Ný hugsun.... ný fátækt?

 

                                          Húsfreyja er grátklökk af einskæru þakklæti og gleði.

  Nú má hún, fyrir yfirþyrmandi náð fjármálaráðherra, hætta að

  safna sér  séreignasparnaði til elliáranna.

  Jessurríbobb!

  Brúka aurana í staðinn í það að greiða inn á höfuðstól

  húsnæðismálaláns hennar ("kaup við fyrstu eign" gasalega smart orðað).

  Allt að eina komma fimm milljón króna.

  Þvílík dásemd og alsæla.

  Býttar engu þó lífeyrissjóður hennar skerði greiðslur til hennar um 10-30%

  þegar hún kemst á ellilífeyrisaldur, og hún fái greiðslur sem nema helmingi

  fyrri mánaðalauna, og duga hvorki fyrir salti í grautinn, rafmagni og hita

  né skófatnaði, (en reddar henni máske rúmstæði inni á tveggja manna stofu

  á niðurskornu öldrunarheimili) bara ef hún fær að eyða séreignasparnaðinum

  sínum í höfuðstólinn á láninu sínu.

  Séreignasparnaðinn sem á að bjarga henni fjárhagslega, þegar

  skertar lífeyrisgreiðslur blasa við mánuð eftir mánuð, og húsfreyja

  er of gömul til að vinna lengur.

  Séreignasparnaðinn sem á að tryggja henni mannsæmandi líf síðustu

  æviárin, salti í grautinn, notalegt og hlýtt húsnæði, nýjan skófatnað af og til

  og björt rafljós á myrkum vetrum.

  Séreignasparnaðinn sem á að gera húsfreyju kleift að skreppa

  með Herjólfi til Eyja yfir helgi í sumarfrí, kaupa smá afmælisgjafir handa

  börnum og barnabörnum, splæsa á sig einni Dominós extra einu sinni

  í mánuði og kannski fara einu sinni í leikhús á ári og tvisvar í bíó.

  Já, svei, svona nýtingu á séreignasparnaði!

  Þá er mun betra að brúka þessa aura í höfuðstólinn...sem kannski lækkar

  eitthvað smá, um eina til tvær milljónir...nema auðvitað að verðbólgan

  tryllist....en það hefur ALDREI gerst á litla Fróni....eða hvað?....já og ef

  að ný kreppa skelli á....eða eitt lítið sætt BANKAHRUN dynji aftur á oss

  örmum fjármálavitfyrringum...en þetta tvennt getur AUÐVITAÐ allls EKKI GERST...

  og það að vertryggingin verði EILÍFÐAR-martröð á litla Fróni,

  er "nottla bara KJAFTÆÐI"!

  Já, séreignasparnaðinn okkar í höfuðstólinn STRAX.

  En þar sem STRAX er orðið svona hrikalega "teygjanlegt" hugtak í íslensku máli,

  ætlar húsfreyja að "teygja" á öllum ákvörðunum sínum

  varðandi séreignasparnað sinn, og þar sem til staðar er

  "pólitískur ómöguleiki" á efndum kosningaloforða hjá þessari ríkisstjórn,

  þá hyggst hún aðeins þiggja lækkun á höfuðstól láns hennar að svo stöddu.

  Annars er næsta víst að séreignasparnaðurinn húsfreyju verði horfinn í

  verðbólguhafaríi og verðtryggingarsukk, útþurrkaður,

  glataður og tapaður að eilífu í hafsjó nýrra reglugerða og frumvarpa

  sem snúast mest um að hyggla þeim peninga- og valdagráðugu.

  Jamm, húsfreyju er um og ó.

  Margir Frónbúar urðu að nota séreignasparnað sinn í bankahruninu

  2008, til að bjarga húsum sínum, og eiga því ENGAN séreignasparnað lengur.

  Þeir hafa ekkert val, þó þeir vildu fórna séreignasparnaðinum upp á von og óvon.

  Margir öldungar á litla Fróni eru að fá skertan lífeyrir mánaðarlega, sem dugir þeim

  fyrir framfærslu í 10-12 daga, ef þeir lifa SPART.

  Súrefni og H2O er svo á "menu" dagsins það sem eftir lifir mánuðs,

  komi börn og barnabörn þeim ekki til bjargar.

  Sumir þessara "greiðsluskertu" öldunga eiga ekki börn eða barnabörn, það

  kemur þeim ENGINN til bjargar.

  Húsfreyja hefur hitt einstæðinga, erna öldunga í heimahjúkrun, sem geta ekki lengur

  annast sína matseld vegna líkamlegra sjúkdóma, að veltast með matseðil

  í höndum, reynandi að velja 1-2 máltíðir á viku af heimsendum mat,

  svo þeir fái eitthvað að borða.  Fjárhagur þeirra leyfir ekki fleiri máltíðir,

  þó ekki sé máltíðin dýr.

  Blóðugt.

  Séreignasparnaður hefði komið þessu fólki vel í ellinni.

  Jamm en brilliant, að LEYFA oss fjármálavitfyrringum að nota okkar EIGIN

  sparnað til að BJARGA heimilum okkar.

  Góðar efndir þetta á kosningaloforðum.

  Sumt er bara SNILLD.

  Góðar stundir, og í guðanna bænum notið séreignasparnaðinn ykkar í

  eitthvað sem þið ÓSKIÐ að nota hann í.

 

„Felur í sér nýja hugsun“

Vér fjármálavitleysingjar ...

  ...og pólitískir "halanegrar" hér uppi á Litla Fróni,

  sem treystu og trúðu árum saman á flokk

  einn pólitískan sem kenndi sig við sjálfstæði,

  megum nú bíta í það súra epli, að hafa skitið upp á

 bak og treyst kolvitlausum flokki til að stjórna oss....

 ÁRUM SAMAN.

  Vér armir rugludallar í pólitík, trúðum í blindni á, að flokkur

  sjálfstæðis myndi leiða oss kreppta og óðaverðbólguþjáða

  fram til jöfnuðar, velferðar, frelsis og sjálfstæðis.

  VÁV!  Vorum við arfaheimskir og auðtrúa.

  Uppskárum bankahrun, djúpa kreppu og aðför að velferðarþjóðfélaginu.

  Fimmföldun, lágmark á skuldum okkar, minni kaupmátt,

  hækkað vöruverð, hrikalegan niðurskurð í heilbrigðis- og menntamálum.

  Öldungar gerðir að "annars flokks" þegnum.... öryrkjar og fatlaðir

  "skornir niður", vegagerð skorin niður osfr. osfr.

  Og flokkur sjálfstæðis... jamm flokkur sjálfstæðis, hvað gerði hann?

  GUÐ BLESSI ÍSLAND!...var eitt.

  (Flestir vita að Guð hjálpar þeim sem hjálpa sér sjálfir.)

  Gerðu "alltaf-að-vara-við-hruni-þegar-hann-var-ekki-að-lofa- sterka-

  stöðu-frónverskra-banka" SEÐLABANKASTJÓRA að ritstjóra yfir

  helsta málgagni sínu, var annað.

  Og í þriðja lagi...... í þriðja lagi...öööö......?

  Húsfreyju dettur bara ekkert "hið þriðja" í hug.

  Núverandi ríkisstjórn tók við VERSTA búi allra tíma,

  þegar hún settist á valdastóla.

  Lífróður verið róinn fyrir vora frónversku þjóð...sumt vel gert...

   annað miður....og sumt ekki einu sinni komist til framkvæmda.

  Samt er þessi ríkisstjórn heilagrar Jóhönnu Sig.,

  stödd á toppi Everestfjalls í hennar huga,

  hvað dugnað og vinnu fyrir "þjóðina" varðar,

  á meðan fráfarandi ríkisstjórnir sjálfsæðismanna, lafa á gömlu morknu

  akkeri úr skipsskaða, út í Faxaflóa þar sem hann er DÝPSTUR.

  Segi Villi hinn skarpi framkvæmdastjóri Samtaka atvinnulífsins,

  að litla Frón sé orðið nyrsta Afríkuríkið, er það sjálfsagt hárrétt hjá honum.

  Hann ætti að vita það.

  Sjálfstæðisflokkurinn kom okkur í þessa eðal stöðu.

  Svo mörg voru þau orð.

  Góðar stundir og munið að brýna spjót ykkar fyrir næsta

  Afríkuríkjafund.

Segir Ísland nyrsta Afríkuríkið

Ónotaleg gull af mönnum.

  Það er ekki nokkur spurning að sjálfstæðismenn

  eru fremur "ónotalegt" fólk í huga húsfreyju.

  Það hefur bitur reynsla hennar af áratuga veru þessa flokks

  í stjórn landsins á árum áður kennt henni.

  Undir stjórn sjálfstæðismanna hefur viðgengist

  fordæmalaus spilling í stjórn landsins árum saman, ásamt vanrækslu og lítilsvirðingu í

  garð þjóðarinnar að mati húsfreyju.

  "Leppflokkar" þeirra sjálfstæðismanna, þ.e. flokkarnir

  sem þeir velja með sér í stjórn, eru síða þægilegir

  "sökudólgar" þegar upp kemst um svikin kosningaloforð,

  spillingu og óstjórn.

  "Framsóknarmaddaman" var hreinlega líflátin, hengd, snúin úr,

  steikt og steindrepin, eftir áratuga

  "syndaburð" með sjálfstæðismönnum í stjórn.

  Einu ástæðuna fyrir því að ekki er búið að kjöldraga,

  sökkva og drekkja Samfylkingunni, telur húsfreyja vera sú,

  að "heilög Jóhanna" tók við forystu þess flokks.

  Sú kerla er seig, hörkudugleg og rær nú lífróður fyrir þjóðina, eftir að taka við versta

  klúðri sjálfstæðisflokksins...EVER.

  Verst að konan sú er með heilmikið af "jólasveinum" í stjórn með sér,

  sem hringsnúast eins og "bollarússibanar" í tívolíi....óvanir að

  vera ekki einvörðu "leppar" fyrir Sjálfstæðiflokkinn.

  Samt skárra að hafa "jólasveinana" en "ónotalegu gullin af mönnum"

  í stjórn.

  Og sjálfstæðismenn mega alveg vera með "vonda tilfinningu",

  húsfreyja, og hana grunar að hún sé ekki ein um það,

  lifði með "vonda tilfinningu" í mörg ár, á meðan þeir sátu

  á ráðherrastólum.

  En Skaupsfólk stakk beint á meinin sjálfstæðismannanna um

  áramótin...og snéri reyndar hnífnum í sárunum hressilega...

  en þannig eru nú einu sinni Áramótaskaup, og húsfreyja telur

  að sjálfstæðismenn hafi átt skilið kaldar kveðjur frá þjóðinni.

  Allir fengu sinn skammt, Jóhanna og Steingrímur einnig.

  Húsfreyja er sátt við sitt Áramótaskaup, þó nokkrum sinnum

  færu menn og konur þar yfir strikið.

  En það er einlæg von húsfreyju að gott og heiðarlegt fólk

  "allra" flokka á Alþingi sameinist um að koma þjóðinni

  út úr þrenginunum, skapi sér þannig góðan orðstý og geti verið stolt

  af verkum sínum.

  Verkin verða síðan metin í Áramótaskaupi 2012....

  Góðar stundir.

 

 

Ónotatilfinning sjálfstæðismanna

Að lokum sigursæl þjóð.

  Margt hefur verið misjafnt sagt um "heilaga" Jóhönnu og

  ríkisstjórn hennar, en það má hún eiga að hún hefur róið

  "lífróður" til þess að bjarga því sem bjargað varð í hruninu.

  Og þó húsfreyju sem öðrum Frónbúum gangi illa að finna

  "skjaldborgina" heimilanna, þá viðurkennir húsfreyja fúslega,

  að hún hefur það yfirleitt  þolanlegt og svo bara nokkuð ágætt af og til. 

  Á nóg að bíta og brenna, þó lífið hafi verið bæði auðveldara

  og fjárhagslega tryggara fyrir hrun.

  Hefur þjappað þjóðinni saman, að lenda í þessum hremmingum.

  Við styðjum við bakið á þeim sem minna mega sín, eftir sem áður...

  skiptir engu þó fjárhagurinn sé almennt bágari.

  Mottó húsfreyju er: "Ég er jafndauð fjárhagslega, þó ég

  gefi einhverjar 10- 15.000 krónur í hjálparsamtök eða líknarfélög

  tvisvar eða þrisvar yfir árið".

  Húsfreyja telur næsta víst að hennar ágæta frónverska þjóð

  muni lifa hrunið og kreppuna af, líkt og flestar aðrar hremmingar sem

  á hana hafa skollið.

  Við höfum lag á því að sigrast á flestum okkar erfiðu áskorunum með

  seiglunni, fúllyndinu, kaldhæðninni, samstöðunni og lífsgleðinni.

  Stundum detta ríkisstjórnir okkar niður á snjallar lausnir,

  og síðan rata þær einnig í tómar ógöngur, spillingarsukk og svínarí.

  Og þegar illa fer er velferðarsamfélagið okkar skorið niður....og skorið niður.

  Hagur okkar versnar um tíma og þjónustunni hrakar.

  Við erum þessu alvön.

  Spýtum í lófana.

  Borgum brúsann.

  Bölvum helvísku skítapakkinu á Alþingi.

  Hötum fjórflokkana.

  Erum brjáluð út í gjörspillt bankakerfið og stjóra þess með einhverja

  djö.... verðtryggingu á lánum, sem hvergi þekkist á nokkrum stað

  á jarðarkringlunni nema hér.

  Sendum fégráðugum og spilltum pappírssnepla-víkingum tóninn-

  glataður orðstýr þeirra vinnst ekki aftur.

  Og við lifum AF.

  Sigurinn er okkar, því við erum kjarni þjóðarinnar, ísinn og eldurinn,

  hugarorkan og framkvæmdaraflið.

  Góðar stundir.

Útvarp Matthildur gengið aftur?

  "Ja, hvurn árann", eins og afi

  húsfreyju hefði sagt.

  Dabbinn mættur með gömlu Matthildar-brandaranna.

  Og það í fréttatíma á flatskjáum okkar landsmanna.

  Jaso.

  Undur og stórmerki!

  Furða og forviða!

  Japl, jaml og fuður.

  Blaður og málæði!

  Ritstjóra-Moggagrín af "ég- og -blái-flokkurinn-erum-saklaus"-sortinni.

  Húsfreyja finnur til með Sjálfstæðismönnum.

  Þetta var afleit auglýsing fyrir landsfund þeirra.

  Þarna er ágætis fólk inn á millum, sem vill taka þátt í því

  að byggja upp litla Frón eftir kreppu, án þess að vera

  kasta skít í mótherja sína, og gera lítið úr vinnu þeirra.

  Svo fá þeir manninn sem var snillingur litla Fróns

  í  "finnum-sökudólg-til að-taka-við-skítnum" vinnuháttum ,

  fyrrum Matthildargrínara

  og núverandi óritskoðaðan Moggableðilsstjóra upp í pontu.

  Eins og að kasta skítugri tusku beint í andlit þeirra Sjálfstæðismanna

  sem eru í stjórnmálum til þessa að vinna að góðum málum.

  Jamm, þeim er vorkun.

  En húsfreyja hefur einnig verið að hafa áhyggjur af

  vinum sínum og samstarfsfólki á Suðurnesjum á árum áður, þar sem

  Sjálfstæðismenn hafa einmitt verið ráðandi í bæjarstjórn

  árum saman.....og sér hvergi fyrir endann á skuldafargi og

  niðurskurði ásamt versnandi kjörum og þjónustu við íbúa.

  Þarna þyngist róður jafnt og þétt, og það var myrkur tónn í

  spjalli fyrrum kollega húsfreyju, þá hún hitti sína elskulegu

  Suðurnesjamenn síðast, við útför einnar elskulegrar samstarfskonu,

  ekki alls fyrir löngu.

  Þá dettur húsfreyju í hug.

  Geta nú ekki vel þenkjandi Sjálfstæðismenn, sent fyrrum

  grínaktugan fyrrum foringja sinn út á Suðurnes með skemmtiatriði

  og uppistand, svona til að létta mönnum skap mitt í

  afleiðingum "kreppu"....sem er að sjálfsögðu ekki

  Sjálfstæðismönnum í bæjarstjórn að kenna...

  ekki á nokkurn handa máta.

  Þar er kreppan bara EKKISEN ÓHEPPNI af "ópólitískum" toga.

  Annað en við hér í höfuðborginni, sem höfum sjálfa

  HÖFUÐPAURA kreppunnar í stjórn...samkvæmt velviljuðum, óþreytandi

  og góðfúslegum upplýsingum frá Sjálfstæðismönnum í stjórnarandstöðu.

  Sér húsfreyja fyrir sér, að fyrrum foringi gæti mætt á hverju

  föstudagkvöldi í Stapann...ef ekki er búið að rífa Stapann vegna

  vanrækslu af völdum fjárskorts... og halda úti uppistandi og

  gríni í Matthildarstíl.

  Næsta víst að Suðurnesjamenn myndu mæta í stórum stíl.

  Grenja af hlátri og skemmta sér hið besta yfir furðulegum

  hugmyndum, hrokabröndurum og besservisseraskrítlum

  Matthildarkóngsins.

  Og altént gætu Suðurnesjamenn, ef þeim færi að leiðast grínið,

  losað sig við ódýru, útlensku tómatana sína upp á svið...

  en aðeins ef farið væri að sjá verulega á tómötunum af elli.

  Þannig myndu Sjálfstæðismenn slá tvær flugur með einu höggi:

  Útvega Suðurnesjamönnum billegt grín á erfiðum tímum,

  og um leið fá vinnufrið í flokknum......allavega á föstudögum.

  Og sem bónus:  Losa sig við ÓÆTA erlenda tómata í leiðinni...

  í stórum stíl.

  Húsfreyja óskar Sjálfstæðismönnum til hamingju með landsfundinn sinn.....

  ekki þeirra sök að "ræðumenn" eru mis vel lukkaðir.

  Góðar stundir.

Þrennt bjargaði Íslendingum

Tarna er blóðugt...

  ... hugsaði húsfreyja, um leið og hún

  tók fram öxi sína fyrir næstu Bónusferð,

  "erum að sigla í 7 milljarða manns,

  í hinu mikla veldi norska kóngsins,

  á meðan við dólum okkur á snigilshraða

  við fjölgunina hér uppi á litla Fróni".

  Húsfreyja spýtti við tönn, þurrkaði

  verstu blóðsletturnar af axarblaðinu með

  svuntu sinni, um leið og hún hrærði grimmt

  í nærri tómri "skyrtunnunni" með skaftinu af spjóti sínu.

  "Djö...var að vita þetta".

  Húsfreyja búin að gera öxina klára, dró fram

  sjóði sína, og hóf að telja silfur sitt sem henni hafði

  áskotnast sem laun fyrir vinnu sem "lukkuriddari",

  í síðustu ferð sinni á norskar lendur.

  "Andsk... var farið að ganga á sjóðinn, dygði varla fyrir

  skeinipappír og hálfu epli".

  Húsfreyja saug upp í nefið og ræskti sig hroðalega.

  Þetta var hrikalegt vandamál sem yrði að taka föstum tökum.

  Nú yrði hún að "brýna" helvíska öxina í ofnálag fyrir

  Bónusferðina, ganga síðan berserksgang, höggva mann og annan

  til þess eins að ná inn vikuskammtinum af skyri í hús.

  Varla að húsfreyja væri að nenna þessu.

  Hún gjóaði aftur augum á fréttina af fjölgun Frónbúa,

  á norskri grund.... "menning og siðir blóðug"... "og ofbeldi"

  notað til að leysa mál...húsfreyja tók upp öxi sína og brýndi í gríð og erg.

  "Nú" , hugsaði húsfreyja, "upphaflega fluttum við hingað

  út á þetta litla sker í miðju Atlantshafi, til að losna við

  freka og ofbeldisfulla, norska kónga og tókum auðvitað með okkur

  slatta af norskri menningu og siðum". Hnussaði í húsfreyju.

  "Hvað voru norskir blaðamenn eiginlega að tuða"?

  Það brast og brakaði í heilabúi húsfreyju undir víkingahjálminum.

  BLING!  Kviknaði ljós í myrkviðum hugarheima húsfreyju.

  "Auðvitað!  Helvískur barningurinn með sleifum á tunnur,

  potta og pönnur niður á Austurvelli, hlaut að vera að fara

  fyrir brjóstið á norskum frændum vorum.

  Að sjálfsögðu var þetta ekkert nema blóðugt ofbeldi

  á sárasaklausar tunnur, enn saklausari potta og pönnur og

  sleifar, að mati okkar frómu frænda".

  Húsfreyja glotti við tönn, spýtti norska "skroinu" í vaskinn:

  "Þannig hlaut að liggja í málinu".

  Húsfreyja snýtti sér hressilega um leið og hún pússaði

  snarlega axlarblaðið, svo á það glampaði.

  "Þá var bara eftir stóra spurningin.  Hví í ósköpunum

  voru Frónbúar að flytja umvörpum til Noregs aftur,  og þar

  að auki að fjölga sér líkt og kanínur í gamla landinu"?

  Húsfreyja hristi stríðar, langar flettur sínar undir

  hornóttum hjálminum:

  "Nei, það var andskotinn, ekkert hægt að fá botn í frétt þessa".

  Húsfreyja dæsti mæðilega yfir þungum þönkum sínum.

  "Mamma", tíu ára djásnið grátklökkt.

  "Sjáðu ég skar mig í fingurinn", blóð rann fagurrautt niður fingur

  barnsins.

  Húsfreyja stökk upp frá undirbúningi sínum fyrir ferð í búðina,

  klippti snarlega niður plástur framleiddan af þýskri fabrikku með

  útibú í Kaupmannahöfn, Gautaborg, Kaarina og "Osló" ,

  og smellti á djásnið.

  "Nú missti ég sko mikið blóð",  djásnið ekki alveg með 5 lítra-dæmið

  í mannslíkamanum á tæru, enda rennandi mannsblóð ekki

  dagleg...vikuleg....mánaðarleg...eða jafnvel árleg sjón hér í voru litla landi.

  "Jamm, greinilega BLÓÐUG menning og siðir hér uppi á litla Fróni",

  hugsaði húsfreyja og glotti með sjálfri sér.

  En gott og vel, norskir frændur vorir hafa sínar meiningar um

  okkur, örsmáa frændur sína, sem greinilega kunnum enn að gera

  "dodo"á erlendri grund.

  En búðarferð næst.

  Húsfreyja telur ekki líklegt að sú ferð verði á neinn máta blóðug....

  nema jú einn:  Helvískt "verðið" sem þarf að greiða fyrir skyrið

  og fleira matvænt verður BLÓÐUGT!

  Góðar stundir og njótið veðurblíðunnar.

Sjö milljarðar Íslendinga í Noregi

Góðir HÁRDAGAR...

  ...þar með framundan í

  amerískri pólitík,

  fyrst Trump neitar framboði.

  Nema auðvitað að "hárgreiðsla" Trumps sé

  í bullandi tísku meðal forsetaframbjóðenda

  í henni Ameríku.

  Þá er bandarísk þjóð í djúpum skít, og næsta víst

  að alheimur liggi í flogakasti af hlátri, þá amerískir

  forsetaframbjóðendur mætast á skjánum

  þar vestra í kappræðum.

  Gott ef frambjóðendur þeirra lenda ekki í hár saman,

  standa í tómum hártogunum og gerast

  gráir fyrir hærum langt fyrir aldur fram.

  Jamm, merkilegur maður, Donald Trump.

  Og hefur þokkalega gott sjálfsálit.

  Segist vera jafn vinsæll og Jesú frá Nasaret.

  Ekki amalegt það, en húsfreyja verður að viðurkenna

  að Donald Trump minnir hana lítt á þann heilaga frá

  Nasaret.

  Nei, þá var nú Jesú glæsilegri til höfuðsins, með eðal

  brúna og liðaða lokka.

  Satt að segja minnir herra Trump húsfreyju á annan

  fremur vandræðalega náunga og nafna hans.

  Nefnilega hinn matrósaklædda "Donald Duck".

  Góðar stundir á mánudegi,

  það er verið að grilla og kjúllinn er kominn

  á borðið í húsi húsfreyju. 

   Namm.

Trump býður sig ekki fram

Norskt ríkidæmi eða arga fátækt?

  "Því fátækari og því minna sem fólk á,

  helst ekki bót fyrir rassgatið á sér,

  því betur líður því andlega og félagslega"!

  Vinkonu húsfreyju í Noregi var mikið niðri fyrir.

  "Alla vega virðist mér norska þjóðarsálin sigla

  hraðbyri í átt til brjálæðis mitt í öllum þessum

  olíugróða sínum.  Hér eiga allir skít nóg af

  peningum, en eru þeir hamingjusamir?

  NEI!

  Kunna þeir að vinna skynsamlega úr sínum málum?

  NEI"!

  Vinkona húsfreyju, íslensk og læknir að mennt, var á innsoginu.

  Hefur búið síðustu 25 árin í Noregi og vegna starfs

  síns kemur hún víða við og þekkir marga.

  Hafði vinkona komið í sumarvinnu upp á litla Frón fyrir rúmu ári síðan,

  hafðið unnið í 3 mánuði, og séð hvernig íslenska

  þjóðin var að reyna að tækla sín mál.

  Bar svo saman þegar heim til Noregs kom.

  Norsararnir skítféllu í þeim samanburði.

  "Hér til dæmis skilja varla hjón lengur án

  nálgunarbanns, þriggja lögfræðinga, dauðra katta, ofbeldis

  skemmdra húseigna og skelfingu lostinna barna viðkomandi."

  Vinkona var komin í ham.

  "Nú fer ég alvarlega að huga að því að koma mér heim aftur.

  Það er ekki búandi í þessu helvíti, þar sem hver höndin

  er upp á móti annarri.  Og fólk með massív fortíðavandamál

  veður uppi með óunna fortíð, og beitir börnum sínum

  fyrir sig á sérlega grimmdarlegan máta"

  Vinkonu var mikið niðri fyrir, " og svo er sífelldur SPARNAÐUR

  og NIÐURSKURÐUR í gangi í heilbrigðiskerfi einnar ríkustu

  þjóðar heims, og fólk jafnvel í vandræðum með að fá

  þá hjálp sem það þarfnast.

  HVAÐ ER ÞAÐ"?

  Húsfreyja gat lítil svör gefið vinkonu sinni í símann,

  enda þekkir hún lítt til norsks þjóðfélags og uppbyggingu þess,

  og veit þar af síður hvað þeir gera við olíugróðann sinn.

  En vinkona var rasandi á gangi mála Noregsmegin,

  enda gæðin ein að upplagi, vinnusöm, glaðlynd og skapandi í hugsun.

  Húsfreyja leyfði vinkonu sinni að tala sem mest,

  enda lá margt þungt á henni, búandi í miðju veldi

  norska kóngsins, með "brjálsemi" í kringum sig flesta

  daga, eins og hún orðaði það.

  "Ég les ekki krimma eða spennusögur lengur, nóg fyrir mig

  að lesa sannar "lífsreynslusögur" í norskum tímaritum,

  þau ekkert nema kærumál, krimmamál og dómsmál"!

  Vinkona dró djúpt andann.

  "Ég er búin að sjá, að það fólk sem á lítið sem ekki neitt

  af peningum hérna, heldur fullum sönsum,

  ber virðingu fyrir sjálfu sér og öðrum og

  verndar börn sín í lengstu lög.

  HINIR með nóg af peningum, gefa skít í allt og alla,

  jafnvel börnin sín".

  Vinkona hryllti sig í símann, enda barngóð og móðir sjálf.

  Húsfreyju fundust þetta slæmar fréttir af norskum

  "frændum" sínum og "frænkum", og fann til með

  vinkonu að vera á bólakafi í vondum málum fólksins

  í kringum sig.

   Og nú rúmum tveimur sólarhringum frá upphringingu

  vinkonu, kemur frétt þessi um að fimmta hver kona

  í norska hernum verði fyrir kynferðislegri áreitni.

  Tilviljun?

  Húsfreyja veit ekki.

  En vinkona hafði beðið húsfreyju að skella

  pistli inn á bloggið sitt um málið, og hér er hann kominn.

  Kemur upp í huga húsfreyju gamall málsháttur:

  Margur verður af aurum api.

 Svo mörg voru þau orð.

  Vonandi að norsarar tapi sér ekki alveg í olíuauðlegðinni,

  og temji sér virðingu fyrir sjálfum sér og öðrum.

  En afmæli framundan hjá húsfreyju og fjölskyldu.

  Ísakurinn sex ára, tíu ára djásnið ætlar að

  föndra afmæliskort.

  Húsfreyja ætlar í olíubað og svo út á sinn herlega

  sólpall í 20 stiga hitann  svolitla stund.

  Góðar stundir á sumarhlýjum maídegi.

Fimmta hver kona áreitt

Nei, eða já....

  ...af eða á...

  var sungið hér um árið.

  Og eflaust tekst okkur Frónbúum að finna svarið

  í þetta sinn, sem oft áður.

  Húsfreyja löngu búin að gera upp sinn hug,

  varðandi "kerlingarfáluna hana Ísbjörgu".

  Fyrir hana er valið einfalt og augljóst.

  Vonar innilega að sem flestir landar mæti á

  kjörstað og kjósi, þetta er mál sem varðar okkur öll,

  börnin okkar og framtíð þeirra.

  Svo er það bara stóra spurningin: NEI EÐA JÁ!?

  Ykkar er valið.

  Njótið svo dagsins og kvöldsins við kertaljós og

  notalegheit. 

  Húsfreyja ætlar að kveikja á kertum í litum Icesafe,

  og "brenna burt" argvítans málið huglægt.

  Hver sem niðurstaðan verður, er það þá horfið henni

  úr hugskotum og ekki lengur áhyggjuefni, aðalleiðindi

  og ergelsi.

  Góðar stundir á kosningadegi.

Varar Íslendinga við

Þetta er ekki flókið, eða hvað?

  Samkvæmt hinni helgu bók

  Sádanna, Kóraninum, þá eru

  konur þeirra frekar ómerkilegur pappír.

  Ekki gott að treysta á minni kvenna eða sannsögli....

  fyrir utan að þær eru allar í "prívat" eigu karla sinna.

  Auðvitað "eiga" flestir velmegandi karlkyns Sádar

  í það minnsta fjórar konur.

  Svo þegar kemur að "lýðræðislegum" sveitastjórnarkosningum

  í henni Sádi-Arabíu er ekki snjallræði að hinir "mark-á-takandi-

  minnugu-sannsöglu" karlmenn smelli einum "fimm" krossum fyrir

  framan val sitt, á atkvæðaseðlinum og málið er DAUTT.

  Konurnar sleppa þá alveg við reyna að gera upp hug sinn,

  um það hvern af "mark-á-takandi-minnuga-sannsögula"

  frambjóðanda þær treysta best, geta setið í ró og næði

  heima yfir börnum og eldamennsku...ef þær rekur þá nokkuð

  minni til að eiga börn og að þurfa að gefa þeim og bónda að borða.

  Og ef í hart fer, ljúga þær bara og segjast ekki hafa haft tíma

  í að elda kjúllann ofan í karl sinn og barnaskarann, því þær hafi verið

  svo uppteknar að sauma ný dúkkuföt á Barbie og Ken.

  Hinir eðal "mark-á-takandi" karlar kjósa síðan sína

  "sannsöglu-minnugu" frambjóðendur,

  gleðjast í hjarta sínu að Allah hafi gefið þeim

  "lýðræðislegar kosningar" af sinni miklu náð.....en

  ljóta helvítið að sá "náðugi" skyldi klikka svona

  illilega á konum þeirra, þegar hann valdi þær handa þeim.

  Hehehehehe...stóðst ekki mátið, húsfreyja.

  Makalaus ekkisens fornöld í gangi þarna í Sádí.

  Góðar stundir, og njótið kvöldsins.

Konur fá ekki að bjóða sig fram