Þetta er ekkert mál....

...að skreppa með litla liðið niður í Skvísusund í klukkutíma",

 húsfreyja var hrikalega BJARTSÝN.

  Mútta húsfreyju horfði full efasemda á hana.

  "Jæja þá, en bara í klukkutíma".

  Systir í Eyjum var rokin til starfa í Skvísusundi, og húsfreyja

  og mútta hennar voru einar heima með Báruna, Aron, Bæron, Svöluna og Alla Elí.

  Við gerðum okkur klár.  Vorum næstum komnar af stað, þegar

  útgangur Alla Elí uppgötvaðist.  Á stuttbuxum og í stuttermaskyrtu.

  Hálf svona "hráslagalegur" til fara.  Vippað í hlýrri föt.

  Lagt af stað!  10 skref.

  Snúið við! 

  Aron í einum þunnum peysugopa....var búinn að vera í

  hálftíma "á leiðinni" að klæðast flíspeysu. 

  Fundinn snolluð flíspeysa af Bæroni, sem Aron var hæst-ánægður með.

  Haldið af stað!  20 skref.

  Snúið við!

  "Ég er að drulla á mig", Aron frændi ekki að skafa af því.

  "Jeminn.  Það verður allt barnafólk komið, farið og mætt aftur í

  bjórinn barnlaust, þegar við loks mætum á svæðið" hugsaði

  húsfreyja áhyggjufull.

  Lagt af stað, eftir að allir höfðu verið "rækilega" yfirheyrðir um

  ástand þvagblöðru og ristils.

  Hallelúja, komumst á áfangastað.

  Alli Elí að vísu að miskilja tilgang ferðarinnar illilega.

  Spurði ömmu sína aftur og aftur, á leiðinni hvort hún hefði

  munað að taka "sundbuxurnar" hans með.

  Amman reyndi að útskýra:  Alli minn, það er ekkert "sund" í

  Skvísusundi". 

  Sá stutti horfði á ömmu sína eins og hún hefði misst vitið.

  Húsfreyja reyndi að koma múttu sinni til bjargar:

   "Alli minn, það er engin "sundlaug" í Skvísusundi. Þröngar,

  mjóar götur eru bara kallaðar "sund".

  Sá stutti setti í brýrnar smá stund...."en hvar synda þá

  skvísurnar, amma"?

   Amman og húsfreyja gáfu frekari útskýringar upp á bátinn.

  Í Skvísusundi stóð mikið til, en reyndar fundust aldrei nema

  helmingurinn af skemmtiatriðunum.  Þ.e spákonan og andlitsmálunin.

  Hitt virtist allt hafa gleymst hroðalega.

  Engar skotskífur, míni-golf eða fjölskylduskemmtun.

  En Aron skellti sér til spákonunnar, og þegar hann hafði fregnað

  að hann myndi eignast ljóshærða vinkonu, "3 börn og 17 sportbíla"

  í náinni framtíð, náðist ekki brosið af andliti hans það sem eftir lifði

  kvölds.

  Systir birtist.  Seldi bjórinn grimmt í Reyniskró.  Johnsen sást á

  ferli með gítar og svartfuglsklóna..."Ólafía, hvar er Vigga"...í

  kartöflugarðinum heima?

  Litla liðinu rótað heim  rétt fyrir klukkan 22:00.  

  Hálffúlt að engin skyldu skemmtiatriðin.

  En annars bara stuð.

  Meira Eyjastuð næst.
 

 

 

Athugasemdir

[Heiður Helgadóttir, 9.7.2008 kl. 16:27]

Þetta var greinilega góður dagur, en fékkst þú engan spennandi spádóm. Eigðu góðan dag mín kæra

[Sigríður Sigurðardóttir, 10.7.2008 kl. 15:55]

  Já, flottur dagur á Stakkó, en kvöldið svona meira vesen.  Nah, tók enga áhættu með spákonuna....því ALLIR er húsfreyja heyrði á hjá henni, fengu lágmark 3-9 börn og "ljóshærða" kærusta eða kærustur...og eftir henni að dæma verður "sportbílaeign" okkar Frónbúanna í sögulegu "hámarki" næstu 20-30 árin.

  Þakka innlitið ljúfust.