Gufusoðin...

  ...leggöng?

  Já há.

  Það var og.

  Og Kaninn fílar þetta í tætlur.

  Jæja, þarf ekki að koma húsfreyju á óvart,

  hjá þjóð sem fer með "kynfæri" sín og "endaþarm" til

  LÝTALÆKNA í "fegrunaraðgerðir"!

  Margt er skrýtið í kýrhausnum...skrítnara hjá þeim í

  S-Kóreu og Ameríku

Ný tíska: Gufuböð fyrir leggöng

Miðlægur köttur?

  Kattarrófan situr í viðbragðstöðu bak við tölvuskjáinn,

  hljóð og kengspent....eitt mjaaavvrrrr!

  Við öllu búin.

  Um leið og húsfreyja sest við kompjúter sinn og tekur

  að hamra á lyklaborðið, læðist kisa fram léttum þófum

  og tekur að rápa fram og til baka yfir tölvuborð húsfreyju..

  lkkadirijfd..notjrmværi...dfklriifjfjk..lkfjlfkdklfæad....

  Húsfreyja byrstir sig við kött og reynir að stroka út

  kattarsanskrítina jafn óðum.

  Köttur setur upp snúð, hlammar sér á óæðri endann

  skammt frá tölvumús húsfreyju,

  og þykist vera óhreinni en skrattinn sjálfur fastur

  í tjörupotti sínum í iðrum Vítis um leið og hún þvær sér.

  Slær rófunni í átt að músinni, músin slæst utan í

  lyklaborðið svo húsfreyju fipast sláttartakturinn og

  slær inn nokkur orð á sinni eigin sanskrít...kloiip...fertoif....búff!

  "Er nú bráðnauðsynlegt að vera að ÞVO sér akkúrat

  hér uppi á skrifborði hjá mér" spyr húsfreyja kött.

  Læða virðir ekki húsfreyju viðlits...hægra eyra hennar virðist

  með versta móti af skít í dag.

  "Það var og" hugsaði húsfreyja, "þá loksins ég hef stund

  í kompjúterinn, þá verður kötturinn athyglisjúkur"!

  SJÍSS!

  En hana!  Köttur aftur farin á bak við tölvuskjá.

  Móðguð!

  Látum vera.

  Aldeilis kominn tími á smá aðventu-pistil.

  Húsfreyja verið í miklum ham það sem af er desember,

  og á lítið eftir nema að skreyta jólatréð og pakka inn

  tveimur pökkum handa níu ára djásninu.

  Samt herjuðu á húsfreyju mergjaðar pestir af og til,

  hiti, beinverkir, hálsbólga, magakveisa og uppsölur.

  Tarna var ekki félega aðventan hjá húsfreyja á tímabili,

  en síðan bráði af húsfreyju, svo hún smellti sér í

  fimmta gír og reit jólakort í gríð og erg,

  verslaði jólagjafir handa venslafólki og ástvinum, þreif gardínur og

  eldhússkápa, reddaði fjárhagnum af stakri snilld (neipp, ekki lán),

  þreif glugga, skreytti þá seríum, pakkaði inn gjöfum,

  fór í jóladinnera eina þrjá, einn konukvöldverð, og fór í

  skólaföndur með djásninu og svo eina Húsdýragarðsferð..

  Svona rétt náð að heilsa upp á Esjuna af og til,

  og dást af rauðbleikum skýjum yfir hvítum koll hennar,

  og að vísitera múttu sína austur í Þorlálshöfn.....TVISVAR.

  Og alltaf með níu ára djásnið á hælum sér:

  "Mamma, hvenær fáum við jólatréð"?

  "Mamma, nú eru bara 10 daga...7 dagar....5 dagar....osfr til jóla".

  "Mamma, við eigum eftir að fara í Húsdýragarðinn".

  "Mamma, mig langar í svona....hitt....þetta... og alveg rosalega

   mikið í þetta hér í jólagjöf".

   Og svo klykkir hún út með:

  "Mamma, ég á svo afmæli STRAX í næsta mánuði.... hvenær má

  ég byrja að bjóða í afmælið mitt"?

  Kattarloppa kemur skyndilega á fleygiferð undan skjánum,

  og ein kló krækir í húð á löngutöng hægra handar húsfreyju....Á!

  "Grálúsuga gráslemban"!

  Húsfreyja potaði loppunni aftur undir skjáinn.

  Köttur læddist grautfúll framundan skjánum og settist aftur

  í "baðsæti" sitt við hlið tölvumúsar.

  "Sjóræningi og saltaður sjódraugur"....húsfreyja hvessti augum

  á læðu, um leið og hún las henni pistilinn upp á "Kolbeinsku"!

  Hefur húsfreyja annars minnst á að jólasveinar þeir er í

  skó gefa, næturlangt þennan mánuð, eru með snjallasta móti?

  Búnir að gefa níu ára djásninu tvær TINNA-bækur í skóinn!

  Bara SNILLD!

  Loftur Guðmundsson á heiður skilið fyrir snjallar þýðingar á

  bókum þessum.

  Húsfreyja er að lesa "Leyndardóm Einhyrningsins",

  og skemmtir sér sem aldrei fyrr yfir orðaleppum Kolbeins kafteins.

  Jamm, annríki en góðir dagar eigi að síður.

  Mútta húsfreyju hefur einnig verið í ham á jólaaðventunni þetta árið.

  Vegna mistaka hjá TR var henni OFGREIDDUR ellilífeyrir upp á 180.000,

  og auðvitað er þá mútta komin í bullandi skuld við þá

  ágætu en örlítið "heilabiluðu" stofnun.

  Eftir mikil bréfaskrif, símhringingar, heimsóknir á sýsluskrifstofur

  og  spjall á "forn-Grísku" við ýmsa aðila á TR í 5 mánuði, ákvað mútta húsfreyju

  fyrir rest að SEMJA um greiðslur á "óumbeðnu láni" þessu.

  Jú, mútta mun næsta áratuginn eða tvo, greiða því sem samsvarar

  5000 krónur á mánuði, þar til 180. þúsund kallinn er að fullu

  greiddur ...með vöxtum að sjálfsögðu...svo eitthvað losar þetta

  200 þúsundin þegar upp er staðið.

  Allir pappírar undirritaðir og frágengnir í haust.

  Mútta alsæl.

  EN......

  Viti menn.

  Mútta húsfreyju fær mánuð eftir mánuð rukkun upp á

  45 þúsundir, í stað fimm.

  Svo mútta hringir í TR, sem af rammíslenskri visku

  vísar á sýsluskrifstofur og Landsbankann,

  og mútta síðan hringir í með hraði.

  Sýsli vill ekkert ræða málið, vísar á Landsbanka allar Frónbúa.

  Mútta hringir.

  Spjallar við ágæta konu í útibúi á Selfossi, sem veit EKKERT um málið,

  hringja "vinsamlega" aftur á morgun.

  Mútta hringir morguninn eftir, og vinaleg stúlka í "Vík í Mýrdal"

  svarar henni.....öööö jú finnur eitthvað í tölvu sinni....

  ..."en við höfum aldrei fengið neitt um málið frá MIÐLÆGA KERFINU"!

  "Getur þú þá frætt MIÐLÆGA KERFIÐ um samninginn sem ég gerði við ykkur

  hér í Þorlákshöfn", spyr mútta örvæntingafull.

  "Jú", stúlkan telur það nokkuð öruggt, "hringdu aftur á morgun".

  Næsta dag er mútta komin á myljandi spjall um sín mál við konu eina

  starfandi í útibúi Landsbanka á "SIGLUFIRÐI"!

  Biður enn og aftur um að einhver RÆÐI við MIÐLÆGA KERFIÐ,

  svo hún fái réttar upphæðir á rukkanir sínar.

  Jaso!

  Síðast þá húsfreyja vissi, var málið í vinnslu í "jaðarkerfinu"?....."útlæga"

  kefinu?...og verið er að reyna að ná "einhverju" sambandi við

  MIÐLÆGA KERFIÐ... og takist það,  þá má mútta húsfreyju

  líklega vænta símhringingar frá útibúi Landsbankans í GRÍMSEY....?,

  og henni tilkynnt að málið sé orðið MIÐLÆGT og þar með DAUTT..

  ....eða hvað?!

  Nema að Landsbankinn sé kominn með útibú í

  Kúlusúkk á Grænlandi...þá á mútta húsfreyju "auðvitað" eftir að

  bjalla í einhverja góða konu þar, og ræða málið "frá byrjun"

  við hana núna í vikunni.

  En nóg að sinni, kötturinn farinn að skralla í "miðlægum" jólapappír húsfreyju.

  Góðar og "miðlægar" stundir á jólaðventunni.

Ráða við? Glætan!

  Nokkur hundruð þúsund vinnufærar hræður

  á skeri úti í Ballarahafi ráða

  ekki rassgat við svona dæmi,

  það eru hreinar línur.

  Enda erum við þorri þjóðarinnar

  vön tölum frá 1 krónu upp í 290 þúsund kall,

  sem við höfum svona í höndunum til að þrauka

  heilan mánuð í einu.

  Teljumst góð ef við eigum 20- 50 þúsundir eftir

  í mat, þá búið er að borga alla mánaðarlega reikninga.

  Húsfreyja viðurkennir fúslega að hún hefur engan skilning á

  "stjarnfræðilegum" tölum í fúlu "Ísbjargarmáli" þessu.

  Gæti kannski náð að höndla töluna "1 MILLJARÐUR" pæli hún

  rækilega í henni, en þegar verið er að tala um

  hundruði milljarða ....gleymið því!

  Húsfreyju þykir næsta einsýnt, að ef það er "kolólöglegt" að

  skella þessu talnarugli á íslensku þjóðina,

  og yfirfæra í skuldir, þá ættum við bara

  að smella okkur með málið fyrir dóm!

  Við erum myljandi flink í því að þrasa og þrefa,

  gefumst aldrei upp finnist okkur við órétti beitt,

  og erum seigari en andskotinn þegar kemur að því að

  rekast í málum á erlendri grund.

  Samanber "frelsisbarátta" okkar við Dani hér í den.

  Eða þetta er mat húsfreyju eftir að hlusta á aldeilis makalausan

  blaðamannafund samningarnefndar Icesafe í gær.

  Og svo er þessi samningur sagður "mun hagstæðari"

  okkur Frónbúum.

  Frónbúum sem vissu lítið sem ekkert um Icesafe á tímum

  góðæris og útrásar.

  Sem nutu aldeilis ekki góðs af "arðgreiðslum", "bónusgreiðslum"

  og hverju ekki sem þá tíðkaðist.

  Neipp.

  Sáum bara myndir í sjónvarpinu af "veislunum" í London og víðar,

  þá "peningakóngarnir" eyddu grimmt arði sínum og bónusum.

  En nú skulum við pöpullinn "flatskjáasjúki" fá að borga fyrir herlegheitin.

  "Dýrurstu flatskjáir heims" þar með.

  En komin með nýjan og "hagstæðari" samning!

  Ó, vei, húsfreyja hefði þá fengi ærlegt hland fyrir hjartað

  hefði henni auðnast að berja fyrri samning augum og

  botna eitthvað í honum.

  Svo mörg voru þau orð.

  Góðar stundir og passið vel upp á þúsundkallana ykkar....

  hef fregnað af "ófélegri kerlingu" á ferð... illvígari en jafnvel Grýla sjálf!

Íslendingar ráða ekki við skuldirnar

Eignarlaust froðufyrirtæki!

  Piff!  Paff!

  Bara hvarf sisona.

  Svo segir Guðmundur Kristjánsson forststjóri Brims

  og eigandi hins gjaldþrota Hafnarhóls.

  Níu komma fjórir milljarðar horfnir Landsbanka landsmanna þar með,

  og skuldin sú færist yfir á breiða bakið almúgamannsins SJÁLFKRAFA!

  Það segir sig sjálft.

  Hefur hvort eð er ekkert við aura að gera sá með breiða bakið.

  Súrefni, vatn og brauð er kappnóg í svoleiðis lýð.

  En það er verra með vesalings forstjóra Brims.

  Aumingja forstjórinn.

  Þarna var hann í rífandi bíssness með "froðu",

  daginn út og daginn inn.

  Keypti froðu grimmt og lánaði froðu enn grimmar,

  og svo bara PÚFF!

  Núll og nix!

  Nada!

  Ingenting!

  Froðan bara hvarf!

  Og nú kemst ekki sá armi forstjóri í "froðubað" um jólin,

  sei, sei nei!

  Verður að láta sér skitin "froðulaus"

  forstjóralaun duga.

  Ó, vei.

  Hætta jafnvel við heimsreisuna í desember og láta sér

  duga tveggja vikna ferð til Miðjarðarhafsins að

  versla jólagjafir og kost fyrir hátíðarnar......eða hvað?

  Jamm, það eru ill örlög að tapa svona í "froðuviðskiptum",

  og ekki einu sinni hægt að fá Elton John til að skreppa

  í eitt lítið sætt jólapartý hér uppi á litla Fróni,

  að syngja angurvær jólalög og dapra "froðuhvarfssöngva".

  SNÝÝÝT!

  Húsfreyju klökknar af sárum sting í peningapyngju sinni,

  og heykist í breiða bakinu sínu, af sorg yfir aumum og

  vesölum forstjórum, sem gráta froðu sína og "froðupeninga"!

  Það var og.

  Góðar stundir og megi öll ykkar jólaböð vera ilmandi af hvítri hreinni "sápufroðu".

„Svo hvarf bara froðan“

Hrikalegt tjón!?

  Hér er hann "Snæfinnur" og hann Frosti,

  snjóhvítir snjókallar húsfreyju og djásnsins báðir tveir,

  búnir að "hverfa" sporlaust af sólpalli

  húsfreyju, árum saman, vetur eftir vetur,

  og það hefur aldrei flökrað að húsfreyju að

  þetta gæti verið "kærumál"!

  Og þá kannski líka skaðabótaskylt!?

  Gæti þá verið búin að að græða grimmt vetur eftir

  snjóugan vetur, húsfreyja, vaðandi í "snjókallabótum" upp fyrir haus.

  Hrikalegt hve húsfreyja getur verið utangátta.

  Fattlaus!

  Máske gengur laus í hverfi húsfreyju sérlegur "snjókallabófi",

  sem rænir og ruplar alla sólpalla af snjóköllum,

  skilur ekkert eftir nema rennblautan pall, og örlitla

  snjóghrúgu eins og í fyrra hjá húsfreyju....líklega vinstri fótinn af Snæfinni.

  Heldur þeim hvítu herrum síðan í gíslingu, og reynir að pína

  þá til sagna um hvar þeir geymi "töfraskóna" einu og sönnu

  sem hjálpar þeim að dansa og syngja.

  Jaso.

  Og hér hefur húsfreyja þá vaðið í villu og svíma árum saman.

  Talið sér trú um að Frosti og Snæfinnur hafi bara bráðnað í rólegheitum

  á sólríkum vetrardögum, breyst í vatn og snjóeðju...

  en svo hefur þeim þá bara verið RÆNT!

  Hrikalegt svíðingsverk er þetta, dónaskapur og hryðjuverk!

  Húsfreyja mun hringja í bítið í fyrramálið í "ein einn tvo",

  og  krefjast þess að snarpir og skarpir rannsóknalögreglumenn

  mæti á sólpall húsfreyju og leiti vísbendinga og sönnunarganga

  um hrikalega glæpi þessa framda að vetri til síðustu árin.

  Verður að negla snjókallasvíðing þennan og erkiglæpon!

  HIÐ SNARASTA!

  Getur farið að snjóa hér í borginni við sundin bláu HVENÆR SEM ER!

  Góðar stundir og njótið vetrarins.

Snjókallinum stolið

Hliðar saman hliðar...

  .. og Gunnar víkur til hliðar.

  Hvort hann stígur til hliðar er svo annað mál ( ensk. step aside).

  Getur máske spígsporað svolítið um, sé hann

  ekki í önnum í Krossinum allan jólamánuðinn og

  gefið sér tíma til að stíga dans við sína ektaspúsu.

  En húsfreyja telur þetta góða ákvörðun hjá Gunnari,

  enda Gunnar snjall maður og virðist skilja alvöru málsins.

  Gerir hárrétt hér, að víkja á meðan úr kærumálum þessum

  leysist, svo ekki falli rýrð á starfsemi Krossins.

  Húsfreyja hefur gjarnan leyft sér að gera góðlátlegt grín að

  Gunnari og trúarhita hans, enda telur hún hann stundum geta

  misst sig, þegar kemur að Guði, kraftaverkum og ræðum

  um meintar syndir okkar mannanna.

  Hitt er svo annað, að húsfreyja hefur í starfi sínu sem

  hjúkrunarfræðingur hitt margan manninn, sem kominn

  var á heljarþröm af neyslu vímuefna, átti nánast

  bara eftir að taka þeim gröf, þegar Krossinn hans

  Gunnars hreinlega BJARGAÐI þeim.

  Ekkert sem upp á vantar hjá Gunnari og Krossinum þegar

  kemur að því að rétta sjúkum og þeim sem lítils mega sín hjálparhönd.

  Þá er það kærleikur, sannur og heill í gegn sem blívur.

  Og það má Gunnar eiga, hvað sem meintum kynferðisafbrotum

  hans líður.

  Húsfreyja leggur ekki dóm á það málið.

  Ekki hennar að dæma.

  Húsfreyja getur síðan ekki hugsað sér Krossinn án Gunnars eða

  Gunnar án Krossins.

  Ekki síst vegna þess að Gunnar er að hennar mati einhver

  skemmtilegasti heittrúarmaður okkar Frónbúanna,

  og henni finnst það bara bráðfyndið hversu hrapalegur,

  sótsvartur erkisyndari hún er orðin, eftir hlustun á eina af hans

  brennheitu trúarræðum.

  Sér glytta í glæður helvítis á öðru hverju götuhorni, og gott ef

  hún sér ekki hornum og hala bregða fyrir líka, í að minnsta kosti

  viku á eftir slíkan ræðustúf frá Gunnari.

  En tekur þá málið upp við Guð sjálfan í bænum sínum,

  og spyr hvort hún sé nú alveg að klúðra öllu hér á

  jörðu niðri.

  Hvort allt sé í kaldakoli hjá henni, djöfulgangi, ódæðu

  og bersyndugu líferni?

  Og Almættið brosir góðlátlega, og segir húsfreyju

  að hafa engar áhyggjur, hún sé á bísna góðu róli,

  starfi í gleðinni og kærleikanum, og hann Gunnar í Krossinum sé

  nú mest fyrir að vera svolítið dramatískur.

  Jamm, svo mörg voru þau orð.

  Kvöldmatur næst.

  Góðar stundir á aðventunni.

 

Gunnar stígur til hliðar

Ljómandi hugmynd eða hugljómun?

  Húsfreyja var upptendruð af andakt

  og góðum tilfinningum á fyrsta sunnudegi

  í aðventu.

  Níu ára djásnið kveikti á fyrsta kertinu, eftir að

  húsfreyja græjaði aðventukransinn með ilmandi greni,

  rauðum kertum og skrauti.

  Húsfreyja dæsti ánægjulega um leið og jólaljós

  voru komin út í glugga hjá djásninu og jólakúla

  í svefnherbergisglugga húsfreyju og bónda.

  Jaso, nú var bara eftir að skella aðventuljósunum

  í eldhúsgluggann, og þá fengi hún pásu.

  Himinsæla.

  Kannski að húsfreyja ætti að tylla sér við tölvuskjá sinn og rita einn

  herlegan pistil, uppfullan af hvatningu og fallegum orðum svona í

  tilefni af því að hátíð friðar og ljóss er að hefjast?

  Já, og máske vera með tilvitnanir í trúarleg fræði, sem

  ku vera full af fallegum og uppbyggjandi orðum.

  Þetta fannst húsfreyju afbragðshugmynd.

  Tók með hraði úr hillum sínum tvö trúarrit, gamla og velkta

  Biblíu sína og nýlegan Kóran sem henni hafði áskotnast á

  bókamarkaði ekki alls fyrir löngu.

  Falleg og uppbyggileg orð full innri friðar og ljóss.....fletta....

  Kona ein islamatrúar er húsfreyja þekkir, kveður Kóraninn fullan af helgum boðskap

  og fögrum.

  Jæja, látum á reyna.

  Húsfreyja fletti upp í Kóraninum:

  Falli þjófnaðarsök á karl eða konu, skal handhögg vera sú

  hegning til varnaðar sem Allah leggur við.  Hann er máttugur

  og alvitur (5. súra).

 

  "Óttist ekki menn, óttist  Mig";...(5. súra).

  "Fyrir á höfum Vér lagt, að koma skuli líf fyrir líf,

  auga fyrir auga, nef fyrir nef, eyra fyrir eyra og tönn

  fyrir tönn, og jafngildi fyrir sár.

  En hverjum sem af góðvilja hafnar hefndakosti skal

  það til friðþægingar verða.  En þeir sem dæma ekki eftir því

  sem Allah hefur opinberað, eru ranglátir"(5. súra).

  "...Allah er máttugur, og hans er að hegna"(5.súra).

  "Vitið að Allah refsar stranglega: en Hann fyrirgefur og

  er miskunnsamur"(5.súra).

  " Óttist Allah, sem yður mun til sín safna".(5. súra)

 

  "Tarna var ljóta eitursúran fimmta "súran" í Kóraninum", hugsaði

  húsfreyja, "ótti, refsing, auga fyrir auga og tönn fyrir tönn.

  Ekki var þetta fagur boðskapur, reyni aftur að fletta með lokuð

  augun".

  "Ef einhver hyggur að Allah muni eigi veita sendiboða

  sínum sigur í þessum heimi og þeim sem kemur,

  þá mætti hann festa reipi við rjáfrið í húsi sínu og

  hengja sig...." (22. súra).

  "..Hinum vantrúuðu er af eldi stakkur skorinn,

  og yfir höfuð þeim skal hellt sjóðandi vatni,

  sem bræðir skinn þeirra og allt sem í búk þeirra

  fundið verður." (22. súra)

  "Þá sem trúa og góð verk vinna, mun Allah leiða í

  garða, þar sem elfur streyma.  Þar munu þeir skreyttir

  perlum og armböndum úr gulli og klæddir silkiskrúða".(22.súra)

 

  Andskotinn í grárri mysu, þetta leist húsfreyju ekkert á.

  Sjálfsmorð, pyntingar og loforð um punt og prjál

  ásamt vatnssopa í eftirlífinu.

  Ekki var það jákvæður og uppbyggilegur boðskapur.

  Hætti að blaða í Kóraninum, verður að bíða sú gæða-lesningin fram

  yfir hátíðar.

  Jæja, gæti verið ögn skárra að kíkja í Biblíuna,

  þó ekki sé það allt fallegt sem í þá bók er ritað.

  Fyrst af handahófi:

 

  "Óttist ekki.  Þetta er það sem yður ber að gjöra:

  talið sannleikann hver við annan og dæmið

  ráðvandlega og eftir óskertum rétti í hliðum yðar.

  Enginn yðar hugsi öðrum illt í hjarta sínu og hafið

  ekki mætur á lygasvardögum.  Því allt slíkt hata

  ég, segir Drottinn". (Sakaría 8:17.)

  Jæja, með því skárra úr Gamla testamentinu.  Ekki alveg klárt hjá húsfreyju

  hvaða "hlið" er verið að ræða um, eða kannski eru þetta "hliðar", (nema ef vera

  skildi að þetta væri gömlu hliðin á Eiðum og Grænuhlíð 20 í Eyjum)

  en það er svo margt duló í Gamla tesatmentinu.

  "Þér hafið heyrt að sagt var:  Þú skalt elska náunga þinn

 og hata óvin þinn.  En ég segi yður:  Elskið óvini yðar

 og biðjið fyrir þeim, sem ofsækja yður".....(Matt. 5:43).

  Margt fallegt að finna í Nýja testamentinu enda kærleiksboðskapur

  Krists þá kominn til sögunnar.

  "Elskið óvini yðar og biðjið fyrir þeim, sem ofsækja yður" er mjög

  flottur boðskapur að mati húsfreyju.

  Þannig snýst iðulega ofsóknin upp í andhverfu sína, og vopnin eru

  slegin úr höndum óvinarins.

  Kærleikurinn er öflugasta "vopn" okkar mannanna, og

  sýnum við náunga okkur kærleik og gerum góðverk, virðumst við fá

  það hundraðfalt til baka.

  Merkilegt.

  Það finnst húsfreyju.

  En svo langan tíma tók það húsfreyju að finna fögur orð til

  að leggja út af, að hún er komin með "hugsanastíflu" af þreytu.

  Telur hún að næst láti hún vera að leita í bókmenntir trúarbragða

  í leit að slíku og þvílíku.

  Jú, þekkir sína Biblíu nokkuð vel húsfreyja, en vildi láta reyna á önnur

  trúarbrögð í þetta sinn, svona til að gæta jafnræðis.

  Viðurkennir fúslega, að hún er ekki byrjuð að lesa Kóraninn,

  rétt búin að blaða hist og her í honum í kvöld, tilviljun ráðið,

  og er sjálfsagt bara ekki búin að finna allar blaðsíðurnar

  með fögru orðunum í þeirri skruddu.

  Getur þá undirstrikað þau með bláu líkt og uppáhalds vers

  sín í Biblíunni.... og þá skal sko næsta hugleiðing ganga glatt.

  En vill að lokum svona í tilefni aðventu og jóla aðeins segja þetta:

  "Ég óska ykkur þeirrar hamingju að finna réttu gjafirnar handa þeim

  sem þið elskið".

  Góðar stundir á aðventunni.

Rukkar fyrir sólskinið?

                                                                                      Húsreyja gerir sér engar grillur,

  þó hún fengi einn herlegan reikning upp á

  200 evrur frá spænsku konu þessari, fyrir afnot af sólinni.

  Bæði bara hina "sólríku" spænsku konu að

  "loka fyrir" sólina hvað sig varðaði, því peninga

  frá húsfreyju fengi hún aldrei!

  Sú spánska mætti þá skreppa í eina

  sjóðandi heita ferð til sólarinnar að finna

  "off-takkann" til að hegna leiðindaliði sem húsfreyju

  sem neitar að borga.

  Altént ekki fyrr en við vitum hvernig fer með

  "kerlingarhelvítið hana Ísbjörgu".

  Jamm.

  Flest má nú einkavæða í dag.

  Hefur engum dottið í hug að "einkavæða" andrúmsloftið

  hér á móður Jörð?

  Rukka síðan grimmt fyrir hvern "andardrátt" sem við drögum að okkur,

  koma á "andadráttarkvóta" í einum hvínadi hvelli með sérstökum

  græjum sem tengdar eru við brjóstkassa okkar mannveranna,

  og setja á "aukagjald" fyrir hvert skipti sem við færum 20

  andadrætti fram yfir kvótann!

  Einkaréttshafi andrúmslofts myndi mala gull á öllum íþróttamótum,

  fótboltaleikjum, hryllingskvikmyndahátíðum og.... jamm reyndar

  allar nætur þá mannkyn brasaði við að fjölga sér....dodoið gæti orðið rándýrt.

  Yrði auðveldlega ríkasti maður heims á nó tæm!

  Jaso.

  Hmmm....kannski að húsfreyja skreppi til ferða og athugi hvernig

  málum sé hagað í "einkavæðingu" hér á landi.

  Góðar stundir, njótið vetrarsólar og dragið djúpt að ykkur andann.

  Það er svo hollt og gott..... og ódýrt... eins og er.

Sólin einkavædd

Stóra drullusokkamálið.....

  .... í uppsiglingu þar með? 

  Eða verður máske stofnuð sérleg

  nefnd til að fjalla um hvort kalla megi

  þá sem fá milljóna og milljarða afskriftir hjá

  "góðhjörtuðum" bönkum vorum, drullusokka?

  Erum við hin þá sem engar afskriftir fáum,

  "fátækir EKKI-DRULLUSOKKAR" með lán til tugi ára hjá

  bönkum með "steinhjörtu", vegna þess að "góðu"

  hjörtun má aðeins not spari þegar milljóna og milljarða-

  drullusokkarnir lenda í veseni?

  Æi.

  Nennum við þessu?

  Orðaskak, röfl, tuldur, þras og muldur.

  PLÍS!  Getið þið ekki hætt þessu ráðamenn hér uppi á litla Fróni?

  Drífa sig og gera eitthvað í málunum.  GERA!

  Skella sér í "skjaldborg heimilanna" einu og sönnu,

  og hjálpa grónum fyrirtækjum í vanda svo ekki komi til

  hópuppsagna og vaxandi atvinnuleysis.

  NÚNA!

  KRÆST.

  Hættið þessu pólitíska kjaftavaðli og þrasi.

  GERIÐ EITTHVAÐ FYRIR FRÓNBÚA, og stöðvið þetta helvíska

  flækjukjaftæði með úrræðin.... ábyrgðarmenn greiði lán fólks

  að biðja um greiðslujöfnun og hvað ekki?  Hvað er það??

  ER EKKI Í LAGI MEÐ YKKUR?

  HUGSIÐ og framkvæmið síðan VITRÆNT og vel ígrundað.

  SETJIÐ BANKALIÐINU VINNUREGLUR!

  Annars halda bankarnir bara áfram að afskrifa milljónir og milljarða

  hjá "drullusokkum"

  en  ÞJARMA SVO AÐ LITLA MANNINUM!

  KOMMON!

  Þið ráðamenn okkar Frónbúa eruð að gera okkur almúgafólkið GRÁHÆRT

  af frústrasjón, ergelsi, pirringi og forundran.

  Þetta sem er í gangi núna, er ekki vettvangur fyrir

  pólitískt argaþras, kjaftavaðal, framapot og rugl.

 Sei sei nei.

  ÞAÐ ER HEIMSKREPPA í gangi!

  "Sameinaðir stöndum vér, sundraði föllum vér"

  Svo einfalt er það.

  Góðar stundir, og munið að skipta um "drullusokka" fyrir Jólin.

Sagði þá vera drullusokka

Holdfúin evra með drep?

  Ljótt er'ða atarna.

  Jamm asskoti er að heyra þetta.

  Og blessaður fjármálasnillingurinn hann David Marsh

  vill að sjálfsögðu kljúfa evruna í herðar niður, í tvennt.

  Aðskilja hina "holdfúnu morknu" evru frá hinnni sterku og öflugu evru.

  Líklega verður Evrópu þar með skipt í norður/suður hagkerfi, og svo í

  miðjuna og jaðarinn.

  Svo leggja má að líkum að norður og miðjan fái fína brilliant

  "hressa" og heilbrigða evru, á meðan suður og jaðrarnir

  hreppa "holdfúnu evruna með drepið.

  Jepp.

  Flotta evra A og holdétna evra.... Ö?

  Þá húsfreyja fór úr einu Evrópulandi í annað á sínum

  yngri árum, hét þetta holdétna pesetar, frankar, lírur osfr.

  en hitt var mörk, pund, kroner osfr.

  Íslenska krónan taldist ööö... líklega til hvorugs hópsins, enda aðeins

  hægt að fá "gjaldeyri" fyrir 40-80 þúsund íslenskar krónur/

  "álkrónur", þá ferðast var erlendis, og varð að sækja um

  sérstaklega með löngum fyrirvara, um þennan munað í bönkum,

  hyggðist maður á ferð á erlenda grund á árunum upp úr 1980.

  Óðaverðbólga í algleymingi, verkföll, gjaldþrot, allir kaupmenn

  vælandi, allir útgerðarmenn vælandi, atvinnurekendur vælandi,

  en merkilegt nokk ekkert atvinnuleysi.

  Enginn fáranlega ríkur, enginn fáránlega fátækur, allir einhvern

  veginn jafnir í miðjumoðinu að berjast fyrir fæði, húsnæði og

  menntun fyrir börn sín.

  Og alheimur hló að íslensku krónunni sem gjaldeyri.

  Og enn hlær alheimur að vesalings frónversku krónunni sem

  hefur ALLTAF verið skringilega verðlítill gjaldmiðill örfárra vinnusamra og bjartsýnna

  eyjabúa úti á miðju Ballarahafi, og er nú verðlausari úti í hinum

  stóra heimi en nokkru sinni fyrr þökk sé bankahruni, útrás og kreppu.

  Jamm.

  En nú stefnir í að stór hluti Evrópu fái jafnvel verri gjaldmiðil

  en vér armir fjármálavitleysingjar uppi á litla Fróni,

  nefnileg "holdétna evru með drep"

  BJAKK!

  Óskemmtilegur andskoti það.

  Ófélegt að fá svona hroða í peningabudduna sína,

  kolsvart, drepétið og illa lyktandi.

  Verðum máske að ganga í það Frónbúar, verði að

  klofningu þessari, að senda nokkrar skínandi, silfraðar

  vel fægðar og "vita verðlausar" frónverskar krónur á

  suður- og jaðarsvæðin, svo íbúar þessara svæði geti

  altént látið "hringla vinalega" í buddum sínum af og til,

  þó ekki geti þeir keypt salt í grautinn fyrir krónurnar fremur

  en vér armir vitfirringar í fjármálum hér uppi á Fróni.

  Jamm, merkileg uppástunga þetta hjá Marsh.

  Skref fram á við eða aftur á bak...ekki gott að segja.

  En holdfúin evra hljómar satt að segja ekki vel í eyrum húsfreyju.

  Góðar stundir og gangi ykkur vel að láta launin endast út

  mánuðinn.... húsfreyja er löngu sprungin.

Kljúfi evruna í tvær myntir