Örn í gassagangi..... og fálkasaga.

  Merkilegt þetta.

  Húsfreyja ekki hingað til talið gæsir hugaða fugla.

  Og að lenda í arnarklóm er ekkert grín, svo eitthvað

  hefur örn ýft stélfjaðrirnar á gössunum áður.

  Sjálf hefur húsfreyja horft á ótrúlega baráttu

  ránfugls við spörfugla.

  En í það skiptið voru það tveir hrafnar, sem

  reyndu dag eftir dag, að ná bráð af fálka sem

  veiddi grimmt handa ungum sínum.

  Flaug langa leið frá Ölfusárós upp í fjall.

  Það varð fálkanum til happs að risastórt

  sjónvarpsmastur var á leið hans í hreiðrið,

  og þar gat hann tyllt sér niður með bráðina.

  Krummaargintæturnar flugu svo hringflug

  yfir fálka, görguðu og létu öllum illum látum.

  Þóttust jafnvel ætla að gogga í fálka, sem tók

  þá hressilega á móti.

  Stundum náðu þó hrafnarnir að æsa fálka nægilega

  í flugbardaga, og þó fálki væri mun fimari flugfugl,

  þá var við ofurefli að etja þar sem krummar voru

  tveir. 

  Ældi þá fálki bráðinni af áreynslunni, og hremmdi þá

  annar krumminn hana, á meðan hinn skemmti fálka.

  En hálf voru krummarnir orðnir tættir og illa útlítandi

  eftir fálkaslaginn, og oft mörgum svörtum fjöðrum

  fátækari.

  Því fálki var harður í horn að taka, og náði oft að læsa

  gogg eð klóm í vængi eða bök krummana.....og þá

  var fjandi erfitt fyrir ræningjana að losa sig úr því glímutakinu.

  Var iðulega bara þyngdaraflið, sem varð krummum til

  bjargar, því þeir voru þyngri, og fálki sleppti þeim alltaf

  niður við jörð.

  Næði fálki að halda ró sinni á mastrinu, á meðan hann

  var að jafna sig eftir langt flug með þunga bráð, höfðu

  krummarnir ekki roð við honum, þá hann hóf sig til

  flugs á ný.

  Var horfin á örskotsstund, og eftir sátu þjófarnir á

  mastrinu með sárt ennið, og görguðu af vonbrigðum.

  En þetta var á því herrans ári 1974, þá húsfreyja hafði

  vart slitið barnsskónum, og varð að liggja 4 vikur á

  sjúkrahúsi Selfyssinga eftir sprunginn botnlanga.

  Var á stofu á efstu hæð gamla sjúkrahússins,

  í rúmi við glugga, sem snéri beint að sjónvarpsmastrinu.

  Fálki og hrafnar sáu um "dagskrána", svo telpukorninu

  leiddist ekki.

 

 

Gæsahópur réðist á örn