Heilt ár fyrir búðarhnupl?

  Þá eru það spurningarnar:

  Hversu langa dóma fá menn fyrir

  rjúfa skilorð eftir síendurtekið heimilisofbeldi?

  Eða fyrir síendurteknar kærur um ofbeldi eða nauðganir?

  Er það þá einnig "brot " á skilorði?

  Eða fyrir að vera endurtekið tekinn akandi á bifreið undir

  áhrifum vímuefna og brennivíns?

  Er máske búið að lengja allan refsitímann eins og leggur sig,

  allt eftir alvarleika brota?

  Jamm, merkilegt atarna, og hélt húsfreyja satt að segja að

  fangelsi vor hér uppi á litla Fróni væru yfirfull af dópkrimmum,

  morðingjum, nauðgurum, útrásarvíkingum og bankasnillum.

  En máske eru sísvindlandi, gráðugir útrásarvíkingar allir og vinalegir

  "vorum-ekki-með neinar-innherjaupplýsingar-bankasnillar" enn í

  "rannsókn", "verið að undirbúa kæru á þá...eða ekki", eða þá

   allir á "skilorði", svo enn er nægt pláss er fyrir

  "kardimommudropahnuplandi" glæpakvendi í steininum?

  Jaso!

  Húsfreyja vonar þá að kardimommufrúin fái að taka með sér

  eins og  eitt, tvö glös af dropunum góðu (ódrukkna)  í fangelsið....má þá

  altént hræra í eina góða jólaköku í fangelsiseldhúsinu,

  marmarateru og fleira gómsætt.

  Halda "kardemommu-veislu" með stæl og skála í botn fyrir íslenska

  dómskerfinu.

  Já, mikið er réttlæti þess og viska.

  HALLELÚJA.

  Góðar stundir, og munið að kardemommudropar eru bísna

  góðir í kökubaksturinn...í hófi.

Árs fangelsi fyrir að stela kökudropum

Hláturinn lengir lífið?

  Hér er tveir gamlir og góðir:

  Þegar ég var á leiðinni upp Ártúnsbrekkuna í morgun

  leit ég til hliðar og þar var kona á splunkunýjum BMW.

  Hún var á svona 120 kílómetra hraða með andlitið

  upp í baksýnisspeglinum og var á fullu að sminka sig

  með meik-up græjurnar í sitt hvorri hendinni með

  annan olnbogann á stýrinu.

  Ég leit fram á veginn eitt augnablik, og næst þegar

  ég leit á hana var bíllinn hennar á leiðinni fram fyrir

  mig í mína akrein, og samt hélt hún áfram að mála

  sig eins og ekkert væri sjálfsagðara.

  Mér brá svo mikið að ég missti rakvélina mína

  ofan á roastbeef-samlokuna, sem ég hélt á í vinstri

  hendi. 

  Í panikkinu við að afstýra árekstri við konuhelvítið

  og ná stjórn á bílnum sem ég stýrði með hnjánum,

  datt gemsinn minn úr hálsgrófinni á mér ofan í

  kaffibollann sem ég var með á milli fótanna.

  Það varð til þess brennheitt kaffið sullaðist á

  "besta vininn" og "tvíburana tvo".

  Ég rak upp öskur og missti við það sígarettuna

  úr kjaftinum og brenndi hún stórt gat á sparijakkann

  minn og ég missti af mikilvægu símtali.

  HVAÐ ER AÐ ÞESSUM HELV... KELLINGUM?

 

  Hjón fóru á fæðingardeildina á Landspítalanum,

  konan að fæða fyrsta barn þeirra.

  Jónas læknir sagði þeim að alveg nýtt tæki

  hefði verið keypt inn á fæðingardeildina, sem

  færði hluta af fæðingarverkjum móðurinnar til

  föðursins.

  Þau hjón vildu ólm prófa tækið.

  Jónas læknir byrjaði á 10% verkjaflutningi til

  eiginmannsins, þar sem það væri líklega meiri verkur en

  en hann hefði nokkru sinni upplifað.

  En eiginmaðurinn bar sig bísna vel, og eftir því

  sem leið á fæðinguna sagði hann lækni að hækka

  í tækinu.

  Læknir hækkaði í 20% og síðan í 50%.

  Og enn var eiginmaður stálsleginn og sagði Jónasi

  að flytja alla verki hinnar fæðandi móður yfir á sig.

  Fæðingin gekk síðan brilliant vel og móðirin

  fann ekki nokkurn hlut fyrir neinum verkjum.

  Og sömuleiðis eiginmaðurinn, hann var hinn hressasti.

  Um kvöldið fengu hjónin að fara heim með frumburðinn,

  og þá fundu þau bréfberann steindauðan á tröppunum

  fyrir framan hús þeirra.

  Jamm, víst er gott að geta hlegið dátt, eða í það minnsta glott

  út í annað.

  Sjálf var húsfreyja á ferðinni í dag.

  Þurfti í Rúmfatalagerinn að ná sér í ódýra prjóna.

  Taldi happasælast að skreppa í Smáralindina, því þar rataði hún

  einna best um verslunina.

  Jamm.

  Auðvitað var búið að hafa endaskipti á versluninni, svo húsfreyja

  vissi ekki hvað sneri upp eða hvað sneri niður.

  En prjónana fann hún samt.

  Týndi svo ýmislegt smálegt með í körfu.

  Gáfaði ungi maðurinn með dökku spangargleraugun,

  var að ræða við sína heittelskuðu fyrir aftan húsfreyju

  þegar þau biðu afgreiðslu við kassa.

  Líklega rúmlega tvítug bæði tvö.

  Hans heittelskaða, einnig með dökk spangargleraugu

  horfði svolítið fljótandi augum á kærastan, enda ung og

  ástfangin.

  "Við verðum að kaupa okkur slatta af þessum hér, þegar

  við fáum íbúðina okkar afhenta" sá gáfaði sýndi kærustu eldhússvampa,

  10 saman í búnti.

  Kærasta kinkaði spekingslega kolli, og hristi ljósan hárlokk sem hafði

  fallið fram yfir dökku spangargleraugun.

  "Já, hélt sá ungi gáfaði áfram, "kannski get ég líka reddað

  500 grænum svona, frá kunningja mínum, fyrir lítinn pening,

  hann er með heildsölu".

  Kærastan tók upp eina lengju af eldhússvömpum,

  velti henni á milli handa sér.

  Spurði svo:  "Til hvers er ÞETTA eiginlega notað"?

  Húsfreyja skellihló inni sér á meðan hún greiddi fyrir prjónana.

  Hlustaði á unga herrann reyna að útskýra þrif á eldhúsi

  fyrir ungu dömunni sinni, sem áreiðanlega hafði aldrei þrifið

  eldhús, hvað þá heldur komið við klósettbursta á allri sinni

  stuttu ævi.

  Já, það fara margir að búa, ÁN ÞESS AÐ KUNNA AÐ BÚA.

  En allt lærist það á endanum.

  Síðan var skroppið austur fyrir fjall í kaffi og kleinuhringi

  til múttu eftir hádegið.

  Mikið spjallað og PRJÓNAÐ.

  Svalan svo með til baka og ætlar að bíóast og fleira með Bárunni

  yfir helgina.

  En góðar stundir og góða og hláturmilda helgi.

Hlegið að Íslendingum í Færeyjum

Skandall að Skandia...

  ...sé fengin til landsins að

  dæla sandi úr Landeyjahöfn,

  geti ekki sinnt sínum störfum dögum saman

  vegna "ölduhæðar",

  og stranda svo sjálft í höfninni...

  í sandinum sem það á að dæla á brott.

  Hvurslags vinnubrögð eru þetta?

  Hvers eiga Eyjamenn að gjalda?

  Ef búið var að sjá fyrir þörfina á reglulegum

  sanddælingum og dýpkunum í Landeyjahöfn,

  því splæstu ekki ráðamenn í "sanddæluskip"

  sem ræður við aðstæður hér uppi á litla Fróni?

  Getur ekki sinnt dælingu dögum saman vegna

  "of mikillar ölduhæðar"!

  STRANDAR sjálft í höfninni!

  Er þetta boðlegt Eyjamönnum á ferðinni upp á land og heim aftur,

  á tímum niðurskurðar í heilbrigðiskerfi, menntakerfi,

  atvinnuleysi og annarri óáran sem dunið hefur yfir?

  Í Eyjum sem annars staðar.

  Lágmark að menn komist ferða sinna til að bjarga

  sér í læknisskoðun, til framhaldsnáms, til starfa uppi á landi

  í heimsókn til vina og vandamanna, nú eða bara til þess

  að smella sér að sjá Justin Bieber í bíó.

  LÁGMARK!

  Óskapa vandræðagangur er þetta.

  Þeir sem fengu "Skandalíu", eins og Spaugstofumenn

  kalla skipið, til landsins, hljóta að hafa kynnt sér

  ölduhæð við suðurstrendur landsins....eða hvað?

  Hefði dugað að spyrja sjómenn.

  Margir sjómenn bæði úr Eyjum og víðar, er fiska

  á miðum sunnan lands, hefðu getað frætt

  "Skandalíumenn" þessa um öldurhæð, strauma og

  og sjávarföll við Landeyjasand.

  Ekki málið.

  Jamm, merkilegur fjandi þetta.

  Svo er verið að "bjarga" dýpkunarskipinu,

  sem á að tryggja greiðar ferðir Herjólfs milli lands og Eyja.

  Redda reddaranum.

  Jæja, en greiðlega gekk að draga dallinn á flot,

  svo vonandi dælir hann nú sandi úr höfninni sem aldrei fyrr...

  ...svona rétt á meðan að "ölduhæðin" er rétt fyrir hann.

  Þegar að "ranga" ölduhæðin mætir aftur á svæðið,

  er það þá bara landlega, öllari og "ölduhæðaspár"

  fyrir áhöfn "Skandalíu".

  Góðar stundir, góða færð og góðar samgöngur.

Skandia festist í sandinum

Syndaaflausn?

  Blessaður öðlingurinn hann

  Benidikt XVI er búin að gefa það

  út að gyðingar eigi ekki sök á dauða Jesú.

  Já, það var aldeilis.

  Og af hverju gefur sá heilagi sextándi það út núna?

  Hefur einhver verið að leita þeirra einstaklinga

  sem bera sök á dauða Jesú, nýverið?

  Er kærumál í uppsiglingu?

  Húsfreyja hefur lengi talið að allt í kringum dauða

  Jesú hafi verið vendilega fært til bókar, og ekki nein vandkvæði að

  sjá hverjir stýrðu málum, og hverjir stuðluðu að og

  sáu um krossfestingu hans.

  Húsfreyju rámar í að Kaífas æðsti prestur ásamt fleirum af hans

  prestum og öldungum, og sömuleiðis Heródus og Pontías Pílatus með sína

  rómversku hermenn, hafi allir eitthvað verið við málið riðnir.

  Jamm, og svo auðvitað hinn armi Júdas...svona í upphafi máls.

  Að þjóð sú er nefnast gyðingar í dag, beri þar einhverja sök

  hefur aldrei komist inn höfuð húsfreyju nema sem rugl og óráðsía.

  Enda Jesú og allir hans lærisveinar gyðingar sömuleiðis.

  Svo hvað er málið með andaktugar páfayfirlýsingar í dag?

  Hlýtur allt þetta krossfestingarmál Jesú löngu að vera FYRNT,

  og of seint að sækja nokkurn til saka fyrir það...allir með

  réttarstöðu grunaðara, steindauðir.

  Eða hvað?

  Ekki alltaf gott að henda reiður á hugleiðingum katólskra páfa.

  En húsfreyja hefur löngum haft áhuga á andlegum

  málum, enda trúuð kona á Guð og góða verndarengla, en lítt

  trúuð á trúarrit, trúarbrögð og trúarkreddur, enda slíkt

  allt frá mönnum komið.

  Hefur dundað sér síðustu vikur og mánuði að glugga í

  Kóraninn, og tarna er furðulega lesningin.

  Eru mikils trúandi á brennandi helvíti í því ritinu,

  og virðist Múhameð spámaður nánast taka helvítis-hugmyndir

  Gamla Testamentisins beint upp og gera þær að sinum og Allah,

  og gott betur.

  Einnig virðist Allah vera tvíburabróðir Guðs gyðinga í

  Gamla testamentinu...auga fyrir auga, tönn fyrir tönn osfr.

  Allah blessaður er einnig ansi herskár:

  "Spámaður, herja þú á hina vantrúuðu og hina hræsnifullu,

  og beittu þá hörku.  Víti skal vera þeim athvarf, og er það takmark allillt"

                                                                              9.Súra 73.

  Allah reynist einnig grimmur "refsari" við lestur þennan.

  Einn hinn harðasti dómari sem um getur, og boðar að

  hann beri að óttast sem og refsingar hans.

  Elskar boð og bönn til mannanna barna... og setur þeim

  óspart lög og reglur.....lögum sem jafnvel er ennþá

  fylgt í dag, hversu forn og ómannúðleg sem þau eru.

  Jamm, ekki mjög kærleiksrík trúarbrögð, nema ölmusufólki,

  munaðarlausum og sjúkum.

  Konur ekki merkilegur pappír í bók þessari, og eiga dætur til dæmis ekki

  sama rétt til arfs eftir foreldra sína, sem bræður þeirra...og þær eru EIGN

  eiginmanna sinna.

  Samt er í sífellu tönnlast á því að Allah sé alvitur og mildur,

  í gegnum allan Kóraninn.....jafnvel eftir hinar hroðalegustu lýsingar

  á fólki sem Allah refsar og sendir til Vítis í sjóðandi vatn, svo

  holdið bráðnar af beinum.

  Jamm, nokkuð merkileg lesning, Kóraninn, en niðurdrepandi á heildina litið.

  Svo húsfreyja smellti sér í meira upplyftandi efni af andlegum toga,

  eftir Kóraninn, og veitti ekki af.

    Ég segi yður:  Þannig verður fögnuður með englum

    Guðs yfir einum syndara, sen gjörir iðrun.

                                                 Lúkas 15:10

 

    Hjarta yðar skelfist ekki né hræðist.

                                                 Jóh. 14:27

 

    Bodhisattvinn elskar allar lifandi verur sem væru þær

    hans eigin afkvæmi.

                               (Vimalakirtinirdesha sutra 5) Búdda.

 

    Megi ótti og kvíði ekki sigrast á mér.

                                (Majjhima Nikaya 6.8)  Búdda.

 

  Strax skárri boðskapur, þegar stöðugur ótti og hræðsla er ekki

  málið í trúarbrögðunum, heldur kærleikurinn.

  En alltaf fróðlegt að skoða málum frá nýjum sjónarhóli.

  og þó Kóraninn fái ekki háa einkun sem trúarrit hjá húsfreyju,

  er hann áreiðanlega fínn fyrir árásargjarna karla þarna austur um

  sem vilja "eiga" margar konur, fíla að lifa í stöðugum ótta

  við reiði og refsingu Allah, eru lítt fyrir þjóðfélagsframfarir

  og hafa gaman af krjúpandi bænahaldi frá morgni til kvölds.

  Svo mörg voru þau orð.

  Góðar stundir og góða nótt.  Guð og góðir englar "ykkar" geymi ykkur.

Hreinsar gyðinga af dauða Jesú

Karlmenn hugsa EKKI UM NEITT annað...

   ...en kynlíf!

  Svo segir einn spakur bókarhöfundur,

  Simove að nafni í hinu víðfeðma veldi

  Betu bjútí bretanna.

  Og það eftir "margra ára rannsóknir".

  Fo´fanden!

  Fjandakornið!

  Þetta líst húsfreyju ekkert á.

  Hér treysta konur heilu kynslóðunum af körlum fyrir

  því að stjórna löndum, bönkum, fyrirtækjum, flugþotum,

  skipum og ekki síst bifreiðum ár eftir ár.

  Eru mikilvæg ábyrgðarstörf, og hvað farartæki varðar, oft

  hrein og klár spurning upp á líf og dauða, hvernig tekst til

  við stjórnunina.

  Svo eru allir þessir herramenn bara ekkert að pæla, hvað

  þeir eru að gera.

  NEIPP, segir hinn vísi Simove.

  KYNLÍF er heila  "heilamálið" karlmannanna.

  Og EKKERT annað!!

  Jaso.

  Anskotinn kvenmannslaus í útlegð á Suðurheimskautalandinu!

  Er Simove hér búin að uppgötva skýringuna á

  því, hví allt hefur farið til helvítis í fjármálaheiminum síðustu

  ár og aldir?

  Hví hér á móður Jörðu logar allt í styrjöldum, drápum og upplausn,

  og það á tímum sem karlar hafa að mestu haldið um valdataumana?

  Körlum þá skítsama um verk sín, skynsemi bak við verkin, útpældar

  uppgötvatnir, rökréttar ályktanir og mannúðlegar hugsjónir, jafnvel

  hvern þeir þurfa að drepa, bara ef næsta "dodo" er HUGSANLEGA í uppsiglingu,

  eða hægt er að velta sé upp úr blautlegum þankagangi um

  síðast "dodo" eða jafnvel mögulegt að hugsa eingöngu um ímyndað "dodo?

  Helvíti er að heyra þetta og sjá.

  Kannski þá ekki að furða, ef allt dúndrar niður í

  myrkustu iður helvítis hér á Jörðu reglulega.

  Helmingur mannkyns má bara "ekkert vera að því" að

  HUGSA um uppbyggingu, uppgötvanir, menntun, vísindi,

  stjórnun, barnauppeldi, mannúð, kærleik, stjórnun farartækja,

  skipulag, jafnrétti, listir, efnahag, náttúrufegurð, afkomu eða afþreyingu....

  ja, nema auðvitað að afþreyingin sé "kynlíf".

  Neipp.

  KYNLÍF er það eina sem þessi karlkyns-helmingur mannkyns pælir í

  og brýtur til mergjar, segir Simove.

  Jaso, húsfreyja er í öngum sínum.

  Pælir jafnvel í því að taka bílinn alfarið af bónda sínum,

  reynast staðhæfingar hins snjalla Simove réttar.

  Er þá húsfreyja mest rasandi á, að vesalings kynlífsþenkjandi ratarnir skuli ekki

  lenda í árekstrum daglega á leiðum sínum frá áfangastað A til B.

  Hér ættu þotur að falla af himnum ofan annan hvern dag,

  skip að stranda tvist og bast, fyrirtæki að fara á hausinn vikulega,

  mæður í haugum að ala börn sín upp einar í nútímaþjóðfélögum,

  ríkistjórnir allra landa að vera rústir einar, efnahagsmál

  þeirra skotin, brennd og urðuð....öö.. þetta er nú reyndar

  svínsleg staðreynd í flestum löndum Jarðar í dag.....æææ.

  Bjalla í bónda næst og bjóða honum "far" heim úr vinnunni.

  Það er þá ekkert bílastjórnunarkjaftæði að trufla hjá honum "þankaganginn"

  á meðan.

  Góðar stundir, og kæru herrar, munið að það er fleira til í jarðlífi

  en kynlíf, matur og fótbolti.

 

Það sem hver karlmaður hugsar um að kynlífi undanskildu

HERINN!

  Sá íslenski?

  Jaso.

  Það hlýtur þá að vera "ósýnilegi" herinn

  okkar hér uppi á litla Fróni,

  sem reykir allar "ósýnilegu" sígaretturnar

  sem Spaugstofan fjallaði um af snilld síðasta

  laugardagskvöld.

  Já, og nýtur svona myljandi góðs trausts í ofanálag.

  En kemur sosum ekki á óvart, að menn af erlendu bergi

  brotnir hinum megin Atlandsála telji hér vera her.

  Hér hafa verið búsettir mergjaðir "hryðjuverkamenn",

  samkvæmt vísum, breskum mönnum, árum saman,

  eða allt frá því að "Ísbjörg gamla" fékk banvænt slag,

  steindó og gekk aftur með voveiflegum hætti.

  Og þó að "vopn" okkar frónverskra teljist ekki beysin,

  mest bitlausir búrhnífar, skæri, ryðgaðir rjúpnabyssuhólkar og heykvíslar,

  þá eigum við altént megaflotta tunnuræfla og

  hrikalega flott barefli sem skapa skemmtilegan samhljóm

  við "undursamlegar" ræður þingmanna á Alþingi voru.

  Sprengjuhvellir, hvað?

  En gaman hefði húsfreyja að því,  að fá að líta eins og eitt

  "herkvaðningarbréf" augum fyrir ósýnilegan her þennan,

  svona bara til að vita hver eða hverjir komu honum á fót

  af okkar frónversku snillum.

  En auðvitað hafa öll slík bréf  verið "ósýnileg"....

  Hehehe, skondin frétt atarna, og grunar húsfreyju að

  eitthvað sé hún orðum aukin.

  Góðar stundir og góða helgi.

26% treysta íslenska hernum

Sýruhausar í and-Gaddafísku stuði?

  Allah sé lof og dýrð...fyrir Gaddafí.

  Hinn skarpvitri og friðelskandi

  "ekki-leiðtogi" Líbíu, Muammar Gaddafí

  er í öngum sínum.

  Þarna er þessi elskulegi maður, Gaddafí

  sem "formlega ber ekkert embætti" í hinu

  undursamlega veldi Líbíu, búin að puða  og púla

  við uppbyggjandi "byltingarstörf" FJÖRUTÍU-ÁRA-BYLTINGARINNAR (síðan 1969, hefur hún

  verið í gangi... ÓGNARLANGA BYLTINGIN væri gott nafn á hana)

  í þágu þjóðarinnar árum saman, og uppsker

  svo ekkert nema vanþakklæti og svívirðingar og grófar móðganir.

  Fékk ekki einu sinni embætti!

  Mótmælendur mættir að mótmæla "ekki-stjórn" Gaddafís.

  Ó vei!

  Og slík svívirða frá hans eigin löndum!

  Og til að auka enn á skömmina eru þessir "Gaddafímótmælandi "samlandar

  hans á "mergjuðu sýrutrippi" frá morgni

  til kvölds, og telja sjálfsagt

  himininn appelsínugulan, sjóinn rauðan og skýin lillableik.

  Gaddafí er sár.

  Mættur undir regnhlíf, (svo ekki rigni á hann lillableiku

  regni og appelsínugulur himininn hrynji

  ekki ofan á haus honum)  og hann

  ekki flúinn af landi brott, með hina

  helgu stjórnarskrá Líbíu á lofti og les mikinn.

  "Gaddafí-ósáttir sýruhausar réttdræpir, Allah sé lofaður".

  Eru hvort eð er á vegum djöfulsins, hinir "ofskynjandi" mótmælendur,

  og því öruggara að drepa þá alla sem fyrst, svo djöfullinn sjálfur

  með horn, hófa, hala og sinn hrikalega þrífork

  verði ekki næsti "óformlegi ekki-leiðtogi" Líbíu.

  Já og Allah forði Líbíu frá því að "sá í neðra" verði næsti

  "yfirmaður ógnarlöngu-byltingarinnar".

  Jamm, vesalings Gaddafi  er móðgaður.

  Líbanskir sýruhausar kunna ekki gott að meta, því er verr.

  Hinir Gaddafí-elskandi Líbanir munu slá skjaldborg um sinn

  heittelskaðan "ekki-leiðtoga"  og berjast blóðugum bardaga

  til síðasta manns!

  Og þá og aðeins þá mun Gaddafí fá frið til að halda áfram LANGDREGNUM

  byltingarstörfum sínum og  að sinna "ekki-embættisskyldum" fyrir land sitt og

  þjóð, eða deyja öðrum kosti.... í Líbíu!

  Jamm mikil er viska og réttlæti Gaddafís, Allah sé dýrð.

  Húsfreyja ætlar að redda kjúllanum úr ofninum.

  Góðar stundir.

Gaddafi fer hvergi

HÆKKUN!?

  Vegna "tímabundins álags og kreppu"

  urðu vinnuveitendur húsfreyju að

  "lækka" laun allra hjúkrunarfræðinga

  á öldrunarheimilinu, þar sem hún starfar.

  Sú LÆKKUN tók gildi frá og með 1. jan 2011.

  Og áfram er verið að ráðast á hjúkrunarfræðinga!

  Frá og með 1. apríl verða engir aðstoðardeildarstjórar

  við störf á stofnun þeirri er húsfreyja starfar á, búið

  að leggja "aðstoðardeildarstjórastöður" við stofnunina niður.

  Að vísu smá pikkles í gangi með einn aðstoðardeildarstjóra

  sem á rétt á biðlaunum, og hennar afsögn dregin til baka

  en sjálfsagt bara "tímabundið"!

  Og stofnun húsfreyju er sjálfsagt ekki eina

  öldrunarstofnunin, sem er í bullandi vandræðum með

  niðurskurð upp á tugi milljóna um þessar mundir.

  Alls staðar kreppir skóinn að, og allir starfsmenn heilbrigðisstofnana

  skilja vel að yfirmenn þeirra eru undir gríðarlegu álagi,

  því þeir eru undir sama massíva álaginu sjálfir.

  Launalækkun og launaskerðing þýðir fyrir húsfreyju enn meiri kreppu og aðhald

  í heimilishaldi, erfiðleika við að greiða skuldir á réttum tíma

  og "niðurskurð" í matarinnkaupum, fatakaupum, bensínkaupum,

  og allri almennri velferð.

  Húsfreyja ferðast ekki erlendis lengur, og eru nú 5 ár

  síðan hún brá sér í ferð til útlanda.

  Hún hefur einnig sniðgengið verslanir allar sem selja "óþarfa",

  og veit ekki lengur hvar slíkar verslanir er að finna,

  nema þær sem hægt er að ganga fram hjá í stórum

  verslunarhúsum, á leiðinni í Bónus eða Hagkaup.

  Þannig gæti hún ekki vísað nokkrum manni á skartgripaverslanir,

  bókaverslanir, leikfangaverslanir, tómstundaverslanir,

  verslanir með merkjafatnað, og gjafavörubúðir lengur.

  Átti sér á árum áður sínar uppáhaldsbúðir, þar sem

  hún gat leyft sér 1-3 á ári að gera vel við

  sjálfa sig, en mest þó við ástvini og vini, og gefa vandaðan

  "óþarfa", en slíkt er löngu liðin tíð.

  Blóm eru hennar gjafir í dag, og nógu eru þau dýr,

  afskorin og steindauð.

  Ef satt skal segja, hefur húsfreyja aldrei, segir og skrifar

  ALDREI, upplifað góðæri innan heilbrigðiskerfisins.

  Boðskapurinn þar í nærri 30 ár, hefur verið

  aðhald og niðurskurður.

  AÐHALD OG NIÐURSKURÐUR!

  Sínkt og heilagt sami söngurinn.

  Í upphafi þurfti veikt fólk ekki að greiða fyrir

  heilbrigðisþjónustu sína, nema fyrir stöku recept,

  nú á dögum "kostar", að verða veikur.

  Þrátt fyrir þetta, er heilbrigðiskerfið á hvínandi kúpunni,

  og greiðslur fyrir þjónustu veitta, greinilega ekki að skila

  sér nema í vasa örfárra einstaklinga.

  Ekki hafa þær birst í launaumslagi húsfreyju, það er á tæru.

  Þvert á móti hefur launaupphæðin rýrnað og rýrnað,

  en álagið og ábyrgðin aukist jafnt og þétt.

  Og hjá húsfreyju og hennar kollegum, er ekki búið að

  vera um neitt "tímabundið aukið" álag að ræða!

  Sei, sei nei.

  Hjúkrunarfræðingar hafa unnið undir stífustu djö.... "pressu"

  árum saman, undirmannaðar, launalágar en "ábyrgar"!

  Kjarabarátta?

  Jú jú, víst reyna hjúkrunarfræðingar að fá laun sín leiðrétt

  miðað við hrikalegt vinnuálag, niðurskurð, og aðhald.

  En erfitt um vik.

  Verkföll út, því alltaf verður að sinna "lágmarksþjónustu" við

  sjúka og aldraða...en það er því miður AKKÚRAT sú þjónusta

  sem hefur verið í boði á Íslandi árum saman í heilbrigðiskerfinu.

  Síðan er sett á "þjóðarsátt" á hjúkrunarfræðinga sem aðrar stéttir,

  og þær hafa mátt hlaupa hraðar, vinna meira og bera meiri

  ábyrgð fyrir lélegri og lærri laun en til dæmis margir skrifstofumenn.

  Það að hjúkrunarfræðingar eru með mannslíf í höndum

  sínum nánast daglega, og þjónusti "fólk" sem getur litla eða

  enga björg sér veitt vegna veikinda eða aldurs,

  virðist ekki hátt skrifað hjá ráðuneyti heilbrigðis.

  Jamm.

  En svo hækkar Kjararáð laun hæstaréttardómara og dómara

  um hundrað þúsund kall, bara sisona, vegna þess að

  þeir eru að sligast undan "álaginu"!

  Og það "tímabundna" álaginu"!

  Á tímum kreppu, aðhalds og niðurskurðar!

  Húsfreyja á eitt orð og eitt orð aðeins um þessi líka

  stórkostlegu vinnubrögð Kjararáðs!

  SVEI!

  Góðar stundir í sólríkri borg við sundin bláu.

Dómarar fá 101.000 kr. launahækkun

Tollverðir tóku stinningarlyf..

 .. í Arnarfellinu, stóð í frétt Vísis.

  "Og til hvers voru þeir að taka stinningarlyf

  þar um borð" hugsaði húsfreyja rasandi hissa.

  "Varla hefur Arnarfellið verið að koma með

  heilan skipsfarm af "tollvarðaelskandi" skvísum

  til landsins og þeim ætlað að þjónusta þær"?

  En neipp, húsfreyja hafði gjörsamlega misskilið

  fyrirsögnina.

  Tollararnir voru ekki að brúka stinningarlyfin

  sjálfum sér eða þurfandi meyjum á ferð

  með Arnarfellinu til ánægjuauka.

  Þeir voru að leggja hald á stinningardótaríið

  ásamt brenninvíni og öðru ólöglega innfluttu

  drasli.

  Jamm.

  Stinningarlyf njóta sífellt meiri vinsælda uppi á litla Fróni,

  og menn jafnvel farnir að smygla þeim til landsins og selja á svörtum.

  Illu heilli.

  Og það veit húsfreyja fyrir satt.

  Húsfreyja lenti eitt sinn á næturvakt á laugardegi á einum af sínum

  herlegu vinnustöðum úti á landi fyrir all mörgum árum.

  Komið var með ungan hálfþrítugan mann  upp úr miðnætti

  aðfararnótt sunnudags niður á slysadeild

  í mikilli sálarangist og hrikalegri vanlíðan.

  Sá hafði lent í miklu og fjörugu partýi á föstudagskvöldið áður,

  og skellt í sig af einskærri lífsgleði "nokkrum" pillum

  af Viagra með bjórnum og pizzunum.

  Þrátt fyrir að kærasta unga mannsins væri þrælhress og kát

  ung stúlka, og tilbúin að dunda sér við "dodo" lengi

  nætur og fram á miðjan laugardag, fékk piltur

  enga "lausn" á endalausri stinningu sinni.

  Honum reis og reis og reis.

  Og reis.

  Kærastan þegar hér var komið, búin á því og sagði PASS.

  Piltur reyndi þá  "sjálfshjálp" í gríð og erg,

  þangað til hann var kominn með strengi í báðar

  hendur og var orðin nánast farlama í handleggjum

  af áreynslunni.

  Ekkert gekk.

  Ástandið bara versnaði, og sá partýglaði kominn með

  sára verki í "vikvæmt líffærið" auk þess sem að hann

  var kominn með "brunasár"  af núningi á "besta vininn" og

  í lófana.

  Jamm.

  Illt var í efni og sálarkvöl unga mannsins jóks og jókst.

  Þá loks kom kærastan sínu ástkæra til húsfreyju á slysó,

  góður vinur hjúanna ók þeim.

  Með "besta vininn" vafinn inn í teppi.

  Neitaði að gefa upp nafn í fyrstu, ungi maðurinn, logarauður

  í andliti, stynjandi af sársauka og horfði stöðugt hægra megin við vinstra

  eyra húsfreyju.

  Minntist ekkert á að hafa tekið inn stinningartöflur

  við húsfreyju.

  VANDRÆÐALEGT?

  Aha, ó já!  Með upphafsstöfum!

  Húsfreyja bjallaði í lækni.

  "Risvandamál, hvað"?, læknir ekki alveg að grípa

  neyðarástand málsins.

  "Má þetta ekki bíða til morguns, hann verður áreiðanlega

  hressari þá", læknir að miskilja eðli vandans.

  "Nei, ekki vandamál að ná upp líffærinu, læknir góður,

  heldur að koma því "niður", húsfreyja reyndi að halda

  svip sínum hátíðlegum og grafalvarlegum.

  ÞÖGN í símann góða stund.

  Svo kom hálf taugaveiklaður hlátur:  "Og á ÉG að gera

  eitthvað í því"?, en læknirinn var karl, þriggja barna faðir, tæplega fimmtugur.

  "Ja, ekki býð ég mig fram, þó pilturinn sé hinn

  myndarlegasti" svaraði húsfreyja að bragði, "því kærastan

  yrði vægast sagt óhress með mig, gott ef hún biti ekki

  af mér höfuðið".

  Læknir dreif sig í föt, og mætti niður á slysó.

  Ungi maðurinn muldraði eitthvað um "Viagra" í hálfum

  hljóðum við lækninn, sem hafði lyft teppinu og horft

  í forundrun á "besta vininn", og klórað sér í höfðinu.

  "Hvað segirðu, Viagra", læknir hvass? 

  "Hve margar"?

   Piltur hvíslaði einhverju sem húsfreyja heyrði ekki.

  "Andskotinn", læknir bað húsfreyju að draga upp lyf

  í sprautu, og lét síðan nálina vaða beint í nárann á partýljóninu.

  "Besti vinurinn" féll hraðar en nýskotin gæs, dauð í miðju oddaflugi.

  Það voru lúpuleg og vandræðaleg hjú sem kvöddu lækni og

  og húsfreyju rétt fyrir eitt þessa nótt, eftir meðal langan

  fyrirlestur frá lækninum um skaðsemi þess að nota lyf,

  sem engin er þörf fyrir, "bara til að prófa"!

  Jamm, fólk veit ekki alltaf hverju það er að bjóða heim,

  með tilraunastarfsemi á líkama sínum, með sterum, dópi

  eða stinningarlyfjum.

  En bara svona til að gera lesendum ljóst hversu

  furðuleg staðan var, þá er þetta í eina skiptið á

  ævinni, í starfi sínu sem hjúkrunarfræðingur,

  sem húsfreyja varð að spyrja eftirfarandi spurninga:

  "Ertu búinn að reyna allt"?

  "Samfarir"?

  "Sjálfsfróun"?

  "Kalda sturtu"?

  "Hugsa um Egil Helgason í G-streng"?

  En húsfreyja sá skötuhjú þessi aldrei framar,

  hvorki á vinnustað sínum né utan hans.

  Hana grunar að þau hafi flutt til Tíbet eða

  Alaska stuttu seinna, þegar vinahópurinn sem

  fylgst hafði spenntur með gangi mála, var búinn að

  leka stinningarsögunni um allan bæ.

  En elda kartöflur og sjóða fisk næst.

  Góðar stundir.

Konunglegar kýr?

  Nú er lag!

  Þeir flugvísu félagsins Kulula í S-Afríku

  vilja senda Kötu kú, eða jafnvel slatta af kúm,

  ef ekki heila kúahjörð í tilefni

  af því að hún ætlar að ganga í hjónaband með

  Villa krónprins þeirra bresku.

  Jaso.

  Verður þá hennar hátign Beta bjútí að byggja eitt

  herlegt konunglegt fjós, við hlið Buckingham hallar,

  fyrir konunglegar beljur þessar, þá sonarsonur hennar hefur

  bundist hinni íðilfögru Kötu?

  Ráða til sín konunglegan kúahirðir, sem tæki að sér að reka

  kýrnar Kötu á beit til skiptis í Hyde Park og St. James Park og

  heim aftur?

  Kúadelluslóðin ilmandi af "lífrænum" fjóshaugum langar leiðir?

  Verður aldrei framar mjólkurlaust í höllu drottningar, eftir

  kýrlegt og konunglegt brúðkaup þetta?

  Ætíð spenvolg mjólk á borðum Betu?

  Og Kötu iðulega að finna við að strokka

  smjör í konunglegu eldhúsi sinnar blátignuðu tengdamóður?

  Ó, hvílík konungleg dýrð og alsæla með feitar og sællegar

  kýr úti á túni kóngafólks,  gæti þetta orðið

  um alla ókomna tíð í hinu mikla veldi breskra.

  Búsældarlegt að sjá feitar konunglegar kýr með breska

  fánann bundinn við halann, og með gylltar kórónur á

  hornum sínum sumarlangt á rölti um stræti Lundúnaborgar.

  Ferðamannabransinn þeirra bresku myndi brjálast!

  Suður-Afríkubúar einir myndu flykkjast þrisvar á ári í milljóna

  ferðamannatorfum að berja beljudýrðina augum.

  Þetta yrði sko "Hasar" með stóru H-i, og "konungleg kúamjólk"

  yrði söluhæsta vara allra minjagripaverslana árum saman.

  Jamm.

  Merkilegt að bretunum hafi aldrei dottið þetta í hug sjálfum,

  að endurvekja "stórbóndann" eða "bóndakonuna" í sjálfri Betu bjútí.

  En máske eru Suður-Afríkubúar að ráða bót á því núna.

  En góðar stundir og munið að mjólk er góð fyrir tennur og bein.

Vilja gefa Kate Middleton kúahjörð