll ykkar ferðalög eiga farsælan endi.

Hunsuðu lokanir á heiðinni

Súrnar nú norskum...

   .. í geði, og gerast þulir þeirra tapsárir og tannhvassir.

  Skiljanlegt.

  Alltaf fúlt að tapa.

  Húsfreyja nagaði naglabönd sín af æsingi og

  spennu, og reitti hár sitt af örvæntingu lengi vel

  yfir handboltaleik þessum millum Frónbúa og

  Norðmanna í gærkveldi.

  Taugar hennar voru úrbræddar og  maginn í hnút.

  En svo komu "srákarnir okkar" með það sem hún hafði

  beðið eftir:  Myljandi baráttugleði og snilldartakta á

  síðustu mínútunum.

  Húsfreyja er langt frá því að vera snilli í handboltareglum,

  en eigi gat hún séð, að maður sem snéri baki í markið,

  ætti víti skilið.

  En hvað veit hún?

  Kannski eru reglur breyttar og dómarar danskir að

  skíta upp á bak, með því að dæma ekki norskum

  "afturábak-mönnum" víti?

  Baunar í dómarastétt þar með gengnir "þeim í neðra"

  á hönd, og farnir leyfa "þrælaþjóðinni og óbermunum"

  uppi á litla Fróni að berja á "eðal herraþjóðinni" ,Norðmönnum og sigra

  þá, með því að hafa af þeim víti....eða hvað?

  Ekki gott að segja .

  Sjálf telur húsfreyja, að "strákarnir okkar" hafi hreinlega

  tekið norsarana í nefið á síðustu mínútum leiksins,

  og sigurinn því þeirra, hvað sosum öllum "afturábak-vítum" líður.

  Góðar stundir og njótið handboltakvöldanna.

Rotvarin, erfðabreytt og iðn-saltpækluð...

  ....um þessar mundir, húsfreyja, samkvæmt nýjustu

  fréttum af því sem hún raðar ofan í sig sem mat.

  Húsflugur steindrepast bara við það að húsfreyja "andi" á þær.

  Húsfreyja ekki fengið kvefvírus síðan á því herrans ári 2008....

  kvefvírusar eiga engan sjens, svo EITRUÐ er konan orðin.

  Kveikir nú húsfreyja á þremur sprittkertum í stofunni,  með einu freti en

  heimiliskötturinn felur sig ofan í baðkari inni á baði

  á matmálstímum, enda extra fín loftræsting á baðherbergi húsfreyju.

  Stofublóm húsfreyju skarta fjólurauðum laufblöðum með gulum

  doppum...og eitt þeirra át um daginn vinnupeysu bónda ásamt

  slatta af sokkum.

  Hehehehehe...stóðst ekki mátið, húsfreyja.

  Alveg með ólíkindum hvað við setjum ofan í okkur villt og galið,

  grunlaus og barnaleg.

  En altént ættum við að vera vel "iðnvædd" hér uppi á litla Fróni,

  hvað sosum hollustuna varðar.

  Góðar stundir, og munið að "salta" vel hafragrautinn og eggið í fyrramálið.

„Áttum að krefjast vottorða“

Seigur, Balti.

  Klikkar ekki Baltasar Kormákur í kvikmyndabransanum erlendis,

  frekar en leikhúsi og bíó hér uppi á litla Fróni.

  Er hörku púl að koma sér áfram í kvikmyndabransa erlendis,

  en Baltasar er seigur og uppsker nú ríkulega.

  Gaman þegar landanum gengur vel á erlendum vettvangi, og húsfreyja óskar

  íslenskum leikstjóra innilega til hamingju.

  Ætlar ekki að missa af Contrabandi í bíó, húsfreyja.

  Góðar stundir.

Contraband tekjuhæst