Sigríður Sigurðardóttir

2.5.2007 | 15:58

Dauðasynd og sköpunarþreyta.

Það er vandlifað í hinu herlega veldi Ahmadinejads Íransforseta! Hann var gripinn glóðvolgur og "utangátta", við það að smella kossi á hanskaklædda konu, klædda síðum svörtum kufli! Svínslega svíðingslegt! Hann ber þess líklega seint bætur að hafa lent í klónum á kvenmanninum! Hver vorkennir henni, þó að hanskarnir séu "ónýtir" henni að eilífu, og kuflinn a'tarna verði hún sjálfsagt að "brenna" á opinberum vettvangi! Ef hún á nokkurn tímann, að geta litið haukfráum augum framan í nokkurn mann aftur! Því auðvitað var það "hennar" sök, að vera að "væflast" fyrir Íransforseta, í þessu líka "óráðsíuástandi"! Sá konan ekki, að manngarmurinn var ekki alveg með sjálfum sér? Harðlínumenn þeirra Teheranbúa standa á öndinn af skömm og vandlætingu, yfir verknaðinum! Næsta víst, að forsetinn verði sendur til rannsóknar á fínasta sjúkrahúsi þeirra, og síðan áminntur harðlega um að iðrast synda sinna, a.m.k. áður en hann fer á næsta stjórnarfund! Vesalingurinn! Hinsvegar verður sjálfsagt tekið mun harðar á "synd konunnar", og henni refsað samkvæmt islömskum lögum! Hef fregnað, að konum er hefur verið nauðgað, sé oftar en ekki stungið í fangelsi þar eystra! En ég veit ekki hvað, koss á hanskaklædda hönd vegur þungt til refsingar! Sjálfsagt nokkurra vandarhögga virði, á næsta götutorgi! Henni var nær! Nei, í alvöru! Ég verð rasandi er ég les svona fréttir!

Þá eru pælingar 6 ára dóttur minnar mun skemmtilegri og uppbyggilegri í trúmálum! Spurði mig um daginn á leið austur fyrir fjall: "Mamma, var erfitt fyrir Guð að "skapa okkur"? Lá við að heilakrílið mitt brynni yfir, að reyna að finna skynsamlegt svar! Rámaði loks í "hvíldardaginn" í sköpunarsögunni, og svaraði að líklega hefði Guð verið "dálítið lúinn" í lok sköpunarinnar, fyrst hann þurfti á hvíld að halda! Allavega hlýtur að hafa tekið töluvert á taugarnar, að bíða þess að við þróuðumst upp í sæmilegar vitibornar skepnur, mannfólkið!