Harðir á strippinu og gubb!

  Húsfreyja horfði á eftir bleikklæddri dótturinni og Einari besta vini, rölta af stað í skólann.  Átti frí sjálf, og hugsaði sér gott til glóðarinnar.  Skella sér í náttfötum með málgögnin upp í rúm.  Jamm og kannski fá sér eina kríu um níuleytið.

  Forsíðan á "24 stundum" blasti við augum húsfreyju, er hún opnaði blöðin sín:

  " Harðir á strippinu".

  "Sönnunargagnið var GUBB".

  Húsfreyja lagði það blaðið frá sér, hálf ómótt bara af fyrirsögnunum.  Greip "Fréttablaðið":

  "Þiggja greiða fyrir kynlíf"

  "Mínúta getur kostað þrettán mánaða bið".

  Húsfreyja reif sig upp úr volgu rúminu, skellti blöðunum vonskulega á eldhúsborðið og pældi í því smá stund, hvort það væru samantekin ráð blaðamanna að hafa af henni notalegar stundir og jafnvel "kríu" þá hún væri í fríi?  Rámaði þá í bókabunkann sem hún verslaði í Perlunni nú síðvetrar.  Hefur ekki komist yfir að lesa nema eina af þeim bókum. 

  Svo nú er húsfreyja á leið upp í rúm aftur með "Þórberg", ævisögu Árna prófasts, og hlakkar mikið til lestursins.  Verst að "krían" dettur þar með, út af listanum yfir það sem húsfreyja ætlaði að gera í dag.  Jæja, kannski má byrja á smá lúr, áður en lestur hefst.

  Njótið dagsins.

Harðir á strippinu

Athugasemdir

[Solla Guðjóns, 16.4.2008 kl. 00:44]

J´h´þeir ku fara mikinn þarna í Mosó