Heyrðu félagi löggi...

  ..alveg varð'etta stórfurðulegt!

  Við bara að "ganga" heim pissufull,

  þegar helvískur bíllinn tók upp á því

  að ELTA okkur... alveg upp á sínar eigin spýtur.

  -HIKK-

  Bara eins og andsk...hundur.

  Við skipuðum honum að snúa við,

  eða í það minnsta að snáfa sér heim!

  -HIKK-

  En hann lét bara alveg eins og asni,

  -HIKK-

  rásaði eins og hauslaus hani

  þvers og kruss um veginn,

  -HIKK-

  og anaði svo bara "bílfíflið", beina leið oní

  fjandans skurðinn!

  Og helv...djöfull, það er ég viss um

  að tryggingarnar harðneita að borga tjónið.

  -HIKK-

  Má ekki annars bjóða þér einn sjúss, vinur?

  -HIKK-

  Nei!  Þú um það!  Ykkar skál...glogg..glogg...glogg!

  Þið skutlið okkur svo kannski heim, félagarnir...

  soldið langt að labba í þessum skítakulda.

  -HIKK-

  Iss, látiði þið bara bílhræið liggja þar sem hann

  er, á'ann ekki, fékk hann að láni hjá Gauja bróður!

  -HIKK-

  Hehehe, bara varð, húsfreyja.

  En gott að stútar þessir ollu ekki sjálfum sér

  og öðrum skaða á fyllerísflandri þessu.

  Góðar stundir.

 

Enginn gekkst við akstrinum

Hæfileiki eða nauðsyn?

  Húsfreyja hefur löngum heyrt

  frá vísindamönnum,

  að konur eigi auðvelt með að

  gjöra marga hluti í einu.

  Svona skipta athyglini niður

  í "hólf", og framkvæma marga hluti í einu,

  á meðan karlar geta aðeins einbeitt sér

  að einum hlut í einu.

  Á flestum  tímabilum í lífi konu, er þetta

  mjög handhægur og góður hæfileiki.....

  og bráðnauðsynlegur!

  Gott að getað skeint, skúrað, eldað,

  reddað Visa-reikningnum í gegnum síma

  um leið og þú hengir þvottinn á þvottagrindina.

  En það er svona "tabú" að beita þessum

  hæfileika undir stýri á bíl, þá ungabörn eru

  annars vegar, þar sem það er andstætt öllu umferðalögum.

  Það breytir ekki því, að konur nota þennan

  hæfileika sinn hvar sem er í þjóðfélaginu,

  við hvaða aðstæður sem er.

  Húsfreyja deilir út lyfjum á deild sinni, skiptir

  á sárum, aðstoðar veika við að matast, svarar

  símtölum um leið og hún planar dagplanið

  fyrir næsta dag í huganum, næstum hvern

  einasta dag....allt á sömu 30-50 mínútunum.

  Missir aldrei taktinn, hver á að fá sín lyf næst,

  hvort hann/hún þarf þau mulin í mauki, með

  AB-mjólk, með Sorbítólmixtúru, með astmapúst

  eða augndropa, þó margt annað þurfi að starfa

  með lyfjagjöfinni.

  Tekur þessum hæfileika sem sjálfsögðum hlut.

  "Bráðagírinn" er svo eitthvað sem hver og

  ein kona verður að þjálfa upp hjá sjálfri sér.

  En hann þarf að nota þegar takast á við óvæntar

  uppákomur, eins og iðulega koma fyrir í

  starfi húsfreyju!

  Þá er bráðnauðsynlegt að "einbeita" sér

  aðeins að þeirri uppákomunni, og finna lausn

  á henni og setja ALLT ANNAÐ til hliðar.

  Sumar konur virðast hafa mjög "latan og hægengan"

  bráðagír, og fara nánast í lost við óvæntar uppákomur.

  En flestar hafa þær er húsfreyja þekkir, þjálfað

  upp ágætis "viðbrögð" við álagi og óvæntum uppákomum,

  og málin leysast vel og farsællega.

  En það er þetta að "bakka aftur" í venjulega

  "marghólfa" gírinn, þá bráðastandið er liðið,

  sem stundum er snúið.

  Adrenalínflæðið hefur brennt upp mikla orku,

  og konan er eins og undin tuska á eftir.

  Þarf mikið kaffi, og slatta af kolvetnum og sykri

  til að koma aftur hugarstarfsemi í rétt horf.

  Smá spjall við kollegana um uppákomuna

  hjálpar líka.

  Hefur húsfreyja minnst á það að kaffið

  er drukkið í "tonnavís" á frónverskum

  heilbrigðisstofnunum?

  En elsku ungbarnamæður "stöðvið" bílinn

  í vegkanti, ef þarf að gefa krílinu brjóst...

  en er alveg hægt að spjalla í símann á meðan,

  ákveða afmælisgjöfina handa pápa, plotta

  kvöldmatarkaupin og renna  varalitnum eina

  umferð á meðan!

  Húsfreyja talar af reynslu!

  Góðar stundir!

 

 

Ók bíl, gaf barni brjóst og talaði í síma á meðan

Tjíváva.

  Hallelúja!

  Húsfreyja hefur nú farið,

  með stuttu millibili

  á tvær bíómyndir þar sem

  hundar leika aðalhlutverkin.

  Nú voru það Sjefferhundur og

  Tjívávatík.....jamm í alvöru.

  Og allir kunna leikarar þessir

  að ræða málin saman á "mennskri"

  tungu, leysa erfiðustu þrautir, glæpamál

  og hvað ekki...en vesalings St. Bernhardshundurinn

  var látinn leika trúð!

  Og þar að auki í örsmáu hlutverki.

  Svei, ef húsfreyja saknar ekki Lassie

  hinnar "vofftyngdu", sem var ógnvaldur

  allra glæpona á 100 kílómetra radíusi

  frá heimabæ sínum.

  Sem stökk í það að bjarga börnum jafnt sem fullorðnum

  í lífsháska, milli þess sem hún urraði

  og "gelti" að bófunum.

  Í dag er það lítil hvít Tjíváva sem heitir

  "CHLOÉ" í bleikum kjól og skóm í stíl,

  notar Chanel No 5 og er með hálsband

  úr "ekta" gimsteinum....og "spjallar"

  á prýðisgóðri íslensku.

  Húsfreyja er eitthvað "veruleikafirrt" í

  hausnum eftir svona kvikmyndir og veit ekki

  hvort myndin var skemmtileg, óbærileg, spennandi

  eða grátleg....og kannski þetta allt saman!

  En skvísurnar 3, Báran, Svalan og Elínóran skemmtu

  sér konunglega, svo húsfreyja er sátt, þar sem

  það er jú aðal málið.

  En NÆST verður það EKKI hundabíómynd, sem

  húsfreyja býður skvísunum á...se, sei nei!

  En svo hefur húsfreyja verið að glugga í

  nýlegar og gamlar bækur í eigu sinni.

  Fann eina með ýmsum skemmtilegum

  tilvitnunum.

        Sá sem hikar er stundum

        sá sem bjargast.

 

        Ellin er það óvæntasta sem getur komið

        fyrir nokkra manneskju.

 

        Ég hata konur vegna þess að þær vita

        alltaf hvar hlutirnir eru.

 

 

        Konur eru skynsamari en karlar vegna þess

        að þær vita minna en þeir en skilja meira.

                                            James Thurber (1894-1961)

 

 

 

 

 

Dásemd!

  Bókaormurinn í húsfreyju

  tók flikk flakk með þrefaldri

  skrúfu af gleði, þá hún barði

  fregn þessa augum, nýrisin

  úr rekkju.

  Man húsfreyja þá tíma, að reyna átti

  að stilla hana inn á "venjulegan"

  svefntíma þá hún var ung að aldri.

  Voru ljósin í barnaherberginu slökkt,

  og fylgst grannt með að ekki læddist

  húsfreyja í að kveikja aftur.

  Tróð hún sér þá 7-12 ára skotta,  út

  í glugga og las í björtu tunglsljósinu.....

  Enid Blyton...Astrid Lindgren....allt sem

  hún komst í eftir þá höfunda lesið.

  Aðeins seinna "Gulleyjuna", "Moby Dick" og

  "Fleming og Kvikk".

   Haraldur bókavörður  á safninu í Eyjum

  var farinn að hjálpa lestrarhesti þessum,

  við að finna "ólesnar" barnabækur, þá hann hafði tíma.

  Mátti taka 4-10 bækur í einu að láni í safninu, eftir foreldraboði,

  svo heimalærdómurinn yrði ekki útundan í

  öllum skemmtilestrinum.

  Tók ALLTAF 10 bækur að láni!

  Var alæta á barnabókmenntir, ekkert hægt að

  merkja þær fyrir henni "eingöngu fyrir stráka",

  eða eingöngu fyrir stelpur.

  Hafði Haraldur gaman að, að yfirheyra skottu

  smávegis um innihald bókanna, því svo hratt

  las hún, að hún náði iðulega að klára 10 bækur á

  innan við viku.....enda lesið við tunglsljós.

  Hélt hann að hún hefði "svindlað", og sleppt því

  að lesa eins og 3-4 bækur.

  En alltaf hafði hún svör á reiðum höndum, og ALLAR

  hafði hún lesið.

  Síðan kom vorið, og ferðir skottunnar urðu strjálli

  á bókasafnið, og að lokum sást hún ekki lengur innan

  um virðulegar bókahillurnar á bókasafni Vestmannaeyja.

  Var horfin á vit eigin sumarævintýra á eyjunni fögru, í útileiki,

  fjör og söng.

  En þá haustaði aftur og tók að dimma,

  mætti aftur smávaxin, logarauðhærð

  skotta í dyrnar á bókasafninu hjá Haraldri, brosti

  feimnislega, og spurði eftir nýjum barnabókum!

  Og Haraldur bókavörður leit yfir gleraugun sín, glotti

  vinalega og sagði að jú kannski að hann hefði fengið eins og

  3 nýjar barnabækur yfir sumarið.

  Og hló svo upphátt sá góði bókavörður, þá hann sá

  vonbrigði skottunnar....BARA þrjár!

  En oft lumaði sá góði Haraldur á gömlum

  góðum barnabókum, sem skottan hafði ekki

  enn náð að lesa...og svo mátti nú bara lesa

  AFTUR skemmtilegustu bækurnar....og AFTUR!

  Það er næsta víst að húsfreyja mun EKKI

  láta bókamarkað Perlunnar fram hjá sér fara.

  Er reyndar með mikið leiktríó á sínum snærum

  þessa helgina.  Svalan mætt og Elínóra besta

  vinkona líka.

  Bíóferð í spilunum...enn ein hundamyndin....DÆS!

  Verst ef húsfreyja fer algjörlega "í hundana", áður en henni

  tekst að næla sér góðri bók ú Perlunni.

  Gera "bíóliðskönnun" næst.

  Góðar stundir.

Þúsundir bóka í Perlunni

Ömmur og afar sem breytast....

  ...í dreka í myrkum skógi,

  er bara ávísun á ræs fyrir

  klukkan 9 á frídegi húsfreyju.

  Átta ára djásnið er í vetrarfríi,

  og síðan vatt "skrímsla- og nornadagurinn"

  í gær, sig eitthvað inn í drauma hennar.

  Hafði þó Svöluna með sér í martröð

  þessari, en þekkti enga ömmuna eða

  afann.

  Baunaeldamennska húsfreyju lukkaðist

  prýðilega vel, þrátt fyrir að hún stressaði

  sig lítið sem ekki neitt yfir pottunum.

  Hefur aldrei skilið hrifningu þessa yfir

  "mauksoðnum baunum", sjálf...enda nægja

  henni 3-4 matskeiðar af graut þessum,

  og þarf þá ekki meira af honum fram á næsta sprengidag.

  Saltkjötið, rófurnar og kartöflurnar er svo allt annar handleggur,

  enda bara um lostæti að ræða.  NAMM!

  En bóndi hennar hringdi af og til áhyggjufullur,

  og athugaði hvernig "baununum" liði.

  "Eins og óhreinum bleium í bleyti" var ekki

  vinsælt svar, né heldur "krauma lukkulegar með alls

  konar gumsi".

  En þegar bóndi var búinn að setja húsfreyju í

  þriðju gráðu yfirheyrslu um "gumsið"...laukur,

  2 saltkjötsbitar og ein skrælluð kartafla

  var undirstaðan í því, var eins og honum létti

  að miklum mun.

  Heilsufar og líðan húsfreyju var hins vegar

  ekki rætt!

  Jamm, og "baunamaukið" er uppétið, svo

  líklega er húsfreyja bara efnilegur "baunakokkur".

  Stinga upp á því við bónda að hún sjóði "grænt baunamuk"

  næsta Sprengidag, að ári.

  Gerir áreiðanlega stormandi lukku.

  Nú svo á Öskudagur eina "18 veðurfarslega bræður"

  samkvæmt þjóðtrúnni, svo húsfreyja sér fram

  á myljandi flottar fjöruferðir með 8 ára djásninu

  næstu 18 daga.

  Fórum eina í gær í himneskri blíðu og náttúrufegurð.

  Fyrir norðan mun geysa stórhríð, eftir því sem húsfreyja sá

  í fréttum í gær...í 18 daga!

  Það er eins og frændur hennar fyrir norðan sögðu oft:

  "Norðurlandið er á mörkum hins byggilega heims.....og

  svo fer það stundum langt yfir mörkin á veturna...

  ....til hins verra".

  En þá var nú útidyrahurðin á húsum þeirra orðin

  smá "þakgluggi" upp undir rjáfri, og svo fóru þeir á

  sunnudögum með familíuna í nestisferð í "skrúðgarðinn"

  og tylltu sér á "ljósastaurana" sem maraði í, undir snjónum

  og snæddu nestið.

  En málgagnið og martraðarlaus blundur næst.

  Góðar stundir.

 

Nornin svaf vært...

  ...en "beinagrindin ægilega"

  var mætt..........

  Með svarta bauga, og

  snaggaralega derhúfu á höfði,

  og spurði eftir norninni.

  "Er að reyna að vekja hana

  í skólann" svaraði húsfreyja

  hálfskelkuð...þetta var ægilegt,

  fölt og skuggalegt beinagrindarandlit

 sem við blasti sjónum hennar í

  myrkri vetrarmorguns.

  Nornin rumskaði loks, klæddi sig

  upp með hraði, snæddi morgunverð,

  vildi glimmer, vildi ekki glimmer, fann

  ekki útifötin sín og gleymdi bæði nesti

  og lestrarbók.

  En svarti nornahatturinn með rauðu

  rósinni gleymdist ekki.

  Loks tókst húsfreyju að koma bæði

  norn og beinagrind af stað í skólann,

  settist og ætlaði í málgögnin.

  Fann þá lestrarbókina og svo nestið,

  er nú á leið í skólann með hvoru tveggja.

  Góðar stundir!

 

 

Öskudagur tekinn snemma

Útvarp Matthildur!

  Í sjónvarpinu!

  Með sama leikara, og allt!

  "Hjálpi mér", hugsaði húsfreyja.

  "Lengi getur vont versnað".

  Og aðalleikarinn búinn að vera að

  "vara Haarderinn við" hruni bankakerfisins

  meira og minna síðan 2006...eða 7....eða 8.

  En í maí síðastliðinn sagði samt blessaður

  foringi vor í Seðlabankastólnum,

  FRAMMI FYRIR ALÞJÓÐ

  "að bankarnir stæðu STERKIR og að

  fjármálalífið væri í meginatriðum TRAUST".

  Jaso!

  Voru "fjármálahrunsaðvarirnar" þá eingöngu

  ætlaðar Haarderanum og bláa liðinu, svo það gæti

  reddað "aurunum" sínum úr landi, og skellt

  þeim inn á leynireikninga í skattaparadísum?

  Því varaði ekki ástsæll seðlabankastjóri vor

  "þjóð sína" við bankahruninu?

  Eða er Haarderinn og hans flokkur "þjóðin",

  í huga seðlabankastjóra?

  Og hví sat Haarderinn á aðvörunum þessum

  eins og ormur á gulli?

  Hví brást ekki andsk... maðurinn við þeim?

  Hann var jú "forsetisráðherra" vor.

  Sé aðalleikari "Útvarps Matthildar" að

  segja satt og rétt frá, er þetta áfellisdómur

  yfir Geir Haarde og ríkisstjórn hans.

  Og enn frekari árétting er þetta viðtal

  við seðlbankastjóra, (sem sagði síðast

  í maí 2008 að "bankarnir stæðu STERKIR")

  um að hann hefði aldrei átt að yfirgefa

  "leikarastéttina"....væri kominn með

  Grímuna, Golden Globe og Óskarinn í

  hendurnar í dag.

  Góðar stundir.

 

Davíð í Kastljósviðtali

Hefði skilið þetta....

  ...húsfreyja, hefði hann nælt sér

  í saltkjöt og baunir.

  En húsfreyja er sérlegur

  baunakokkur í dag, hér á

  sínu heimili.

  Fékk miklar leiðbeiningar

  í gærkveldi frá bónda sínum, sem

  er svo sérlegur áhugamaður

  um saltkjöts- og baunaát.

  Enda verslaði hann bæði kjöt og baunir,

  til að tryggja gæði hráefnis....en svo

  er það bara þetta, að ÞURFA að treysta

  húsfreyju fyrir baununum.

  Jamm, mikil og þung er ábyrgð húsfreyju,

  enda farin í rúmið með málgagnið í sínu

  vaktafríi. Reddar baunamálinu eftir blund

  og hádegissnarl.

  Góðan Sprengidag.

Brotist inn í Melabúðina

Hrikalegt! Rosalegt!

  Að klikka svona á öllum

  sköpuðum hlutum, húsfreyja.

  Auðvitað hefði hún átt að giftast

  honum "Spægó", fressinum í næsta húsi

  þá hún var 2 ára, og í ljós

  kom að "frekjuskarðið" á milli framtanna

  hennar rúmaði heila tönn....þótti heldur

  ólánlegt á að líta, svo ekki sé minnst á

  "ógurlega skapsmunina" sem fylgdu

  "tanngjá" þessari.

  Í dag er þá hún og hennar herlega stórfjölskylda

  "Nóbelsverðlaunahafar í veseni" allt út af

  svona mergjuðu "giftingarklikkelsi" í bernsku!

  Eldgos í bakgarðinum hjá húsfreyju ´73 var fyrsta

  vísbendingin um að eitthvað hefði klikkað

  illilega í "giftingarbransa" húsfreyju í

  frumbernsku.

  Prestur sem kveinaði eins og kvalinn köttur

  þá hann tónaði í fermingu hennar, hefði

  líka átt að hringja öllum aðvörunarbjöllum.

  Stutt andlát með "frávísun" úr "himnaríki sjálfu"

  eftir "hvellsprunginn" botnlanga, á unglingsárum hefði einnig

  átt að skjóta 50 logarauðum neyðarblysum á loft í heilabúi

  húsfreyju.

  Og góðærissukkari af Guðs náð (og af Dabba náð) uppi á Litla Fróni

  og terroristi numero UNO í Stóra Bretlandi síðustu

  mánuði, hefði svo sannarlega átta að sprengja "atombombu"-

  ljós í hugarskotum hennar.

  En sei, sei,nei!

  Húsfreyja búin að vaða í villu og svíma, ÓGIFT,

  VESENISTI í stórum stíl árum saman og stendur bara á

  (illu) öndinni yfir yfir öllu þessu árans, óláns

  VESENI sem hún alltaf virðist klúðra sér í.

  Hún sem hefði getað lifað rólegu og huggulegu

  lífi í Eyjunum....harðgift honum Spægó! 

  Raulað Eyjalögin, duddað við kartöflurækt,

  skroppið í bjargsig í Heimakletti á

  hverjum föstudegi, verslað sér dress hjá

  Jóa í Drífanda, náð sér mjólk og brauð á

  Þingvöllum og fengið sér kandís í Brynjólfsbúð.

  Og hún hefði náð sér í efnilegan útgerðarmann

  úr Eyjunum, þá Spægó ræfillinn gerði hana að ekkju

  og lifað hamingjusöm til æviloka.

  Jamm, mikið hrikalega skal húsfreyja alltaf "klikka

  rosalega" á svona sára einföldum málum,

  eins og að giftast einhverju heimilisdýrinu í

  bernsku.

  Ætli það sé nokkuð hægt að redda málunum

  úr þessu??

  Hmmmm... hann Siggi Freyr frændi húsfreyju

  var að fá lítinn "fresskettling".....ætli hann sé

  nokkuð lofaður......!?

 

Giftist hundi vegna ólánstannar

Eitrað grín?

  Eða gengur "eiturbyrlari"

  laus á litla Fróni?

  Er Johnsen kominn í mikinn

  grín og glens ham eða er

  þetta dauðans alvara?

  Er komin upp ný atvinnugrein á

  litla Fróni hér mitt í kreppunni?

  Jeminn!

  Eiturbyrlari!

  Geta þá Frónbúar nú bjallað í eiturbyrlara,

  þá þeim rennur í skap, og vilja koma við

  "kaunin" á andstæðingum sínum eða

  svörnustu óvinum?

  Eitra hressilega fyrir dónana, og koma á

  þá sárum og bólgnum fingrum og tám,

  og heilsa svo með "föstu handartaki" og

  troða svona "óvart" á tám þeim í leiðinni?

  Dettur þá húsfreyju í hug að ekki sé

  gott fyrir "eiturbyrlara" að auglýsa upp

  starf sitt, þar sem að starf þetta myndi

  sjálfsagt teljast til "miður heppilegra" starfsgreina,

  teljast jafnvel til leigumorðingja og brennuvarga.

  Telur samt húsfreyja að nú verði laganna verðir

  að fara að lesa vendilega smáauglýsingar DV,

  því svona ímyndar hún sér að "eiturbyrlari"

  gæti auglýst starf sitt:

    Tek að mér að skipta út fæðubótarefnum

    og setja í staðinn "ása" og "hálfbræður",

    hjá öllum ykkar Döbbum, Geirum, Ingibjörgum

    og Johnsenum fyrir tilboðsverð: Hálf bankastjóralaun.

    Nafnleynd, algerum trúnaði, bankaleynd og

    grafarþögn heitið.

    Hringið í síma 666-.......

  Hehehe...stóðst ekki mátið svona á föstudegi, húsfreyja.

  Smá skot á kreppuliðið.

  En gott að Johnsen fékk bót meina sinna og að

  þarmainnhellingin hennar Jónínu svínvirkaði.

  Þykir húsfreyju fremur líklegt, að um skætt

  ofnæmi hafi verið að ræða hjá Johnsen

  og er það bara nógu bölvanlegt út af fyrir sig.

  Fólk hefur lent á sjúkrahúsi fyrir minna.

  Góðar stundir og góða helgi.

DV: Eitrað fyrir Árna Johnsen