Svartir dagar á flökti.

 Húsfreyja er utangátta, út á ská og hlið.

Hún missti af sótsvörtum mánudegi í gær!

Missti af bensínhækkun, sem virðist boða að fólk verði fara

að selja úr sér annað nýrað til að ná að skreppa norður yfir

páskana.

Missti af því að mannréttindadómstólar Evrópu, vilja taka

að sér að hringla í tölvupóstveseni "stólpípuelskandi"

Frónbúa.

Missti af því að "krónufall" húsfreyju mun kosta hana

mun fleiri þúsundkalla næst er hún verslar í Bónus.

Missti af því, að verið er að tala um að setja lög á hjúkkur...

og þær rétt byrjaðar í kjarabaráttunni.

Missti af því að "Laugarvegurinn" er í krísu....

Hafði bara ekki hugmynd um að borgargötur gætu verið í "krísum",

húsfreyja.

Fólk, jú og dýr upplifa krísur, og plöntur líka eftir því sem

föðursystir segir.

En götur í krísum...ný bóla fyrir húsfreyju.

Hlýtur samt að vera myljandi slæmt mál, að vera með heila 170 húsa

borgargötu í "organdi krísu".

Dugir varla tonnið af róandi.

  Er nú húsfreyja einna helst á því, að hún hafi verið með óráði síðasta sólarhring.  Svifið um á ljósbleiku "allsherjar-reddaraskýi", og hvorki vitað þennan heim né annan.  Talið sér trú um það í óráðsíukasti þessu, að allt væri í besta lagi í hennar litla landi, sól úti og sól inni, gleði, góðviðri og mögnuð hamingja í öllum sálum, öllum húsum og á hverju götuhorni.

  Sér nú húsfreyja að hún verður að sjá að sér.  Fara að berja sér á brjóst, væla og vola af harmkvælum, eymd og volæði!  Vorkenna sjálfri sér í gríð og erg, fara í stólpípumeðferð til Póllands ef í hart fer, og helst leggjast undir feld, og eigi fara aftur á fætur fyrr en í júníbyrjun, þegar króna húsfreyju hefur hækkað um 0,002%.  VERA MEÐ!  VERA MEÐ!

  Og amenið eftir efninu:

                                     Heimsins brestur hjálparlið,

                                     hugur skerst af ergi.

                                     Þegar mest ég þurfti við,

                                     þá voru flestir HVERGI.

                                                               Friðrik Jónsson.

 

Krónan veiktist um 1,27% í dag

Athugasemdir

[arny (IP-tala skráð) 18.3.2008 kl. 17:58]

YES flott að einhver fer með jóu ben til póllands,en Henslan mælir ekki með spítalavist þar......og svo þurfum við að fara að labba...er byrjuð að æfa mig...var það einn fót upp hinn niður snögt hopp og skopp til vinstri snú ekki detta.......

[Sigríður Sigurðardóttir, 18.3.2008 kl. 18:06]

  Hmmmm já, Hennslan var víst búin að prófa heilbrigðiskerfið þeirra þarna í Póllandi!  Verð kannski að endurskoða þetta með "stólpípuferðina"......  Nei, nei, einn fót fram fyrir hinn, virkar best hjá húsfreyju á gangi, systir.

[Sigríður Sigurðardóttir, 18.3.2008 kl. 22:06]

  Báran (7ára) fær að velja myndirnar, og hún er sérlegur kattarunnandi.  Úti að aka er mjög hóglega að orði komist, Móðir! 

[Kristín Henný Moritz, 19.3.2008 kl. 06:24]

Vá hvað ég hefði verið til í að missa af þessu öllu, hund leiðinlegt að vera meðvitaður um þetta, maður verður háfl sár og reiður!

En heilbrigðiskerfið í Póllandi er alls ekki upp á marga fiska... ekki sniðugt! 

[Heiður Helgadóttir, 19.3.2008 kl. 15:52]

Er ekki allt í lagi að missa af þessu leiðinda ástandi, mikið er kisulúra falleg.

[Sigríður Sigurðardóttir, 19.3.2008 kl. 20:15]

  Enda nú þegar húsfreyja hefur náð áttum með atburði líðandi stundar, stefnir allt í massa PIRRING.  Hefði líklega betur sleppt því að fara á fætur í morgun, frænka mín góð.  Jamm, pólskir spítalar....kapítuli út af fyrir sig!

  Jú, Heidi, er komin á þá skoðun að mun lífvænlegra hefði verið fyrir húsfreyju að hanga fast á sínu bleika "alsherjar-reddaraskýi".