Steinhætt að snýta sér....

  ,húsfreyja!

  Þó úr nefi renni í stríðum straumi

  á köldum vetrardögum,

  FÆR ÞAÐ BARA AÐ RENNA!

  Stórhættulegur andskoti, samkvæmt

  hollenskum vísindasnillum þessum.

  AÐ SNÝTA SÉR!

  Býður upp á HEILABLÓÐFALL!

  Og stunda kynlíf og drekka kaffi

  eru vísast til bullandi áhættuþættir einnig.

  Svo að súpa á kaffibolla í miðju "dodoi" með elskunni sinni,

  og snýta sér í leiðinni......gleymið því, gætuð gott eins tekið inn eitur!

  DAUÐANS MATUR!, segja hinir snjöllu frá Hollandi.

  (Og elskan yrði aldeilis ekki hress

  með svoleiðis gutl og gauf í miðju "dodoi" heldur)

  Þetta líst húsfreyju ekkert á, og er miður sín!

  Kynlíf viðheldur jú mannkyni, svo ekki sér hún fram á að

  okkur gangi að láta af slíku athæfi.

  Kaffidrykkju getur hún heldur ekki hugsað sér, að mannkyn

  geti gefið upp á bátinn.

  Án morgunkaffis síns, er húsfreyja hismið eitt frá því

  klukkan 07:30 til 12:00, en líkamsklukka hennar

  hringir að öllu jafna RÆS á hádegi!

  Húsfreyja er ekta B-persóna, líkamsklukka hennar

  stillt á SVEFN frá 01:00 eftir miðnætti til 12:00 á hádegi.

  RÆS!  FRAMKVÆMA! og STUÐ! eru svo 3 stillingar hennar

  á líkamsklukkunni frá hádegi til rúmlega eitt eftir miðnætti!

  Þetta þýðir aðeins eitt:  Tíminn frá 07:30 til 12:00 var bara

  búinn að vera eitt stórt hrikalegt VESEN fyrir húsfreyju,

  þá hún mætti á morgunvaktir fyrstu ár sín í starfi.....

  eða þar til hún uppgötvaði

  dásamlegasta drykk allra tíma:  BLESSAÐ KAFFIÐ.

  Svefndrukkin grámoskulega vofan í líki húsfreyju,

  sem rorraði meðvitundarlítil á stólunum í morgunrapportinu,

  gjörsamlega gufaði upp við fyrsta kaffibollann.

  DING!  VÖKNUÐ! Í VIÐBRAGSSTÖÐU!

  Húsfreyja dýrkar kaffi, og getur ekki hugsað sér að

  láta af kaffidrykkju, enda vinnur hún nú eingöngu morgunvaktir.

  Kynlífið er ekki til umræðu, svo eftir stendur að hætta

  öllum SNÝTUM, heilaæðum sínum til björgunar og góðrar heilsu.

  Jamm.

  Það er von húsfreyju að, hollensku vísindasnillar þessir,

  taki það að sér næst, að finna LÆKNINGU við KVEFI hið

  snarasta.

  Annars er næsta víst að fólk fari í umvörpum að drepast úr HOR!

  Góðar stundir á vorlegum föstudegi.

Kaffi, kynlíf og snýtur hættuleg heilsunni

Hehehe...misheppnaðir karlar í kálhausavanda!

  Þetta mætti túlka sem svo að hér á

  jörðu væri algjörlega "öfugsnúið" mannkyn.

  Eða bara hreinlega SAMKYNHNEIGT!

  Hommar allt saman!

  Allir sem einn!

  Allt fullt af körlum skotnum í "misheppnuðum" körlum,

  og flestir hinir misheppnuðu karlarnir hommar sömuleiðis!

  Skotnir í körlum.

  Hehehe...kitlaði hláturtaugina húsfreyju, frétt þessi.

  Sér hún fyrir sér heilu hersveitirnar af "mislukkuðum" körlum

  í "kálhausaræktinni" sitjandi dag og nótt á salerninu,

  símígandi, á meðan gæludýr allra heimila eru dauðans

  matur og "greftruð" í akkorði í dýrakirkjugörðum á 28 daga fresti

  þá "misheppnuðu" karlarnir á heimilinu eru á blæðingum.

  Hehehehe...gaman að þessu.

  En það telur húsfreyja næsta víst,

  að heldur viti karlmenn meira um konur sínar í dag,

  en Albertus Magnus þessi....

  altént nóg til að þurfa ekki að DREPA þær.

  Góðar stundir og verði ykkur "sumarkálið" að góðu.

Konur séu misheppnaðir karlar

Blóðglundur í glasi...

  ..aldeilis eitthvað, sem

  þörf er á að blessa, á

  þessum síðustu og verstu tímum.

  Svo segir hans háæruverðugi heilagleiki,

  Benedikt, sá sextándi í Róm.

  Þar með gutlinu úr sáluðum páfa,

  elskulegum Jóhannesi Páli, komið

  fyrir meðal allra hauskúpanna af Jóhannesi

  skírara, krossaflísum þess frá Nasaret upp á

  nokkur tonn og ekki má gleyma  BLESSUÐUM nýfundnu

  "nöglunum" sem brúkaðir voru til að

  negla upp Nasaretann,

  sem einhver snjall kvikmyndagerðamaður

  datt oná í Ísrael nú á dögunum.

  HELGIR DÓMAR!

  HALLELÚJA!

  Hvorki meira né minna.

  Jamm, orðinn að "dýrðlingi" blessaður

  sálaði pólverjinn, sem gengdi störfum páfa

  á efri árum, ferðaðist grimmt um allar trissur,

  komst jafnvel í það að smella kossi á "malbikið"

  á flugbrautinni inn í henni Keflavík okkar Frónbúanna.

  Hefur sjálfsagt skilið eftir á malbiksbút þessum

  munnvatn sitt og svita sá dýrðlegi páfi,

  okkur Frónbúum til dýrðar og heilla.

  Og svona líka rosalega "heilagir" líkamsvessar að

  leka niður á frónverskt malbik, að það hálfa væri nóg.

  Húsfreyju finnst nú kjörið tækifæri, að koma

  vel "páfakysstu malbiki" þessu í verð, og bjóða

  þeim sextánda að kaupa og koma fyrir í

  sölum sínum innan um aðra "helga dóma".

  Ekki mikið mál að finna nákvæmlega,

  hvar "sá dýrðlegi" hné niður á kné sín á frónversku

  malbiki, hér um árið, (sjálfsagt sjálflýsandi míní-

  GEISLABAUGUR á sveimi fyrir ofan þann helga stað)

  skella loftpressunni á blettinn  og mæla út,

  (10x10x10 t.d),  ná upp í heilu lagi og

  senda þeim sextánda í ábyrgðarpósti.

  Rukka heilagleikann hóflega fyrir "helga dóminn",

  200 þúsund kall á hvern centimetra eða svo.

  Myndi aldeilis sóma sér vel, grásvart frónverskt

  malbikið innan um morknaðar hauskúpur, blóðglundur í glösum og

  ryðgaða nagla þarna austur í Róm.

  Ekki spurning.

  En matur næst á heimili húsfreyju;

    Átti ég forðum áform glæst

    eina von sem ei gat ræst.

    En nú er sú mín hugsjón hæst

    hvenær verður étið næst.

                         (Húsfreyja veit ekki höf.)

  Góðar og "helgar" stundir í Páskalok.

Blóð úr páfa helgað

...miðað við að EKKI sé dælt sandi í sumar.

  Og mennirnir ekki hálfnaðir

  með þessi "örfáu" tonn eða 180 þúsund

  í það heila, sem þeir áttu að dæla

  burt úr Landeyjahöfn.

  Það er aldeilis.

  Setja upp "stöðvunarkyldu" á Markarfljót þar með?

  Og hvað, beina öllum sumarlægðum með

  "óvenjulegar" ölduhæðir beina leið

  til Betu bjútí bretanna í sumar, enda kona sú

  "há-öld-ruð! og munar ekkert um "háar öldur" við

  sína konunglegu landsteina?

  Jaso, lítil verk og löðurmannleg þá framundan hjá

  vegagerð okkar Frónbúanna.

  Aðeins dútlerí við að eiga við náttúruöflin,

  Markárfljót og veðurguðina.

  Hættir að moka í Landeyjahöfn!

  Komið nóg af helvískum sandaustri.

  Búið spil!

  Það var og.

  En húsfreyja spáir því að eðalferjan Herjólfur sigli

  eftir sem áður sína þriggja tíma leið í Þorlákshöfn,

  sumarlangt, hætti Skandalíu....ömmm fyrirgefið,

  Skandíumenn að dæla í maí.

  Og Landeyjahöfn verði lítt brúkuð, nema þá

  til að demba sér í ærlegan sundsprett í söltum sjó,

  þá ölduhæð er "venjuleg".....nú og ef enn fyllist

  höfn af aur og leðju, koma ætíð "hrísgrjónaakrar"

  upp í huga húsfreyju.

  Þá yrði sú höfnin aldeilis til einhvers nýt,

  fengju Landeyjarmenn nokkur tonn af

  hrísgrjónum í afrakstur að hausti.

  Verst að húsfreyja gæti trúað að

  seltan væri svona við efri mörk hvað varðar

  hrísgrjónarækt á þessum slóðum....en það má

  sjálfsagt leysa slíka smávægilega áskorun,

  ekki síður en "óvenjulegar"" ölduhæðir,

  og sand- og aurflytjandi smáfljót á Suðurlandi.

  Neipp, þvílíkt smotterí flækist ekki fyrir fólki

  í samgöngumálunum hér uppi á litla Fróni.

  Jamm.

  En eitthvað er húsfreyja að veltast með töluna 180 þúsund

  TONN í hausnum.

  Er enginn reiknishaus, húsfreyja, því síður fróð

  um viðráðanlegt sandmagn í höfnum við íslenskar strendur.

  En miðað við að Skandal...Skandia hefur aðeins dælt upp

  40 þúsund af þessum 180 þúsund tonnum sem þurfti að

  dæla upp úr Landeyjahöfn, og ekki er ætlunin að dæla meira,

  veltir húsfreyja fyrir sér HVAÐ hafi orðið af

  140 þúsund tonnunum sem eftir átti að dæla burt.

  Fóru þau eitthvað?

  Upp á eigin spýtur?

  Skroppin til Færeyja, kannski?

  Ný "eyja" myndast við Færeyjaklasann?

  Hehehe... tarna er merkileg frétt.

  Húsfreyja vonar Eyjamanna vegna,

  að sandælingu verði áfram haldið í Landeyjahöfn,

  hvenær sem ölduhæð er ekki "óvenjuleg" eða há,

  og höfninni verði komið í siglingafært lag fyrir sumarið.

  Húsfreyja er þá ákveðin í að nýta sér eins og eina ferð

  þaðan út í Eyjar í sumar....víst ansi þægileg og flott

  siglingaleið....sé ölduhæðin ekki því "óvenjulegri"!

  Góðar stundir og baráttukveðjur út í Eyjar.

Óljóst hvað Skandia dælir lengi

Flott SKÚBB þetta!

  Naglarnir fundnir!

  Sem brúkaðir voru til að negla upp

  Jesú frá Nasaret.

  Hallelúja!

  Benedikt sext... XVI hlýtur að hoppa hæð sína af hrifningu

  og andaktugri gleði yfir fundi þessum.

  Enn einar gersemarnar í helgigripasafn páfa.

  Munu sóma sér vel innan um "einhver tonn" af

  krossaflísum Krists, og "ótölulegum hauskúpum"

  Jóhannesar skírara.

  Talar ekki húsfreyja um alla líkklæðisstrangana,

  sem Jesú eru eignaðir.

  Himnesk gleði og hamingja katólskra um alla ókomna tíð.

  Gott ef sá sextándi bjallar ekki með hraði í Kára Stefáns.

  okkar Frónbúanna, og lætur rannsaka nagladásemdirnar

  og leita eftir DNA-sýnum.

  Ekki amalegt að vera máske með erfðamengi

  þess krossfesta frá Nasaret í ofanálag.

  Húsfreyja er þess fullviss að ísraelir munu fúslega

  láta nagla þessa af hendi til hins háheilaga

  Páfadóms á Ítalíu.

  Nema auðvitað þeir þurfi að brúka þá í "naglasúpu"....

  Það er víst kreppa í Ísrael líka.

  Góðar stundir og munið:  Betra er "naglfast" útigrill,

  en "fljúgandi grill",  á ferð í mergjuðum vorlægðum.

 

Segist hafa fundið krossfestingarnaglana

Flaut ekki upp?

  Fleiri, fleiri tonn af steypu og járni?

  Átti það að geta flotið upp, blessað

  bráðnauðsynlega tónlistarhúsið okkar,

  Frónbúanna?

  Og hvað?

  Þá hægt að "sigla" því?

  Koma í staðinn fyrir Herjólf, máske?

  Senda það í siglingar milli lands og Eyja?

  Eða átti það að geta dólað hringinn í kringum

  landið, með tónleika á nýjum áfangastað á hverju kvöldi?

  "Hringleikahús með tónlistarlegu ívafi"?

  Hehehehe...stóðst ekki mátið, Húsfreyja.

  Gerir sér fulla grein fyrir þeirri miklu áskorun byggingaraðila, að

  reisa heilt tónlistarhús út í sjó.

  Hægt að lenda í allt öðrum málum, en þá byggt er á þurru landi.

  En byggingasmiðir okkar Frónbúa bísna snjallir, og þeim ekki fisjað

  saman..... þó að þurfi að rífa niður einhvern helvískan haug af

  stáli af og til vegna galla, og setja síðan upp nýtt betra,

  hvað er það?

  Fara létt með slíkt.

  Svo er annað mál, hvort brýn þörf hafi verið á

  þessari miklu tónlistarhöll hér úti í miðju

  ballarahafi, þegar kreppa og bankahrun herjar á,

  og kostar orðið meira en að reka bíl í ár, að koma börnum

  sínum í tónlistarmenntun?

  Stefnir allt í það að tónlistarmönnum okkar Frónbúa muni

  fækka á komandi árum, og þeir muni jafnvel verða sjaldgæfari en

  lundinn Eyjamanna.

  Það líst húsfreyju illa á, því hún telur fallega tónlist næringu fyrir

  sálina.

  En svo má ekki gleyma að blessuð stálgrindahöllin er

  einnig ætluð í ráðstefnuhald.

  Það væri þá ráð að demba sér í þrotlaust ráðstefnuhald á

  árum komanda.

  Halda 3-6 á dag LÁGMARK, Jól og Páskar ekki undanskilin

  og hafa þá einn herlegan logarauðan söfnunarbauk

  í andyrinu, vel merktan þurfandi og fátækum tónlistarmönnum

  á vonarvöl með hæfileika sína og list.

  Muna bara að merkja hann kyrfilega:

  NO ICELANDIC KRÓNAS, PLEASE!

  ONLY EUROS, DOLLARS OR POUNDS!

  Ef í hart færi, og illa gengi að safna í baukinn,

  mætti bæta við:

  PAY OR WE'LL PLAY....ALL DAY!

  En gleði að blessuð tónlistarmerkta stálhöllin skyldi

  ekki fljóta á haf út, og enn meiri bullandi hamingja að hún

  skyldi ekki leka.

  Þeir tónlistarmenn sem þrauka kreppuna á litla Fróni,

  geta þá aldeilis slegið um sig í tónleikahaldi í HÖRPU um öll

  ókomin ár..... séu þá ekki allir salir uppteknir af ráðstefnuhaldi!

  Húsfreyja óskar tónlistarfólki öllu velfarnaðar,

  óskar því til hamingju með nýja tónlistarhúsið.

  Megi þeir vel njóta...og við hin tónlistarinnar. 

  Góðar stundir.

Harpa reyndist pottþétt

Ísland er eitt af ríkustu löndum...

  ...heims".

  ("Iceland is one of the richest countries in the world")

  Norsaranum var mikið niðri fyrir.

  "You see the point here"!

  "You have a lot of money".

  "Hjálpi mér" hugsaði húsfreyja," bankahrunið og

  og fálan hún Ísbjörg hafa alveg farið fram hjá norsaranum".

  Norsarinn æddi áfram:

  "But you are not doing your work, you are not doing nursing".

  Norsarinn var orðinn heitur.

  Hann bunaði út úr sér langri ræðu á bjagaðri ensku,

  þar sem hann níddi störf vestrænna hjúkrunarfræðinga

  niður í svaðið, sagðist að vísu mundu aðeins níða okkur niður til að byrja með...

  "you see the point here"?

  Húsfreyja sá engan skrattans "point" neins staðar,

  nema þá bláleitan nefbroddinn á norsaranum, og svo beitt

  svipþungt andlit kollega síns nokkur sæti frá sér.

  Sú kona þekkt fyrir ákveðni, fagmennsku og dugnað,

  ásamt stóru skapi.

  Eins gott að norsarinn gusaði stressuðum hlátri

  frá sér af og til, svo leit út fyrir að hann væri að mestu að gera

  beitt grín að áheyrendum.

  Húsfreyja glotti með sjálfri sér:  "Reverse psychology.

  Gott og vel.

  Snúa fólki á sitt band með því að

  fá þá til að gagnrýna sjálfa sig og störf sín í tætlur,

  koma þá með flottar nýjar lausnir, hrósa fyrir það sem vel er gert,

  og hvetja til að "kaupa"  hjálpartæki sem bæta gæði vinnu.

  Húsfreyja fylgdist spennt með norsaranum.

  Hann var bísna fróður, og tættist víða um lönd með

  alls konar tölur um afspyrnu lélega hjúkrun.

  Reif heimaland sitt Noreg niður í tætlur "heilbrigðiskerfislega".

  "And we have a lot of oil-money, and still we don't take proper

  care of our old people".

  "AND YOU DO NOT TAKE GOOD CARE OF OLD PEOPLE HERE IN

  ICELAND" hrópaði norsarinn fagnandi.

  "Still you hve a lot of mony and plenty of time at work,

  but you have stopped nursing"!!!

  Ygglibrún kollega húsfreyju versnaði að miklum mun.

  Nokkrir aðrir áheyrendur slepptu frá sér taugaveikluðum

   vantrúaðarhlátri. 

  Deildarhjúkrunarfræðingurur í þriðju röð smitaðist af eldmóð

  norsarans, "JÁ  við erum hættar að hjúkra, sitjum fastar í

  pappírsvinnu alla daga" kallaði hún upp.

  "I LOVE YOU" hrópaði norsarinn upp af andakt og einskærri

  gleði yfir því að níðið skyldi svínvirka.

  Sú á þriðja bekk roðnaði í kinnum af ánægju.

  Húsfreyja kyngdi hlátrinum og muldraði í hljóði: 

  "HALLELÚJA"!

   Varð hugsað til deildar sinnar, 25 manna deild, þar sem

  18 sjúkir heimilismenn eru hjólastólabundnir,

  hinir göngugrindafærir.

  Húsfreyja eina hjúkkan á vakt dag eftir dag, sinnir

  hjúkrun sinna skjólstæðinga, bæði líkamlegri og andlegri,

  tekur á bráðaveikindum, sér um að senda fólkið sitt

  í rannsóknir eða á bráðamótökur,

  sinnir deildarstjórastörfum á harðahlaupum, ræðir við

  starfsfólk, skipuleggur dagleg störf þeirra, ræðir við ástvini

  skjólstæðinga, fylgist með virkni deildar, vöntun á

  hjúkrunarvörum,  þvotti, lyfjum, annast lyfjagjafir,

  skiptir á þvagleggjum,  á magaslöngum, fylgist

  með breytingu á getu sinna heimilismanna,

  er stöðugt að meta líðan þeirra, er hjartabilun

  í uppsiglingu, lugnabólga, þvagfærasýking eða

  er jafnvel öldungurinn að búa sig undir að kveðja þessa jarðvist.

  "YOU SEE THE POINT HERE"!

  Norsarinn í ham.

  Húsfreyja hrökk upp frá hugsunum sínum.

  Var búin að tapa þræðinum hjá norsara.

  Einbeitti sér.

  Hann sem betur fer enn að níða vestræna hjúkrunarfræðinga.

  Missti ekki af neinu merkilegu, húsfreyja.

  Norsarinn hvessti snörpum augum yfir hópinn.

  Hundrað og sextíu hjúkkuaugu mændu á hann.

  "DON'T TELL ME YOU DON'T HAVE TIME OR MONEY!

  "YOU HAVE BIG JEEPS IN ICELAND, AND FULL

  RESTAURANTS OF PEOPLE ON WEDNESDAYEVENINGS",

  þrumaði karl.

  "AMEN" hrópaði húsfreyja í huganum.

  Hún var komin með bullandi "Gunnar í  Krossinum-tilfinningu".

  Karl glotti og hélt áfram með ýmsan fróðleik, með dassi af

  hjúkkuníði hér og þar.  Skot á mikið ríkidæmi frónbúa.

  Loksins kom matarhlé.

  Það var grand.

  Íslensku sölustjórarnir höfðu vandað til verksins,

  allt var gott og hressandi

  Áttatíu hjúkrunarfræðingar snæddu og spjölluðu,

  einhver hvíslaði að það væri skrítið að sitja undir

  því að það sem við ynnum dags daglega væri ekki

  lengur talið "hjúkrun"!

  Húsfreyja reyndi að hughreysta viðkomandi,

  og sagði að nú væri líklega neikvæðu yfirhalningunni lokið,

  næst yrði karl ekkert nema jákvæðnin og gleðin, því hann vildi

  selja okkur ný og glæsileg hjálpartæki.

  En NEI!

  Norsarinn demdi sér vissulega í mikla sölukynningu á

  "því besta sem völ er á í hjúkrun aldraðra", en hann hnýtti

  áfram í áheyrendur og var afspyrnu kaldhæðinn við

  annan íslenska sölustjórann..." oh, you're going to use you brain NOW".

  Norsari var farin að pirra húsfreyju undir lokin, og hún var þeirri

  stund fegnust að komast út í vor-slagveðrið.

  Hafði skyndilega fengið það á tilfinninguna, að norsarinn væri

  eitthvað spældur út í frónverska þjóð, jafnvel eitthvað bitur.

  Máske ekki búin að jafna sig á því, að við skyldum YFIRGEFA

  Noreg þarna um árið...874 eða þar um kring, því okkur hugnaðist

  ekki lengur lengur það land til búsetu.

  En það getur sosum verið vitleysa hjá húsfreyju,

  eigi að síður segir húsfreyja og skrifar...og stendur við það:

  LEIFUR HEPPNI VAR ÍSLENDINGUR OG VERÐUR

  ÆTÍÐ!

  OG HANA NÚ.

  Góðar stundir.

Þrælar Hjörleifs....

  ...að trufla mokstur í Landeyjahöfn?

  Altént beinahrönglið þeirra.

  Jaso, og húsfreyja sem hélt að þeir þrælar hefðu

  flestir ef ekki allir flúið í Eyjar út og "Ingó fyrsti"

  landnámsmaður murkað úr þeim líftóruna

  seinna meir, með sínu liði.

  Svo eru þeir bara að svamla um í Landeyjahöfn

  tólf hundruð árum seinna, og skapa Herjólfi, eðalferju,

  tjón, tjöru og ekkisens vandræði.

  SJÍSS.

  Ekki að furða, að Herjólfi gangi illa að komast inn í

  Landeyjahöfn!

  Hún er full af MANNABEINUM!

  Andskotinn í grásúrri ostasósu!

  JARÐA þrælmeninn hið SNARASTA!

  Kalla til "allsherjargoðann" og fá hann til að

  rusla lýð þessum í "heiðinn haug", svo Herjólfur

  fái silgt í friði og andaktugri spekt inn í sína

  Landeyjahöfn.

  Svo eru menn að kenna Eyjafjallajökli með sína smá

  gosspýju um að spilla siglingu inn í Landeyjahöfn.

  Og "smáfljótinu" Markarfljóti  með eitthvert tutl af sandi.

  Ja svei!

  Fúlir "Hjörleifsmyrðandi" þrælar eiga hér greinilega alla sök,

  og til vansa að Herjólfur skuli hafa þurft að sigla

  í "þrælslegu beinahröngli" mánuðum saman.

  Hefði strax verið mun skárra, ef þarna hefðu verið

  eðal "víkingabein" á ferð nú eða beinahröngl af pöpum.

  Hehehehe.....Fyrsti apríl er ágætis dagur.

  Góðar stundir.

 

Fornleifar í Landeyjahöfn

Farin!

  Asskoti er að heyr'etta.

  Atli og Lilja búin að flokka sig burt

  úr flokknum.

  Flokklaus, óflokksbundin og á mergjuðum flokksflótta.

  Flokkurinn þeirra góði gengin á svig við öll fyrri markmið,

  orðin "Samfylkingeraður".

  Jaso.

  Hvað er atarna?

  --RÆKNI

  Þetta er ekki þjóðrækni

  og þaðan af síður guðrækni

  heldur íslensk heiftrækni

  og helvítis bölvuð langrækni.

                                                          Káinn.

 

  VESEN!

  Vinstri grænt vesen.

  Jæja, stjórnin stendur...höllum fæti, en stendur.

  En auðvitað er eftir að kjósa um helvísku

  kerlingarfáluna hana "Ísbjörgu".

  Syndagjöldin

  Hlaðin sorgum heldur öld

  heim; þess margur geldur,

  er þeir borga ekki í kvöld

  og ekki á morgun heldur.

                                                     Káinn.

  Svo enn getur allt farið fjandans til, stjórnarfarslega.....

  ef það er ekki farið þangað nú þegar.

  Ef að horft er, allir sjá

  -eins og í varga hreysi

  þar er skortur öllu á

  öðru en bjargarleysi.

                                               Káinn.

  Jamm, ekki er það gæfulegt, en sjálfsagt að

  hver maður fylgi sinni sannfæringu.

  Lífsins skóli getur verið þungbær, og ekkert grín

  að fylgja bévítans "pólitíkinni" innan flokka

  frá A til Ö í kreppu og harðæri.....enda er það

  ljóta ekkisens tíkin....slagar hátt upp í fáluna hana

  "Ísbjörgu".

  En maður kemur í manns stað, og enginn er ómissandi,

  svo fari Lilja og Atli vel og gangi þeim allt í hag.

  Verst að húsfreyja er að hafa áhyggjur af blessuðum

  öðlingnum honum "Jóni Sigurðssyni", sem líklega verður

  ærður af tunnuslætti og djöfulgangi þarna niðri á

  Austurvelli.

  Hann getur ekki einu sinni "mótmælt" djöfulgangi þessum

  og látum þar sem hann stendur á stalli sínum, þögull sem gröfin.

  Þetta er dauðans sorgleg sjón,

  sjón og heyrn er farin;

  helvíti er að horfa á Jón!

  Hefur hann verið barinn?

                                                      Káinn.

  Sjálf er húsfreyja ágætlega bjartsýn á lífið

  og tilveruna, þrátt fyrir launalækkun og niðurskurð.

  Henni er það bara eðlislægt.

  Ég trúi því stöðugt, að tíðin sé góð

  og tímarnir hagstæðir núna.

  Suður í Kansas er fádæma flóð

  í Florida steikjandi helvítis-glóð,

  en taktu ekki frá mér trúna.

                                                           Káinn.

  Hitt er annar handleggur að húsfreyja er lítt hrifin

  af bankastjórum frónverskum og ofurlaunum

  þeirra, og finnst fjandi hart að þetta skuli viðgangast

  í kreppu og niðurskurði.

  Góður, betri, bestur

  burtu voru reknir;

  illur, verri, verstur

  voru aftur teknir.

                              Káinn.

  Og sjálfsæðismenn sem fleiri pólitíkusar ötulir við

  að verja "ofurlaunin" og rífa kjaft í fjölmiðlum.

  Þú ert sveitar svívirðing,

  sótugi eldhús-raftur.

  Aftan og framan, allt í kring

  ekkert nema - kjaftur.

                                       Káinn.

  Jamm, það er ýmislegt á seiði í þjóðfélagi voru

  uppi á litla Fróni, og ekki allt réttlátt eða gott.

  Húsfreyja hefur t.d ekki fengið launahækkun

  "vegna álags" líkt og dómarar fengu á dögunum.

  Situr uppi með háþrýsting af stresssi og álagi,

  astmaskít og vöðvabólgu af sífelldu lyfjaryki,

  harðahlaupum, lyftum og aukinni ábyrgð.

  Fær enga yfirvinnu greidda lengur, verður að

  taka út í fríi.....þegar stofnuninni hentar,

   en þraukar samt , húsfreyja.

  Jamm.

  En að lokum ein ágæt speki um lækna:

  Læknar eru svo heppnir,

  að sólin skín á lækningar þeirra,

  en mistökin eru grafin þrjár álnir í jörð.

                                                                             Sókrates.

  Og eitt smáskot til karlanna, sem ætíð virðast "rétthærri" en við konurnar:

  Því meira sem ég kynnist karlmönnum,

  því betur fellur mér við hundana.

                                                   Madame de Sévigné.

  En góðar stundir öll sem eitt og kíkið á Káinn við tækifæri,

  margt hjá honum tær snilld.

Segja sig úr þingflokki VG

Dauðans matur...

  ...húsfreyja, samkvæmt fréttinni sem hún las

  á Vísir rétt í þessu:

  "Þeir skapstyggu lifa lengur en glaðlyndir".

  Andskotinn í grárri og súrri mysu.

  Tarna var ljótt að heyra.

  Þeir hinir skörpu og knáu vísindamenn hins

  friðelskandi Obama Bandaríkjanna, hafa verið að

  gaufa við það í hartnær 90 ár að fylgjast með

  fimmtán hundruð einstaklingum, frá barndómi og

  fram á efri ár.

  Þeir súru og fúlu hafa vinningin!

  "Það lifir lengst sem lýðnum er leiðast" ,

  sagði amma húsfreyju oft, og sagðist verða afgömul...

  og stóð við það og kvaddi 93 ára gömul þetta jarðlíf.

  Var reyndar skapstygg mín kæra amma, svo orð fór af,

  afspyrnu vinnusöm og vandvirk og lét ekki af störfum fyrr en

  kringum áttrætt.

  Svo hún virðist alveg smellpassa inn í rannsókn þessa.

  En ef rétt er, þýðir þetta auðvitað bara eitt.

  Húsfreyja er dauðans matur.

  Verður að fara drífa sig hið snarasta að rita

  ERFÐASKRÁ, velja sér eðalflotta líkkistu,

  líkklæði og velja sálmana......ææææ... sálmar.

  Húsfreyja getur talið á fingrum annar handar þá

  sálma sem henni finnast fallegir, og telur að

  ekki sé vinsælt að fólk sé jarðað undir jólasálmasöngi.

  Ætli það myndi ekki duga að spila QUEEN-disk í botni,

  slatta af góðum Bubbalögum með dassi af þjóðhátíðarlögum

  Vestmannaeyinga?

  "LÍFIÐ ER YNDISLEGT......"...nei, kannski ekki.

  Nú og svo verður húsfreyja að kanna fjárhagsstöðuna, til að sjá

  hvort hún hafi yfir höfuð "EFNI Á" að drepast

  fyrir aldur fram af einskærri gleði og gassagangi.

  Kostar víst orðið milljón að hola manni niður

  í þokkalegt stæði í kirkjugarði, steindauðum.

  Og allt í helvískum blankheitum og kreppukjaftæði.

  Í versta falli verður húsfreyja að hætta við að

  gefa upp öndina í miðju gleðikasti, gerast

  "gallsúrt meinhorn, fúllynd, vinnusöm og  hrikalega ergileg".

  Já, og fresta starfslokum út í hið óendanlega.

  "ÞIÐ GETIÐ STUNGIÐ ÞESSUM DJÖ.... ELLILÍFEYRIR ÞANGAÐ

  SEM LJÓSIÐ ALDREI SKÍN"!

  Verða elsta og arfafúlasta hjúkka í starfi sem sögur fara af.

  Hehehehe.....húsfreyja stóðst ekki mátið

  að grínast svolítið með frétt þessa.

  En hennar trú og mottó er og verður þrátt fyrir merkilegu

  rannsókn þessa:

  HLÁTURINN LENGIR LÍFIÐ.

  Góðar stundir og takið nú lífinu létt,

  þið lifið það hvort eð er ekki af.