Kattarkyrkingardagur.

  Húsfreyja hefur setið í síðsumarssólinni

  úti á sínum herlega sólpalli, hlustað á

  Eyfa og Stebba, Bubba og svo gömul lög

  frá árinu 1981......jamm, húsfreyja var

 "nebbnilega" ung pæja það árið , nýútskrifaður

  stúdent sem hafði ekki hugmynd um hvað hún

  ætti að finna sér að bauka í lífinu.

  Var einna helst á því að gerast trúboði eða

  kennari, heimshornaflakkari eða símadama hjá

  Símanum....."samband útlönd, góðan dag...má

  bjóða þér að bíða á meðan ég reyni að ná

  sambandi við númerið"?

  En þá væri húsfreyja orðin atvinnulaus í dag, ef hún

  hefði orðið símamær, í lítilli eftirspurn ef hún hefði

  valið trúboðann, alltaf í launtjóni og verkföllum

  ef hún hefði orðið kennari og "ekki komin heim aftur"

  ef hún hefði lagst í heimshornaflakkið.

  Svo einhverja "miðstýringu" að ofan hefur hún

  fengið þá hún valdi hjúkrun.

  Ekki náð að anna eftirspurn öll þau ár sem hún

  hefur hjúkrað veiku fólki, ALDREI nokkurn tímann

  verið atvinnulaus, FÆR EKKI að fara í verkföll þó

  launin sleiki reglulega botninn í launatöflu

  opinberra starfsmanna, og er bara merkilegt

  nokk, "bísna oft" heima hjá sér.

  Hefur til dæmis í dag notið veðurblíðunnar,

  þvegið þvotta, hengt út, setið með málgögnin...

  og bjargað kettinum fimm sinnum frá kyrkingu.

  En læða húsfreyju er í miklum ham út í alla

  ókunna ketti er rölta framhjá í 10 -30 metra

  fjarlægð, skellir upp á sig ægilegri kryppu og

  tekur svo á rás á "óþverraliðið"...og kyrkist næstum

  því í bandinu sínu í öllum djöfulganginum.

  Til allra lukku hugkvæmdist húsfreyju að versla

  kattaband sem væri utan um miðjan búk dýrsins,

  og svo lausar um hálsinn, og hefur það reddað miklu

  fyrir læðu í dag.

  Því mikil bévítans, ekkisens "kattaskrúðganga"

  virðist vera í gangi um lóð húsfreyju í dag, og

  telur jafnvel húsfreyja að um "gay pride"-göngu

  lausakatta sé að ræða.

  Læðu er ekki skemmt, og húsfreyja getur svo sem

  tekið undir það hjá kisu, að enginn hefur sótt um

  "kattaskrúðgönguleyfi hinseginn katta" um lóð

  hennar nýverið.

  Kettirnir bara mæta.

  Annars var húsfreyja líka á rjátlinu að kompjúternum

  sínum.

  Verið að bíða eftir að fá launin sín, svo hún gæti rölt

  með 7 ára djásninu í búð og verslað í matinn.

  Og hið opinbera klikkar aldrei.  Komu inn tíu mínútum

  fyrir klukkan fjögur.

  Gerðu gott betur en að "sleikja botninn" á launatöflunni

  núna eftir sumarfríið, launin....voru svona 23 centimetra undir

  botninum.

  Sjíss!

  Bónusnúðlur, þrumari og pakkasúpur matseðill Septembers,

  hjá húsfreyju......djásnið segist vera flutt að heiman.

  En huggun harmi í....

  ....kötturinn er "ókyrktur"....enn.