Snjókorn og piparkökur.

  Húsfreyja gutlaði og gaufaði

  í húsverkum í dag.

  Braut saman þvott, tók úr

  uppþvottavélinni, og pakkaði

  inn afmælisgjöf til bestu

  vinkonu 7 ára djásnsins.

  Djásnið skellti sér svo í

  bleikan prinsessukjól og

  spariskó og tiplaði yfir í

  næsta hús til vinkonu eftir skóla.

  Kötturinn móðgaður yfir hvítum,

  fallegum en "blautum" snjókornum

  er svifu tignarlega niður á sólpallinn

  til hennar, rétt á meðan hún var að

  brýna klærnar á staurnum sínum.

  Mjálmaði ámátlega við stofudyrnar, og

  skellti sér upp á grindverkið þegar hún

  fékk ekki svar strax.

  Hékk þar sem gammur í leit að bráð

  er húsfreyja bjargaði henni inn.

  Húsfreyja dásamaði veðrið og snjóinn

  við köttinn, sem leit hvasst á eigandann

  og mótmælti:  MJAAAVVVR, húsfreyja gat

  átt sín "blautu" og köldu korn sjálf.

  Inni tendraði húsfreyja kertaljós, og

  hélt áfram gaufinu...og gutlinu.

  Djásnið mætti sársvöng..."ég er skítsvöng

  mamma, því ég fékk bara tvo bita af

  afmæliskökunnni, því það voru svo margir

  krakkar".

  Húsfreyja dró í snatri fram piparkökur

  og mjólk, sem þær snöfluðu í sig

  í vinalegri rósemd og ræddu afmælið.

  Kötturinn lá í öngviti á eldhúsborðinu,

  þar sem ofninn náði að hita upp borðplötuna,

  og leit ekki einu sinni upp.

  Ætlar svo húsfreyja, að skella slátri frá tengdó í

  pott og sjóða í kvöldmatinn og slatta

  af Þykkvabæjarkartöflum með.

  Góður frídagur þetta.

  Góðar stundir.

 

Athugasemdir

[Solla Guðjóns, 20.11.2008 kl. 21:28]

GÓÐUR DAGUR OG SVO JÓLAMYND .ÞAU ERU VÍST AÐ KOMA

[Sigríður Sigurðardóttir, 21.11.2008 kl. 08:38]

  Ó já, Jólin að bresta á eftir rúmanmánuð, Solla mín.  Búin að versla 5 jólagjafir, svo ég er altént byrjuð.  Aha, dagurinn í gær var bísna góður, og slátrið frá tengdó var æði.