Sigríður Sigurðardóttir

26.10.2007 | 16:10

Stormur í aðsigi.

Karl minn hafði í gær, orð á því að sig langaði að skreppa norður að vísitera foreldrana, ef veður væri sæmilegt. "Suss" hvæsti húsfreyja, "ekki láta þá heyra til þín"! "Hverja" hváði minn maður, undrandi. "Veðurguðina" hvíslaði húsfreyja örvæntingafull yfir skilningsleysi makans. En karl bara hristi höfuðið yfir dellunni í frúnni, og hraðaði sér út að skella vetrardekkjum undir bílinn. Í gærkveldi beið húsfreyja löðursveitt af angist yfir veðurfréttunum. Og sei sei jú. Siggi stormur mætti. Og með þessa líka hrikalegu "óveðursspána" fyrir vestanvert landið. Mergjaður stormur, snjóél og önnur veðravíti á leið til landsins. Og ekkert að marka þó hann sé ekki brostin á núna, Siggi stormur lofaði því að kominn yrði hinn versti veðurhamur um það leyti sem við hjónaleysin og litla manneskjan legðum af stað úr borginni seinni partinn. "SKO" sagði húsfreyja af þunga og leit álasandi til karls síns í sófanum. Hann lét sér fátt um finnast, og heimasætan dæsti aðeins ánægjulega yfir Kitty Kat-myndunum í tölvunni. Veðrið ekki rætt meir. Húsfreyja svo búin að dunda sér við niðurpakkningu í dag. Kuldagallar (66 gr. norður), kuldaskór, þæfðir ullarvettlingar, og ullarsokkar, treflar og húfur tróna efst í farangurshaugnum. Nesti til þriggja daga, ef við skyldum festast svo dögum skipti uppi á háheiði og svo salernispappír...ja þið vitið til hvers. Veðurguðum er nefnilega "meinilla við" að húsfreyja og hennar ættbogi sé eitthvað að flækjast og vafra um landið í reiðuleysi á veturna. Gera sitt ítrasta til að halda henni og hennar fólki föstu á litlum bletti, sirka 7 kílómetrar í radíus, yfir háveturinn. Þola húsfreyju einnig afspyrnuilla allt þvottastúss og "úthengingar" á þvotti er fyrir þeim hið mesta "tabú"! Svo best að fara að öllu með gát. Er svo farin í bloggfrí fram á sunnudag, húsfreyja. Og óskar ykkur góðra stunda. En örlítil góð speki fyrir sálina að lokum.