Ægileg kanína.

   KratsjúBANG!  ÞRUUUUMA!!!

  Dökkærða smávaxna dísin,

  kom fram úr barnaherberginu

  eitt þrumuský, með tárin í augunum

  og rauk fram í forstofu.

  -HÁTT SNÖKT-

  Húsfreyja stökk upp og spurði

  áhyggjufull hvað amaði að.

  "Þær sögðu að ég hefði valið kall,

  sem ég valdi ekkert....snökt"

  Hrikalegt!

  Foreldrar þeirrar smávöxnu enn í vinnunni,

  og ekki þýddi að barnið færi heim, og

  biði í kuldanum fyrir utan.

  Brýn þörf fyrir góð "mömmu-inngrip".

  Sú smávaxna sett við eldhúsborðið,

  dregin fram skúffuterta, mjólk og

  svo Daim-súkkulaði í eftirrétt.

  Sú stutta lét sér það vel líka, á meðan

  að húsfreyja reyndi að fá botn í

  "óveðrið" sem skollið hafði á í barnaherberginu.

  Jú, djásnið og dökkhærða háa dísin héldu

  því stíft fram, að "kanínan" sem ENGINN

  vildi leika hefði komið í hlut þeirrar smávöxnu.

  "Loft var þrútið og lævi blandið", þá húsfreyja

  bauðst til þess að "taka að sér" kanínuræfilinn.

  Og vildu þær ekki líka koma fram í skúffurtertu

 og mjólk.

  NEI!

  Húsfreyja fór fram aftur og stússaði í kringum

  þá smávöxnu.

  Þær "þrútnu og læviblöndnu" fylgdu á eftir, þungar á

  brún.

  Djásnið sagði ekkert gaman, þegar Elínóra væri

  hætt í Pet-Shop.

  Húsfreyja bauðst aftur til að leika kanínuna, og

  hvort þær vildu ekki líka tertu, mjólk og Daim.

  NEI!

  "Hvurslags hrikalegi svíðingur er þessi kanína"?

  hugsaði húsfreyja.

  En þær "þrútnu og lævi blöndnu" voru farnar

  að gjóa augunum á kræsingar þeirrar smávöxnu.

  "Þið þurfið ekkert að hafa kanínuna með" sagði

  húsfreyja "komið nú og fáið ykkur köku og mjólk,

  og ræðið málin".

  Og skvísurnar settust.  Eftir hressilega sykurbombu

  ásamt mjólkurglasi, voru friðarumleitanir húsfreyju

  komnar í góðan gír.

  Og aftur orðið heiðskýrt og ekki ský að sjá á lofti.

  Búið að samþykkja vopnahlé, og rokið inn í

  stofu og "babúskur" húsfreyju settar í leikinn.

  Eftir músík, dans, hreyfileik og babúskur var

  aftur ákveðið að fara inn í barnaherbergi að

  leika í Pet-Shop.

  Úúú... húsfreyja bauðst enn og aftur til að

  "leika" kanínuna ógurlegu, en þess reyndist

  ekki þörf, því þær "ætluðu ekki" að rífast.

  Je ræt!

  Þegar 3 sjö ára skvísur eru komnar saman

  í Pet-Shop, er betra að eiga góðar birgðir

  af skúffukökum, mjólk og súkkulaði.

  Og hlusta vel eftir "þrumum og eldingum"!

  Var svo í morgun með tengdó á augndeildinni, húsfreyja.

  Tengdamútta í sprautu á meðan húsfreyja og

  tengdapabbi fengu ævisögu eins aldraðs

  herramanns beint í æð.

  Sá beið einnig eftir "vinkonu" sinni, og fór

  vítt um völl í spjalli sínu við vin sem hann

  hitti á biðstofunni.

  Sá var ekkill, er var nýbúinn að kaupa sér

  íbúð með "vinkonu", var að pæla í því að

  versla sér "golfbíl" fyrir 300.000 krónur,

  taka þátt í næsta Bridge-móti á Selfossi

   og skreppa í eina herlega reisu til

  sólarlanda í vetur.

  Ræddi almennt heilsufar, skilnaði, giftingar og

  andlát bróðurparts allra öldunga á Selfossi í leiðinni.

  Og soninn sem var í vandræðum og ekki sáttur við

  pápa gamla......jamm, en hann átti altént íbúð

  peyjinn.

  Ekki nokkur "kreppa" í öldungi, og hann að njóta

  lífsins til fullnustu, þrátt fyrir böl og alheims grín.

  Og dagurinn kaldur og blár, en sólartær.

  Fínn dagur þetta, að mati húsfreyju, þó hún sé

  á fljótandi fæði fyrir "steinbrjótinn" á morgun.

  Góðar stundir.

 

Athugasemdir

[Heiður Helgadóttir, 31.10.2008 kl. 12:30]

[Árný Sigurðardóttir, 31.10.2008 kl. 19:57]

alltaf fjör hjá þér systir kær......sjáumst.

[Sigríður Sigurðardóttir, 1.11.2008 kl. 13:16]

Já ljúfastar, hér er alltaf stuð, grín og gleði!