Mikilvægar upplýsingar...

  ...þetta, um oddvitana í Reykjavík!

  Og er nú alveg hreint á kristaltæru

  hvaða flokk húsfreyja mun kjósa í

  komandi kosningum!

  Hefur verið í bévítans vandræðum, húsfreyja....eiginlega

  hefur hún verið að bíða eftir "hugljómun".

   Og nú sér hún í hendi sér,

  að hana bráðvantaði "slagsmálaferils-upplýsingar" þessar

  um oddvita borgarinnar.

  Þetta eru auðvitað upplýsingarnar sem þjóðin

  hefur "beðið eftir" og munu hjálpa hverjum og einum

  kjósenda að gera upp hug sinn,

  á degi örlaganna.

  Ekki nokkur spurning!

  Skiptir auðvitað höfuð máli að menn séu búnir

  með "ofbeldiskvótann", hafi verið

  sundurlamdir og handleggsbrotnir,

  ætli þeir sér að verða borgarstjórar.

  Gott væri einnig ef þeir hefðu lent

  í mergjuðu einelti, orðið fyrir innbroti

  með tjóni upp á hundruði þúsunda...

  og langsamlega best væri auðvitað ef

  allt hefði brunnið að minnsta kosti einu sinni, ofan af þeim.

  Og valið verður oss kosningaþjáðum fjármálavitleysingum AUÐVELT!

  Kjósum að sjálfsögðu þann vesalinginn sem við VORKENNUM mest!

  Jamm!

  Aldeilis brilliant að fá fréttir þessar af oddvitum vorum á silfurfati

  rétt fyrir kosningar.

  Húsfreyja var farin að örvænta!

  Í ALVÖRU!

  Góðar kosningastundir!

Ólafur F. handleggsbrotnaði í slagsmálum við vin sinn

Öskurok og sandbyljir.

  Ekki lítur þetta gæfulega út.

  Sei, sei nei.

  Ófært á Sólheimasandi!

  Og nýja höfnin Eyjamanna á Bakka?

  Ætli þar sé allt "grænt og uppgróið",

  hugggulegt, fínt og tilbúið fyrir vaxandi

  umferð bíla, þá Herjólfur fer að mæta

  þangað á klukkustundar fresti...í sumar?

  Ætíð heiðskírt og bjart?

  Máske búið að "spá" blankalogni og bongóblíðu

  á Bakka og næsta nágrenni um "alla ókomna tíð"?

  Einhverjir ægilegir veðurfræðingasnillar, jafnvel með málin á tæru?

  Eða verða Eyjamenn og ferðalangar allir er með Herjólfi

  ferðast, að fá sér eitt herlegt "GPS-tæki" í bílinn svo

  þeir rati um Suðurlandið í brjáluðum öskustormi

  og sandbyl?

  Munu Eyjamenn máske ALDREI finna höfuðborgina við

  sundin bláu aftur?

  Ramba beina leið austur á Horn í Hornafirði,

  á 12 kílómetra hraða, í gegnum öskusortann....

  kolbikasvart helvíti, aðeins brotið upp af

  draugalegum gráum hrossum norpandi við

  öskugrafnar girðingar.....úúú!

  Verður "Horn" máske nýja höfuðborgin Eyjamanna?

  Verður "bílasprautun" aðalatvinnuvegur Hornfirðinga þar með?

  Eða verða mattir, silfurgráir og vel "öskuskafnir" bílar "inn" í Eyjum?

  Næstu 20-30 árin!

  Verða bændur undir Eyjafjöllum RÍKIR menn?

  Af því að selja Eyjamönnum sem og ferðamönnum öllum

  "öskugráar" andlitsgrímur, úr eðalgrárri sauðarullinni?

  Núll komma núll fimm grömm af ösku fylgir "FRÍTT" með hverri grímu!

  Verða allar draugamyndir HOLLYWOOD teknar upp

  undir Eyjafjöllum og nágrenni næstu 10 árin?

  "RED AND BLOODY-BLACK SUNSET" 1-5 verða þá nýjustu

  hryllings-drauga smellirnir frá Hollywood-smiðjunni

  ár eftir ár.....ALLAR teknar upp á litla Fróni í mergjuðu

  "öskuroki"!

  Hætta bændur Eyjafjalla að hokra í öskusvartri sveit,

  með baulandi gráar kýr og jarmandi kindur, nema sem hobbý,

  og gerast allir sem einn, "aukaleikarar" í amerískum stórmyndum?

  Jamm.

  Margt á huldu í öskugrárri þoku framtíðar.

  Ýmislegt sem birgir sýn!

  Líkurnar á sunnlensku koppalogni árum saman,

  eru álíka miklar og líkurnar á því að húsfreyja

  skelli sér í ferð upp á Everest-tind í þessu lífi!

  (Astmaveik kuldakreista, húsfreyja!)

  Svo öskustormurinn blívur á Sólheimasandi, Bakka og víðar!

  ÓFÆRT!

  Hallelúja!

  Góðar stundir.

Sólheimasandur nánast ófær

Down to earth raunveruleiki...

  ...getur verið erfiður og sár ýmsum.

  Og raunin er sú að við búum öll

  á "móður Jörð".

  Og "móðirin" er sko alls ekki einhver steindauð

  "kúla" á rólegu sveimi í kringum sólu.

  Ó nei.

  Bullandi virk eldfjöll þvers og kruss út

  um allt á móður Jörð.

  Heilu jarðarflekarnir á stöðugri hreyfingu og iði

  undir okkur mannanna börnum, sem og öðrum

  lífverum jarðar....allt á stöðugu ruggi og róli.

  Jarðskjálftar, eldgos og flóðbylgjur eru skýr

  skilaboð frá "Móðurinni" að hún sé langt frá því

  að vera dauð úr öllum æðum.

  Þvert á móti er hún bara asskoti hress og ern kerling,

  sem hefur gaman að því að "hrista" upp í hlutunum.

  Og af því að láta "okkur börnin hennar" vita, HVER ræður í raun!

  Varðar hana lítið um grát okkar og angist yfir TAPI

  á einhverjum seðlum, búnir til úr niðurhöggnum trjám hennar,

  enda langt síðan hún "grét" missi sjálfra trjánna.

  Og hún tekur sig til reglulega og minnir okkur á eitt, og eitt aðeins!

  VIRÐINGU!

  Virðingu fyrir ógnarkrafti hennar og hamförum.

  Fyrir ægivaldi því sem hún hefur yfir okkur og

  öllum þeim lífverum sem í hennar skjóli búa.

  Ferðaþjónustufólk, ferðamenn og heimshornaflakkarar

  verða eins og allir aðrir hér á jörð,

  að gera sér grein fyrir "alvarleika" málsins,

  þegar "Móðirin" blæs öskustrók upp í himingeiminn á einni

  fjölförnustu flugleið okkar mannanna.

  Grátur, gól, reiði, angist yfir töpuðu fé,

  langtíma dvöl á flugstöðvum,

  frestuðum ferðum, aflýstri eða mikið breyttri

  ferðaáætlun hefur ekkert upp á sig nema leiðindi.

  Mun betra að halda stóískri ró, líkt og öskugráir

  Eyjafjallabændur, finna aðrar leiðir til að ferðast

  yfir Atlandshafið og njóta þess vera þrátt fyrir allt

  nokkuð öruggur í faðmi "móður Jarðar".......næstu

  daga....eee...daginn í dag....altént þessa mínútuna.

  Svo ef við jarðarbúar verðum að þjást tímabundið af smávegis

  "pain in the ASH", so be it!

  En húsfreyja ætlar "til ferða" í dag...á bifreið sinni,

  á kaffiboð hjá systur í Þorlákshöfn.

  Hefur heyrt því fleygt, húsfreyja að "móðirin" sé

  eitthvað farin að róast þar uppi á jökli....

  Góðar "ferðastundir" í sumar!

 

„Íslenskur öskuverkur“

Nú, bullandi sparnaður...

  ...þetta fyrir skánska kálgarðsbændur!

  Þeir spara sér auðvitað einhvern

  helvískan helling af seðlum,

  sem hefðu öðrum kosti verið eytt í að kaupa

  rándýrt eitur á pöddur, lús og kálorma.

  Nú "skjóta" bara bændur bévítans

  kálmaðkana í tætlur með hríðskotarifflum,

  brúka "napalm-bombur" á pöddurnar og lýsnar,

  og sé þá eitthvað kvikt eftir í kálgarðinum...og

  í 10 kílómetra radíus í kringum hann,

  má þá klára dæmið með "handsprengjum"!

  Selja svo þeir skánsku "pöddu-og ormalaust"

  salat grimmt í sumar...og reyndar "vel napalm-grillað" líka.

  Hehehe...skondin frétt!

  Snjallir "útreiknarar" í sænska hernum, og sjálfsagt örlítið

  litblindir líka, fyrst þeir rugluðust á "kálgarði" og "flugvelli"....

  nema að flugvöllurinn í Rynkeby, sé "grasflugvöllur".

  Máske jafnvel brúkaður sem "gólfvöllur" á sunnudögum og

  Páskum.

  Aldrei að vita.

  En húsfreyja er komin í helgarfrí, svo

  góðar stundir og góða helgi.

 

 

Hergögnin lentu í kálgarðinum

Lítill framboðsfundur....

  ...bara svona meira spjall við

  fólkið í hádeginu" ? sagði

  skrifstofustjórinn á vinnustað húsfreyju.

  Húsfreyja gjóaði augum á frambjóðendur,

  sem mættir voru með hvíta plastpoka.

  "Jaso, RÚSÍNUFLOKKURINN bara mættur"

  hugsaði húsfreyja.

  Gaf leyfi húsfreyja og það stóð heima, frambjóðendur

  byrjuðu á því að heilsa og deila út

  "rúsínupokum" með kaffinu eftir hádegismatinn.

  Húsfreyja nikkaði frambjóðendunum tveimur og

  reyndi að beina þeim að borðum eldklára fólksins.

  Kvenframbjóðandinn rataði strax á borð fullt af

  eldklárum öldungum, en karlinn var ekki eins heppinn.

  rambaði beint á borðið hjá þeim sem voru orðnir

  all nokkuð gleymnir og sumir töluvert mikið, svo jaðraði

  við minnisleysi.

  Hann heilsaði fólki með virktum, og það tók vel undir,

  á meðan frúin á eldklára borðinu, þurfti talsvert að

  útskýra veru sína á svæðinu og stefnu flokksins,

  og rökstyðja hví í ósköpunum öldungar ættu að kjósa

  "rúsínuflokkinn" fram yfir aðra.

  "Mikið ertu huggulegur og skemmtilegur maður" sagði

  ein elskulega "svolítið farin að gleyma" frúin.

  Maðurinn innti eftir áhuga annarra flokka að mæta á svæðið.

  "Við höfum bara ALDREI séð nokkurn frambjóðanda hér

  fyrr en þig" svaraði önnur frú töluvert mikið farin að gleyma.

  "Hvað segirðu"?, frambjóðandi var rasandi.

  "Já, svaraði frúin að bragði, þú ert sá fyrsti síðan ég kom hingað"!

  Frú þessi hefur dvalist hartnær 8 ár hjá húsfreyju, og hitt töluvert af

  alls konar frambjóðendum á tímum kosninga í landi voru.

  Húsfreyja glotti en lét vera að leiðfrétta elskulega frú sína.

  Frambjóðandi setti í gír og ræddi um stefnu "rúsínuflokksins"

  í borgarstjórnarkosningum.

  "Ég kýs þig, og þú verður forseti" sagði elskulegur

  karl með langt genginn minnissjúkdóm við hlið frambjóðenda.

  "Já, og ég skal sko kjósa þig, ef ég fæ hjá þér bækling" sagði

  sú sem ALDREI hafði hitt frambjóðanda fyrr...hvorki þennan né nokkurn annan.

  Frambjóðandi varð eitt bros, reyndi að leiðrétta "forsetaframboðið",

  reif upp bæklinga úr poka sínum og rétti ALDREI-konunni.

  Konan rýndi á forsíðuna, rétti svo bæklingin yfir til

  "svolítið farin að gleyma frúnnar", "lestu þetta fyrir mig,

  ég er alveg orðin blind"!

  Svolítið farin að gleyma frúin tók glöð við bæklingi,

  "ég skal svo sannarlega lesa þetta, hlýtur að vera

  bæði hugguleg og skemmtileg lesning frá svona

  myndarlegum manni eins og þér" og las síðan

  í honum það sem eftir lifði hádegisverðar...í hljóði.

  "Ertu læknir"? spurði gamli með langt gengna minnissjúkdóminn.

  Frambjóðandi fór allur hjá sér, var eiginlega alveg í rusli,

  þegar húsfreyja kom honum til bjargar.

  Hún smellti sér í pælingar um næsta borgarstjóra,

  hvort íbúar í borginni við sundin bláu myndu í

  alvöru kjósa yfir sig "veifandi" borgarstjóra sem

  býður upp á hlunnindi eins og FRÍTT í sund og

  niðurskurð á "öspum"!

  Frambjóðandi brosti glaður og feginn, og taldi að borgarbúar

  héldu sönsum, og myndu skilja að grín væri grín,

  og kysu "ábyrgt fólk" eins og er svo mikið af í

  "rúsínuflokknum"!

  Húsfreyja tók undir með frambjóðanda, enda fannst henni

  ekki vert að bæta við hremmingar hans.

  Kvöddu þau svo "rúsínuflokksframbjóðendur" öldunga

  og starfsfólk með virktum, og fóru að hitta ellismelli

  á öðrum deildum.

  Jamm!

  Hlakkar til að fá "pennaflokkinn", "barmmerkjaflokkinn", "blöðruflokkinn"

  og "skera-niður-aspir-flokinn" í heimsókn næstu daga,

  húsfreyja.

  Verður stuð.

  Er svo húsfreyja búin að skreppa með systur í Þorlákshöfn

  á  kosningaskrifstofur, að kynna sér stöðu mála þar í

  sveitapólitíkinni.

  Líst bara vel á.

  En systir hefur verið dugleg að flakka á milli kosningaskrifstofa

  að kynna sér málin.

  Ein "dökkblá" frú í höfninni er heldur óhress með "ráp"

  þetta á systur, húsfreyju og þriðju konu sem gjarnan slæst

  með í för, og sagði þær vera "flokksskækjur"!

  Húsfreyja glotti við tönn, og sagði það ekki verra að

  "skæklast" og "skækjast" á milli flokka til að fá málin

  á hreint, en að vera "svarblá" af heilaþvætti.

  Jamm.

  Víða heitt í kolum þegar kosningar fara í hönd.

  Húsfreyja hefur lúmskt gaman að!

  Góðar stundir og húsfreyja mælir með "rúsínuflokknum"....

  í dag...Spurning hvað verður á morgun....hehehe!

 

Framboðsfundi frestað vegna öskufalls

Allt er nú sem orðið SVART...

  ...ærnar, kýr og smalinn!

  Já og strókurinn frá Eyjafjallajökli sást stefna

   í austur, þá húsfreyja skrapp austur fyrir fjall

   í dag með 9 ára djásnið.

  Eyjarnar mistruðu í gráu skýi, hálf umkomulausar

  og daprar að sjá.

  Systir í Eyjum var í símanum við okkur í Þorlákshöfninni,

  alveg rasandi á "öskugráum" skít og drullu, og rausaði villt og galin

  í peyjum sínum að "fara úr fötunum ÚTI" á meðan

  hún barmaði sér og sínum.

  Heppin samt að þurfa aðeins að hugsa um 3 grútskítuga

  peyja, einn drullugri hund og eina tandurhreina "neitar að

  fara út í þennan viðbjóð"-móður.

  Engar kindur, kýr, eða svín að hafa áhyggjur af.

  Engin uppskerubrestur eða skortur á heyi.

  En svo heppnir eru bændur undir Eyjafjöllum ekki.

  Allt í sótsvörtu tjóni og ösku.

  Vonar húsfreyja að "þeim í neðra" sé farið að leiðast

  þar í jöklinum, og fari að huga að smá lúr...

  og að fara í það að hrella Mister Brown fyrrum

  "yfirhatt" í Bretlandi næst.

  Kannski tapi sér í pípulögnum hjá Brown, og jafnvel

  rústi hjá honum salerninu þá hann hyggur næst

  á djöfulgang og læti.

  Hvíla sig á eldgosum...tekur of mikla orku frá öllum.

  En djásnið vill í kompjúterinn næst.

  Góðar stundir.

 

Allt orðið svart aftur

Send us CASH...

  ...and we'll send you "ash".

  Líst vel á þetta, húsfreyju.

  Eigum heilu helvítis tonnin af

  henni í hrúgum og haugum

  í kringum Eyjafjallajökul.

  "Just don't eat the black shit,

  or spread it around airports,

  and you'll be fine...as well as the

  proud owners of Icelands finest

  volcano ash", væri samt öruggara

  að skella utan á öskuílatin.

  Svona til að fyrirbyggja meiri háttar

  slys á erlendri grund.

  Hehehe, stóðst ekki mátið húsfreyja.

  En er auðvitað brilliant leið til að losa okkur

  við öskuna...og "græða" smávegis aur upp

  í déskotans Icesafe-skuldina í leiðinni.

  Tæki jafnvel húsfreyja það að sér í "sjálfboðavinnu"

  að troða ösku í flöskur fyrir "svarttúna" Eyjafjallabændur!

  Er ömurlegt að upplifa "svart" vor, heyleysi og vandræðagang

  í miðjum sauðburði.

  Eyjafjallabændur eiga alla samúð húsfreyju.

  Ekki síður íbúar í Vík í Mýrdal.

  En "sá í neðra" verður að fá að blása úr sér

  vonskunni yfir ofurbjartsýnum Frónbúum,

  og örlítið skárra er að hafa hann þarna í Eyjafjallajökli,

  í djöfulgangi, öskuhrati og eldglæringum en

  í Kötlu gömlu.

  Húsfreyja svo að koma að austan, skrapp

  á kosningaskrifstofur með systur í Þorlákshöfn.

  Leist húsfreyju ágætlega á "kosningaloforðin",

  en spáir litlu um efndir.

  Hér í höfuðborginni spáir húsfreyja hinsvegar

  því, að nýr borgarstjóri verði "veifari" og

  sé meinilla við "aspir", og gangi grimmt í að skera þær

  niður eftir kosningar.

  Vonar húsfreyja að það grínið verðið töluvert

  skárra en "borgarstjóri í einn dag-grínið"

  sem var í algleymingi hér í borginni við sundin bláu

  rétt fyrir kreppu og bankahrun.

  Húsfreyja svo að setja sig í "sólpallsgírinn" og er að

  stumra ufir túlipönunum sem bónda tókst næstum að

  drepa, með því að skella fargi ofan á túlipanapottana.

  Finna falleg sumarblóm á pallinn næst.

  Góðar snemmsumarsstundir.

Askan selst eins og heitar lummur

Stjórnvöld svara ekki?

  Hvurslags?

  Eru frónversk stjórnvöld bara farin í fílu

  við Sigurð, vegna smá bankahruns

  og nokkurra milljarða taps?

  Bara svona smotterí sem ekki kom í veg fyrir

  á Sigginn gat flutt í sæmilega gott húsnæði

  í hinu mikla veldi Bretadrottningar!

  Hva?  Hann átti NÆGAN AFGANG eftir bankahrunið,

  bara hinir brjálæðingarnir hér uppi á litla Fróni,

  sem allir klikkuðust í góðærinu og keyptu sér

  "flatskjá" sem sitja í súpunni!

  Ekki hans mál að þeir vesælu áttu eigi banka eða sátu í stjórn

  einnar slíkrar stofnunar, og voru með eitthvað

  "örlítið lægri" laun en hann sjálfur!

  En máske er bara alltaf "á tali"  hjá voru herlegu

  stjórnvöldum vegna mergjaðra og heitra

  símaviðræðna við breska og Niðurlendinga vegna

  kerlingarfálu einnar er húsfreyja kallar stundum "Ísbjörgu"?

  Allar símalínur landsins kannski bara rauðglóandi,

  og Sigginn orðinn logarauður á hægra eyra, að hanga

  svona í símanum með talsóninn suðandi,

  og sjálfsagt kominn með legursár

  á hægri olnboga eftir að hvíla símahandlegginn

  á mahogany-skrifborðinu sínu.

  Jamm.

  Ill örlög þetta að geta ekki einu sinni fengið

  "upplýsingar" frá stjórnvöldum um hvað málið varðar.

  Hefur bara ekki "grænan grun" um hvað er í gangi,

  blessaður bankamaðurinn, enda hann ekki framið nein lögbrot

  við rekstur bankans....mesta lagi hægt að brígsla honum

  um magnaða heimsku, skammsýni og því að klikka

  ALGERLEGA í starfi sínu sem stjórnarformaður bankans!

  Jamm! 

  Sér það líklega núna Sigginn, að hann hefur valið sér

  ALRAGNT lífsstarf, þegar hann gerðist bankamaður!

  Hefði aldrei nálægt banka átt að koma...nema þá kannski

  til að skúra og tæma úr ruslafötum!

  Gerast þá "ráðgjafi"?

  Ráðgjafafyrirtæki?

  Gleymið því!

  Húsfreyja myndi ekki þiggja ráð frá fyrrum stjórnarmanni bankans,

  um hvernig best væri að afhíða banana eða sjóða egg...

  og allra síst treysti hún ráðgjöf hans í fjármálum!

  Vonar samt húsfreyja að blessaður maðurinn finni

  starf í veldi breskra, við hæfi, þó svo að eitthvað

  fái hann lægri launin þar en í herlegum banka vorum.

  En aumingja stjórnarformaðurinn fyrrverandi er

  greinilega í vondum málum með upplýsingaflæði

  og símtengingar.

  Nær ekki í nokkurn mann hér uppi á litla Fróni sem

  vill tala við hann.

  Verður bara að treysta á verið sé að rukka hann um

  skýringu á vangreiddum stöðumælasektum.

  Nú svo gæti hann alltaf "skroppið" til Köben,

  og síðan ljúfa siglingu með Norrænu hingað til okkar á litla Fróni...

  þó það væri til þess eins að afla sér upplýsingar um

  hvað sé í gangi og því oss frónverskum finnst

  áríðandi að spjalla við hann.

  Ekkert hægt að treysta á flugið hingað lengur.

  "Sá í neðra" er bandbrjálaður yfir að hafa misst

  haug af "svörtum sauðum" af landi brott, og hefur

  hertekið Eyjafjallajökul í mótmælaskyni með djöfullegum

  afleiðingum fyrir flugið!

  Jamm.

  Blessaður stjórnarformannsöðlingurinn að "lenda svona óvart" í þessu.

  En grilla hammara næst og græja grænmeti.

  Góðar stundir.

  

Segist engin brot hafa framið

Það sem augað sér.

Varla geta þetta talist

  flunkuný vísindi.

  Frá því að húsfreyja hafði vit og rænu til

  hefur útlit skipt hana máli.

  Og það á hverju sem er.

  Líkt og húsfreyja hafi innbyggt "fegurðarskyn"

  sem stjórnar hugmyndum hennar um hvað sé

  gott, vont, ljótt, fagurt, sætt, súrt, beiskt eða salt.

  Veit ekki hvaðan henni kemur viska þessi,

  en man eigi að síður eftir að hafa ákveðið

  að rúgbrauð væri óþverri sem lítill krakki,

  vegna þess að brauðið "var forljótt"!

  Og þegar húsfreyja seinna meir reyndi að

  snæða girnilega rúgbrauðssúpu með þeyttum rjóma,

  reyndist súpan sú "óþverri" á bragðið, hvað húsfreyju varðaði.

  Getur enn þann dag í dag hvorki borðað rúgbrauð

  né rúgbrauðsúpu!

  BJAKK!

  Og svona hefur þetta verið með flest allt í lífi húsfreyju.

  Sæti strákurinn í menntó sem allar stelpurnar lágu flatar

  fyrir, var eiginlega bara lala í augum húsfreyju,

  en barnalegi ljóshærði gaurinn sem skvísurnar í bekknum

  gerðu grín að, höfðaði mun meir til húsfreyju.

  Enda er sá sæti að springa úr offitu í dag, og er

  nýorðinn atvinnulaus, en sá barnalegi, ljóshærði

  er vinsæll rithöfundur, grannur og spengilegur sem fyrr.

  Jamm.

  Það sem augað sér og skynjar er oft

  víðtækara en maður heldur, og krakkar sem

  fíla umbúðirnar af hollum mat eru mun líklegri að njóta

  hans en hin, hefði húsfreyj talið.

  Sjáið bara "listfengið" hjá meistarakokkum er þeir

  raða á matardiskana eðalréttum.

  Er iðulega konfekt fyrir augað, sem aftur eykur gæði

  matarins fyrir bragðlaukana, og vellíðunina í maganum

  er hann er snæddur.

  Namm.

  Mannskepnan er furðulegt fyrirbæri, og merkilegt

  hvernig við upplifum, sjáum og skynjum lífið á misjafnan máta

  hvert og eitt.

  Þá húsfreyja var barn að aldri, vildi hún að fólk

  fengi nöfn eftir "svipbrigðum" sínum...og var

  alveg rasandi þegar að kona sem hreinlega

  ÁTTI að heita Ingibjörg samkvæmt hennar tilfinningu

  hét svo bara Ásta!

  Og maðurinn sem henni fannst hljóta að heita Hermundur,

  hét svo því stuttaralega nafni Gunnar.

  Húsfreyju sem þá var lítil skotta, fannst þetta alveg

  hroðalegt, hve fólk var óheppið með nöfnin sín.....

  en svo var hún sosum ekkert heppin sjálf með nafn...

  sat uppi með Sigríður, þegar hún ÁTTI að heita Elah Búga!

  Eða Ellabogga eins og fullorðna fólkið í kringum hana bar það fram.

  Kynnti sig lengi þannig, húsfreyja, sem barn, móður hennar

  til mikillar armæðu og mæðu, enda bévítans mál að útskýra

  "Elinborgar-nafngiftina" á barninu, og ekki eina einastu

  Elínborgu að finna hvorki í móður- né föðurætt.

  En svo átti líka húsfreyja sem barn, það til að klikka ALVEG sjónrænt,

  og til dæmis hræðast fólk sem var "rangeygt" eða

  "rytjulegt" til höfuðsins. 

  Telja það sorgmætt, ljótt eða jafnvel vont.....en oftast

  samt bara dapurt.

  Hafði ekki alltaf þroska til að úthugsa "sjónræna skynjun"

  sína, sem skotta, og rangtúlkaði margt, enda heimur

  fullorðna fólksins iðulega flókinn og snúinn.

  En eitt lærði húsfreyja snemma á ævinni,

  og það er að "augun" eru gluggar sálarinar....

  og þau sjá og skynja mun meira en margur heldur.

  Það er eins og maður hreinlega "andi inn" með augunum,

  fallegu landslagi, svo húsfreyja taki nærtækt dæmi.

  Eins og augun megni að fylla brjóstið af ljósgulu og bláu ljósi,

  standand í miðri Þósmörkinni um sumar í blíðviðri.

  Og hver hefur ekki upplifað að hreinlega "drekka"

  með augum sínum fallegt barnsandlit baðað björtu brosi?

  Fundið "eld kvikna í augum sínum" þegar aðlaðandi

  einstaklingur af gagnstæðu kyni blikkar mann.

  Jamm.

  En svo mörg voru þau orð.

  Ferð heim í borgina við sundin bláu næst, eftir sólardag

  í Þorlákshöfn.

  Góðar stundir

 

Umbúðir skipta máli

Dorrit... New York... og barningur...

  ...er þetta að komast að

  kompjúternum með eina bloggfærslu"

  hugsaði húsfreyja, um leið og hún

  hlustaði á 9 ára djásn og bónda þrasa um

  hvort þeirra hefði setið lengur við tölvuna.

  Djásnið situr við "fésið" og leiki, og bóndi

  við íþróttaleiki og fréttir.

  Síðan þrasa þau og þrátta um þennan eina

  tölvugarm sem til er á heimilinu.

  Djásnið verður sárt, tárast og skellir hurðum,

  bóndi pirrast yfir af hafa misst af marki hjá

  "Úlfunum" og húsfreyja reynir að vera sáttasemjari

  og fá málsaðila til að skipta tíma fyrir framan kompjúter

  jafnt á milli sín.

  Jamm.

  Húsfreyja var aldrei mjög snjöll í vélritun hér

  í den, hefði orðið GLATAÐUR einkaritari,

  svo henni veitir ekki af minnst klukkustund til að

  pistla smá á blogg sitt.

  Hennar úthlutaði tími undanfarið við tölvuna er allt frá 30. sek.

  upp í 15-20 mínútur á dag, en lengur fær hún sjaldnast

  að dudda sér við "rafheilann"!

  Svo pistlarnir fæðast og deyja í hugskoti húsfreyju,

  og hverfa inni í óminni gleymskunar að eilífu með

  jöfnu millibili.

  En veit vart hvað hefur gerst í húsi sínu, húsfreyja í dag.

  Hún er "ein" heima á laugardegi, djásnið horfið á vit dýralífs og

  hoppandi skopps í Húsdýragarði en bóndi er farinn

  að reyna "drekkja" þrálátum axlarverk í sundlaug

  hér í borg.

  Húsfreyja getur dundað sér við pistlaskrif að villd....

  fram yfir hádegi og jafnvel lengur.

  Og hvað?

  Jú, allar hennar snilldarhugmyndir að pistlum eru

  horfnar úr höfði húsfreyju.

  Piff!

  Draugalegur, hjáróma ómur sem bergmálar í hugskotum hennar,

  af stöku hugmynd, meinlegri skoðun eða snjallri hugsun,

  það eina sem eftir er.

  Ætlaði að rita einn herlegan "hallelújapistil" um

  bankastjóra sem skitu upp á bak og lentu síðan

  inni á Litla Hrauni......í einangrun svo enginn annar

  þurfi að þola af þeim ódauninn!

  En nei!

  Allt farið.

  Ætlaði að skrásetja eitursnjallar hugmyndir

  um tilurð eldgosa á borð við Eyjafjallajökulsgos,

  með tilheyrandi djöfullegum brennisteinslýsingum

  og eldglærum.

  Púff!

  Fuðruðu upp í frumeindir sínar, hugmyndirnar þær.

  Öfugsnúinn déskoti!

  Húsfreyja er súr.

  Gallsúr!

  Og svei því öllu saman....hún skrifar SAMT!

  Þó ekki verði það allt gáfulegt...

  Elskuleg og æruverð forsetafrú okkar Frónbúa

  er ætíð að gera góða hluti fyrir "stórasta"  land í heimi.

  Nú er sú fína frú farin að styðja "öskusölu" í New York!

  Eins og þeir hafi ekki nóg af skít og drullu í þeirri

  herlegu borg þar fyrir.

  Altént man húsfreyja ekki betur en allt væri

  vaðandi í rusli og skít, brennandi öskutunnum,

  og hrikalegu drasli þá hún rölti um sum hverfin

  í þeirri dýrðarborg hér í den.

  Og ekki gleymir hún vesalings fólkinu sem lá eins og hráviði

  um allt, heimilislaust og allslaust.

  Þurftir ekki annað en að skreppa nokkur skref

  niður 42. stræti af fimmtu breiðgötu með öll sín æðislegu

  flottheit, og voila!

  Þarna var allt vaðandi í óhroða, eymd og skít.

  En nú er sem sagt Dorrit farin að styðja öskusölu

  í New York....eða svo segir Fréttablaðið...ekki lýgur það!

  Fá New York-búar heimsenda fulla flösku af þá "líklega"

  eldfjallaösku fyrir 20 dollara!

  Jamm!  Tuttugu dollara!

  Nefndir eru til sögunnar tveir netkaupmenn sem

  hingað til hafa selt sælgæti á vefnum (Nammi.is), en eru nú

  komnir í bullandi "útrás" í öskunni.

  Þykir húsfreyju líklegt að netherjar þessi verði að

  MERKJA 20 dollara öskuflöskur sínar vel og rækilega,

  svo New York búar hreinlega "éti" ekki drullugráa dýrðina.

  VARÚÐ-BANEITRUÐ ELDFJALLAASKA!!

  VARÚÐ- ASKA BEINT ÚR IÐRUM MÓÐUR JARÐAR!!

  Eða bara :

  FOR HEAVENS SAKE-DON'T EAT THIS SHIT!!!

  Jamm, við eigum frábæra forsetafrú, og sú tekur sér

  aldeilis ýmislegt fyrir hendur.

  Verst að hún er alltaf í einhverju bévítans basli

  með galakjólana sína, blessunin, og illt að

  treysta forseta vorum að mæta með þá í flugi til Danmerkur,

  spúi hér heill jökull eldi, eymyrju og ösku uppi á litla Fróni.

  Alltaf gaman að frétta af forsetafrú vorri.

  En fyrst húsfreyja er farin að skrifa um New York,

  þá kemur henni ýmislegt í huga.

  New York var á þeim árum sem húsfreyja vísiteraði

  borgina, skreytt miklum "tvíburaturnum", WORLD TRADE CENTER.

  Lagði húsfreyja ferð sína upp í þá miklu turna og barði

  ægifagurt útsýnið þaðan augum.

  Því New York er ekki einungis borg fátæktar, eymdar og rusls,

  heldur einnig borg stórkostlegrar framkvæmdagleði, menningar,

  arkitektúrs og merkilegs skipulags.

  Þar er lifað hratt og mikið lagt upp úr félagslífi og skemmtunum.

  Er suðupottur menningarheima og borg mikilla öfga.

  Aldrei leiðinleg borg, þó ekki sé allt fallegt eða gott í henni.

  Gælunafn hennar "the big apple" á vel við,

  ef húsfreyja fær að notast við epli vondu stjúpunnar

  í ævintýrinu um Mjallhvít og dvergana sjö.

  Einn helmingur eplisins er skemmdur og baneitraður,

  en hinn ekki.

  Þannig upplifði húsfreyja einmitt New York á sínum tíma.

  Nú kemst húsfreyja aldrei framar upp "tvíburaturnana"

  fremur en nokkur annar á jarðríki.

  Ellefti september 2001 strokaði þá út, og markaði

  djúpt, svart sorgarspor í sál New York-búa.

  Þætti húsfreyju merkilegt að vísitera nú aftur

  "stóra eplið" og athuga hvernig New York-búar kæmu

  hennir fyrir sjónir, en ekki er víst að kreppa og fjárhagur leyfi það.

  En nóg að sinni, enda bóndi mættur úr sundi,

  og þarf án efa að komast í kompjúterinn fyrst

  9 ára djásnið er ekki heima.

  Góðar stundir.