Siggi á Eiðum og páskamold.

  Pabbi heitinn, húsfreyju,

  Siggi á Eiðum var vanur að hlakka mikið til páska. 

  Það voru iðulega hans lengstu frí fyrir utan jólafrí,

  og hann naut páskafrísins til hins ítrasta.

  Ekki var verra að páskaegg voru öll orðin

  úr súkkulaði, en hann var mikil súkkulaðimaður.

  Veður voru oft mild og hlý á páskum í Eyjum

  hér í den, og hann fór iðulega með okkur fjölskylduna

  beint í útiveruna.

  Ekki áttu foreldrar húsfreyju í bifreið í Eyjunum,

  heldur fóru um allt gangandi og á hjólum.

  Þær systur áttu engin hjólin, en voru reiddar

  á hjólum foreldranna, þá farið var til hjólreiðaferða.

  pabbi tók systurnar á stöngina, en húsfreyja sat

  á bögglabera á hjóli móðurinnar.

  Ef páskar voru seint á ferð, var ósjaldan farið

  vestur í kartöflugarð, sem var skammt frá

  þáverandi flugvallarenda á hjólunum tveimur,

  og einnig teknar 2 stunguskóflur með.

  Þar pældu mamma og pabbi upp stóran

  kartöflu- og rófugarð og gerðu kláran fyrir

  sáningu, á meðan við systur skottuðumst

  í kring og lékum okkur.

  Vorverkin oft unnin yfir páska hér í den,

  en aldrei á Föstudaginn langa eða Páskasunnudag.

  Þeir dagar háheilagir, föstudagurinn sorgarsöngur í útvarpi,

  en sunnudagurinn hamingja í súkkulaðieggi.

  Breyttir tímar í dag, en húsfreyju kitlar enn í fingurnar

  þá tekur að nálgast páska, að skella sér í einn

  herlegan hjólreiðatúr út í náttúruna, og ekki væri verra að

  finna ilminn af nýpældri mold fósturjarðarinnar.

        Góðar stundir.

 

Athugasemdir

[Sigrún Óskars, 10.4.2009 kl. 10:11]

flott skrifað hjá þér og góðar minningar. Ég man líka eftir föstudeginum langa - það mátti ekki spila hvað þá meir.

En nú er einhvernvegin komið vor og hugurinn farinn að reika út í garð

Hafðu það gott um páskana með páskaeggið