Rífandi vöruskipti komin í gang?

  Og það milli Tíbet og litla Fróns.

  Getum máske fengið heilan helv...helling

  af síðum og góðum treflum fyrir veturinn

  þá frostið nístir og bítur kinnar frónverskra

  barna, kvenna og karla.

  Gæti kannski reddað okkur frá svínaflensunni

  ægilegu, sem nú veður uppi með djöfulgangi

  og látum:  Heill "einn" einstaklingur hér á litla Fróni sem hefur sýkst!!

  Í staðinn ruslum við einhverju af hraungrýtinu á Þingvöllum

  austur til Tíbet ( eigum margra alda birgðir af hraunmolum

  þar í alfriðaðri "geymslu"), og fáum flinkar mæður okkar og ömmur til

  að hekla slatta af sjölum með.....nú eða verslum þau

  ódýrt í Kína.

  Muna þá bara að fjarlægja "Made in China" miðann

  svo ekki standi illilega í munkum hárra fjalla Tíbets,

  þá þeir vefja sig íðilfögrum sjölunum!

  Hehehe.....húsfreyja meinhorn í dag.

  Henni nefnilega tjáð af "innanhússmálara"

  að deild hennar yrði máluð, því von væri á

  Dalai Lama.....svei, ef húsfreyja var örugg á því hvort

  þetta var grín eður ei.

  Húsfreyja stendur um þessar mundir á öndinni (gæsinni og rjúpunni)

  af annríki í vinnu, og hefur hvorki tíma til að

  fara út að róta eftir hraungrjóti á Þingvöllum, né heldur hekla sjöl

  svo hún geti tekið sómasamlega á móti Lamanum, skyldi

  hann reka inn nefið!

  Stumrar svo yfir axlarbrotnum bónda heima og sinnir

  dótturinni og húsverkunum.

  Gæti máske reddað einu létt saurmenguðu grjótsýni

  úr fjörunni við Geldinganesið og köflóttum eldhúsdúk

  ef mikið lægi við, en það yrði þá líka að duga fyrir Lamann.

  Nei, í alvöru er bara ágætt að einhver gefi sér tíma

  til að spjalla við okkur Frónbúana um kærleik og frið,

  á tímum búsáhaldabyltingarinnar.....mótmælendur

  berja þá máske pottana mjúkar næst.

  Og vonar húsfreyja að Lama njóti sín sem allra best

  hér hjá "snarvitlausu fólki í peningamálum" sem stundar

  hryðjuverk í hjáverkum hjá "Brúnum" í Stóra Bretaveldi,

  og sé hann ætíð velkomin hér á norðurslóðir með boðskap sinn!

  Góðar og kærleiksríkar stundir.

Dalai Lama í Alþingishúsinu