Ölmususjóðir sagði...

...amma mín öskuill, þá hún sótti greiðslur

  í lífeyrissjóð sinn í fyrsta sinn.

  Enda kaus hún að starfa við

  gardínusaumaskap fram undir

  nírætt, fyrir verslunina V.B.K. og

  vel efnaðar frúr Reykjavíkurborgar.

  Á þeim tíma er amma heitinn mælti þessi

  orð, geisaði óðaverðbólga með

  gjaldeyrisskömmtun, takmörkunum

  á innflutningi á landbúnaðarvörum, himinháu bensínverði

  og almennu "fjárhagslegu harðlífi" á litla Fróni.

  Amma gamla var rasandi bálill út í ríkisstjórnina,

  þrátt fyrir að vera kolblár sjálfstæðismaður, en

  sjálfstæðisflokkurinn var oftast annar tveggja

  stjórnarflokka í stjórn.

  Botnaði amma aldrei neitt í botnlausri heimsku

  framsóknarflokks eða vinstri flokka, sem voru með

  völd með íhaldinu, og vorkenndi þeim "bláu"

  ægilega að þurfa að reyna að stjórna með

  þessum vitleysingum.

  Jós úr skálum reiði sinnar daglega yfir

  húsfreyju, sem þá var unglingur að

  "EmmErrast".

  Hafði unglingurinn takmarkaðan áhuga á

  stjórnmálum, bölsýni kerlu og bræði.

  Sá ekki að stjórnarskipti breyttu neinu

  með óðaverðbólgudrauginn, sú unga.

  Allt var í hönk fyrir því, og aðeins hægt

  að leyfa sér að fara í bíó tvisvar í mánuði eftir

  sem áður, þó stjórnarskipti yrðu reglulega.

  Yppti öxlum, sú unga og muldraði:

  "Sami grautur í sömu skál, amma"!

  Amman tapaði sér gjörsamlega yfir kæruleysi,

  forheimsku, argavitleysu og þrugli þeirrar ungu.

  Æðar tútnuðu út, tveir logarauðir blettir birtust

  á kinnum ömmu, og orðaflaumurinn streymdi

  á lágmark 160 metrum á sekúndu.

  Sú unga þar með orðin eitt voldugasta

   "glæpakvendi aldarinnar",

  sem hafði það í hendi sér að redda "óðaverðbólgu",

  lækka bensínverð, gera fólki kleift að ferðast með

 sómasamlegan gjaldeyri til útlanda, stöðva ofveiði

  þorsksins, bannfæra alla vinstri stjórnmálaflokka

  í útlegð á Suðurheimskautalandið, lækka verð á

  mjólk  og svörtum tvinna, kæfa eldgos í fæðingu

  víða um veröld, brauðfæða öll börnin í Bíafra,

  stöðva flóð með einni hugsun, og stjórna alfarið

  öllu veðurfari á litla Fróni....og gerði svo bara

  andsk...... ekki neitt af neinu tagi, að því að

  hún hreinlega nennti því ekki.

  Allar stundir síðan hefur húsfreyja reynt að

  grafa upp eitthvað af þessum "ógurlegu

  hæfileikum", sem amma gamla sá blunda í henni.

  Leitað logandi ljósum í öllum skúmaskotum

  heilabús síns...ekkert fundið nema þokkalega

  hæfileika í mannlegum samskiptum og hjúkrun.

  Þá leitað í koppum sínum og kirnum veraldlegum....

  ....nada...nichts....nothing.

  Jú, hefur stöku sinnum trú á að hún hafi

  náð þokkalegum samningum við "veðurguðina",

  og að "fjármálaenglarnir" brosi stöku sinnum

  til hennar af góðmennsku, og sendi henni

  einar 15 þúsund krónur í vinning hjá DAS.

  Annars  EKKERT!

  Svo nú hefur húsfreyja ákveðið skipta sér

  sem minnst að "verðbólgudraugnum" sem vaknað

  hefur upp af værum blundi, og er verulega

  fúll yfir að hafa ekki verið ræstur mun fyrr.

  Búinn að missa af "heimsendaaldamótunum" miklu

  árið 2000, tölvuvæðingunni, álverabrjálæðinu og

  virkjanaæðinu hér uppi á litla Fróni.

  Enginn furða að hann sé úldnari en kæstur hákarl

  á 10 ára ýlduafmæli sínu.

  Húsfreyja ætlar ekki að fá ægilegt kast, þó

  hún verði að versla kjötfass í kálböggla mun

  oftar en áður, eða þó hún verði takmarka

  heimsóknir austur fyrir fjall, þar sem ekki

  kemur til mála að veðsetja íbúðina fyrir einni

  bensínáfyllingu.

  Húsfreyja ætlar að þrauka og þreyja verðbólgu,

  spara og reyna að lifa af sem best hún getur

  ásamt sinni litlu fjölskyldu....hefur gert það áður.

  En aðeins eitt:  Í guðanna bænum kæra ríkisstjórn,

  látið lífeyrissparnað húsfreyju vera í friði erlendis,

  hann verður þá kannski einhvers virði, þá hún þarf

  hans eftir hartnær 20 ár.

  PLÍÍÍS!

 

 

 

Lífeyrissjóðir komi að lausn

Athugasemdir

[halkatla, 4.10.2008 kl. 13:31]

Til að bjarga þessu landi þarf að setja lögbann á sjálfstæðisflokkinn og banna fólki alfarið að nefna hann á jákvæðan hátt, það er í alvörunni eina leiðin - þannig að hlutirnir reddast aldrei, því miður

[Sigríður Sigurðardóttir, 4.10.2008 kl. 17:04]

  Ussss...hafðu lágt um þetta Anna, sú gamla gæti gengið aftur ef "þeim bláa" er í nokkru hallmælt!  Nei, í alvöru þá held ég að amma sé alsæl í "Sumarlandinu", loksins laus við argaþras út af pólitík.  En mikið vildi ég prófa að senda íhaldið í gott "4 ára frí" frá ríkisstjórn, og athuga hvort ekki réttist eitthvað hagur sauðsvarts almúgans á meðan.  Og hvort hlutirnir færu ekki að "reddast".

[Sigrún Óskars, 4.10.2008 kl. 19:17]

Ég segi líka - plís látið lífeyrissparnaðinn vera. 

[Sigríður Sigurðardóttir, 4.10.2008 kl. 21:12]

  Já nú liggur á, að leggjast á bæn, Sigrún mín, og BJARGA lífeyrissparnaðinum okkar.