Náttfari í Eyjum.

  Næturferðir með Herjólfi?  Brilliant.  Fer aldrei svo sjálf til ferða, í Eyjar út, að ég tryggi mér ekki notalega koju fyrst.  Nema ég vilji mæta "kolgræn", skjálfandi, með galtóman umsnúinn maga og sjóriðu á fornar heimaslóðir mínar, Vestmannaeyjar .  Hef reynt það nokkrum sinnum, og hef takmarkaðan sem lítinn áhuga á, að marglenda í þeim hremmingum. Er á annan sólarhring að jafna mig eftir slíka "djöfulega sjóveiki", og óska þess heitt á meðan hryllingurinn stendur yfir, að einhver gustuki sig yfir mig, og hreinlega fleygi mér útbyrðis .  Það er eitthvað við magann og meltinguna í mér, sem illa þolir grængolaða undirölduna á leiðinni út í Eyjar, og myndi ég ekki óska mínum svörnustu óvinum svo illt, að þjást af sjóveiki á þeirri leiðinni.  Sé nú fram á að geta skellt mér á árgangsmót í haust, í þægilegri koju, um hánótt.  Get ælt upp lifur og lungum, ef svo viðrar, í friði og ró í minni koju, eða dormað í blankalogni .  Merkilegt nokk, þá er magi minn alveg til friðs líka, ef aftakaveður gerir á sjóleiðinni....er bara bévítans undiraldan í "brælunni" sem alveg fer með mig.  Einkennilegt hve oft þarf að vera árans ekkisens bræla á þessari sjóleið.  En bravó Eyjamenn, að fá næturferðir á "stórhátíðahelgum" og uppákomuhelgum..........kannski að Johnsen róist eitthvað með göng á meðan .

Herjólfur fer næturferðir í þessari og næstu viku