Bráðvantar fleiri upplýsingar..

.. í frétt þessa.  HVERNIG var blaðran á litinn?  Og í "hvaða" átt feykti vindurinn henni?  Væri vel hægt að gera sér ferð til London, og skreppa út fyrir borgarmörkin með góðan kíki og "míni hvalaskutul" eða haglabyssu.  Jamm, frumlegheitin geta hæglega breyst í klaufaskap eða auladóm, þegar ástin er annars vegar.  Er ekki búið að sýna fram á það, að ástfangið fólk sé meira viðutan en prófessorinn sem barði konuna sína í höfuðið með teskeið, en kyssti eggið?  En vonandi fær veggfóðrarinn hringinn sinn aftur.  En assgoti gera veggfóðrarar það annars gott í London....

  Tinnan mætti svo spræk og hress í lambalæri til okkar í gærkveldi.  Eftir þrotlaust ferðalag frá Kína frá því klukkan 7 í fyrradag.  Var þreytt, en ánægð að vera komin heim.  Segist EKKI vera á leiðinn til útlanda alveg á næstunni.  Gott ef hún skreppur til Vestmannaeyja eða út í Hrísey næstu 10 árin. 

  En gott var að fá stelpuna heim.  Okkur finnst öllum svona notalegra að vita af henni á góðum stað.

  Í Þorlákshöfn var gleði og gaman að vanda.  Spjall og skraf, á meðan eldri krakkarnir fóru í 1-2-3-4-5-dimmalimm.  En Vigrinn (5 ára) og Marinó Týr (2 ára), fíla ekki þann leikinn, svo þeir fóru í feluleik "ala Tarsan við apana", og földu sig bak við stofugardínurnar.  Og svo "sveifluðu" þeir sér í gardínunum... aaaajjjajjjhajjjja!!!, og auðvitað húrraði gardínukappinn niður með gardínum, strákum og öllu heila klabbinu. 

  Við systur erum ekki með hæstu konum, og systurdóttir, móðir Marinós er undir 165 cm. líka, svo nú hófst heljarinnar bras og vesen.  Húsfreyja fékk að standa á tröppum, systurdóttir á tveimur kollum skellt saman, en systir hékk uppi á stofuskáp eins og hæna á mjóu priki, við hliðina á myndinni af pabba heitnum og sparikertastjökunum.  Svo var hamrað, skrúfað, hamrað og skrúfað.  Skipt um tappa, hamrað og skrúfað.  Hékk loks bévítans gardínukappinn 80% fastur uppi, og varð það að duga að sinni.  Marinó Týr var afskaplega hrifinn af framkvæmdum þessum, og þvældist í tröppunni í fótunum á húsfreyju, og gerði ítrekaðar tilraunir til að ná hamrinum frá ömmu sinni (systur).  Er nú systir að vinna í því að festa gardínu kappa alla í húsinu með "súperglue maximum strength", eða senda konur allar í ættinni í "handleggjalengingu" öðrum kosti.

  Húsfreyja svo að jafna sig af astmaskítnum og hóf aftur störf í morgun eftir fríhelgi.  Voru öldungarnir hennar fjallhressir á deildinni, og lítið um þras eða bras nema í einum og einum ættingja.  En það fylgir, því ástvinum er annt um sitt fólk, og þarf að huga vel að öllu svona rétt fyrir páska.

  En huga að kvöldmat næst.

Trúlofunarhringur út í bláinn

Athugasemdir

[Heiður Helgadóttir, 19.3.2008 kl. 15:54]

Eins gott að þið slösuðust ekki við að setja upp bansetta kappann.

[Sigríður Sigurðardóttir, 19.3.2008 kl. 20:18]

  Jamm, Heidi, alltaf "brjálað að gera" hjá verndarenglunum okkar í vesenistafjölskyldunni.