Jólaljós á aðventu...eða stórbruni.

  Húsfreyja var mætt niður

  á Austurvöll með 8 ára djásnið

  og Rakel bestu vinkonu.

  Kona mælti á norska tungu og

  kona "mælti" á táknmáli við hlið hennar.

  Sú norska var með hland fyrir hjartanu

  yfir kreppuörlögum sinna frónversku frænda,

  og óskaði að við næðum okkur fljótt á strik aftur.

  Falleg ósk það, þó norskir frændur vorir hafi

  ákveðið að bíða með lán til litla Fróns, þar til

  "Ísbjargarklafinn" væri kyrfilega festur á frónverksa þjóð,

  og Alþjóða Gjaldeyrissjóðurinn hefði lokið sinni blóðtöku.

  Jamm!

  Íslensk kona, Hanna Birna, titluð borgarstjóri rabbaði

  næst um ljósið og vonina.

  Verið í embætti borgarstjóra "óvenju lengi", sú góða kona,

  mun lengur en síðustu fyrirrennarar hennar sem dúlluðu

  sér við að stjórna borginni nokkra mánuði í senn.

  En ljómandi góð ræða hjá "þaulsætnum" borgarstjóra,

  stutt og "vongóð"!

  Jólatréð var glæsilegt.

  Húsfreyja reyndi að koma djásninu og Rakel í sjónmál,

  svo þær sæju þegar tréð tendraðist upp.

  Var töluvert mál, því feður í kringum 190 til tveir metrar

  á hæð, tróðu sér stöðugt fram fyrir 8 ára skvísurnar...

  og með börn á aldrinum 1-5 ára á herðunum.

  Húsfreyja náði þeim loks á svæði þar sem þær náðu að

  berja hálfan metra af toppi trésins augum....talið niður...

  BINGÓ og það varð ljós!

  "Noh"!

  "Bara eins og í sköpunarsögunni", húsfreyja glotti

  góðlátlega að hugsun sinni.

  Myndir teknar af djásni og Rakel undir trénu,

  við hliðina á þremur "sænskusyngjandi" túristum,

  sem þurftu að fá 25 myndir af sér undir trénu.

  Húsfreyja tók tvær.

  Þá vildu 8 ára skvísur heim hið snarasta.

  Enda töluvert kalt fyrir grannvaxnar 8 ára dömur í

  blautum snjógöllum.

  Húsfreyja reyndi að freista þeirra með upplestri

  Gerðar Kristnýjar, jólasveinum og bangsanum úr

  Dýrunum úr Hálsaskógi.

  Neipp!

  Svo húsfreyja hélt heim á leið, með dynjandi söng

  jólasveina í eyrunum.

  Á árum áður bjó húsfreyja á Heimaey,

  "næst-stærstu" eyjunni í Vestmannaeyjaklasanum....

  litla Frón að sjálfsögðu sú stærsta samkvæmt

  hógværum og lítillátum Eyjamönnum.

  Heldur var minna umstang í kringum jólatré

  á Stakkó, kirkjuna og víðar í Eyjum þá, en var í dag niðri á

  Austurvelli.

  Gott ef Eyjamenn voru yfir höfuð nokkuð látnir vita,

  þegar tendra skyldi ljós á bæjarjólatrjám.

  Allt í einu voru bara sprottin upp upplýst jólatré

  hist og her um bæinn.

  HALLELÚJA!

  Bara sisona.

  Lítið gert úr málinu, þótt trén væru falleg í svartasta skammdeginum.

  Húsfreyja man ekki eftir einni jólatrésræðu hjá

  Magga bæjó.

  Ekki einni.

  Mun meira spennandi og meira að gera hjá krökkum að fá að skreyta

  aðventukransinn á heimilunum, og systkini börðust

  jafnvel um að fá að kveikja á fyrsta kertinu.

  Þá voru "rauðar" lafandi slaufur og hangandi upp

  eftir grannri spýtu í tísku á aðventukrönsum.

  Húsfreyja lítil skotta þá, náði að kveikja í a.m.k.

  tveimur aðventukrönsum, og systur hennar

  náðu að brenna einn til kaldra kola.

  Móðir húsfreyju stillti sínum aðventukrönsum

  ætíð upp í "mest 70 cm fjarlægð" frá svalahurðinni

  í borðstofunni, og faðir húsfreyju var orðinn

  æði snjall í að sveifla "logandi" kransakyndli

  á innan við sekúndu út um dyrnar.

  Jamm, aðventukransar voru sko hasar.

  Faðir húsfreyju bauð móðurinni ein jólin

  að brenna bara helvískar "slaufurnar" STRAX,

  úti á svölum, áður en þær færu á kransinn.

  Og málið væri þar með dautt!

  Móðirin afþakkaði pent, en sleppti slaufum

  að mestu, bara svona smávegis á milli kerta.

  En þá héldu systur húsfreyju, þá pínulítil peð

  með ljósa slöngulokka, að þær gætu aldeilis kveikt sjálfar

  á aðventukransinum!

  Brann til kaldra kola....úti á svölum.

  Faðirinn með brunasár á handarbaki í 4 vikur.

  Síðan lítið verið notað af slaufum á aðventukransa

  í stórfjölskyldu húsfreyju.

  Það er ENGIN slaufa á aðventukransi húsfreyju þetta árið.

  Aðeins greni, keramíksveinar, kuðungar og jólasnjókarl.

  Átta ára djásnið kveikti á fyrsta kertinu seinni

  partinn í dag undir vökulum augum húsfreyju sem

  stóð 10 cm frá kransi og 30 cm frá svalahurðinni.

  En allt fór vel, og það eina sem brann var kertið

  sem átti jú að loga.

  Átta ára djásnið svo alsælt með snjóinn, og er búin

  renna sér á rassaþotu allan liðlangan daginn,

  fyrir utan "skreppelsið" á "upptendrunina" niður

  á Austurvelli.

  Húsfreyja hins vegar að jafna sig af ellihrumleika í baki,

  og eftir tvö andlát hjá hennar yndislegu öldungum á deildinni

  hennar.

  Annð andlátið var nokkuð fyrirsjáanlegt, en hitt kom snögglega upp

  og því eru nú tveir elskulegir herramenn horfnir í "Sumarlandið".

  Jamm, erfitt að horfa á eftir yndislegu fólki.

  "En svona er lífið, Siggi" sagði Júlli á Hlíðarenda gjarnan við

  föður húsfreyju, og ekkert nema gott eitt um það að segja.

                    Gæfan mesta.

  Aska og mold.  En nægir nokkrum slíkt,

  sem notið hefur ritninganna fræðslu?

  Vor eirðarlausa öld er hrjáð og sýkt

  af efasemd og hræðslu.

 

  Oss voru gefin fögur fyrirheit,

  en fæstir vilja þeim í auðmýkt trúa

  og nema staðar eftir langa leit

  í landi þar sem, sem hryggð og ótti búa.

 

  Oss voru gefin holl og heilög ráð,

  er hefja skyldu mannsins líf og sanna,

  að barnið skynjar betur drottins náð

  en böðlar þeirra Kaífasarmanna.

 

  Vor mesta gæfa er að fæðast feig

  og finna guð og ljósið eygja,

  en þyngsta raun að þjást af banageig

  og þora ekki að deyja.

                                 Davíð Stefánsson frá Fagraskógi.

 

  Góðar stundir á aðventu.

 

 

 

 

 

 

Tendrað á ljósum Óslóartrésins

Bévítans ellihrumleiki...

  ...í baki, að hrjá húsfreyju þessa

  síðustu daga.

  Var að bjástra við blautan þvott

  síðdegis á föstudegi, og varð næstum

  farlama á eftir.

  Ekkisens, árans sviðabruni í mjóbaki með

  leiðni niður í fót setti húsfreyju í "farbann"

  med det samme.

  Komst við illan leik frá rúmstokk og á salerni

  næstu tvo daga.

  Klæða sig í sokka!  Ekki sjens.

  Buxur!  Mega-vandamál, en þó gerlegt með

  mikilli skipulagningu.

  Fyrst upp á olnboga, í sitjandi stöðu,

  skáskjóta skárri skankanum fram í buxnaskálm,

  upp að ökkla.  Þá troð verri löppinni í sína skálm

  ofurhægt og ofurvarlega...hrópa á 8 ára djásnið

  og biðja hana að koma og toga buxnastrenginn það

  hátt upp að húsfreyja næði honum án þess að beygja sig

  hið minnsta, og BINGÓ málið var leyst.

  Síðan legið á hitapoka, bólgueyðandi lyf brudd

  og óréttlæti heimsins krufið til mergjar.....og krufið

  til mergjar.

  Árans vesen að geta ekki þrifið eldhúsgluggann

  og sett upp jólagardínurnar.

  Ekki einu sinni hægt að pára á nokkur jólakort.

  Húsfreyja dæsti og stundi yfir hrikalegu óréttlæti

  þessu, einmitt þegar hún ætlaði að byrja SVO SNEMMA

  á jólaundirbúningnum....ætlaði alls ekki að vera

  með allt í rassi, eins og oft áður.

  Jamm.

  En húsfreyja er nú öll plástruð upp á japanska vísu,

  og er heldur að skána.

  Verður orðin "jólagardínufær" um helgina.

  Góðar stundir, og passið ykkur á bévítans blauta þvottinum

 

 

Vitskert af græðgi?

  Húsfreyja reynir að fylgjast

  með í kreppufári, "Ísbjargarkrísu"

  og "góðviljuðum" aðgerðum

  Alþjóða gjaldeyrissjóðarins hér

  uppi á litla Fróni.

  Gömlu bankarnir hrundir og steindauðir,

  og Arion, Hagar, Baugur-grúpp ásamt fleirum dansa

  trylltan dans í kringum "rotnandi lík" þeirra.

  "KLING, KLANG, KISTAN TÓM"!

  Ríkisstjórnin rær lífróður til að bjarga því sem

  bjargað verður, með myllusteina stjórnarandstöðunnar

  um hálsinn og fnykinn af morknaðri útrás í vitunum

  og síðast en ekki síst stæka ólyktina af siðspilltum

  bankaviðskiptum.

  Sauðsvartur almúginn herðir enn sultarólina,

  enda í hans verkahring að standa skil á og endurgreiða

  "hringavitlaus endurfjármögnunarlán"

  útrásarvíkinga og fyrrum bankaeigenda.

  Spekingar og spámenn ryðjast inn í fjölmiðla..."þið eigið

  að gera þetta svona, en ekki hinsegin...spara milljarða hér

  og milljarða þar", þegar málið er að AGS hefur ALLT um málið

  að segja hvernig hlutirnir eru framkvæmdir.....og þá þær þjóðir

  sem "mestu ráða" innan AGS.

  Okkar er EINGÖNGU að BORGA!

  Enginn ber ábyrgð á því hvernig fór,

  því menn bara svona "misstu tökin á veruleikanum"

  í öllum þessum "brjálæðislega góðærisgróða"....sem

  reyndist svo aðeins endalausar tölur á pappír eða í

  tölvum.

  Engir áþreifanlegir peningar.

  Merkingarlaust núllerí!

  Þá spyr húsfreyja:  Urðu útrásarvíkingar allir ásamt

  fyrrum bankaeigendum "vitskertir af græðgi"?

  Vitskertir!?

  Nei, bara svona spyr, húsfreyja.

  Því ástandið í þjóðfélaginu er aldeilis ekki gáfulegt í dag.....

  ...svona meira GJEGGJAÐ......VITSKERT jafnvel!

  Húsfreyja er að íhuga alvarlega að HÆTTA að fylgjast

  með kreppufréttum, tóm helvísk, botnlaus endaleysa

  hvort eð er, sem enginn sér fyrir endann á.

  Mun skárra að huga að 4 ára afmæli heimiliskattarins,

  "harðfisksafmælisterta" að boði 8 ára djásnsins,

  hrósa svo 8 ára djásninu enn og aftur  fyrir að vinna íslenskuverðlaun

  Menntaráðs Reykjavíkur, kenna henni 8 sinnum töfluna

  í stærðfræði, föndra jólakortin, senda veðurguðum

  öllum hljóða bæn um kyrrláta og fallega snjókomu

  á Aðfangadag því 8 ára djásninu langar svo að hafa

  hvít jól, stússa á kringum öldungana í vinnunni

  svo þeir eigi gleðileg Jól, skipuleggja piparkökubakstur með múttu

  í desember og muna að kveikja á kertum í skammdeginum

  verndarenglum öllum til dýrðar og gleði.

  Húsfreyja NEITAR að smitast af kreppupakkinu.....

  kærir sig ekkert um að verða VITSKERT!

  Góðar stundir og gangi ykkur vel með "ólina"!

 

 

 

 

 

Noh! Alltaf að græða....

  ...bankinn húsfreyju.

  Uppskírður, afspilltur, skuldalaus

  og glænýr!

  Húsfreyja er alsæl.

  Hlýtur að koma að því að allur þessi

  gróði skili sér til kúnnanna....eða hvað?

  Fær máske húsfreyja "afskriftabréf" í jólagjöf frá

  "Arion"?

  Ekki slæmur díll það.

  Bara þetta með nýja nafnið.

  Húsfreyja er ekki viss að henni líki

  við að bankinn hennar heiti eftir

  "vængjuðu hrossi".

  Hrossi sem gat flogið hvert á

  land sem var....enda faðirinn sjálfur Pósedon

  sjávarguð hinna fornu Grikkja.

  "Flýgur" þá bara ekki "allur þessi" gróði eitthvað

  út í buskann, líkt og aurarnir útrásarvíkinganna

  gerðu?

  Kúnnarnir að borga okurvexti af okurlánum eftir sem áður,

  og mega þakka fyrir að "eiga" þak yfir höfuð sér

  skuldlaust um áttrætt!

  Jamm.

  Húsfreyja er orðin kúnni hjá "Arion"!

  Banka með nafn af "grískum" uppruna.

  Úr goðafræðinni.

  Verður húsfreyja brátt "goðsögn ein" með allar sínar

  okurskuldir?

  HALLELÚJA!

  Og AMEN.

  Góðar stundir

 

 

Virðisrýrnun um 20 milljarða

Sjónrænn bölvaldur?

  Nærbuxnafaldur?

  JASO!

  Nú klæðist fólk af báðum kynum

  þröngum fatnaði, ef þeim hugnast slíkt.

  Enda margir með fallega og spengilega kroppa,

  bæði konur og karlar, og því þá ekki að leyfa línunum

  að njóta sín?

  Húsfreyja hefur gaman af fólki.

  Sér í lagi samskiptum við fólk, en spekúlerar mun

  minna í útliti þess nú til dags.

  Horfir meira á það hvort mannfólkið hefur hlýlega

  framkomu, bjart bros og einlægt augntillit.

  Og það hvað fólk hefur fram að færa í töluðu máli.

  Útlitið svona meira eftirá þankar, hvað húsfreyju varðar,

  þó alltaf finnist henni mikilvægt að fólk sé snyrtilegt

  og hreint til fara.

  En húsfreyja man þá tíð, er hormónar blússuðu

  á ógnarhraða um æðar hennar og Keanu Reaves, Brad Pitt

  og Antonio Banderas voru "hrikalega heitir" og sexý....úúú...

  og eru nú reyndar enn.

  Þá var aldeilis mikið pælt í útlitinu...og pælt í útlitinu....og pælt

  í útlitinu með vinkonum og vinum.

  En aldrei nokkurn tímann man húsfreyja eftir því,

  að "nærbuxnafaldur" kæmi inn í þær umfangsmiklu pælingar.

  Eða að "nærbuxnafaldur" hafi skipt minnsta máli, þá horft

  var á eftir vel vöxnum karlpeningi á götum úti....og það

  þó þeir væru í níðþröngum buxum, sem sýndu vel að

  þeim fannst betra að halda "djásnum" sínum heitum

  í "naríum" á köldum vetrardögum.

  Engin vandræði voru heldur á húsfreyju og vinkonum hennar

  með að vera í naríum undir níðþröngum gallabuxum.....og enginn

  setti út á það heldur.

  ENGINN.

  Þá spyr húsfreyja:

  Horfir fólk  mikið á "nærbuxnafalda" í dag, þá þeir sjást í gegnum

  þröngar flíkur?

  Eru þá faldar þessir að "bögga" menn og konur út í hið

  óendanlega?

  Í alvöru!

  NÆRBUXNAFALDAR!

  Skvísan eða gæinn sem faldi þessum skartar

  þar með orðin "hrikalega púkó"?

  Lummó?

  Hallærisleg?

  UNCOOL!

  Ekki kynæsandi fyrir krónu!

  Hundljót helv.... skrípi?

  Út af daufum útlínum nærbuxnafalds!

  Kommon!!

  Hvenær fóru nærbuxnafaldar að vera svona "sjáanlegir"

  og "vinsælir" í útlitspælingunum?

  Hverjum hugnast eiginlega að góna eingöngu á þá, í stað þess

  að dást að vel formuðum líkama?

  Hvað gerðist eiginlega?

  Urðu allt í einu allir nærbuxnafaldar miklu "þykkari" og

  óþjálli, svo þeir blasa við langar leiðir, gangi fólk í

  þröngum fötum?

  Fær viðkvæmt fólk "slag", þá það ber augum slíka falda?

  Eða er fólk sem sést á götum úti með "sýnilegan

  nærbuxnafald" lagt í einelti af "NÆRBUXNAFALDSHÖTURUM"?

  Er máske búið að stofna félag "NÆRBUXNAFALDSHATARA",

  sem heftur sett sér það markmið að útrýma

  nærbuxnaföldum í 12 skrefum fyrir árið 2012?

  (Eftir 2012 skiptir engu máli hvort sést í slíka hörmungarnærbuxna-

  sjónmengun, þar sem Majarnir spáðu mannkyni ekki lengri framtíð).

  Jamm!

  Naríur eða ekki naríur verður að vera mál hvers og eins.

  En pyntingatól eins og G-strengi og nú C-fjaðurstafi

  mega "NÆRBUXNAFALDSHATARARNIR" eiga.

  Góðar stundir og megi veturinn verða ykkur

  "hlýr og þvagfærasýkingalaus".

 

 

Tekur c-strengur við af g-streng?

Vandfundinn heiðarleiki?

  Á litla Fróni?

  Ja, jú, jæja.

  Húsfreyju hefur virðst

  að heiðarleiki í pólitík

  hafi verið vandfundnari

  en sjálfdautt hross út í haga.

  Enda hestamönnum allflestum umhugað mjög

  um hross sín, og orðið næsta fátítt að

  hross finnist sjálfdauð út í haga.

  En í pólitík virðist aðal málið að "svíkja, pretta,

  ljúga og smjúga", og upplýsa almennig sem allra minnst

  um stöðu mála á litla Fróni.

  Helst aðeins á laugardögum á "nýju tungli" þá kyngir

  niður snjó.......og þá aðeins ef ákveðinn fyrrum

  seðlabankastjóri hefur gefið tilskilin leyfi fyrir því.....og

  ljós logar á friðarsúlunni.

  En er víst eitthvað að gutla í blaðamennsku um þessar mundir,

  sá góði dökkblái maður, sem hefur haft "upplýsingaflæði"

  til þjóðarinnar í hendi sér.

  Ætli "þjóðfundarfólk" verði að senda inn

  skriflega beiðni í ÞRÍRITI um HEIÐARLEIKA til Alþingis og Mogga?

  VÁV!

  Þvílíkur kjarkur sem þarf í slíkt.

  Ætli allt "þjóðfundarfólk" verði þá tekið á teppið,

  líkt og Hallgrímur Helga. rithöfundur hér um árið?

  Rosalegt!

  Svaðalegt!

  En þetta er ekki allt og sumt!

  Þjóðfundarfólk vill að lögð verði áhersla á:

  Jafnrétti!

  Virðingu!

  Réttlæti! 

  Til hvurs?

  Er ekki allt þetta í myljandi góðum gír hér

  í "stórasta landi" í heimi?

  Spyrjið bara konur út í launajafnrétti á litla Fróni.

  Spyrjið bara karla út í jafnan rétt til að umgangast börn sín

  eftir skilnað.

  Spyrjið hvort framganga ríkisstjórnar, útrásarvíkinga

  og fyrrum bankaeigenda síðustu 16 árin hafi ekki

  vakið virðingu og áðdáun hjá þjóðinni.

  Og hæstiréttur litla Fróns sem náðar allt útrásarpakkið

  eins og leggur sig!- Réttlæti á æðsta, besta og bláasta stigi.

  Dásemd!

  Dýrð!

  HALLELÚJA!

  Kærleikur, ábyrgð, frelsi, sjálfbærni og lýðræði..........????

  Sko! Það er lágmark að þjóðfundur noti

  orð sem stjórnendur og framámenn

  litla Fróns SKILJA!

  Þessi fimm síðustu atriði finnast hvergi

  í neinum "pólitískum orðabókum".

  Og hafa líklega aldrei heyrst í pólitík,

  síðan síðurnar er innihéldu þessi orð og hugtök

  voru brúkuð sem "neyðarskeini" á Alþingi,

  þegar þáverandi frónversk ríkisstjórn samdi

  við Kanana um her hér í den.

  Fjölskylda, jöfnuður, traust???

  Væri jafn gott að senda frá sér yfirlýsingu

  á forngrísku eða sanskrít!

  Jamm.

  En það má sosum alltaf reyna.

  Ofurbjartsýnir sem við Frónbúar erum.

  Muna bara að senda góða "frónverska orðabók" með,

  þá stjórnvöld þarf til að tryggja árangur af vinnu þjóðfundar.

  En virðingarvert og gott framtak, eigi að síður hjá þjóðfundarfólki

  í Laugardalshöllinni.

  Húsfreyjar á þá ósk heitasta

  að árangurinn verði góður fyrir land og þjóð.

  Góðar og þjóðlegar stundir.

 

 

Þjóðin leggur áherslu á heiðarleika

Kakósúpa og egg...og góð íslenska.

  Kvöldmatur.

  Jamm.

  Kreppukvöldmatur segir húsfreyja.

  "Namm, mamma" segir átta ára djásnið.

  "Við getum svo haft slátur á morgun, mamma".

  "Og við eigum eftir að baka súkkilaðikökuna, sem þú keyptir

  í Hagkaup".

  Brosdagar í skólanum hjá henni um þessar mundir,

  og hún er bjartari en sól í heiði á hádegi 23 júní.

  Lætur sér nægja eina gulrót og eina sveskju í morgunmat

  og snöflar svo í sig hafragraut í skólnum.

  Alsæl.

  Kreppufæði, hvað er nú það?

  Kom með bréf til foreldranna heim úr skólanum í gær.

  "Er búið að reka þig fyrir óþekkt, óspektir og yfirgang" spurði

  húsfreyja stríðnislega og tók við bréfinu

  Nah!

  Djásnið vildi ekki kannast við neitt slíkt í sínu fari.

  Húsfreyja las bréfið.....upphátt.

  Búið að tilnefna átta ára djásnið til íslenskuverðlauna menntaráðs

  Reykjavíkur.

  Foreldrum og djásni boðið í Tjarnarsal Ráðhúss Reykjavíkur

  næsta mánudag.

  "Oooo nú fékk ég í magann, mamma....af hverju ég?

  Ég er svo feiminn, ég þori ekki að standa uppi á sviði

  í einhverri verðlaunaafhendingu".

  Djásnið lagðist í keng í sófann og blés og dæsti.

  Húsfreyja að springa af monti.

  "Iss, ekkert mál, ég fer bara með þér...og svo er ekkert

  víst að þú þurfir upp á svið, það eru margir tilnefndir og

  líklegast þarf bara sá sem vinnur upp á svið".

  Djásnið róaðist.

  "Nú, þá er þetta allt í lagi".

  Húsfreyja hefur síðan ekkert viðrað þann möguleika við

  átta ára djásnið, að hún gæti "unnið" verðlaunin.

  Mamma mía!

  Húsfreyja sér fyrir sér, að verða basla með djásnið

  náfölt og skjálfandi í fanginu upp á svið...öll 22 kílóin....

  ....organdi "NEI, ég vil EKKI nein verðlaun, mamma...þú sagðir

  að ég þyrfti ekki að fara upp á svið.....aaaaarrrrgggh".

  En koma tímar koma ráð...og eins og húsfreyja sagði,

  eru margir tilnefndir, en aðeins einn vinningshafi.

  Svo djásnið á "góðan sjens" á að sleppa við

  mergjaðan sviðsskrekk.

  En gaman að þessu.

  Og mestur heiður liggur í því að vera tilnefndur.

  Verðlaunin bara bónus....."taugatrekkjandi" bónus.

  En húsfreyju er bara nokkuð glatt í sinni,

  og hún spáir því að kreppukakósúpan verði

  bísna gómsæt í kvöld.

  Eggin betri.

  Góðar stundir og njótið þess að kenna unga fólkinu okkar

  að tala og skrifa fallega og skýra íslensku.

 

Hvað? Allt að gerast...

  ...hér uppi á litla Fróni í kreppuaðgerðum!

  Búið að lengja skuldahala heimilanna

  um 3 ár.

  Hækka skatta.

  Hæstiréttur að "refsa" INNHERJUM í bönkum

  grimmilega....eða NEI.....

  ...þar var víst allt slétt og fellt og löglegt.

  En búið að "stappa" kaupgetuna langt niður fyrir núllið

  hjá almenningi.

  Hækka bensín.

  Hækka mat og nauðsynjavörur.

  Skera niður hjá lögreglu Frónbúa.

  Glæpir og refsing búið spil þar með á litla Fróni.

  Má bara loka Litla Hrauni.....eða hvað?

  Skera niður í heilbrigðiskerfi Frónbúa, enda

  sáralítið að gera hjá því pakkinu....bara ein lítil

  svínaflensa að bögga jarðarkringluna og íbúa hennar.

  Iss!

  Búið að afskrifa "milljarða á milljarða ofan" hjá

  útrásarvíkingum og fyrrum bankaeigendum

  sem nýju bankarnir "treysta" svo vel.

  Skera niður greiðslur til aldraðra og öryrkja.

  Setja flest öll sprotafyrirtæki í gjaldþrot eða greiðsluþrot.

  Búið að ákveða að "klára" Tónlistarhöllina við höfnina,

  því hún er það sem kemur Frónbúum að "mestu gagni" nú

  mitt í albrjálaðri kreppunni.

  Og mikilvægast af öllu:  Það er búið að kveikja á FRIÐARSÚLUNNI.

  Sem sagt!

  ALLT að GERAST!

  ALDREI DAUÐUR TÍMI á litla Fróni.

  ALLT SVO SKILVIRKT OG MARKVISST!

  OG RÉTTLÁTT!

  Góðar stundir í bráðhuggulegum kreppuaðgerðum.

 

Kalla eftir aðgerðum í kreppu

Gott minni?

  "Já, ég man þetta eins og

  gerst hefði í gær", sú aldraða

  iðaði í skinninu og var komin

  í mergjað sögustuð.

  "Manstu eftir fæðingunni ÞINNI"?

  Tvær konur einnig vel við aldur, voru

  áheyrendur þeirrar öldruðu og voru

  furðu lostnar.

  "Að sjálfsögðu" svaraði sú aldraða drjúg.

  "Og ekki nóg með það", hér hafði sögukona

  áhrifamikla þögn til áherslu,

  "hann pabbi fékk að vera viðstaddur fæðinguna,

  það man ég svo vel"!

  Sú aldraða krosslagði hendur og iðaði sem aldrei fyrr.

  "Hvað segirðu"?

  "Manstu eftir að hafa séð hann pabba þinn, þegar

  þú varst nýfædd"?

  Eyru og augu áheyrenda voru næstum dottin í gólf niður,

  svo mikil var bísnin og forundranin.

  "Ó, já" svaraði kerla hróðug, "get aldrei gleymt því,

  því hann heilsaði mér og sagði: Sæl dóttir".

  Sögukona lygndi aftur augunum af sælu minninganna.

  Opnaði þau aftur og horfði einbeitt á viðmælendur sína.

  Svo kom ábúðarfullt:

  "Og auðvitað svaraði ég að bragði og sagði:  HALLÓ PABBI".

  Það var þögn dágóða stund.

  En svo sló fáránleiki síðustu setningar sögukonu og áheyrendur.

  Brosvipra myndaðist við munnvik sögukonu.

  Svo slapp frá henni fliss, og að lokum veinuðu

  allar stöllurnar þrjár af hlátri....

  ......og síðan skelltu þær kaffinu og jólakökunni í sig

  og ræddu ekki "minnisstæðar" fæðingar meir.

  ... .... .... .... .... .... .... .... ....

  Það er aldrei dauð stund á vinnustað húsfreyju,

  og oft glatt á hjalla.

  Öldungar hennar eru allir dásamlegt og skemmtilegt fólk.

  Færa hverjum þeim sem nennir að hlusta, hafsjó að kyngimögnuðum

  fróðleik, speki, lífsreynslu og lífsgleði að gjöf.

  Góðar og dýrmætar gjafir það.

  Jamm.

  Og svo eru það "öldungarnir" með OFURMINNIÐ, eins og sögukona....

  Þeir eru bara SNILLD!

  Húsfreyja svo á leið með 8 ára djásnið í bíó.

  "This is it, með Michael Jackson" skal tekinn með stæl.

  Jamm.

  Heilabilun framundan hjá húsfreyju?

  Heilu næturnar með undirspil Jacksons í öllum hennar draumum....

  NÆSTU MÁNUÐINA.....ÁRIN?

  Ekki spurning.

  En leggur ekki móðir geðheilsu sína fúslega á vogarskálarnar

  fyrir glóhært 8 ára djásn, með geislandi falleg brún augu og

  bjartasta brosið undir sólunni?

  "I am not alone....Billie Jean your not my.....Thriller......

   so beat it"!

  Jamm.

  Engin spurnig hér.

  This is it!

  Góðar stundir á ljúfum sunnudegi.

Mun mæta í sína eigin...

  ...jarðarför, húsfreyja....

  STEINDAUÐ og FRAMLIÐIN!

  Mun láta lítið fyrir sér fara og

  enn minna í sér heyra.

  Og alls ekki undir neinum kringumstæðum,

  mun húsfreyja fara að rjátla við kistulokið,

  berja í það eða lyfta upp nokkra sentimetra

  í miðri líkræðu...og það þó henni finnist

  málflutningur klerks ekkisens lofræðubull.

  Því slíkt mynda án vafa koma af stað massívum

  kransæðastíflum og heilablóðtöppum í

  ættmönnum húsfreyju, þeim sem í jarðaför mættu

  af stakri skyldurækni og samviskusemi.

  En fólki vill svona "heldur bregða" þegar búið er

  að "afskrifa" og útskrifa hinn látna úr jarðlífi,

  ef allt í einu lyftist lok...."ÍÍÍÍÍískur"...

  eða heyrist bank...BANK-BANK....úúúúúú!

  Og húsfreyju er frekar vel við afkomendur sína

  ættingja og vini, og vill síður gerast "fjöldamorðingi" í eigin útför.

  .... .... .... .... ... .... .... .... .... .... ... ....

  En hrapalegur atburður atarna í Brasilíu, og ekkert grín að missa

  ástvin í bílslysi.

  Góðar stundir og farið varlega í umferðinni.

 

Mætti í eigin jarðarför