Skárra að fara undan...

  ...glóandi hrauni en mót því.

  Eða það telur húsfreyja.

  Fékk sjálf ekkert val hér í den,

  með elgosið nánast í bakgarðinum.

  Skipti engu þó hraun rynni fyrst á haf út

  en ekki í átt að byggð eins og síðar varð.

  Húsfreyja var ræst, skellt í úlpu og skó

  og holað ofan í slorangandi fiskibát um hánótt,

  komið til Þorlákshafnar í einum hvínandi fart....

  eða á svona siglingarhraða sem lítill fiskipungur nær

  í bullandi brælu á móti vindi.

  Fimm þúsund manns á faraldsfæti þá nóttina.

  Jamm.

  Nú er landinn enn og aftur á faraldsfæti,

  þúsundum saman. 

  "Fagnandi" á göngu í óbyggðum,

  allt á fótinn og "á móti" hraunstraum.

  Sumir jafnvel á gallabuxum og strigaskóm.

  Þrjátíu kílómetra göngu að hitta einn herlegan hraunstraum.

  Og kannski ná að berja einn logarauðan gosstrók augum

  með drunum og tilheyrandi, í óþægilega "heitri" nálægð.

  Með hraunstrauma rennandi í allar áttir...suður og niður,

  norður og niður.

  Vissulega upplifun að berja eldgos augum í nálægð,

  en mun betri upplifun telur húsfreyja,

  að "komast heil" frá slíkum hamförum,

  og lifa það, að segja frá ævareiði móður Jarðar,

  sjónarspili og ægifegurð.

  Vinum og ættingjum.

  Börnum og barnabörnum.

  Svo kæru landar, notið skynsemina.

  Eldgos eru ekkert grín.

  Farið vel búin, með fólki sem þekkir vel til aðstæðna.

  Verum erlendum ferðamönnum góð fyrirmynd.

  Góðar stundir.

Fá hraun og ösku á móti sér

Margur er knár, þó hann sé...

  ....DAUÐUR.

  Ætli hann verði þá einnig látinn sæta

  refsingu "steindauður", fyrir fíkniefnamálið?

  Kista með líkamsleifum og alles máske orðin

  "skrifstofustáss" hjá fangelsisstjóra í einu herlegu fangelsi

  í hinu mikla veldi Mister Brown?

  Fær að taka sína refsingu út í "himneskum frið og ró"?

  Ekkert vesen frá öðrum föngum, ekkert vesen við að

  neyða ofan í sig hið "breska kidney-pie" og annan eðal

  matarhroða þeirra ensku, þar með.

  Ekkert vesen né áreiti frá snaróðum ættingjum að

  koma vikulega með alls konar VANDAMÁL á heimsóknartímum....

  í versta falli kæmi við fangelsisprestur af og til sem

  krossaði yfir kistuna og blessaði!

  Jamm.

  En sérann gæti samt orðið vesen, vildi svo lukka til

  að sálaði kóni þessi væri islamatrúar.

  Yrði að vera "immann" sem jóðlaði bænina yfir þeim látna!

  VESEN!

  Því samkvæmt því sem húsfreyja hefur lesið sér til um,

  eru mál þeirra í hinum vestræna heimi oft eitt stórt VESEN!

  Vilja sér sundlaugar, sér vatnshana, sérstakt kjöt að snæða,

  sér dómstóla fyrir skilnaðarmál, erfismál o.fl., sér skóla fyrir

  börn sín, sér klæðnað fyrir konur og ungar stúlkur

  og sér lög um fjölkvæni og leyfi til að kvænast stúlkubörnum.

  Spyrjið bara Dani.

  "AÐLÖGUN" virðist bara ekki vera á dagskrá múslima,

  sér í lagi þeirra sem aðhyllast sharíalög...og þeim fer

  því miður fjölgandi meðal islamatrúaðra.

  Þeir rotta sig saman í hverfum í Danmörku og víðar,

  og gætu gott eins búið heima í sínum eigin löndum miðað við hve

  lítið þeir hafa fyrir því að læra danska tungu, hve lítið þeir

  leyfa börnum sínum og konum að hafa samneyti við

  aðra Dani.

  Jamm, furðulegt vesen allt saman, að flytja fleiri þúsundir

  kílómetra í nýtt land að stofna sér nýtt heimili, en VILJA svo hvorki

  aðlagast þjóðfélagi né þegnum nýja landsins.

  Gera meira segja kröfur um að "nýja þjóðfélagið og þegnar þess"

  aðlagi sig að þeim og breyti rótgrónum hlutum ÞEIM, nýju þegnunum í hag!

  Sjíss.  Húsfreyja er fegin að hafa ekki fæðst í islamatrúarlandi....meira

  en orð fá lýst.

  En skrítin og nokkuð skondin frétt frá hinu "réttsýna" ríki

  bresku drottningarinnar.

  Meira segja "látnir" eiga góða sjensa á því

  að vinna dómsmál...virðist engin krafa þar í landi

  að menn séu í tölu "lifenda" hafi þeim tekist að

  komast í það reka mál fyrir dómi.

  Ætti húsfreyja að athuga hvort "afi heitinn"

  gæti fengið "skaðabætur" fyrir skemmdir á

  grindverkinu heima á Eiðum hér í den?

  Nah!

  Líklega fyrnt málið það.

  Og svo sönnunarbyrði erfið...Eiðarnir fóru undir

  hraun með skemmdu grindverki og öllu saman

  1973.

  Góðar stundir og munið "liðin lík" virðast lítil fyrirstaða.

 

Látinn maður sigraði í dómsmáli

Gossprungur....

  ....geta lengst og hafa lengst.

  Margra alda jarðlög eða bergstál eru engin

  fyrirstaða þá jarðeldar eru annars vegar.

  Húsfreyja hefur sjálf orðið vitni að því,

  þá jörð rifnaði sem vesælt blaðsnifsi,

  í báða enda gossprungu.

  Stóð hún á malarvegi fyrir framan

  Vilborgarstaði í Eyjum, með Vilpuna sér á

  hægri hönd og all-langa gossprungu með breiðum

  eldstrókum beint fyrir framan sig.

  Sjónarspilið var ægifagurt, ógurlegt og ótrúlegt.

  Logarauðir gosstrókarnir þeyttust fleiri metra upp

  í vetrarsvartan himininn.

  Kirkjubæina bar við bjarmann og voru sem lítil

  svört leikfangakubbahús.

  Þar sem húsfreyja stóð, þá 12 ára stelpuskott,

  fann hún jörðina nötra undir fótum sér, líkt og

  sjálf Móðir Jörð væri dauðhrædd við sitt eigið

  ægivald.

  Furðulegar "hvíslandi" drunur bárust 12 ára stelpuskottinu

  til eyrna, þegar hver eldstrókurinn af fætur öðrum

  sentist upp úr sprungu sinni og litaði rauð-appelsínugular

  misbreiðar rákir á svartan himininn.

  Og svo gerðist það.

  Jörðin "orgaði" líkt og í fæðingarhríðum,

  skalf og hristist svo hressilega að stelpuskottið

  greip í móður sína við hlið sér, til að

  missa ekki jafnvægið.

  Og sjá, jörðin rifnaði til beggja enda gossprungunnar

  sem bréfsnifsi væri, og nýir gosstrókar þeyttust upp

  með ofurkrafti.

  Tólf ára stelpuskottið reyndi að telja eldstrókana...

  gafst upp þegar hún var komin í 33...kleip sig

  í 3. sinn í handlegginn þessa nótt...FAST!

  Jú, hún var áreiðanlega VAKANDI.

  Hversu fáránlegt sem henni virtist það,

  varð hún að sætta sig við að sjónarspilið

  var raunverulegt.

  Dagurinn var 23. janúar.

  Árið 1973.

  Þá flýði húsfreyja bernskuheimili sitt um hánótt,

  líkt og margir íbúar Fljótshlíðar og þeir er sveitir

  undir Eyjafjöllum byggja, gerðu í nótt og í morgun.

  Húsfreyja hugsar til þeirra.

  Góðar stundir.

Gossprungan gæti lengst

Flutt til Spánar!

  Ekki seinna en í gær, húsfreyja!

  Verði síðdegisdúrinn "alfriðaður"

  og settur á skrá dýraverndunarsamtaka

  sem "verndað listform" hjá hinum tígulega spánska

  kóngi, þá er sko húsfreyja FARIN! 

  Hættir þá húsfreyja að þræla sveitt hjá hinu "alauma" opinbera,

  fyrir smáaura sem vart duga fyrir saltinn á grautinn,

  og smá bensínaslatta á bílræfilinn upp í Spöng.....

  er að "spara" skósólana á skóm sínum...og fer nú

  ALLT á bílnum..ussss...er alveg splunkunýtt, leynilegt

  kreppuráð.

  Jamm, ekki spurning...húsfreyja flytur búferlum

  til Spánar og gerist "listamaður af guðs náð".

  "Picassó eftirmiddagslúrsins"!

  "Da Vinci 15 mínúta dúrsins"!

  Húsfreyja sér fyrir sér, að hún gæti

  "lifað á listinni" einni saman í hinu sólríka

  veldi Spánarkonungs árum saman.

  Tæki fúslega að sér að lúra og dúra

  á beddum, bekkjum, "almenningsrúmum",

  almenningsgörðum, grasblettum og í húsaskotum

  tvist og bast um hið "svefnvæna" ríki

  spánskra.

  Leggði jafnvel til með sér sæng sína og kodda,

  svo spánska ríkið þyrftii eigi að spandera á

  hana herlegum "pakkakössum" í yfirstærð,

  sem "síestu-menn og konur" virtust halla sér

  mjög "að og á" utandyra, þá húsfreyja vísteraði

  senjora og senjorur í Barcelona á Spáni ekki alls fyrir löngu.

  Tæki húsfreyja hóglegt gjald fyrir hvern 15 mínúta

  blund, en yrði að fara fram á lágmark 100 evrur fyrir

  lengri svefn.

  Hrotur yrði hún að rukka fyrir "aukalega"!

  Að sjálfsögðu færi hún svo fram á "listamannaloft"

  á besta stað á austurströnd Spánar, yrði að hafa

  bíl til umráða þyrfti hún að ferðast vegna

  "listar" sinnar og dagpeningar væru að sjálfsögðu

  "möst".

  Jamm.

  Dúndur frétt þetta frá hinu suðræna ríki spánskra.

  Húsfreyja er að hugsa um að skella sér inn í rúm

  og fleygja sér....ágætt að vera í "formi" og æfingu

  ef allt færi á besta veg þar syðra.

  Góðar stundir og njótið síðdegislúrsins....z.z.z.z.z.z.z

Vilja friða síðdegisblundinn

Fregnir af VEÐRI?

  Það voru veikindi "á köflum"

  á vinnustað húsfreyju í morgunsárið.

  Birti til með "sjúkrahússinnlögn" eins öldungs,

   "hjartahlýjandi" kaffidrykkju og "heiðríkis-heimilismannaspjalli"

  með morgninum.

  Gerði "stress-hret" upp úr ellefu.

  "Svört þrumuský" vofðu síðan yfir deildarstjóraherbergi

  húsfreyju í vinnuskýrslugerð um hádegisbilið.

  Stöku elding sló sér niður með þrumandi ákalli:

  "Andskotinn"!,  þegar allt sat fast hjá húsfreyju

  í skýrslugerðinni, og yfir hana helltust

  "skúrir símhringinga" frá aðstandendum.

  Stytti þó upp í hringingum þegar nær dró kaffi,

  og brast á með "blíðviðris-hrósi" til starfsfólks

  kvöldvaktar frá einum góðum aðstandenda.

  Síðustu skýrslugerðarskýin hurfu svo á bak og brott

  með glampandi "sólarsamvinnu", gæsku og lífsgleði

  rétt fyrir vaktarlok, og var þá líka skýrslan klár,

  húsfreyja búin að renna yfir meiri hlutann í stjórnandanum

  í tölvunni, græja ýmislegt smálegt.....

  og heimilismenn kvöddu deildarstjórann með

  regnvot gleðitár á brá....sjálfsagt leifar frá

  þrumuveðri og skúrum í hádeginum.

  En húsfreyja notaði blíðviðrið "utandyra" til að skreppa með

  9 ára djásnið og Rakel bestu vinkonu í labb

  niður í fjöru.

  Þar var ekki hundur í nokkrum manni, en allir með

  hunda, að fara í hundana eða löngu farnir í hundana.

  Altént all nokkuð um hunda á hlaupum.

  Gott að tína smáskeljar og kuðunga, og lítinn uppþornaðan

  krossfisk.

  En svið í matinn.

  Góðar veðurblíðar stundir.

Lísa í UNDIRLANDI...

  ...þar sem "Brjálaði Hattarinn" lék

  Johnny Depp með tilþrifum, var

  á óskalista 9 ára djásnsins og

  frændsystkinanna úr Þorlákshöfn í gær.

  Myrkur talsvert í myndinni og fljótandi gráir hausar

  manna í hallardíkinu.

  "Hausinn AF" orgaði drottningin.

  Ekki víst að Vigrinn 7 ára hafi alveg haldið

  þræðinum, enda myndin ekki með íslensku tali,

  aðeins textuð.

  Og hin náðu því ekki alveg afhverju Lísa

  vildi ekki vera "hetjan Lísa" og drepa

  hinn illa Djabbervokkí!

  "Ég hefði strax sagt "já" og viljað drepa skrímslið"

  níu ára djásnið örlítið hneyksluð.

  "Ég sko líka" Sigginn 9 ára að verða 10 og með

  alveg nýjan samanlímdan skurð á hné, alveg

  furðulostinn yfir tregðu Lísu...muldraði svo í barminn:

  "En þær eru nú rosaskrítnar þessar stelpur".

  Svalan reyndi að koma Lísu til bjargar:  "En hún heldur að

  sig sé bara að dreyma"!

  Lá við "hóp-lúr" með tilheyrandi hrotum á bekk húsfreyju,

  þegar dróst áfram að Lísa sætti sig við hetjuhlutverkið

  og skrímsladrápið.

  Jamm.

  Sálfræði-þriller með aðalhetjum úr barnabókmenntunum?

  Líklega, því húsfreyja hafði lúmskt gaman að.....og það

  þó að hún hafi aldrei fílað söguna af hinni upprunalegu

  Lísu í Undralandi.

  Fannst alltaf sagan sú ruglingsleg, tilgangslaus og boðskapslaus.

  En var reyndar aðeins 8 ára húsfreyja, er hún las hana fyrsta og

  síðasta sinni, og fékk enga ánægju af.

  Óliver Twist las hún hins vegar sér til mikillar ánægju,

  á unga aldri og nú skal haldið í þjóðleikhús með

  allt litla liðið klukkan þrjú.

  Nú skal sko "tvistað með Óliver" sagði húsfreyja glettin

  við fjórmenningana.

  "Þetta er ekkert soleiðis" Vigranum mikið niðri fyrir.

  "Nei, mamma þetta er leikrit um Óliver Twist" djásnið tók

  undir með frænda sínum!

  Spenningurinn hjá þeim ungu er orðinn áþreifanlegur,

  og húsfreyja varð að senda þau út á róluvöll að

  kæla sig niður og róa.

  "Í SPARIFÖTUNUM"!

  Systir í Þorlákshöfn svo barnlaus að "árshátíðast"

  um helgina.

  Mikið stuð, eins og hennar er von og venja.

  En græja sig í leikhúsföt næst.

  Góðar stundir.

Nýir gjaldmiðlar?

  Blessaðir Kanarnir alltaf snjallir.

  Gerðu "páfagauk" konu einnar upptækan,

  því konuræfillinn hafði eigi staðið í skilum

  með afborganir af húseign sinni. 

  Ekki nóg með það að "gæludýrið" væri tekið

  með harðræði upp í skuldina,

  heldur gengu verktakar hins ágæta Bank of America

  í það að "eyðileggja" húsgögn konunnar.

  Makalaust athæfi atarna.

  Og nú er konuvesalingurinn í sjokki, með mergjaðan

  ofsakvíða yfir húsgangna- og gaukstjóni

  þessu, á meðan gaukurinn Lúkas er sjálfsagt allur úfinn

  og stúrinn yfir því að geta ekki tyllt sér lengur

  á uppáhaldssófabakið sitt, og argur yfir því hafa þurft að gista

  óhrjálegt skrifstofuborð verktakanna sem skemmdu sófann.

  Fimmtíu þúsund dollara vill kvíðafulla konan fá

  í skaðabætur frá bankanum fyrir hremmingar sínar og Lúkasar....

  og það þrátt fyrir að Lúkasi ræflinum hafi

  verið skilað með vinalegri afsökunarbeiðni frá

  bankamönnum og konum....

  Jamm, á þá altént konan að geta skellt einhverju af þeim

  dollurunum upp í fasteignaskuldina.

  Hehehe...skondin frétt.

  Hvað ætli annars að "gangverðið" á páfagaukum sé?

  Já, og þá öðrum gæludýrum?

  Því færi svo að frónverskir bankamenn tæku ameríska bræður

  sína sér til fyrirmyndar, og færu að gera "gæludýr" sér

  að góðu upp í skuldir, þá á húsfreyja eðal læðu.

  Bröndótta, barngóða, húsvana en að vísu eilítið "gallaða"!

  Hún er með skarð í vinstra eyra eftir ægilegan bardaga

  við fresskattargrey, sem missti sneið úr læri í viðureigninni

  við kisu húsfreyju.

  Haltrar síðan!

  En það má alveg líta svo á, að læðurófan sé

  líkt og hin dásamlega frónverska sauðkind

  vel "mörkuð"..."aftur-þríhyrnt -skorið" mætti lýsa

  eyra læðu....svo máske það sé bara bónus.

  Húsfreyja ætti kannski að bjalla í bankastjórann

  sinn, og kanna hvort hún geti ekki sent þeim

  köttinn næstu mánaðarmót í stað peninga...

  og málið er dautt.

  Lán húsfreyju að fullu greidd!

  Nah!  Gengur ekki!

  Níu ára djásnið tæki það aldrei í mál.

  Dýrkar læðuna, enda er djásnið eina barnið

  í 25 kílómetra radíus sem á "kött með skarð í eyra".

  En mikið rosalega eiga margir "halta" ketti í hverfinu.......

  Góðar stundir og hugsið vel um gæludýrin ykkar....tala ekki um

  sé bankinn á hælunum á ykkur.

 

Banki tók páfagauk upp í fasteignaskuld

Ungir neftóbakskarlar og konur í Noregi?

  Eða eru kannski bara alltaf í "munntóbakinu"?

  Fyrst "aðeins" 32 þeirra á aldrinum

  24 ára og yngri "reykja það.

  Hehe...grun hefur húsfreyja um að hér vanti

  prósentumerkið, en skondin frétt atarna,

  því einnig kemur fram að 21% þessa aldurshóps

  brúki "fínkornað tóbak"....svo fyrst svona fáir

  "reykja" það.....þá væri líklegt að þeir "tækju hressilega í nefið"

  eða skelltu því í vörina....væri fréttin kóréttur sannleikur!

  En svo er fremur ólíklegt.

  Afi húsfreyju var mikil tóbakskarl, og hans uppáhald var

  munntóbak.

  Pakkaði af mikilli list tóbakinu í lítinn köggul með fingrunum,

  og smellti síðan undir tunguna.

  Spýtti síðan tuggunni í moldina á Hawai-rósinni

  í glugganum sínum, þegar áhrifin fóru að dofna.

  Rósin sú stóð svo í blóma mestan part af árinu,

  og sást ALDREI á henni ein einasta lús.

  Húsmæður í götunni störðu upp í glugga afa

  grænar af öfund, enda þeirra Hawai-rósir annað hvort

  steindauðar er grálúsugar "að drepast".

  Afi húsfreyju var snyrtimenni mikið, og aldrei

  fann móðir húsfreyju eitt einasta tóbakskorn

  á borði, gólfi eða í rúmfötum hans þá hún

  stóð í stórhreingerningum.

  Tóbakstauma sá maður aldrei hjá afa húsfreyju.

  Vissu margir kunningjar hans ekki af tóbaksnotkun hans,

  svo fínt fór hann með það.

  Afi ákvað síðan sjálfur að hætta "í tóbakinu",

  nennti ekki að hafa fyrir því, þegar líða tók

  á efri ár.

  Vesen að nálgast það, þegar hann var kominn á Hrafnistu.

  Leiddist með afbrigðum á elliheimili, afa húsfreyju.

  Þoldi við í 3 ár, dó þá saddur lífdaga aðeins 77 ára að aldri....

  tóbakslaus.

  Húsfreyja hefur aldrei lært að brúka tóbak

  og syrgir það ekki.

  Finnst fýla af reykingafólki og þolir illa, er hlutlausari

  gagnvart nef-og munntóbaki, fólk sem slíkt notar

  hvorki angrar aðra né eitrar fyrir öðrum....aðeins fyrir sjálfu sér.

  Um óhollustuna lætur húsfreyja svo hvern dæma fyrir sig,

  því hún hefur mörgum lugnakrabbameinssjúklingnum

  hjúkrað og líknað á dauðastund.

  Er þar hlutdræg svo jarðar við fanatík.

  Svo hún skilur vel sína norsku frændur að hafa

  áhyggjur af reykjandi ungviði sínu.....

  þó þeir væru aðeins 32.

  Góðar stundir og gætið vel að heilsunni.

Banna sölu sígarettukartona

Veðurbarið logagyllt hár! HORFIÐ!

  Þannig liggur í því.

  Hlaut að vera.

  Vesen.

  Eftir að húsfreyja fluttist

  úr 12-18 vindstigunum

  í Eyjum hér um árið,

  þegar hún vaknaði við

  sundurrifna jörð og

  eldspúandi, þá hefur

  logagyllti litur hárs hennar verið að

  fölna jafnt og þétt.

  Dól og dangl í "Kára" upp á 2-7 metra á sekúndu

  hér uppi á "meginlandinu" er bara ekkert að gera

  fyrir hana.

  Má segja að hár húsfreyju hafi orðið "miður sín",

  og ekki borið sitt barr síðan 17 vindstigin í Eyjunum

  lyftu því og börðu því í andlit hennar.

  Og alltaf fylgdi Kára "grenjandi slagveðurs rigning",

  eða þá "dass" af sjávarseltu.

  Rauði liturunn er að verða "minning ein"....má jafnvel

  kalla hár húsfreyju "off-red" hár...samanber "offwhite"!

  Jamm.

  Húsfreyja verður máske að flytja búferlum

  aftur til heimaslóðanna, í þeirri von að öðlast

  aftur sinn fagra háralit.

  Hmmmmm...ætli gamla vitahúsið

  á Stórhöfða sé nokkuð til sölu.

  Góðar og "vindasamar" stundir.

Rautt hár og rysjulegt veður

Það er verið að taka upp kvikmynd...

  .. á heimili húsfreyju.

  Tökur hafa nú staðið stíft yfir

  í 2 vikur, eða allar götur frá því

  að 9 ára djásnið uppgötvaði

  að það var ekkert mál að læra á

  "videokameru" heimilisins.

  Djásnið fer með eitt af fimm aðalhlutverkunum.

  Elinóra, Rakel, Habba og Hekla eru í hinum fjórum.

  Húsfreyja hefur ekki grænan grun um hvað kvikmynd

  þessi fjallar, enda aldrei fengið að berja "kvikmyndahandritið"

  augum.

  Hlýtur auðvitað að vera "topp-síkret" í þessum bransa

  "hér" líkt og í Hollywood.

  Hefur samt húsfreyja grun um að kvikmyndin sé í anda

  "One flew over the cookoos nest" með Nicholson,

  eftir þeim atriðum að dæma, sem hún hefur fengið að kíkja

  á hjá 9 ára djásninu.

  Já, og svona í bland við klikkaða raunveruleikaþætti þar sem

  alls óskylt fólk hefur verið látið dúsa saman í litlu lokuðu rými

  í 40 daga.

  Síðasta atriðið sem húsfreyja skoðaði gekk til dæmis

  út á "óvenjulega nálgun" á einu mannsauga, þar

  sem viðkomandi rak svo hressilega við og hló svo

  geðveikislega ásamt upptökumanni.....í 10 mínútur.

  Húsfreyja er samt "aukaleikkona" í kvikmynd

  þessari, með vara-varahlutverk....þó hún hafi ekki hugmynd út á hvað

  hlutverk hennar gengur...virðist einna helst felast í því

  að sjá um að dæla kexi og mjólk í "Aðalinn", á meðan

  er hún kvikmynduð grimmt, og svo skoða einstaka

  brot og kommentera.

  Jamm!

  Komist kvikmynd þessi einhvern tímann á hvíta tjaldið,

  er næsta víst að húsfreyja verði að fara huldu höfði

  næstu mánuðina....eða taka á móti Eddunni fyrir

  "snilldartakta sem vara-varaleikkona í aukahlutverki" öðrum kosti!

  Annars er svo slátur í pottunum hjá húsfreyju

  á gráum mánudegi...búið að kvikmynda það...

  og eðal frónverskar kartöflur.

  Húsfreyja vonar að Frónbúar séu búnir

  að jafna sig eftir "kosningahelgina",

  "tvísýn og spennandi" sem hún var.

  Við sem teljum okkur með jákvæðustu þjóðum

  heims voru svo bara "93%" neikvæð um

  helgina.

  Jamm!

  Ekki að spyrja að kerlingarfálunni henni "Ísbjörgu",

  búin að steypa þjóðinni í bullandi þunglyndi

  og eitt stórt samhuga NEI!

  Ættum máske að hafa þjóðaratkvæðagreiðslu

  um "getu Seðlabankastjóra" fyrrum og núverandi næst,

  og síðan gagnsemi Fjármálaeftirlitsins þar í kjölfarið.

  Næsta víst að öll þjóðin yrði að fara á Prozac eftir þær

  kosningarnar.

  Stjórnina og alþingismenn?

  Nah!

  Því er ekki þorandi.

  Þá lenti þjóðin í "ólæknandi" þunglyndi

  fram á miðja 21 öldina.

  Ekki víst að við lifðum slíka óáran af.

  En græja kartöflur næst.

  Góðar stundir og njótið kvöldsins.