Guðseindin eina og sanna.

  Jaso!  Hér leita vísindamenn

  einhvers sem þeir hafa aldrei

  fundið, séð né vísindalega sannað

  að sé til....er svona meira ofboðslega

  rökréttur grunur þeirra, að þessi

  eind sé til.

  Því án þessarar eindar er ekki hægt

  að útskýra stærðfræðilega hvers vegna

  allt efni hefur massa.

  Og massa hefur EFNIÐ um það efast

  varla nokkur vísindamaður.

  Óneitanlega minnir guðseindarleit þessi,

  húsfreyju á leit vísindamanna að sönnunum

  fyrir "tilvist Guðs".

  Eða er máske einhver vísindamaðurinn búinn að

  finna rökréttar skýringar á "kviknun lífs"?

  Búinn að finna sönnun fyrir uppruna lífsneistans?

  Þessum sem gefur okkur tilfinningar, hugsun, forvitni,

  vitræna greind og aðgreinir okkur frá öðrum lífverum jarðar?

  Og veit sá skarpvitri vísindamaður

  þar að leiðandi "hvað verður um" þessa

  lifsneista-orku sem býr í öllum mönnum, þá

  lífi er lokið hér á jörð?

  Því vísindin segja að líf manna hér á jörð

  sé eitt orkuferli...sífelld inntaka orku, bruni

  á orku og framleiðsla á orku fer fram í

  líkömum manna.

  Og orka "eyðist aldrei" segja þeir þungt

  þenkjandi vísindasinnuðu.

  Svo hvað verður um "lífsorkuna" þá

  maður deyr?

  Ekki gufar hún bara upp sisona?

  Því orka eyðist ekki!

  Eitthvað umbreytist hún í, þó hún ekki

  finnist, sjáist né vísindalega sé hægt að

  sanna tilvist hennar?

  Eða hvað?

  Nei, bara svona smá "lauflétt" pæling

  á miðvikudegi hjá húsfreyju.

  Því hún hefur sjálf aldrei efast um tilvist lifs

  eftir dauðann hér á jörð.

  Og veit í sínum innsta "lífskjarna" að hún

  mun flytja héðan með sína "orku" og

  ummyndast í svifléttan, heilbrigðan

  einstakling í "Sumarlandinu", þar sem

  verður haldið mikið partý henni til

  heiðurs af látnum ættingjum hennar.

  Nú það bara "verður" að bjóða húsfreyju VELKOMNA

  eftir hafa lifað af ein aldamót og slatta af kreppum,

  að hafa verið uppáhalds hryðjuverkamaður Mister Brown,

  að hafa þolað hartnær 20 ár með íhaldið í ríkisstjórn.....

  og ekki síst það að hafa þraukað með Dabba

  sem seðlabankastjóra.

  Í Sumarlandinu er ætíð veðurblíða, sól og 23 stiga hiti,

  söngur, dans, lærdómur að villd, gleði og vellíðan.

  Enginn er veikur, enginn þarf að borða, engir peningar,

  ekkert íhald, engir vinstri menn, engir seðlabankastjórar

  og best af öllu:  Við fyrrum Jarðarbúagamlingjarnir erum

  yngdir upp.  ALLIR 25 ára!

  Jamm, en þetta er nú "guðseindin" í húsfreyju

  búin að hvísla að henni, svona í bland með viskuleit

  á ýmsum vígstöðum, um framhaldslífið.

  Og svei, ef húsfreyju líst bara ekki ljómandi vel á

  Sumarlandið.

  Hlakkar til að komast í gleðina þangað, þá

  "jarðarskelin"  hennar er hrörnuð og úrelt orðin.

  Og lífsorka hennar þarf nýtt og betra heimili.

  Góðar "guðseindastundir"!

 

Hverjir verða fyrstir til að finna „guðseindina“?

Óvissuferðir hjá SAS?.... og andvökur.

  Ætli þetta sé nýjasta nýtt

  hjá SAS....skella ferðalöngum

  í óforvendis "óvissuferð", í

  heldur lengra og "dýrara" ferðalag

  en til stóð í upphafi...og rukka svo

  bara mismuninn á áfangastað?

  Nú og máske er þetta liður í sparnaði hjá SAS,

  að ráða til vinnu fólk sem aldrei veit

  hvert það er að fara.....hinir sem vita það

  hljóta þá að hafa verið að fá "extra bónusa" fyrir "viskuna"

  hjá því félaginu.

  Nú eða þá að þetta sé sjúkdómur,

  eða jafnvel faraldur sem orsakar svona

  óvissu og minnisleysi hjá fólki í ábyrgðarstöðu.

  Og hér hélt húsfreyja, að það væri

  bara "ástsæll seðlabankastjóri" vor,

  sem ekki vissi hvort hann væri að

  "koma eða fara", væri uppsegjanlegur

  eða ekki óuppsegjanlegur,

  hvort hann væri í pólitík eða ekki í pólitík,

  hvort hann væri vinsæll eða óvinsæll!

  Svo er þetta ef til vill bara að "ganga" víða lönd,

  og máski bráðsmitandi líka.

  JEMINN!

  -----   ----   ------ ---- ----- ---

  En þetta var nú meinleg grínútrás hjá húsfreyju,

  enda húsfreyja í meinlegum gír í dag.

  En hún vonar svo sannarlega að flugstjóri þessi hafi ekki verið

  alvarlega veikur hjá SAS.  Margir slæmir sjúkdómar sem geta

  orsakað brátt ruglástand hjá fólki, eins og blóðtappar

  og heilablæðingar, og er ekki gerandi grín að slíku.

  --- --- --- ---- --- ---

  Móðir húsfreyju á nú í vök að sækja á

  sínum heimavelli, forstofuherbergi sínu

  austan fjalls. 

  Þar hvílir hún lúin bein næturlangt með

  Svöluna sér við hlið.

  Stundum bætast Sigginn og Vigrinn við

  og svo tíkin hrjótandi undir rúmi.

  Reynir þá múttan að finna sér næturstað

  í öðrum auðum rúmum þá fer að þrengja að.

  Hefur nú bæst heldur við "svefnbúskapinn"

  hjá múttu, því kattarræfill, svartur og hvítur er Álfur

  nefnist, er farinn að hringa sig til fóta múttu.

  Sér húsfreyja í hendi sér, að vilji mútta hennar

  halda sínu forstofusvefnherbergi, verði hún að

  færa múttu sinni forláta "hengirúm" með digrum

  kaðalstiga upp á 2 metra.

  Negla hengirúmið upp undir loft í forstofuherberginu,

  og festa kaðalstigann við.

  Þar í "efri hæðum" geti svo múttan unað sér glöð,

  ánægð og "steinsofandi" í friði og ró allar nætur....

  en aðeins EF hún rúllar kaðalstiganum upp á

  eftir sér, þá hún er "uppstiginn"!

  Gleymi hún því er næsta víst að múttan hrökkvi

  upp við illan draum, með Svöluna, Siggann, Vigrann

  og köttinn í einu vöðli sér við hlið í hengirúminu,

  og tíkina ofan á kvið sér.....um miðja nótt.

  Og þá er úti um svefn múttunnar þá nóttina...

  og verður hún að láta sér nægja að dudda sér við krossgátur

  og bloggskrif...ef hún þá kemst niður úr

  "loftbælinu"!

  Húsfreyja á annars ágætis tjald...getur lánað

  múttu sinni það...má altént tjalda því úti á bletti

  í VOR!

  Góðar stundir og ljúfan nætursvefn í nótt.

 

 

Flugstjóri vissi ekki hvert hann var að fara

Lestrarhestur og hálfviti.

  Mikill lestrarhestur, átta ára djásnið,

  en aldrei hefur húsfreyju

  dottið í hug að senda hana

  upp á þak að lesa.

  Þar svona hálfnöturlegt,

  blautt og skuggsýnt þá kvöldar,

  og næsta víst að húsfreyja hálsbryti

  sig reyndi hún að ná mynd af djásninu

  í "þaklesningum"!

  Bara slysagildra og tryggingamál að

  hafa "óvenjulegasta staðsetningin" lestrarkeppni.

  Nóg af slysum að hafa innanhúss,

  þó foreldrar fari ekki að senda börn sín að

  lesa uppi á strompum, lesa hangandi úti

  á þvottasnúrum eða utan í ókleifum klettum.

  Síðast í gær skellti átta ára djásnið enni sínu

  af alefli í eldhúsvegginn, og hlaut af blæðandi sár.

  Orgaði í klukkutíma, og það þrátt fyrir að

  húsfreyja "límdi saman" sárið sjálf, og djásnið

  losnaði þar með við læknastúss og saumaskap á slysó.

  Er ekki sú sterkasta á svellinu, þegar kemur

  að blæðandi sárum, djásnið.

  Jafnaði sig samt og fór með húsfreyju

  austur fyrir fjall í dag, að leika við frændsystkin sín.

  Og auðvitað skellti hún nokkrum góðum, "djúpum"

  spurningum á húsfreyju á heimleiðinni, ásamt

  ýmsum öðrum pælingum.

  "Mamma, til hvers er allt í heiminum til"?

  "Ha, mamma?  Til hvers er þetta líf"?

  "Og mamma, veit einhver NÚNA, hver skapaði

  GUÐ?  Er einhver búinn að rannsaka það"?

  (PLÍS...EINHVER sem veit svörin við þessum,

  hafa samband við húsfreyju sem fyrst!)

  "Mamma, HÁLFVITI er skrýtið orð".

  "Huhm já...hvað meinarðu"?...múttan enn

  með heilafrumur allar í "suðumarki" að reyna að

  finna svör við fyrri spurningum.

  "Jú, þetta er svona eins og verið sé að tala

  um "hálfan" vita....svona eins og lýsir skipum.

  "Jamm...en ég held að það sé verið að meina

  fólk sem veit ekki marga hluti, eða skilur og

  hafi þá kannski bara "hálft vit", svaraði múttan.

  "Eins og við" , svaraði átta ára djásnið snarlega,

  "því við vitum ekki allt og vitum alls ekki HVER skapaði GUÐ"!

  "Já, ætlum við séum þá bara ekki ljótu háfvitarnir"

  svaraði húsfreyja og glotti með sjálfri sér.

  En svo kom Latabæjarmúsíkin á CD-spilaranum húsfreyju

  til bjargar, og átta ára djásnið söng hástöfum með,

  á meðan "ljóti hálfvitinn" móðir hennar, ók bílnum,

  og reyndi að leysa lífsgátuna....og í örvæntingu að

  finna einhverja skynsamlega lausn á því HVER

  skapaði eiginlega GUÐ!

  EINHVER?!

  En þegar húsfreyja hélt að hún væri sloppin

  fyrir horn, og fleiri yrðu spurningar ekki,

  kom:  "Mamma, skapaði GUÐ okkur ekki líka

  til að "leika okkur" hér á jörðinni"?

  Húsfreyja taldi það nú heldur líklegt.

  Yrðum líka að læra að "leika okkur" í þessu lífi,

  ásamt því að syrgja, reiðast, starfa, gleðjast,

  gráta, hjálpa náunganum og rækta mannleg

  samskipti af kærleik.

  Átta ára djásnið var bísna ánægð með þau

  svör húsfreyju...og hún virtist sætta sig fullkomnlega

  við það að mútta hennar sé bara "hálfviti"

  sem veit ekki hver skapaði Guð!

  Góðar stundir og njótið helgarinnar.

 

 

 

Biskup með synina á strompnum

Davíð listamaður?

  Ekki spurning!

  Var "listagóður" borgarstjóri,

  sem reisti perlur og ráðhús

  í braggarblúsarstíl, fyrir

  skattaurana borgarbúanna.

  Var sannur listamaður  í því að

  skála Bermudaskálum, og sérstaklega

  snjall að læða "bláu höndinni" inn í

  flest verkefni, og gera þau pólitískt

  fagurblá, þá hann gerðist forsetisráðherra.

  Verst hve "einhæfur" hann er í litavali sem

  "listamaður"....eingöngu blár.

  Þykir húsfreyju sem þó er hrifin af bláum lit,

  nóg um "bláma" Dabba, og vill gjarnan

  að hann snúi sér að fleiri litum.

  Til dæmis "grænum", sem væri vel við

  hæfi í núverandi stafi hans...enda grænn

  oft sagður litur peninganna..."colour of money".

  En máske Dabbi hafi bara aldrei sleppt

  "bláu hendinni" flokksins, og geti því ekki

  einbeitt sér í "grænu umhverfi peninganna"?

  Jamm, en hann er altént orðin "listamaður"

  á heimsmælikvarða samkvæmt frétt þessari....

  blár eða ekki blár!

Davíð Oddsson á vafasömum lista

Dabbavandræðagangurinn...og Snæfinnur.

  Sögukorn úr vinnu húsfreyju.

  Sú gamla er 95 ára, ern í hugsun

  fylgist vel með málum líðandi stundar

  og reynir iðulega að spjalla við

  borðfélaga sína í matsalnum þrátt fyrir

  versnandi heyrn.

  Sú gamla:  "Já, hér er ég búin að sitja ein

  tvö til þrjú ár, á móti manni í borðsalnum,

  sem veit ekki hvort hann er "að bíða" eftir matnum,

  "að borða" hann, eða "búinn að snæða" hann"!

  "Spyr í þaula HVAR hann sé staddur í máltíðinni,

  en þegar þjóðmálin ber á góma, veit hann sjaldan

  hvað verið er að ræða um, nema ÞETTA EITT", segir

  sú gamla og hlær við.

  "Og hvað er það" spyr húsfreyja forvitin.

  "Jú, hann spyr, "hvað í ósköpunum eigum við að

  gera við hann Davíð"???, hér hlær gamla dátt og

  segir svo, "og þá hlæ ég"!

  Þegar öldungar óklárir á nóttu og degi, hvort

  matur hafi verið snæddur eður ei, þekkja til

  Dabbavandræðagangsins í Seðlabankanum,

  má gera ráð fyrir að málið liggi nokkuð ÞUNGT

  á þjóðinni, telur húsfreyja!

  HVAÐ Í ÓSKÖPUNUM EIGUM VIÐ AÐ GERA VIÐ

  HANN DAVÍÐ??

  EINHVER?

  Var í nógu að snúast í vinnu húsfreyju í dag.

  En hafði deildarstjóra með sér, svo vel vannst.

  Náði svo í átta ára djásnið í skólann.

  Snæfinnur "Hall" hinn hallandi snjókarl var

  alveg lagstur á hliðina á sólpallinn er heim kom.

  Sú átta ára pældi í því hvort að það væri af því,

  að Snæfinnur væri svona DAPUR, og lægi þarna grátandi!

  Er viðkvæm sál, átta ára djásnið og má ekkert aumt sjá!

  En eftir að hafa gert snögga athugun á málinu,

  komst hún að þeirri niðurstöðu, að ekki væri karl

  lagstur í tár af depurð, heldur væri hann nýbúinn

  að "skera niður lauk"!

  Snaraði sér þá í að gefa kettinum harðfisk, og

  Snæfinnur "Hall" hinn laukskerandi snjókarl gleymdist.

  Komin í leik við vinkonu.

  Húsfreyja ætlar að skella sér í olíubað og

  skola af sér vinnulúann.

  Góðar stundir.

 

 

Skrafhreifir menn og...

  ..skemmtilegir, forseti vor og

  seðlabankastjóri, hér uppi á

  litla Fróni.

  Verst hve erlendir sparifjárseigendur,

  bæði í Bretaveldi og hinu mikla ríki þýskra

  taka spjall þeirra og skraf nærri sér.

  Verður allt vitlaust í bönkum tengdum litla Fróni,

  hjá enskum og þýskum, og reikningsskila krafist að

  fullu af frónverskum bönkum.

  "Úps og æ æ", kveða Dabbi og Óli í kór.

  "Við meintum þetta ekkert svona"

  "Allt tekið á versta veg og algjörlega úr samhengi"!

  Jamm, Frónbúar, við verðum bara að fara að láta "alheim" VITA

  af "pólitískri ellílífeyristöðu" fyrrum útbrunna ráðherra í

  Seðlabankakanum, og "puntudúkkustöðunni"

  á Bessastöðum fyrir fólk með erfiðar pólitískar

  skoðanir.

  Gengur ekki að allir séu að taka þetta "grínlið"

  alvarlega út í heimi...sei sei nei.

  Svo er bara allt steikt og steypt í múr hjá

  okkar "nýju" bönkum, og aumingja Jóhanna

  sett á "biðlista" með BJÖRGUN heimilanna-plottið!

  Steingrímur Joð. verður "kjaftstopp", svo sleginn er hann

  yfir málgleði fyrrum pólitíkusa...

  og það sýnir þjóðinni hversu hrikalegt

  málið er.

  Vill nú húsfreyja að háttvirt Alþingi vort gangi

  í það með HRAÐI, að stofna góðan "spilaklúbb"

  fyrir Óla og Dabba... Bridge eða Vist...nú eða

  jafnvel saumaklúbb ef þeim leiðist spilamennska,

  þar sem þeir VERÐA að mæta vikulega.

  Setja upp eina litla "videokameru", ljósalampa

  og taka upp fyrir þá "snilldarskraf" þeirra og

  spjall um frónversk efnahags- og bankamál.

  Hafa svo "hlátur í dós" fyrir Dabba, af og til,

  "klapp í dós" fyrir Óla af og til.

  Afhenda svo köppunum sín hvora spóluna

  svo þeir geti "horft á sjálfa sig aftur og aftur"

  og dáðst að orðfimi og kjafthátt.

  Verst verður sjálfsagt að fá "sjálfboðaliða"

  til að spila við félagana reglulega, en húsfreyju

  dettur samt að þeir "Spaugstofumenn", væru

  til í að skipta þessu á milli sín.

  Fengu nægt efni í Spaugstofuna næstu 30

  árin......

  Jæja, þetta var nú bara svona lauflétt grín

  á fallegum þriðjudegi.

  Þeir verða víst að fá að láta ljós sín skína,

  þessir háu herrar...en mættu gera meira af

  því að læra "sanskrit" og tjá sig frekar á því

  tungumálinu í fjölmiðlum.

  Sækja 8 ára djásnið næst í skólann.

  Góðar stundir.

 

Viðtalið tekið úr samhengi

Á ferð og flugi.

  Húsfreyja sér ekki betur

  en fljúgandi furðuhluturinn

  "blaki vængjum"!

  En fuglar af stærri gerðinni,

  eru máske orðnir sjaldgæfir og

  "furðulegir" í Washington.

  Nú og kannski eru fljúgandi

  "grænar geimverur", farnar að

  dulbúa "flugdiska sína" með

  fiðruðum vængjum, svo minna

  beri á þessum flugförum þeirra.

  Hvað veit maður?

  Það er svo margt skrýtið og skondið

  í henni Ameríku.

  Og svo er alltaf til í dæminu að

  húsfreyja sé orðin svo vel vernduð af

  "englum", að hún sjái "vængi" á

  öðru hverju farartæki er hún gjóar

  á augum, uppi í vetrarbláum himninum.

  Ekki slæmt það.

  Þarf góða vernd í kreppu og fjármálaharðlífi.

  Er bara notalegt að sjá flugvélar, þyrlur...

  nú og fljúgandi furðuhluti blaka fiðruðum vængjum.

  Góðar stundir.

Fljúgandi furðuhlutur flaug yfir setningarathöfn Barack Obama

Á tvennum vígstöðum barist..

  ...á norðurlöndum í dag,

  segir Vísir.is.

  Mótmælendur mættir við

  Seðlabankann á litla Fróni

  að berjast við Davíð.

  Nú fær sá ástsæli seðlabankastjóri

  "stöðvunarskyldu" við innganginn, og

  fær eigi barið skrifstofu sína augum,

  fái mómælendur að ráða.

  En Dabbi kemur alltaf aftur...og aftur,

  virðist eins skæður hér á litla Fróni og

  "salmonellusýkingin" sem frændur vorir

  í Danaveldi eru að berjast við.

  Þeir núna barist við uppsölur og skitu af

  völdum þessarar óþverrabakteríu í

  hartnær ár, og sér enn ekki fyrir endann á.

  Frekar en vor þjóð sér fyrir endann á

  setu Dabba í seðlabankastjórn.

  Jamm, það er ýmislegt að hrjá okkur

  norðurlandafrændur og "uppsagnarbréf

  og sýklalyf" virðast alveg hætt að

  skila tilætluðum árangri í löndum okkar.

  Svo hvað er til ráða?

  Hvernig losna menn við hrokagikki, óáran og óværu

  á tímum kreppu, skitu og fjármálahruns?

  Jamm, húsfreyju er svaravant, og ætlar því

  að bregða sér inn í rúm með málgagnið,og

  lesa nokkrar línur áður en hún svífur inn í

  draumalandið. 

  Máske að "himnaseðlabankastjórinn"

  sendi henni einhverjar lausnir í draumalandinu.....

  hjálpi henni að finna upp "anti-seðlabankastjóra-biotica"

  fyrir litla Frón, og "salmonellueyðandi-bréfplástra" sem

  má skella á húð!

  Aldrei að vita.

  Góðar stundir.

 

 

Konur eiga að vera forsetar landa..

  ...og forsetisráðherrar, sagði

  góðkunni gamanleikarinn og

  uppistandarinn Robin Williams

  eitt sinn fyrir fullum sal af fólki

  í Metropolitian Operahouse í

  New York.

  Konur væru ekki undir ægivaldi

  testósterónsins líkt og karlar eru stöðugt,

  sagði Williams, sem þýddi að karlar gætu

  aðeins hugsað um eitt mál eða einn hlut

  í einu. 

  Sæju aldrei heildarmyndina á einu eða

  neinu, og væru í ofanálag árásagjarnir

  pirraðir og með eilífan þorsta í völd í sínu

  bullandi testósterónflæði.

  Konur hins vegar væru hið mjúka skynsama

  kyn, sem þyrftu ekki að díla við svona

  "hormónaeitrun", nema í nokkra daga

   á 28 daga fresti.

  Og það kemur ekki að sök, sagði Williams,

  því það versta sem kona getur "upphugsað"

  þá hún er í hormónaflæði, er að láta öðrum,

  "líða svolítið illa, eins og henni sjálfri"...í smá tíma.

  Konur myndu "aldrei" sprengja upp heilu

  borgirnar með kjarnorku eða eiturefnasprengjum

  líkt og karlar gera, sagði Williams.

  Né heldur senda ungt fólk í stríð að drepa

  mann og annan, sei, sei nei!

  Hjá konum við völd yrðu málin leyst með

  viðræðum, hjálpsemi, og með vernd "barna"

  heimsins í huga, sagði Williams.

  "Að vísu yrðu viðræðurnar mjög "intense"

  á 28 daga fresti" sagði sá góði Williams

  og glotti, "en það er í lagi því eftir 5-7

  daga er "hormónaspennunni" lokið.

  Og engin þarf að heyja stríð eða deyja í stríði,

  þá konur eru við völd!

  "That's why there should be a woman PRERSIDENT

  in America...don't you see"? lauk Williams

  þessu máli sínu.

  Vonandi gengu nýrri ríkisstjórn undir

  stjórn Jóhönnu vel að hreinsa svolítið til

  fyrir kosningarnar.

  Íhaldið er sótrautt af vonsku yfir því að

  hafa þurft að sæta ábyrgð líkt og

  fyrrum kollegar þeirra í Framsókn.

  Skammast heilaþvegnir aðdáendur íhaldsins

  og kalla núverandi stjórn "kommúnista".

  Ekki finnst húsfreyju þetta uppbyggileg og

  góð gagnrýni, enda enginn kommúnistaflokkur

  verið í framboði á litla Fróni frá því að hún fór

  að mæta á kjörstað að kjósa.

  En máske mætti þá bara skella "nasistanafninu"

  á íhaldið ef íhaldsmenn halda kommúnistkjaftæðinu áfram.

  Nei, bara svona grín!

  Góðar stundir.

 

 

Öld testósterónsins lokið

Jeminn! Nú er það svart!

  Húsfreyja fékk bækling frá

  hinni ágætu Bente og hinum

  ljúfa Abel Struksnes í Odnes í hinu mikla

  veldi Noregskonungs á dögunum.

  Þetta ágæta "frændfólk" húsfreyju

  í Noregi hefur miklar áhyggjur af

  líkamlegu atgervi húsfreyju en þó

  meira af hennar sálarheill.

  Hefur húsfreyja þó aldrei fregnað

  neitt frá ágætu fólki þessu áður.

  Veit eigi hverra manna þau eru,

  né hví þau sáu aumur á húsfreyju og

  sendi henni pistil þennan.

  Samkvæmt þessum ágæta bæklingi

  þeirra hjóna eða systkina nema hvortveggja sé,

  er "heimsendir" í nánd....í töluvert fjarlægri,

  "óártalsettri" framtíð...svolítið í það a.m.k,

  en eigi að síður í NÁND!

  Og Biblían, eða annar ritháttur bæklings þessa:

  "Bibblían" segir frá 3 englum sem boða okkur

  mannkyni ófagra framtíð, segja hin norsku hjú.

  Og lengi getur vont versnað í pistli þeirra vitru

  norsku spáhjúa:

  Katólska kirkjan er "skækja" segja þau fullum fetum!

  Og ber fram fyrir söfnuð sinn "saurlifnaðarvín"!

  BJAKK!

  Katólskir og mótmælendur báðir, misskilja

  alveg "skírnina", og eru í ofanálag að

  skíra "smábörn...þegar allir heilvita "rétttrúaðir"

  vita að "biblíuleg skírn" er í raun "greftrun í vatni"!!!

  Húsfreyja hefur lengi vel haldið að "grafist menn í

  vatni" DRUKKNI þeir, en viðurkennir fúslega að hún

  hefur ekki eldheita "rétttrú" Struksnes-ista.

  Og allar kirkjur er vilja vera í "samstarfi" við

  "skækjuna" hina katólsku, telja hin heilögu

  norsku hjú vera "dætur hórkvenna"!

  Ekki útskýra hinir skörpu norsarar HVERNIG

  "hórkonur" geta af sér kirkjur, sem hefði þó verið fróðlegt,

  ...né heldur segja frá hverjir "feður" þeirra eru.

  Telur samt húsfreyja, að þetta muni vera

  "mjög stórvaxið" fólk/kirkjuforeldrar, svona miðað við að

  kirkjur eru yfirleitt reisulegar og "háar" byggingar.

  En nú kemur húsfreyja að því sem hún telur að

  sé aðalástæða þess, að hinir ágætu "vinir" hennar

  í ríki norska kóngsins sendu henni bækling þennan.

  Þeir hafa að sjálfsögðu séð til húsfreyju á leið til

  messu einhvern tímann, á "kolröngum" hvíldardegi.

  Ja sei, og svei og þvílík ekkisens mæða.

  Slíkt athæfi segja hin góðu norsku hjú sé komið

  beint frá "Anti-Kristi sjálfum" eða "DÝRINU"!

  Þó húsfreyja þekki hvorki hin norsku Struksnes,

  "Dýrið" né heldur nokkurn "Anti-Krist", hljómar þetta

  hálfógnvænlega í eyrum húsfreyju.

  Sér í lagi þar sem "Dýr" þetta mun merkja allt

  "Sunnudagshvíldardagsfólk" með sínu frímerki....

  (á ennið, heldur húsfreyja),

  og sjá til þess að Sunnudagspakkið lendi

  í "eyðingu í eldsdýkið" (eða "eldsdíkið", annar ritháttur

  bæklings).

  "Laugardagshvíldardagsfólkið" mun að sjálfsögðu

  fá "frímerki" frá sjálfu almættinu og búa með

  Jesú Guðssyni í 909 Himnaríki, Elífðinni.

  Jaso, húsfreyja er í djúpum ......!

  Eða hvað!

  Vill hafa sinn hvíldardag á Sunnudegi áfram,

  og kærir sig ekkert um að láta "grafa sig í vatni".

  Þekkir engann af "vondu körlunum" í bæklingi

  hinna ljúfu norsku hjúa, því síður hefur hún nokkra

  hugmynd um hvar "Eyðingarstöðina Dýkið/Díkið"

  er að finna, og telur það jafnvel geta verið "sér-norskt

  fyrirbæri", svona í svipuðum dúr og Sorpa okkar

  Frónbúanna.....hmmmmmm!

  Og Dýrið og Anti-Kristur máski bara "óvinsæl", morðóð

  nágrannahjón þeirra Struksneshjúa??

  Ætlar húsfreyja því að skrásetja "varnaðarbréf"

  til allra sinna afkomanda um ókomna tíð,

  og mæla eindregið á móti því við þá, 

 að þeir flytji til Noregs, þar sem kolvitlausir

  Anti-Kristar og "dýr" fá að vaða uppi og "eyða"

  fólki og sálum með "Sunnudagsfrímerki" á enninu.

  Einnig að afkomendur hennar hafi ÆTÍÐ

  gott "límeyðandi" efni við hendina, svo auðvelt

  sé að losa  fúl "frímerki" af ennum og skella einu

  af íslensku Holtasóleynni þar í staðinn!

  Er þá húsfreyja og hennar fólk allt í góðum

  málum, þá að "heimsenda" kemur, og getur

  altént spókað sig um í hinu "Frónverska Sumarlandi",

  908 Alheimi Almættisins, á meðan hinir eru hjá Jesú

  í Himnaríki .

  Er þá kannski bara spurning um jafngóð "heimilsföng" eftir allt saman,

  samanber:  "Í húsi Drottins eru margar vistarverur",

   og svo "nágrannaerjur" í gangi hjá Struksneshjúum

  á fyrrum veiðlendum Noregskonungs.

  Og þá mega hinir norsku vinir húsfreyju eiga "eldsdýki, dýr og

  Anti-Krista".

  Þeirra höfuðverkur, ekki húsfreyju.

  Góðar stundir...fram að næsta heimsenda  !