Kærleikurinn er eilífur.

  Og boðskapurinn um návist og kærleika Guðs.

  Þetta finnst húsfreyju vel orðað hjá

  séra Jóni Helga í Langholtskirju.

  Og gæti ekki verið honum meira sammála.

  Aðstæður okkar mannanna barna eru

  margslungnar og breytilegar, bæði í

  fortíð, nútíð og framtíð.

  En kærleikurinn ER.

  Svo einfalt er nú það.

Boðskapurinn breytist ekki

María Magdalena....

  ....að valda dönskum

  biskupum áhyggjum í

  byrjun 21. aldar!

  Merkilegt þetta.

  Húsfreyja fær ekki séð að

  kærleiksboðskapur Jesú frá

  Nasaret breytist hið minnsta, þó

  hin ljúfa mey María Magdalena hafi

  verið hans "mest elskaði" lærisveinn.

  Ekki einu sinni þó hún hafi verið ástkona eða

  eiginkona Jesú.

  Boðskapurinn stendur tær og kærleiksríkur

  eftir sem áður.

  Þó forpokaðir ritskoðendur Biblíunnar hafa viljað

  gera guðssoninn sem háheilagastan og

  afneitandi öllu holdlegu samneyti við konur, þá

  geta þeir aldrei breytt þeirri staðreynd, að

  Jesú var einnig barn jarðneskrar móður.

  Var maður rétt eins og við hin, átti

  jarðneskt líf og mannlegar tilfinningar.

  Og því skyldi hann ekki hafa orðið ástfanginn,

  rétt eins og aðrir ungir menn jarðar?

  Kreddufullir og forpokaðir siðapostular,

  páfar, biskupar og klerkar "vilja" hafa

  Jesú sem "kynlífsafneitandi" piparkarl,

  sem ekki svo mikið sem hóstaði í áttina til

  kvenna, því síður að hann hafi horft á þær

  með aðdáun og ást.

  Og nú er María Magdalena enn og aftur orðin

  þyrnir í augum þeirra háheilögu, og það í hinu

  mikla Danaveldi.

  Merkilegt að Magdalenan skuli yfir höfuð vera

  nefnd á nafn í hinu "ljúfa" riti Biblíunni...að hún skuli

  fá að vera með!

  Máski að það sé ávísun á að hún hafi gegnt

  töluvert veigamiklu hlutverki í lífi Jesú?

  Aldrei að vita.

María Magdalena veldur áhyggjum

Jeminn!

  Þetta er vandræðalegt ef satt er.

  Svo ekki sé meira sagt.

  Annar hver samstarfsmaður húsfreyju

  hóstandi og "hnerrandi" um

  þessar mundir, svo ekki sé minnst

  á húsfreyju sjálfa.

  Hvað erum við eiginlega að pæla

  í háheilögum jólamánuðinum?

  Þetta er bara ávísun á massíva

  "nýburasprengju" í september

  næstkomandi.

  Verður allt vaðandi í litlum "Meyjum",

  samkvæmt stjörnuspekinni.

  Lítið ofurgagnrýnið, hógvært, duglegt

  og pottþétt lið að fæðast í heilu bunkunum.

  Jamm, er máske ekki algalið.

  Því þetta er liðið sem kemur þjóðinni

  út úr fjármagnsfeninu og stjórnarkreppudrullunni

  eftir  á að giska 25 ár.

  Mun hafa vitið til þess.

  Hefur húsfreyja annars nefnt það, að hún

  er fædd í merki Meyjunnar......?

  Jólaundirbúningur verið nokkuð tímafrekur

  hjá húsfreyju undanfarið.

  Pipakökurnar bakaðar með múttu, systurdóttur,

  djásninu, Heimi og Marinó eina helgina.

  Jólagjafir allar keyptar, innpakkaðar og tilbúnar

  til afhendingar.

  Tvö risaalmanök með 100 myndum hvert, föndruð

  og innpökkuð.

  Tvenn jólahlaðborð tekinn með stæl....á sömu helginni

  að sjálfsögðu.

  Jólakort 35 stykki skrifuð og komin í póst.

  Jólaseríur í gluggum, jólaútsaumur á veggjum

  jólaþorp á stofuborðinu.

  Jólatréð skreytt og ljósum prýtt í stofunni.

  Og þetta allt fyrir utan daglegt gauf og gutl,

  matseld, þvotta og vesen.

  Karlinn lenti í "þrifunum".

  Honum er EKKI skemmt!

  Þrátt fyrir það búinn að fara um íbúðina sem

  stormsveipur og allt er orðið skínandi hreint og

  fínt og vel tekið til

  Karlinn minn er öðlingur.....þarf bara að "fíla"

  sinn hluta af málunum betur.

  Húsfreyja fílar nefnilega allt þetta stúss

  í tætlur, og syngur hástöfum jólalög og inn á

  milli "Ég fíla dilla dilla, ég fíla dilla" ala Madagaskar!

  Sjö ára djásnið tekur eftir móður sinni, og er á

  útopnu.

  Jesúbarnið er "ógesslega" heppið að eiga afmæli

  á jólum, og mikið er rosalega gaman að allir

  skuli vera svona glaðir og góðir...og skuli gefa

  jólagjafir.

  Nú er aðal pælingin hjá henni, af hverju hún fær ekki "fleiri"

  stóra pakka, en við fullorðna fólkið.

  Farin í rúmið fyrir klukkan níu öll kvöld, enda ekki sést

  svo mikið sem eitt kartöfluhýði í skónum hennar.

  Er búin að standa í miklum bréfaskriftum við

  illaskrifandi jólasveina, og er afskaplega lukkuleg

  þegar þeir svara bréfum hennar.

  Kann kvæðið hans Jóhannesar úr Kötlum um

  sveinana góðu utan að.

 Og hlakkar MIKIÐ MEIRA og MEST til jólanna.

  Góðar jólastundir.

 

Hnerrandi kynlíf?

Nú já! Við erum bara....

  ....ALLTAF á topp tíu, hér uppi

  á litla Fróni.

  Virðist engu skipta hvort það

  er á topp 10 verstu eða bestu

  listunum, alltaf er litla Frón "inn"!

  En á einum lista hljótum við þó að

  velgja toppsætið um þessar mundir.

  En það er á listanum um mesta

  "darraðadansinn" í stjórnmálum og

  fjármálarugli.

  Og nú er "sagan endalausa", Baugsmálið

  komin í gang aftur.

  Sjíss!

  Eitthvað kostar það, í lögmenn og

  málskostnað.

  En húsfreyja hélt að allir væru komnir með

  þetta á hreint á sínu litla landi.

  Eða þannig lítur þetta út í huga húsfreyju:

  Jón Ásgeir á landið, er landið og verður landið.

  Dabbi á ríkisvaldið, er ríkisvaldið og verður ríkisvaldið.

  Svo því eru menn að rífast um skitna 200 milljarða?

  Öðru eins hefur verið sólundað og eytt síðustu

  misseri, og engin fengið svo mikið sem hóstakast

  vegna þess.

  Ekki einu sinni staðið í fólki.

  Benda bara Jóni á það, að gott væri ef

  hann gæfi eins og hálfan milljarð til Mæðrastyrksnefndar

  og annað eins til Geðhjálpar fyrir jól, og málið er dautt.

Íslenski skellurinn í 10. sæti

Draugasaga á jólum.

  Svo bar við á því herrans ári 2007,

  þá líða tók að jólum, að móðir

  húsfreyju fékk mikla hugljómun.

  Ákvað hún, búsett í Þorlákshöfn,

  að fara til ferða til borgarinnar við

  sundin bláu, og versla sér eina

  fína, flotta og spánýja spariskó.

  Ekki nóg með það, sei sei nei.

  Æskuvinkona móður var búin að

  tryggja sér tvo miða á jólatónleika

  karlakórsins Fóstbræðra, svo nú átti

  að mæta eftir skókaup á tónleikana

  með múttu húsfreyju.  Og múttan síðan að

  fá gistingu hjá æskuvinkonunni, en halda heim

  á leið aftur daginn eftir.

  Þar sem móðir húsfreyju býr í sama húsi

  og systir í Þorlákshöfn ásamt þremur

  börnum, lagði múttan áætlunina fyrir

  dóttur sína áður en hún hélt af stað í

  langferð þessa.

  Systir í Þorlákshöfn hélt það ekki mikið mál,

  að stússast í kringum sín börn "ein", einn sólarhring.

  Svo móðirin hélt af stað um hádegisbil með rútu,

  yfir fjallveginn mjóa, Þrengslin, og komst aftur

  til byggða stundu seinna í höfuðborginni.

  Þar verslaðir fínir spariskór, kaffast á kaffihúsum

  með æskuvinkonu, snæddur eðalkvöldmatur og

  svo Fóstbræðrasöngurinn tekinn með stæl.

  En þá búa átti múttunni rúm í húsum

  æskuvinkonu, birtist óvænt dóttir æskuvinkonu.

  Sú býr austan fjalls og var á heimleið, og það var

  sko ekki mikið mál að skutla henni Stínu heim í

  Þorlákshöfn svona í leiðinni.

  Svo mútta húsfreyju pakkaði niður nýju

  spariskónum í hasti, kvaddi æskuvinkonu og

  hélt heim á leið.

  Var þangað komin upp úr hálftíu um kvöldið,

  hvergi ljós nema í fremri forstofu svo múttan

  brá sér í smá gauf og gutl á salerninu,

  háttaði sig í sinn hvíta hnésíða silkináttserk

  og skellti sér inn í rúm inni í sínu stóra

  og fína forstofuherbergi.

  Kveikti á sjónvarpinu.

  Er þá ekki þessi fína konumynd að byrja.

  Mútta húsfreyja kemur sér vel fyrir og er brátt

  kominn á bólakaf í konumyndina.

  En einu hafði hún steingleymt.

  Hún hafði illilega gleymt að sinna "tilkynningaskyldu"

  til systur, um breyttar áætlanir og komutíma.

  Víkur nú sögu til systur í Þorlákshöfn.

  ALEINNI heima með börnin.

  Hún búin að sinna börnum sínum, 5,7 og 9 ára,

  og aldrei þessu vant, kemur hún þeim óvenju

  snemma í ró, og allt liðið steinsofnað klukkan níu

  um kvöldið.

  Hún læðist fram í eldhúsið, gengur frá eftir

  kvöldmatinn, fær sér kaffi.

  En dettur svo í hug að kíkja á sjónvarpið frammi

  í stofu um tíuleytið.

  Er þá ekki þessi líka fína konumynd að byrja.

  Systir dæsir af ánægju og kemur sér vel fyrir framan sjónvarpið.

  Þá þessari líka fínu konumynd er lokið, er systir

  orðin skraufþurr í kverkum.

  Best að skella sér fram í eldhús að fá sér að drekka.

  Aldimmt er í húsinu fyrir utan smátýru í

  eldhúsi, svo bjarmann af ljósinu í fremri

  forstofunni.

  Þegar systir er að feta sig fram úr stofunni í

  myrkrinu, verður henni litið fram í innri forstofu.

  Aaaaaaaaarrrrrgh!!

  Hvít vera kemur svífandi hægt og tignarlega

  eftir innri forstofunni inn í borðstofuna.....úúúú.

  Systir frýs föst við stofugólfið.

  DJÍSUSS! 

  Hrikalegt!

  SVAÐALEGA SVAKALEGT!

 Hún orðin bullandi SKYGGN...og það ALEIN heima með börnin.

  "Hvaða hryllilegi óvættur er að ásækja mig"? hugsar

  systir í argapanikk.

  Púlsinn er kominn upp í 200 slög á mínútu hjá systur,

  hún er kaldsveitt og hefði migið á sig af hræðslu,

  hefði hún ekki verið svona skrælnuð og þurr eftir

  sjónvarpsglápið.

  Henni tekst að safna örlitlum kjarki og spyr "draugsa"

  skjálfandi röddu:  "Ertu DRAUGUR"?

 "Neihei, ég er bara þyrst og ætla að fá mér eitthvað

  að drekka frammi í eldhúsi" svaraði vofan snöggt.

  Og framhjá systur sveif "múttan", hvorki steindauð þá

  né heldur er hún framliðin í dag.

  Systir var rasandi yfir "draugagangi" múttu sinnar,

  og var svo hálfa nóttina að ná sér niður eftir skelfinguna.

  Af þessu má svo læra tvennt.

  Í fyrsta lagi:  Þá horft er á fínar konumyndir skyldi ætíð

  gæta þess að hafa "nægan vökva" til drykkjar við hendina.

  Í öðru lagi:  ALDREI, ekki undir neinum kringumstæðum skyldi

  maður gefa móður sinni "hvíta, hnésíða náttserki í afmælisgjöf.

  Góðar og júfar stundir á jólaaðventu.

 

 

Litla Frón hristir upp í...

  ... frændum sínum í Skandinavíu,

  með kæru þakklæti fyrir veittan

  stuðning í  upphafi kreppu.

  En þeir tóku svo reyndar við sér

  frændurnir, er líða tók á kreppu,

  svo það varð bara "smáhristingur" núna

  .....enginn Suðurlandsskjálfti hér.

  Jamm, í mörgu stöndum við Frónbúar,

  hristum og skekjum Skandinavíu svo

  nötra í munni tennur.

  Enda ekkert annað að gera í stöðunni,

  en að "flytja land og þjóð í heilu lagi"

  suður á bóginn, þá fjármálakreppa,

  síldarpest, Dabbalenska, óðaverðbólga,

  skuldasöfnun og lausafjársharðlífi hrjáir

  okkur Frónbúa.

  Væri fínt að komast nær Miðbaugi, og skella

  okkur í "sólarlandaferðabransann" með hraði

  til að redda málunum.

  Gætum notað "nýbyggingar" sem standa

  auðar tvist og bast í nýjum hálfköruðum hverfum

  sem gistirými!

  Verst hvað þessir "flekar" eru á miklu dóli,

  þyrfti að fá eins og einn hamhleypu-Dabba til að

  keyra þetta áfram.

  Góðar stundir.

 

 

 

Ísland og Afríka ollu skjálftanum

Hallinn mikli.

  Frá því húsfreyja hóf störf

  sem heilbrigðisstarfsmaður,

  hefur verið bullandi halli á

  rekstri heilbrigðiskerfisins.

  Spara, spara, spara!

  Skera niður, skera niður, skera niður...

  svo hægt sé að skera upp af og til.

  Þetta er söngurinn sem sínkt og heilagt hefur hljómað

  í eyrum húsfreyju, sem annarra heilbrigðisstarfsmanna.

  Allt í myljandi rekstrarhalla árum saman,

  rekstrarörðuleikum, deildarlokunum, meiri niðurskurði,

  minni fjárveitingum, niðursveiflu...allt niður og á ská!

  En hvernig sem sparað er og sparað, skorið niður og NEÐAR,

  þá hreinlega verður mannfólkið "veikt", og þarf á

  hjálp og þjónustu heilbrigðiskerfisins að halda.

  Og sá sem hefur lent í þeirri stöðu, að senda foreldra

  heim með ungling eftir sjálsvígstilraun, veit hve

  ömurleg heilbrigðisþjónusta skapast af stöðugum

  niðurskurði vegna rekstrarhalla.

  Rífur og tætir í hjartað, að þurfa að segja: "Því miður, drengurinn

  ykkar kemst ekki inn á unglingageðdeild, en kannski

  hægt að athuga með göngudeild".

  Eða þurfa að segja hjartasjúklingi, að hann sé

   á margra mánaða biðlista eftir hjartaaðgerð,

  sem getur mikið bætt gæði lífs, svo

  ekki sé talað um "lengt" líf að miklum mun.

  En málið er, að "gróðinn" af góðu heilbrigðiskerfi er ekki mældur

  í fjármagni, heldur í mannauði sem skilar sínu svo

  aftur til þjóðarinnar með vinnu sinni.

  Svo heilbrigðisstofnanir geta aldrei sýnt fram á

  neinn "fjármagnsgróða", aðeins skilað  einstaklingum

  heilbrigðum út í þjóðfélagið aftur, eða létt vinnandi

  fólki lífið með því að annast þeirra öldruðu og sjúku.

  Er þá einhver hissa á "eilífum rekstrarhalla" ef heilbrigðiskerfið

  er sífellt í fjársvelti, og nær ekki að anna þörf

  og eftirspurn?

  Ja, húsfreyja er ekki hissa.

  En þá er það málið: Því er þessu svona farið,

  þegar stjórnvöld hafa lýst yfir vilja sínum,

  að hafa hér velferðarkerfi með öruggu og sterku

  heilbrigðiskerfi?

  Etthvað stangast þetta illilega á finnst húsfreyju.

  En hún er nú "bara" heilbrigðisstarfsmaður,

  og hefur ekki vit á stjórnmálum og skarpvitrum

  ákvörðunum stjórnvalda.

  Góðar stundir.

Halli hjá heilbrigðisstofnunum

Skór af himnum ofan?

  Bush má gera að því "skóna",

  að til séu vinsælli þjóðhöfðingjar

  þessa heims, en hann í Írak.

  Og betra er fyrir hann að binda

  ekki lengi "skóna" þar um slóðir, svo

  Írakar haldi ekki áfram að níða "skóinn"

  niður af honum.

  Og vaði jafnvel ofan í aumingja Bush

  á skítugum "skónum" æ ofan í æ.

  Er þá hætt við að Bush karlinn verði

  fljótt bundinn í báða "skó", og gott

  ef öll ferðin til Íraks "missir ekki marks", og

  karl forseti Ameríku, hefði þá betur setið heima og

   pissað í "skóinn" sinn þar, innan um vini

  og vandamenn.

  Jamm, aumingja karlinn hann Bush.

  Það er ekki heiglum hent að reyna að

  heilla Íraka upp úr "skónum"......

 

Bush varð fyrir skóárás

Gott að lesa...

  ...á sunnudagsmorgni, þessa

  ágætu grein AA Gills.

  Gill hefur kynnt sér málin

  ágætlega, og nær í skottið

  á þjóðarsálinni hér á litla Fróni.

  Mister Brown hryðjuverkalagamaður

  fær einnig á baukinn, sem er vel.

  Ekki líklegt úr þessu að íslenska

  ríkisstjórnin hafi manndóm í sér til

  að höfða mál gegn Brown og hans stjórn

  fyrir hryðjuverkastimpilinn.

  So be it.

  Tókum því af stakri rósemd, sem öðru sem

  yfir okkur hefur dunið.

  Hér erum við, með hugvit, mannauð og

  náttúrulegar auðlindir eftir sem áður.

  Og þó að pappírsbankarnir og "pappírs-Pésarnir"

  hafi sprungið, og óþverrinn af þeim hamagangnum

  slettst yfir okkur almúgann á litla Fróni sem aðra,

  æsum við okkur ekki mikið yfir því.

  Aðalmálið að snúa bökum saman og hjálpa

  þeim sem missa atvinnu, húsnæði og lífeyrissparnað

  og við erum GÓÐ!

  Tökum okkur svo extra langt og gott jólabað,

  og náum af okkur "pappírs-Pésajukkinu".

  Góðar stundir.

 

 

Brown sparkaði í Íslendinga

Aldeilis makalaust skondin..

  ...frétt.

  Greinilegt að hún hefur

  verið slegin inn í miklu hasti.

  Eða ekki getur húsfreyja ímyndað

  sér "stærð" dýrs þess, sem gaf frá

  sér "sæði" sem rúmar heilu akrana,

  byggingar manna auk "hauskúpunnar

  góðu.

  Þetta er þá máske "sæði" úr

  Miðgarðsormi þeirra ásartrúarmanna

  En það kvikindi á að hafa verið "allstórt",

  og á að hafa hringað sig utan um jörðu.

  Ekki amalegt það, fyrir ásatrúarmenn að

  fá fregnir af ástarlífi Ormsins stóra,

  fyrr á öldum.  Greinilegt að sá langi ormur

  hefur þá "baukað" við ýmislegt í hinu

  mikla veldi Mister Brown.

  Og ákaflega upplýsandi líka, var að það skyldi

  vera "gamall" heili í 2000 ára hauskúpu þessari.

  Kannski að heilinn reynist  þá vera "2000 ára" líka.

  Nei, það er nú annars bara getgáta hjá húsfreyju.

  En búðarráp næst.

  Góðar stundir.

 

 

Fundu fornan mannsheila frá járnöld