Tek svona fréttir of.....

....nærri mér, hugsaði húsfreyja.  Sortuæxlum að fjölga á litla Fróni, og það hjá konum.  Vont mál, og getur auðveldlega kostað ungt fólk lífið, að fá sortuæxli.  Fljótt að sá sér, þó frummeinið sé auðlæknanlegt.

  Og sama dag og þessar döpru fréttir hljóma fyrir eyrum húsfreyju, fær hún ofsakláða í ökkla um ellefuleytið í vinnunni.  Lagast lítið þó húsfreyja klóri, og viti menn við henni blasa 6 logarauðir upphleyptir blettir, þá hún skoðar betur.  Og nýbúin að hlusta á "sortuæxlisfréttina" í fréttunum.  Eitt andartak sveiflaðist vaktarherbergið til og frá, í æðisgengri vorgolunni frá opnum glugganum, og húsfreyja saup hveljur.  Sortuæxli?!  Sei, sei nei.  -Sjúkkit-

  Húsfreyja andaði léttar, og hvessti haukfránum hjúkkuaugum á bévítans "starrarflóarbitin", krossbölvaði í hljóði, og náði sér í joðspritt og penslaði óhroðann vel.  Kláðinn hvarf.  Hallelúja!

  "Væri nær að gefa út skotveiðileyfi á "flóbitna" starrana hér á landi, en láta nær útdauðar rjúpur, 30% lunda í Eyjum og hvalagreyin í sjónum vera", hugsaði húsfreyja bálill.  "Drepa mann úr hræðslu, með þessum líka ekkisens óþverra".  "Hmmmmm... en jæja, tek víst svona sortuæxlisfréttir heldur nærri mér".  Húsfreyja snöflaði í sig köldum hafragrautnum og kaffinu.  Lagði á ráðin með framtíðina, og það að "tylla sér niður í vorgrænt grasið" strokað út af öllum listum, yfir "What to do" með kolsvörtum tússpenna.  Ja svei!

 

Athugasemdir

[Sigrún Óskars, 13.5.2008 kl. 20:49]

Það er nú fló á fleiri fuglum en starranum. Starrinn er bara oní húsunum okkar. Það mætti frekar gefa út skotveiðileyfi á mávinn, hann er alveg extra leiðinlegur fugl (það er ekki sama fugl og fugl hjá mér)

En flóabitin eru hvimleið

[Kristín Magnúsdóttir, 14.5.2008 kl. 13:19]

Já Sigga mín, flóabit eru ekki skemmtileg hef prófað á eigin skinni  og sagði mér "drápsérfræingur" að það væri blessaður kötturinn sem flytti þetta til og frá. Sammála um mávinn hann er hvimleiður.

[Sigríður Sigurðardóttir, 14.5.2008 kl. 17:48]

  Hallelúja!  Það verður brjálað að gera hjá mér í sumar, við að skjóta máva og BAÐA köttinn

[arný (IP-tala skráð) 14.5.2008 kl. 20:01]

eins og þú veist hefur fjölgað snarlega í okkar húsi.....ein 6 st.eftir hávaðinum að dæma.....voða sætt og engin bitin nema ég...starri leiðinlegur.....kisurnar í nágreninu eru að gera hundinn brjálaðan...voða sætt.

[halkatla, 14.5.2008 kl. 23:47]

ég er milli steins og sleggju í fuglamálum núna, ef ég ætla að setjast að á mínu heittelskaða Grænlandi þá þarf ég að finna mann sem getur veitt fyrir mig bæði fugl og fisk (konur mega að mínu mati ekki veiða fugla og ég get það hvort eðer ekki - það hefur oft verið gert grín að mér fyrir þetta ójafnréttissinnaða sjónarmið, hehe) en  samt segir hjartað mér að  það sé bara óraunhæft draumórabull og að nauðsynlegt sé að friða alla fugla hið snarasta, sérstaklega rjúpuna - og mávarnir eru góðir vinir mínir, einn fékk sér kvöldgöngu í garðinum mínum í fyrradag, mér finnst þeir bara sætir

ef ég les eða heyri um sjúkdóma þá er ég líka svona, byrja að fá einkenni. En ég held að ég sé frekar seif fyrir skaða af völdum sólarinnar, hún fær voða lítið að skína á mig

[Sigríður Sigurðardóttir, 15.5.2008 kl. 21:45]

  Jamm, ég er er líka í tómu tjóni, Anna þegar kemur að veiðum.  Get ekki hugsað mér að drepa neitt lifandi, og er á fullu öll sumur að bjarga býflugum úr gluggum, og skorkvikindum af sólpallinum mínum.  En fuglakjöt er herramanns matur, að mínu mati.  Og ekki er lambakjötið verra.  Það er bara þetta með að DREPA.......nah er bara ekki minn stíll.  Fá aðra í það djobbið. Verðum bara að þola að gert sé grín af okkur, Anna.

  Flottur Grænlandspistill hjá þér.