Gleðilegt og gott sumar.

  Þeir slúttuðu vetri með mergjuðum djöfulgangi og hasar upp við Rauðavatn, lögregla og vörubílstjórar í gær.  Undarlegt að sjá, á friðsemdarlandinu litla Fróni.  Sjálf duddaði húsfreyja sér í vinnuna, hafði mikið að gera og sótti tvo fundi að auki.

  Í dag aftur vinna hjá húsfreyju, en  öllu rólegra yfir lögreglu og ökuþórum vörubifreiða.  Og annað í fréttum þolanlega rólegt.  Að vísu var einhver bévítans rottugangur að hrjá íbúa við Réttarholtsveg, hér í borg, og gleðst húsfreyja í hjarta sínu yfir því, að búa austan við Elliðarár.  Enn sem komið er slíkir pestargestir sjaldgæfir á þeim slóðunum.  Hrollur!

  Skemmtilegasta fréttin að mati húsfreyju, var hinsvegar frétt frá Turkmenistan.  Þar er hinn hugumprúði og "nafnstutti" forseti þeirra, hann "Gúrbangúlíj Malikgúlíjevítsj Berdímúkhammedov" að breyta nöfnum mánuðanna.  (Fengi ALDREI fullt nafn skráð á litla Fróni, eru heilir 40 bókstafir í nafni þessu.  Talvan á hagstofunni "bræddi" úr sér með hraði, ákvæði Túrkmenistanforsetinn að flytjast búferlum til litla Fróns)  En hinn ágæti forveri Berdímúkhammedovs ( "sextán" stafir bara í eftirnafninu), hin hógværi og lítilláti Saparmúral Nijazev, endurskírði alla mánuði ársins, árið 2002.  Skírði þá í höfuðið á sjálfum sér og foreldrum sínum.  Svo líklega hefur janúar útlagst "Saparmúral", og febrúar "Nijazev" o.s.fr.  En húsfreyja telur að foreldrar Níjazevs hafi heitið töluvert "mörgum" nöfnum (miðað við 12 mánuði í árinu), og efalaust löngum líka.  Hefur þá verið fremur "óþjált" í munni fyrir Túrkmenista að ræða mánuðina.  Svo mánuðirnir fengu aftur sín gregorísku nöfn, þ.e. jan., feb. og so videre, eins og flestir jarðarbúar.  

  Telur húsfreyja, að okkur hér á litla Fróni þætti ekki gott, ef janúar yrði skírður "Geir," febrúar "Haarde", mars "Ingibjörg", apríl "Sólrún" o.s.fr..  Þá væri karl minn að halda upp á afmælisdag sinn "annan í Sólrúnu", en dóttirin ætti afmæli "16. Geir".  Alverst þætti húsfreyju þó, að lenda í að eiga afmæli "30. Björn Blöndal", og tæki reyndar aldrei slíkt í mál.  Strax skárra að hafa það "30. Össur"!

  En svona til að reka endahnútinn á málið með gamla Nijazev, þá má nefna það að hann kallaði sig "alföður allra Túrkmenista".  Hógværir og lítillátir menn, forsetar Túrkmenistans.

Vor í lofti

Athugasemdir

[Solla Guðjóns, 24.4.2008 kl. 21:27]

Gleðilegt sumar elsku Sigga mín.

[arny (IP-tala skráð) 25.4.2008 kl. 13:17]

gleðilegt sumar....við á pestar völlum..fögnum sumri með hor í nös og eyrnaveseni...eyjarferð  í bígerð hjá sumum.b.kv.addý

[Sigríður Sigurðardóttir, 25.4.2008 kl. 16:54]

  Sömuleiðis, Sollan mín.

  Húsbóndinn á þessu heimili líka, nema hjá honum er bæði hor og hósti ásamt mergjaðri hálsbólgu.  Bið að heilsa Eyjarfaranum og svo út í Eyjar.  Svo óska ég ykkur öllum gleðilegs sumars, og þakka veturinn.