Prag í lausu?

  Furðulegt!

  Húsfreyja glápti stórum augum

  á turnspírurnar sem virtust svífa

  í lausu lofti yfir kirkjum, ráðhúsum,

  söfnum og hverju merkishúsinu

  eftir öðru.

  Ekki gæfulegt að fá þetta í hausinn!

  Var mætt grútsyfjuð, vansvefta,

  utangátta og banhungruð í

  grárri Prag þeirra tékknesku.

  Þétt þoka var og lágskýjað, svo

  hæstu turnspírur annað hvort hurfu,

  eða virtust lafa í lausu lofti.

  "Greit", hugsaði húsfreyja, "nú á

  ég eftir að týna öllum samferðarfólkinu

  í þokuófétinu, villast upp í sporvagn

  á leiðinni upp í sveit, og lenda svo

  í flórmokstri á einhverjum sveitabænum,

  svona vinna fyrir fæði og húsnæði-vinnu".

  Hún krækti með hraði í handlegg bónda

  síns, og reyndi að stimpla eitthvað af

  kennileitum inn í vanvirkt heilabúið.

  En allt var grátt og litlaust í þokunni, og

  ekkert festist í minni húsfreyju nema

  einn kolsvartur turn, með stóru bogahliði

  sem bifreiðar óku um.

  Rauðhærði félagi bónda, sá eini sem

  hafði barið Prag augum áður, leiddi

  okkur 6 saman um verslunargötu að baki svartaturns

  og í eina herlega veislu á kínverskum

  veitingastað.

  Verulega, verulega góður matur.

  Heldur hressari, eftir næringuna var aðeins

  rölt um, og komið að stóru glæsilegu torgi,

  áður en þreytan bugaði liðið og haldið var

  aftur á hótel í rándýrum taxa.

  Daginn eftir ræs í sól og blíðu.

  Sporvagninn tekinn niður að svartaturni.

  Húsfreyja komin í gír, með kort í höndum

  og þeyttist í gegnum litskrúðugar og

  fallegar götur Prag með bónda, að Þjóðminjasafninu.

  Þar beið viskubrunnurinn hún Soffía leiðsögumaður,

  sem veit nánast allt um Prag og sögu Prag

  frá því um aldamótinn 1200 eftir Kristsburð.

  Soffía þrælaði yfir 60 ferðalöngum þvers og kruss

  um borgina, skírði svartaturn Púðurturn,

  glæsilega torgið Gamlabæjartorg og sagði

  frá vægast sagt furðulegum sið stjórnvalda í Prag,

  í gegnum aldir.

  En stjórnvöldum fannst einna best að henda "óvinsælu fólki" út um

  glugga á háum byggingum....sá síðasti látinn vaða

  niður á tímum gamla Sovíet.

  Þarf vart að taka fram að þeir "niðurköstuðu",

  þurftu ekki að kemba hærurnar.

  Gladdist húsfreyja ákaflega í hjarta sínu

  yfir því að hafa fengið aðvörun þessa

  strax á öðrum degi, svo hún gæti gætt þess

  að lenda ekki upp á kant við tékknesk stjórnvöld.

  Húsfreyja og bóndi voru nefnilega staðsett

  á "5. hæð" á hótelinu.........

  Og kóngar og yfirvöld þeirra tékknesku dudduðu sér

  sosum við ýmislegt annað, en að henda fólki

  út um glugga ef einhver ágreiningur kom upp.

  Sumir fengu "opinberar aftökur" með gálgum,

  hauskörfum, stjaksetningum hausa og alles á

  Gamlabæjartorgi, á meðan aðrir gerðu

  þau "ekkisens mistök" að smíða forláta flottar

  og merkilegar klukkur í ráðhústurninn, og var

  þar með vel launað með "augnaúrstungum".

  Gyðingar voru ýmist vel liðnir af yfirvöldum eða

  bjuggu í ghettóum í gegnum aldirnar,

  svona eins og tíðarandinn breyttist, en er nú hið

  fallegasta gyðingahverfi inn í miðri borg......og

  þar er hægt að brúka evrur til að versla kristal.

  Karlsbrúin við Moldá, ein af elstu brúm Evrópu,

  var að sjálfsögðu barin augum, Vorið í Prag '68

  rifjað upp og litið á andlitsgrímuna hans Jans Palach.

   En Palach þessi brenndi sig til bana fyrir framan

  Þjóðminjasafnið, til að mótmæla ægivaldi gamla

  Sovíet drápstólum og kúgun. 

  Jamm, mikil saga og mikið gengið á þarna í ríki

  Tékka hér í den.

  Eftir labbitúrinn, rölti húsfreyja með bónda sínum

  frá Karlsbrúnni að Gamlabæjartorgi, og upp í ráðhústurn.

  Þar ægifagurt útsýni, og húsfreyja myndaði í gríð og erg.

  En bóndi húsfreyju kiknaði í hnjánum við það að líta niður

  á torgið, á meðan japanskur öldungur með haug af

  myndavélum um hálsinn, skreið með veggjum turnsins,

  og leit í allar aðrar áttir en NIÐUR.

  Dýrðlingarnir hringsóluðu í forláta klukkunni er

  niður var komið og haninn gól, en Jan Huss var

  einbeittur á svip, þrátt fyrir að hafa misst haus

  og líf fyrir að mótmæla katólskum sið yfirvalda.

  Að kveldi var mikil árshátíð bónda og vinnufélaga

  á hótelinu, glundur í glösum, hlaðborð, sprell,

  spjall og gleði.

  Um hádegi næsta dag, aftur farið með

  sporvagni ( bévítans leigubílatékkinn svikull og

  prettinn, ekkert nema svínarí fjárhagslega

  að taka taxa, hittum aðeins á EINN heiðarlegan)

  niður að Púðurturni.

  Soffían mætt með rútu. 

  Nú ekið sem leið lá upp á kastalahæð.

  Þar rölt um í sól og 22 stiga hita um hverfið,

  forsetahöll, kirkjur, klaustur og garða.

  Vaslav aðaldýrðlingur þeirra tékknesku hvílir

  þar í gylltri kapellu, innan um Jesú- og Maríu Mey-líkön

  á meðan hryllilegir steinóvættir skreyta

  kirkjurnar að utan, og bægja þeim "raunverulegu"

  frá...nema auðvitað mannskepnunni.

  Meira tekið af myndum, þrátt fyrir fótafúa og hælsæri.

  Flottur Argentískur veitingastaður um kvöldið,

  þar sem "alvöru TANGÓ" var dansaður fyrir gesti.

  Fínt kvöld þrátt fyrir að hressileg hlátrasköll

  frónbúa þættu ívið hávær, og eitthvað rætt

  um "pólitzei" við nokkra þá glöðustu.

  Heyra vel þeir tékknesku, ef fólk er illa staðsett

  í húsi, því frammi í aðalsalnum var þrefalt meiri

  hávaði en inni í hliðarsal frónbúa.

  Húsfreyja glotti við tönn að sérvisku þessari.

  En maturinn var brilliant góður.....og dansinn

  bara "heitur"!

  Sunnudaginn var smotterí af dótaríi verslað

  handa foreldrum, börnum og afabarni bónda,

  snarlað á Fridays úti við skemmtilega götu,

  en síðan rölt niður að Moldu í sólskini og blíðu

  í góðum félagsskap.

  Heim klukkan tíu um kvöld og heim í Grafarvoginn

  hálf tvö eftir miðnættið.

  Prag er með fallegri borgum sem húsfreyja

  hefur skoðað, og mælir svo sannarlega með

  skreppitúrum þangað.

  Versla lítið samt, allt hrikalega dýrt, nema í mollum.

  Þar einna helst hægt að finna sambærileg

  verð miðað við heimalandið.

  Góðar stundir.

 

 

 

 

Athugasemdir

[Heiður Helgadóttir, 3.10.2008 kl. 09:25]

Hef því miður ekki komist til Prag er búin að vera á leiðinni þangað í fleiri ár

[Árný Sigurðardóttir, 3.10.2008 kl. 16:53]

velkomin heim.....hverna kemuru svo austur fyrir fjall?

[Sigríður Sigurðardóttir, 3.10.2008 kl. 18:33]

  Þakka ykkur mínar kæru.

  Komum austur, systir, með fyrstu leysingum...eða þegar bensínverð lækkar.

[Sigrún Óskars, 4.10.2008 kl. 19:24]

Prag er bara falleg borg, hún er mjög heil og skemmdist lítið í stríðinu hér forðum. Varstu nokkuð rænd? Hún er fræg fyrir góða vasaþjófa og í rauninni er mjög "smart" hvernig þjófarnir vinna - maður getur fylgst með þeim í margmenni. En það er ekki smart að verða fyrir þeim.

[Sigríður Sigurðardóttir, 4.10.2008 kl. 21:10]

  Sei,sei jú...ekki beint rán en svona óbeint.  Vorum tvisvar rukkuð um 300 kórónur fyrir reisu í taxa sem átti að kosta 99 kórónur...erkiþrjótar....!