Hefur einhver séð....

  ..."skýjahöll" með nafni húsfreyju

  á  "rúllandi" ráfi og reiðuleysi

   um litla Frón?

  Samkvæmt Sörensen hinum danska,

  á húsfreyja að hafa byggt sér

  eina slíka fyrir annarra manna fé,

  og vill hún gjarnan fá að berja

  herlegheitin augun áður en

  höllin sú verður tekin upp í gjaldþrot!

  Vonar húsfreyja að finna höll þessa í tæka tíð,

  svo að henni takist að selja hana í hvínandi hvelli,

  til að geta greitt afborganir af sinni

  venjulegu þriggja herbergja íbúð

  í Grafarvoginum næsta árið.

  En líklega hefur húsfreyja aulast til

  að hafa höll sína "rúllandi á hjólum", svo

  engin kæmist að því hvað hún væri að

  bauka í "fjármálaóráðsíuköstum "sínum,

  og sífellt flutt hana til og frá á milli

  landshluta.

  En nú er sem sagt "æðið" runnið af húsfreyju,

  og hefur engar minningar um "skýjahallir"

  hér uppi á litla Fróni,

  eða "Matadorpeningaspil" í breskum bönkum.

  Eina sem húsfreyja "man" að hafa haft upp úr "góðærinu",

  er eitt stykki herlegur sólpallur, og eitt stykki "nýleg" þvottavél.

  (Gamla þvottavélin framdi að sjálfsögðu "harakiri", því bóndi

  húsfreyju var að þvo, þá hún gaf upp öndina.  Annars hefði

  húsfreyja auðvitað "myrt" vélina með vitleysisgangi.)

  Lýsir hún hér með eftir "skýjahöll" sinni.

  Nokkuð öruggt að húsfreyja hefur fjármagnað

  höll sína með dönskum eða breskum Matadorpeningum,

  og brostið á í tryllingslegan hlátur af og til og bölvað upp á

  bæði dönsku og ensku, með hamarinn á lofti, þá hún 

  smíðaði í gríð og erg.

  Hafi einhver séð til húsfreyju við hallarsmíðarnar, og

  viti hvar höll hennar er niðurkomin, er hann

  vinsamlegast beðinn um að láta hana vita....

  hið snarasta.

  Gæti hún altént tekið höllina niður í smá

  einingum, og sent Sörensen hinum danska,

  svona sem smá skaðabætur og með

  bestu kveðjum frá:

  "Litla Fróni".

  "Ræpu úr iðrum jarðar no 1" (reyndar hugmynd frá Noregi),

  "101 Helvíti".

  Nei, grínlaust skilur húsfreyja vel svekkelsi

  Sörensen.

  Enda voru útrásarvíkingar ekki beint

  bljúgir og auðmjúkir í Danaveldi og Bretlandi.

  En það voru þeir heldu ekki hér á landi.

  Og ekki telur húsfreyja að "meirihluti

  þjóðarinnar" hafi grætt á "góðærissukkinu",

  eða sýnt öðrum þjóðum hroka og græðgi.

  Sitjum í sama djúpa skítnum og danir þar.

  Ef ekki dýpri.

  En alltaf gott að fá "uppbyggjandi" gagnrýni

  frá frændum okkar dönum.

  Kann húsfreyja Sörensen kærar þakkir fyrir, og

  óskar honum alls hins besta í krepputíð.

  Góðar stundir.

 

 

 

Frekja og hroki aðgangsorð íslenska helvítisins

Athugasemdir

[Solla Guðjóns, 4.12.2008 kl. 10:22]