Dauðir í kosningaslag?

  Var að hrista af mér heiladoðann í morgun, eftir þrjár vikur sem afleysingadeildarstjóri, yfir kaffi og blaðalestri.  Rakst á dásamlega kaldhæðna frétt í Fréttablaðinu: "Lifandi dánir berjast"!  Á Indlandi er sem sagt búið að stofna nýjan stjórnmálaflokk!  "Flokk hinna dánu"!  Jamm!  Flokk hinna dánu, segi og skrifa!  Þar í landi geta menn og konur lent í því , að vera "úrskurðuð látin" af illa innrættum ættingjum og spilltum embættismönnum, bara sisona!  Hirða hinir svínslega illgjörnu ættingja síðan allar eigur þínar, og borga embættismönnum prósentur af gróðanum!  Svo ert þú bara "steindauður" árum saman í hinu herlega ríki Indverja, og nýtur þar með eingöngu þeira réttinda sem dauðir njóta:  ENGRA!!  Stofnandi flokksins, Bihari, er sjálfur nýrisinn upp frá dauða.  Hafði þá verið látinn í hartnær 28 ár!  Segir hann "þúsundir" Indverja vera "lifandi dauða"!  Úúúú.. spúkí þjóðfélag þarna á Indlandi, og framúrskarandi "heiðarlegir og afkastamiklir" embættismenn! 

   Og ég sem hélt að fylgjendur sjálfstæðismanna hér á litla Fróni væru duló!  En einn þeirra mætti í kaffi til mín og systur í Þorlákshöfn, í síðustu sveitastjórnarkosningum.  Ég lýg engu, er ég segi að "blátt" blóð rennur í æðum þeirrar konu!  Var hún að agitera fyrir sinn flokk, með stórt X-D merki í barmi!  Tjáði hún okkur systrum, að hún hefði byrjað á því að skreppa í kirkjugarðinn, og "messað" boðskapinn yfir leiði föður okkar!   Þótti okkur systrum líklegt, að "dræmar undirtektir" hafi hún fengið frá pabba heitnum.  Var alltaf vinstri sinnaður pabbi, og kaus vinstri flokkana allt sitt líf hér á jörð.  Og þar sem hann var bæði látinn, vel jarðaður og afskráður af öllum kosningalistum þar austan fjalls, þótti okkur hún ekki hafa haft erindi sem erfiði í kirkjugarðinn!  Enn dátt hefur hann hlegið, pabbi minn, hafi hann kíkt niður úr "Sumarlandinu" og hlustað á þá "bláu!  Svo Indverjar eru ekki þeir einu, sem standa í furðulegum kosningaslag!  Sjálfstæðismenn hafa úti allar klær eftir atkvæðum!  Líka uppi í kirkjugarði!