Lífið.

  Húsfreyja kíkti yfir bloggið

  hjá bloggvinum sínu, og sá

  að kollega hennar var að auglýsa

  eftir bloggi um lífið og tilveruna.

  Sjálf bloggar húsfreyja jöfnum höndum

  um fréttatengt efni, og svo lífið og tilveruna

  inn og milli, svona eins og gengur.

  Hefur alltaf haft gaman að því að velta fyrir sér

  lífinu hér á móður Jörð, húsfreyja.

  Hvað erum við mannkyn að vilja upp á dekk

  hér á þessari bláu plánetu, úti við "endamörk

  alheimsins"?

  Já, bara svona yfir höfuð?

  Hvaða bras er þetta á okkur?

  Mætum hér ósjálfbjarga, minnislaus og

  nær hárlaus.....organdi og gargandi af

  svengd og athyglisýki.

  Getum ekki einu sinnt okkar grunnþörfum

  sjálf...skítum upp á bak, stöndum ekki

  í lappirnar, verður jafnvel að snúa okkur

  í vögguræflunum.....bera okkur allra okkar

  ferða!

  Munum ekki einu sinni hvort við heitum eitthvað!

  Og þó.

  Sum okkar rámar reyndar í nöfn okkar í fyrri lífum....

  húsfreyja hét "Elah Búga" og Siggi Freyr systursonur

  húsfreyju hét "Elluh Nessú".

  Þrætti húsfreyja sem smákrakki lengi vel

  við foreldra sína um nafn sitt....og alla þá sem

  inntu hana eftir nafni...."Ég heiti Elah Búga".

  "Nú já, ELLABOGGA, litla vina!   Eftir hvað Elínborgu

  er barnið skírt, Stína mín"?

  Móðir húsfreyju í standandi vandræðum.

  "Hún heitir ekki Ellabogga, barnið....veit ekki

  hvaðan hún hefur fengið þetta, er engin Elínborg

  í okkar ættingja- og vinahóp".

  Siggi Freyr (9 ára) kynnti sig lengi vel sem "Elluh Nessú",

  og botnaði ekki frekar, en húsfreyja sem barn, í þessari

  tregðu foreldra sinna að ná ekki nafni sínu.

  Svo sætti húsfreyja sig (og Sigginn sömuleiðis)

  við þetta "skrítna" nýja nafn, sem allir vildu endilega

  nota.

  Húsfreyja hélt lengi vel að allir krakkar ættu

  litla "álfavini" eins og hún sjálf í bernsku.

  Sá fyrstu 6 árin í lífi sínu myndarlega álfahöll uppi á Blátindi

  í Vestmannaeyjum, þar sem henni var eitt sinn

  boðið í afmælisveislu "álfavinkonu" sinnar.

  Var alveg rasandi á forheimsku fullorðna fólksins,

  sem skammaði hana fyrir að hafa týnt hlutum á

  heimilinu, sem álfarnir fengu að láni.

  Auðvitað vissi hún oft hvar álfarnir höfðu sett

  hlutina frá sér, og gat komið þeim í hendurnar á

  afa sínum og foreldrum.....en það þýddi svo

  sannarlega ekki að hún hefði sjálf tekið þá

  til brúks og handagagns.

  Sei sei, nei.

  Og sem barn gat húsfreyja gengið í gegnum

  "veggi" inn í aðra heima....og trúði að

  sjálfsögðu að slíkt stunduðu ALLIR eins og hún

  á kvöldin.

  Svo ekki sé nú minnst á hana Ólöfu langaömmu

  húsfreyju, frá Byggðarholti, sem lést á því herrans 1963 (líklega frekar en '62),

  en sat samt iðulega við prjónavélina sínum niðri í

  "Banka" (gömlu, nú "yfirhraunuðu" húsi í Eyjum)

  þá húsfreyja kom að vísitera með Önnu Stínu

  frænku sinni, á árunum 1964 -1965.

  Svo var húsfreyja bara skömmuð sem stelpuskott,

  ef hún veifaði langömmu sinni, fyrir fíflagang

  og fyrir það að vera að gera draugaat.

  Jamm, húsfreyju fannst lífið strax töluvert flókið

  og snúið sem barn.

  Og þessi ósköp sem margir gátu verið bæði

  blindir og heyrnalausir.

  Sáu ekki álfavini hennar!

  Heyrðu þá ekki syngja!

  Sáu aldrei fallegu álfadansana þeirra!

  Og alvarlegast af öllu:  Heilsuðu hvorki né

  virtu Ólöfu ömmu viðlits!

  Þvílíkur dónaskapur!

  Þetta með aðra heimaheimsóknir lét litla skottan

  liggja milli hluta, því stundum komst hún sjálf ekki í

  gegnum veggina, ef illa lá á henni.

  Og því er bernskuheimur mannanna barna svo ólíkur?

  Og unglings- og fullorðinsárin?

  Komum við öll hérna í prívat og persónulegum tilgangi?

  Máske engum þeim sama?

  "Secret operations" allt saman?

  Húsfreyja að læra um "dularfulla hluti"

  mannleg samskipti, svínsleg eldgos í bakgarðinum,

  og gleðina sem fylgir því að hjálpa náunganum,

  á meðan Gústa í næstu íbúð er að læra um

  sorg á unga aldri, sem fylgir föðurmissir, áskoranirnar

  sem fylgja því að ala ein upp 3 börn, eftir að hafa

  sagt skilið við tvo barnsfeður vegna ofdrykkju og vímuefnavanda?

  Á meðan Geiri á móti fæddist með silfurskeið í munni,

  átti mótorhjól og Toyotu þegar aðrir strákar áttu ekki

  einu sinni gamlan Skoda, en svo misstu hann og pápi gamli

  fyrirtækið í kreppufjandanum, og báðir verið á atvinnuleysisbótum

  í 1/2 ár og  verðandi barnsmóðir Geira stungin af með Tomma besta vininum

  til Danmerkur?

  Jamm, skóli lífsins getur verið harður.

  Og skemmtilegur.

  Djö.... andskoti pirrandi og erfiður á stundum.

  Gjörsamlega frábær!

  Er lífið á jörð máske besta gjöf Guðs til mannanna barna?

  Allt svo skemmtilegt, skrítið og skondið.

  Fallegt!

  Ljúfsárt, yndislegt og fyndið.

  Helv.... ömurlegt og ljótt.

  Leiðinlegt og sorglegt.

  Fáum að upplifa allan tilfinningaskallann.

  Njóta okkar í botn.

  Gera herfileg mistök......og lifa þau af.

  Eignast maka, börn og buru.

  Vera vel stæð eða gjörsamlega búin að spila

  rassinn úr buxunum.

  Allt getum við sýslað við, brasað og baslað

  hér á móður Jörð.

  Verðum bara að muna að lifa lífinu lifandi.

  VAKANDI!

  OG NJÓTA ÞESS.

  Og taka lífið ekki of alvarlega,

  því við lifum það hvort er eð ekki af.

  "Og settu svo sætan Smiley-kall, mamma" segir

  átta ára djásnið.

                                    

  Hana!

  Þið fenguð 3.

  Góðar stundir. 

 

 

 

Málþófsflokkurinn í vondum málum...og ekki einn.

  Búinn að vera blankur

  árum saman, enda á

  stórum fátækrastyrkjum

  frá góðhjörtuðum bönkum

  og jafnvel FL-grúppurum!

  Tómt helv... basl og

  örbirgðarbúskapur alltaf hreint,

  og það hjá (fyrrum) stærsta stjórnmálaflokki

  litla Fróns.

  Sjálfsagt ekki sést almennilegt skeini í Valhöll

  mánuðum saman!

  Nýbakaðir snúðar og vínarbrauð það eina sem

  fæst með kaffinu....snittur, sushi og indverskur

  frá Indíafaranum liðin tíð!

  Ja, svei!

  Svo skuldar hann víst "eitthvað" líka.

  Jamm, og hinir flokkarnir með menn á Alþingi,

  hafa einnig fengið "ölmusustyrki", (þó ekkert

  á við "málþófsflokkinn") og eru sömuleiðis

  í "skuldahalasúpunni".

  Fjárhagslegur ræfildómur, betl, "skítlegir"

  styrkir og peningaþunglyndi og auraharðlífi að hrjá alla

  þingflokka....en allra mest þó vesalings "málþófsflokkinn".

  Að það þrátt fyrir að "helmingur" þingheims sé

  tengdur fyrirtækjum.

  Það þó að flestir eigi þingmenn allsæmilega

  stór einbýlishús, sumarbústaði, jeppa jafnvel, fái

  ferðarisnur, dagpeninga, ökutækjastyrk og

  aura í vasann fyrir nefndar- og fundarsetur.

  Harðræði er þetta og vesaldómur sem frónverskum

  "óspilltum, gegnheiðarlegum og lítilmagna-verndandi"

  stjórnmálaflokkum er boðið upp á, hér á fornum slóðum

  víkinga og ljóðskálda.

  Ja, SVEI!

  Vesalings fyrrum framkvæmdarstjóri í "þeim stærsta",

  Sjálfstæðisflokknum/ "málþófsflokknum,  reyndi jafnvel að fá "yfirstrump"

  flokksins til að afþakka veglegustu "ölmusustyrkina",

  en hann vildi víst endilega þyggja þá.

  Og nú er enginn ábyrgur lengur innan flokksins, 

  fyrir hafa þegið "búbætur þessar".

  Nema auðvitað  Haarderinn, sem ber "alla" ábyrgð....

  fíflið sem hann var!

  Ekki fékk hann Darling og Brown til að

  skilja fjármálastöðuna á litla Fróni,

  svo flinkur sem hann er í engilsaxneskunni,

  sei sei, nei!

  Frónbúar "mergjaðir hryðjuverkamenn" og

  fjármálafífl á eftir.

  Vesen!

  Vandræði!

  Svínarí!

  Veit Dabbi hvernig Haarderinn hefur EINSAMALL

  rústað orðstý flokksins?

  Haarderinn virðist bara ekkert kunna að ræða við erlenda

  þjóðhöfðingja og stjórnmálamenn, líkt og Árni Matt.

  og Dabbi kunna "svo vel"!

  NEI!

  Var bara að dudda sér við að þiggja himinháa styrki!

  Halda æsispennandi fjölmiðlafundi.

  Reyna að róa pottaberjandi mótmælendur.

  Bjarga landinu úr fjármálakreppunni.

  Málið "tært og hreint" á borðinu.

  Haarderinn er erkisvíðingurinn.

  Sökudólgur númer EITT!

  Skítþvotti er lokið hjá "málþófsflokknum"!

  Kvörtunum um spillingu, makk, vitleysisgang

  og fjármálasvínarí ber að vísa beina leið til

  Haarderans!

  Hann ber ábyrgð!

  Góðar stundir.

 

 

 

 

 

Samfylking stærst

Full bleyja...

  ....svo lekur út úr...og nú

  steig hin góða Þorgerður Katrín

  illilega í "skítadamminn"  sem

  lekinn var niður úr skálm og út á

  55 milljóna Sjálfstæðisgólfið...eftir

  á annan tug ára í skítsöfnun!

  Vill svo að Samfylkingin fari

  að vinda hvítþvegna bleyju sína,

  sem bráðþurfti þvott eftir nokkra

  mánuði í stjórn með herlegum

  flokki Þorgerðar Katrínar!

  Og hvað þá heldur "hverfandi flokkinn"

  þennan sem kenndi sig við framsókn!

  Vill hafa brjálað að gera í bleyjuþvotti þar líka,

  sú ljúfa Þorgerður Katrín.....og það allt áður

  en hennar flokkur svo mikið sem hugsar um

  "sápukaup" í þvotta á Sjálfstæðisbleyjunni,.

  og svo ekki sé minnst á "rennisleipan"

  skítinn á "Sjálfstæðisgólfinu"!

  Kunna bara sjálfsagt orðið ljómandi vel

  við "dauninn" eftir öll þessi ár, sjálfstæðismenn.

  Eitthvað svo "heimilislegur" og "bláhandarvinalegur"!

  Jamm, húsfreyja sér fram á brjálað þvottastand

  hjá ýmsum flokkum fyrir kosningar...sér í lagi

  55 milljóna liðinu.

  Óskar hún þeim öllum góðar þvottastundir og

  sérdeilis góðrar samvisku á eftir.

  Alls óvíst samt, að hún kjósi nokkurn "hvítþvegin",

  þegar þar að kemur......daunninn vill loða svo lengi við.

  Góðar þvottastundir.

„Hvítþvegin bleyjubörn“

Siggi á Eiðum og páskamold.

  Pabbi heitinn, húsfreyju,

  Siggi á Eiðum var vanur að hlakka mikið til páska. 

  Það voru iðulega hans lengstu frí fyrir utan jólafrí,

  og hann naut páskafrísins til hins ítrasta.

  Ekki var verra að páskaegg voru öll orðin

  úr súkkulaði, en hann var mikil súkkulaðimaður.

  Veður voru oft mild og hlý á páskum í Eyjum

  hér í den, og hann fór iðulega með okkur fjölskylduna

  beint í útiveruna.

  Ekki áttu foreldrar húsfreyju í bifreið í Eyjunum,

  heldur fóru um allt gangandi og á hjólum.

  Þær systur áttu engin hjólin, en voru reiddar

  á hjólum foreldranna, þá farið var til hjólreiðaferða.

  pabbi tók systurnar á stöngina, en húsfreyja sat

  á bögglabera á hjóli móðurinnar.

  Ef páskar voru seint á ferð, var ósjaldan farið

  vestur í kartöflugarð, sem var skammt frá

  þáverandi flugvallarenda á hjólunum tveimur,

  og einnig teknar 2 stunguskóflur með.

  Þar pældu mamma og pabbi upp stóran

  kartöflu- og rófugarð og gerðu kláran fyrir

  sáningu, á meðan við systur skottuðumst

  í kring og lékum okkur.

  Vorverkin oft unnin yfir páska hér í den,

  en aldrei á Föstudaginn langa eða Páskasunnudag.

  Þeir dagar háheilagir, föstudagurinn sorgarsöngur í útvarpi,

  en sunnudagurinn hamingja í súkkulaðieggi.

  Breyttir tímar í dag, en húsfreyju kitlar enn í fingurnar

  þá tekur að nálgast páska, að skella sér í einn

  herlegan hjólreiðatúr út í náttúruna, og ekki væri verra að

  finna ilminn af nýpældri mold fósturjarðarinnar.

        Góðar stundir.

 

Mest af blettum!

   Húsfreyja er með besta móti

  í morgunsárið, þrátt fyrir að

  bóndi hennar hafi misst góða

  klessu af frostpinna ofan í lyklaborðið

  á kompjúter hennar í heimsfótbolta í gær.

  Hitinn í kropp húsfreyju farinn að

  nálgast 37 gráðurnar, þó rödd

  sé enn rám og hás, og einna líkust því

  að húsfreyja hafi gerst aðalsöngvari

  "dauðarokksveitar" nú í vikunni, og tekið

  6 stunda hljómleika með sveit sinni, 3 kvöld í röð.

  Kötturinn nýtur einnig góðs af batnandi

  húsfreyju, og slafrar í sig afgangsmjólkinni

  úr morgunkornaskál 8 ára djásnsins.....

  uppi á eldhúsborði.

  Húsfreyja búin að svekkja sig yfir

  mannslátum á Ítalíu í jarðskjálfta,

  lesa um Össur og "Brúnan" í myndaþrasi

  og velta fyrir sér visku þess, að

  taka í notkun "kennslabúnað" á breskum

  flugvöllum og víðar, sem greinir ekki

  á milli Winonu Ryder, horaðrar leikkonu,

  og Osama bin Laden, horaðs hryðjuverkamanns.

  Þetta virðist aldeilis ætla að loða við hið breska

  heimsveldi, að þekkja ei vini frá óvinum.

  Skemmst að minnast þess að "harkaleg"

  viðbrögð "Brúns og Elskunnar hans" gerðu

  okkur Frónbúa alla, að "hryðjuverkamönnum"

  í stórum stíl.

  Og það þó að á flestum heimilum hér uppi

  á litla Fróni finnist lítið bitastætt af vopnum

  hryðjuverkamanna!

  Jú, stöku sæmilega beittur hnífur í hnífaparaskúffu,

  ryðgaða byssuhólka eiga fyrrum rjúpnaskyttur landsins,

  skæri eiga flestar frónverskar fjölskyldur, nú og svo

  auðvitað sleifar og pottlok, en slík vopn eru eingöngu til

  brúks niðri á Austurvelli, á litlum bletti þar fyrir framan

  Alþingishúsið.

  Ó, já blettur.  Það minnir húsfreyju á, hvað pistillinn átti

  að fjalla um.

  Það var þetta þarna í Vísir.is í morgum, um "rauða blettinn"

  á Júpíter.

  Sem alþjóð veit er Júpíter allstór pláneta á sporbaug

  um sólu vora, rétt eins og móðir Jörð.

  Húsfreyja hefur eigi barið plánetu þessa augum, því síður

  hefur hún vísiterað hana, enda slæm lendingarskilyrði á Júpíter

  vegna storma sem gera 55 metrana á sek. á Stórhöfða

  hlægilega.  (Lélegan brandara, satt að segja.)

  Eigi að síður merkileg pláneta, Júpíter, segja stjörnufræðingar.

  Og hún hefur það umfram aðrar merkar plánetur

  að hafa "rauðan blett", sem stjörnufræðingar hafa fylgst "grannt"

  með frá því herrans ári 1870.

  Ekki hafa þeir stjörnufræðingar neina vitneskju um hvaða

  fyrirbæri þetta er, og lítið að gerast í "blettaathugunum"

  þessum árum saman, fyrr en nú allra síðustu ár, er hann tók upp á því að

  minnka.

  Á krepputímum er húsfreyju annt um að fólk hafi nóg

  að starfa, og það þó að aðeins sé um "blettaskoðunarstarf"

  sé að ræða.

  Þætti henni því slæmt ef "helvískur" bletturinn á Júpíter

  tæki upp á því að "hverfa alveg", og gera slatta af

  stjörnufræðingum atvinnulausa!

  Vonar hún að störnufræðingar þeir er sinnt hafa

  "blettagóni" á Júpíter hafi einnig lagt rækt við önnur fyrirbæri í

  geimnum, og séu liðtækir í önnur störf á vinnustöðum sínum.

  Í Eyjum bernsku húsfreyju var mikið um "bletti".

  En þá verið að tala um "grasbletti" þá er í kringum

  heimili manna voru, þá þeir höfðu komið sér upp

  fjölskyldu og föstum samanstað.

  Hvert heimili átti sinn "blett", og voru húsbændur

  misviðkvæmir fyrir ágangi á sínum bletti.

  Þeim er sárast var um "blettinn" sinn, rann iðulega

  í skap, skoppaði bolti frá fótboltaleikandi peyjum inn

  á blett þeirra, eða ef stelpuskott prílaði upp á steinvegginn

  er rammgirti téðan blett.

  Birtust þá menn jafnvel með látum út á stétt, jusu úr skálum

  reiðar sinnar yfir krakkaræflana, hótuðu klögun í foreldra

  og í versta falli lögreglurannsókn á meintu broti á

  "helgum bletti" viðkomandi.

  Lærðu Eyjakrakkar fljótlega hvar væri óhætt að leika sér,

  og hvar ofurviðkvæmir blettaeigendur rústuðu allri leikgleði.

  Voru að vísu hrokagikkir bernskunnar, krakkarnir, og leikur

  gat jafnvel borist í nýsáðan grænmetisgarð, en það var samt

  undantekning fremur en regla.

  Virðing var borin fyrir kartöflu-og grænmetisgörðum,

  enda nutu Eyjabörn uppskerunnar í ríku mæli að hausti.

  Erfiðara var að læra þetta með skrautblómabeðin, er

  prýddu marga "blettina" í Eyjum hér í den.

  Skrýtið að mega ekki tína þessi fallegu blóm, eins og mátti tína

  sóleyjar, gleyméreyjar, Baldursbrár og sólfífla....en það lærðist

  eins og annað.

  Voru flestir Eyjamenn ánægðir og lítt stressaðir með sína bletti,

  og voru þeir leiksvæði barna Eyjamanna um leið og þeir geymdu

  kartöflu-og grænmetisgarða þeirra.

  En nú er átta ára djásnið rokið út á "blett" fáklædd

  á eftir ókunnugum ketti, svo mál er að linni.

  Húsfreyja verður að "birtast með látum" út á sólpall.....

  Góðar stundir!

 

Réttar og rangar áttir.

  Húsfreyja hefur aldrei haft

  minnstu áhyggjur af því

  "í hvaða átt" hún biður, þá

  hún spjallar við Guð.

  Virðist engu skipta hvernig

  húsfreyja snýr, spjallrás hennar við

  Guð er alltaf opin...eða þannig

  upplifir húsfreyja bænir sínar.

  Og merkilegt nokk, bænum húsfreyju

 er svarað, þó hún hafi staðið á hvolfi

  í jóga á stofugólfinu, verið parkeruð

  á bíl sínum á bílastæðinu við Kringluna,

  setið á kirkjubekk í gamalli timburkirkju

  eða legið hálfsofandi í svefnherbergi sínu

  að kveldi þá hún bað.

  Svo húsfreyja er ekki alveg að skilja

  þetta með mikilvægi þess að biðja "í rétta átt",

  hér á móður Jörð.

  Jörðin okkar er jú hnöttur, þannig að beini þú

  bænum þínum að "einum stað" á jörðu, mun

  bænin sannarlega lenda þar fyrir rest, geri þú ráð fyrir

  að bænin þín fari frá upphafsstað "á braut" utan um hnöttinn.

  Jörðin bæði snýst og hallast, og þó þér hafi

  skeikað nokkuð í upphafi, ætti bænin að ná

  á áfangastað....jamm stundum eftir "nokkuð marga" hringi.

  Eða það telur húsfreyja.

  En hver segir svo að "bænir" geti ekki beygt?

  Jafnvel tekið "U-beygjur" ef þörf er á!

  Sikksakkað?

  Farið í heilan hring?

  Það er trú húsfreyju að allar kærleiksríkar

  bænir fari beina leið til Guðs og góðra engla,

  sem gangi svo í málin.

  Hvar almættið býr, veit húsfreyja ei, en allar

  hennar kærleiksríku bænir virðast eigi að síður rata þangað.

  Og "allar áttir" eru "réttar" áttir fyrir kærleiksríkar bænir

  hér á móður Jörð.

  GÓÐAR BÆNASTUNDIR UM PÁSKA!

 

 

Bænirnar beðnar í ranga átt

Harkalegt yfirgjammara hitaþrugl!

  Húsfreyja er með hita.

  Hóstar stöðugt, og særindin

  í hálsinum eru að drepa hana.

  Hálstöflur og hóstasaft í morgunverð.

  Reyndi samt að lesa fréttirnar

  í netmálgagninu í morgun:

  "Of harkalegt að beita lögum um hryðjuverk

  gegn Landsbankanum og Íslandi".

  Rannsóknarnefnd breska þingsins að skila skýrslu.

  Ekki minnst á það einu orði, hvort hryðjuverkalögum

  þessum eigi þá að létta af.

  Ekki einu orði!

  Er þá húsfreyja enn " a terrorist at large"

  í hinu mikla veldi Bretadrottningar?

  Naglaþjalir hennar og saumaskæri gerð

  upptæk af herlegum tollurum Breta, freistist

  hún til að ferðast til Lundúna?

  Eða er hún orðin "miður harkalegur" hryðjuverkamaður?

  Máske bara svona þolanlega "ullarmjúkur" og

  "í lagi að vísitera og versla á Oxford"- hryðjuverkamaður?

  Hvernig ber að skilja svona skýrslu?

  Hitaþruglið í haus húsfryju stigmagnaðist við lestur

  fréttar þessarar.

  Skellti sér í að lesa eitthvað skárra og viturlegra.

  Fékk að vísu nokkurra sekúnda "bráðahitaslag", þar sem

  hún ímyndaði sér að hún væri að horfa á upptöku

  frá Alþingi af Johnsen að "syngja" þingræðuna sína....

  en það sýnir bara hve þrælsleg pest húsfreyju er og

  hve illilega veik hún er!  HÓST!

  Datt niður á fregn þessa frá Alþingi, þar sem greinilega

  er stöðugt verið að skapa ný störf fyrir kreppuþjáða

  Frónbúa.

  "Yfirgjammari þingsins" er ekki starf sem húsfreyja hefur

  áður heyrt nefnt.

  Telur þakkavert að nýsköpun eigi sé stað inni á sjálfu

  Alþingi allra landsmanna, en hefði gjarnan viljað

  sjá "starfslýsingu" á þessu Yfirgjammaradjobbi.

  Og af hverju var þessi nýja staða ekki auglýst?

  En Arnbjörg máske bara vel að þessari stöðu komin,

  og "sjálfskipuð"?

  Húsfreyja gafst upp á að finna visku og fróðleik

  í fréttum, enda heilabúið á suðumarki eftir

  yfirferð þessa á netinu.

  Sló heldur í hitasóttina og þruglið að reyna að fylgjast með!

  Fór húsfreyja í það að veifa bleikum fjöðrum hangandi

  í spotta á svartri stöng, og kattarrófan

  ærðist af leikgleði.

  Svei, ef rann ekki eitthvað af hitaþruglinu

  af heilabúi húsfreyju í bleikfiðraða leiknum

  við kisu, svo hún samþykkti að karl hennar

  skryppi í verslunarferð.

  Á húsfreyja að annast átta ára djásnið,

  köttinn og heimilið á meðan, og fara ekki sjálfri

  sér að voða.

  HÚN!

  ALDREI.

  Það þó að hún sé ekki "herlegur yfirgjammari", heldur

  aðeins mergjaður "hryðjuverkamaður" með

  hitaslag að ímynda sér Johnsen syngjandi ræður

  niðri á Alþingi.

  Góðar stundir

 

 

Yfirgjammari þingsins

Systragleði.

  Á tvær systur, húsfreyja,

  enda hún með glaðari konum

  er hér á jörðu ganga,

  og það þó hún segi sjálf frá.

  Og þó húsfreyja væri feimnari

  en spói í kríuhóp, þá hún var barn

  og unglingur, er hún það ekki lengur.

  Og aldrei leiddist henni, þó hún væri

  feimin, og alltaf átti hún haug af

  vinkonum og vinum.

  Stóð að vísu stundum og tvísteig

  í korter fyrir framan hús vinkonu,

  þá hún ætlaði að bjóða henni í leik

  með sér....var alltaf svolítið smeyk

  við þessa foreldra, sem allt þurftu að vita.

  Var afi þinn ekki sæmilegur af gigtinni?

  Pabbi þinn í brjálaðri vinnu hjá Einari ríka?

  Var þetta mamma þín sem stóð uppi í stiga

  og hjálpaði pabba þínum að mála húsið

  núna í júlí?  Þetta líka stóra hús!

  Hvenær byrja tvíburasystur þínar í skóla?

  Nú já, á næsta ári.

  Húsfreyja var fremur uppburðarlítil undir

  þessum yfirheyrlsum, með logarauðar kinnar

  og kökk í hálsinum.

  En oftast nær sáu foreldrar aumur á

  stelpuskottinu, og hleyptu henni bara

  inn til vinkonunnar og sendu svo aftur

  báðar tvær út að leika.

  Oft voru systur húsfreyju með í för og leikjum,

  því henni bar að gætta þeirra eftir hádegi flesta

  daga á sumrin og allar helgar jafnt á vetrum sem sumur.

  Voru svona óskráð lög á heimilinu,

  sem húsfreyja var ekki mikið að pirra sig á

  sem stelpuskott.

  Fékk oft undanþágur frá lögunum, stæði eitthvað

  sérstakt til hjá henni, og oft var pabbinn

  liðtækur í gönguferðir, ísferðir og fjör

  um helgar með þær allar þrjár systurnar.

  Þá var oft mikið sungið og hlegið, og pabbinn

  náði stelpunum sínum vel samtaka í leik og gleði.

  Heima hjá múttu sinni og afa í suðaustan 17 á Stórhöfða,

  gátu systurnar einnig oft leikið sér saman í "Dimmó",

  "dúkkulísuleik" og "púsli"!

  Ansi oft vildi samt hvessa innandyra einnig, þá

  stríðnin kom upp í systrunum, jafnvel brutust

  út bardagar af og til.

  Múttan og afinn urðu þá að stía stríðsaðilum sundur,

  skæruliðarnir með slöngulokkana sendir upp í barnaherbergi,

  þar sem þær gengu berserksgang í herberginu í mótmælaskyni,

  en rauðhærða skottan, húsfreyja, fékk "sá vægir sem vitið hefur

  meira"-fyrirlesturinn og var látin þurrka af leirtauinu eftir

  þrjúkaffið og ganga frá.

  Afinn tapaði sér svo alveg yfir ástandinu á barnaherberginu,

  þegar hann kom upp úr kaffi, og heyrði rauðhærða skottan

  grátkveinin í glókolla systrunum þegar afinn skellti þeim í að

  taka til eftir "hamfarirnar"!

  Vorkenndi múttan þeim iðulega, og læddist undir handlegg

  gamla mannsins sem stóð í dyragættinni á barnaherberginu

  heldur byrstur á svip, og hjálpaði glókollunum við tiltektirnar.

  Sú rauðhærða dæsti mæðulega yfir óréttlætinu niðri í eldhúsi,

  "ENGINN hjálpaði henni að þurrka, og ganga frá leirtauinu".

  Svo hún kláraði sitt verk ein, skrapp svo rétt niður

  í kjallara og faldi uppáhaldsstrigaskó þeirra slöngulokkuðu

  inni í fírherbergi.  HANA!

  Sagðist svo vera farin út að leika, og að sjálfsögðu vildu

  glókollurnar með henni, þó hrakviðri væri og stormur.

  Og út fóru þær allar þrjár, systurnar, og létu vindinn

  þeyta sér til og frá með ærslum og skríkjum.

  Voru að vísu svolítið súrar slöngulokkuðu systurnar

  fyrst, því uppáhaldsstrigaskórnir þeirrra fundust

  bara HVERGI er þær klæddu sig í útifötin. 

  Urðu að sætta sig við gömlu slitnu strigaskóna.

  VESEN!

  Húsfreyja er fimm árum eldri en systurnar, sem reyndar

  hafa enn nokkuð ljósan hárlit, en slöngulokkarnir eru löngu

  horfnir.

  Þær eru allar þrjár löngu hættar að berjast um athygli

  og yfirráð, stríða hvor annarri góðlátlega í það mesta,

  og mikilvægast af öllu, þær eru og verða perluvinkonur.

  Geta alltaf treyst á hvor aðra, leitað til systranna ef

  eitthvað bjátar á, sótt í styrk og suðning, ráð og dáð.

  Glaðst saman á góðri stund, spjallað, ferðast saman, 

  tekið saman sumarbústaði á leigu, og deilt saman lífsgleðinni.

  Jamm, líklega er þetta bara nokkuð góð vísindi, að

  systur skapi lífshamingju.

  Systur!   YKKAR SKÁL!

  Góðar stundir.

Systur skapa gleði en bræður kvíða

Þegar menn búa í glerhúsi...

  ....og eiga einhver helv....

  helling af grjóti í ofanálag,

  er ekkert annað að gera en að

  grýta því.

  Ætli hann hafi látið hjákonuna

  undirrita snepla í þríriti, með

  2 lögfræðinga sér við hlið, þá

  þau gerðu samkomulagið?

  Eiginkonan máske verið "vottur"?

  Greinilegt að maður þessi veit ekkert

  hvað hann á að gera við aura sína.

  Sólundar kannski einhverju smotteríi

  af auðæfum sínum í málshöfðun gegn

  hjákonunni...sem sjálfsagt á ekki bót

  fyrir rassinn á sér...og lendir í skuldafangelsi

  vinni sá gamli málið.

  Jamm, mannskepnan er furðulegt dýr,

  og ekki allt gáfulegt sem hún tekur sér

  fyrir hendur.

  Húsfreyja og 8 ára djásnið svo báðar

  veikar heima í dag.

  Flensuskítur, hiti, beinverkir og hósti að

  hrjá þær.

  Búnar að horfa saman á "Home Alone",

  "Mister Bean" í listaverkavandræðum í Hollywood

  og baka eina afmælisköku handa bónda húsfreyju.

  Átta ára djásnið situr nú með restina af súkkulaðikreminu

  á kökuna og hámar í sig...búin að setja "Mister Bean"

  aftur á byrjunarreit og hlær dátt af óförum kauða

  í Ameríku.

  Hún verður orðin hress á morgun, spáir húsfreyja.

  Húsfreyja ætlar að hósta sig inn í rúm, og ná

  sér í góðan lúr....ef hún fær frið fyrir höfuðverk

  og beinverkjum.

  góðar stundir.

 

Auðjöfur í mál við hjákonuna

Slúðurkarlar!

  Hehehe....er sem húsfreyju

  grunaði, jafnvel í slúðrinu

  vilja karlar standa konum framar.

  Slúðra svolítið og skeggræða um

  náungann.

  Húsfreyja sem betur fer illa að sér

  í slúðri, og "Séð og Heyrt" sem hefur

  á sér sæmilegt slúðurorð, aðeins

  keypt inn á heimilið af bónda hennar....

  ..svona tvisvar á ári.

  En svona honum til varnar, þá kaupir hann

  aðeins snepil þennan, þá miðdóttirin

  sem hefur verið í modelbransanum, ratar

  inn á síður þess.

  En gaman að þessu, og máske gott

  umhugsunarefni fyrir alla,

  bæði konur og karla, sem hafa gaman

  að því að slúðra um náungann, að hafa slúðrið

  ætíð á léttum og græskulausum nótum, en

  láta rætnina eiga sig.

  Góðar stundir.

 

Karlar slúðra meira en konur