Ferfættur gjaldmiðill.

  Eitthvað finnst húsfreyju

  vísundar vera "óþjáll" gjaldmiðill,

  og svona dálítið fyrirferðamiklir í því hlutverki.

  En sjálfsagt veður ekki almúginn

  í Malasíu í peningum um þessar mundir, frekar en

  "Ísbjargarokaðir" Frónbúar uppi á litla Fróni,

  svo vísundar sem "sekt" er máske besta mál

  fyrir smá "dodo-brot".

  Jamm.

  En svona þegar húsfreyja fer að hugsa málið,

  þá er þetta máski framtíðin, hvað gjaldmiðla varðar,

  hér uppi á Fróni.

  Krónan er klikk, krúnk og botnsokkin sem gjaldmiðill.

  Evran stendur höllum fæti, og vor íslenska, "alvitra"

  Vikuvölva spáir henni mergjuðu "hruni" á árinu 2010...

  og ekki lýgur hún frekar en Dabbi og Mogginn.

  Það veit hver heilvita maður.

  Dollarinn rambar á fjármálabarmi brasks og stríðshelvíta

  vestan hafs, milli þess sem hann dúndrar niður í

  sér amerískt fjármálavíti, sem tíð

  rosatjón af fellibyljum og illa öfugsnúið opinbert

  kerfi valda reglulega.

  Svo ekki eru það vænlegir kostir í "gjaldmiðilskrísunni"

  hér hjá oss þjáðum af bullandi "útrásarkveisu"og

  "bankahrunsdrullu".

  Ó, sei, sei nei!

  Máske það verði þá ofan á að fara aftur út í hrein og klár

  "vöruskipti".

  Húsfreyja röltir þá væntanlega öll næstu mánaðarmót

  út í sinn "fébanka" og fær útborgaða 8 og hálfan "sauð"

  fyrir störf sín....8 lifandi á fæti, einn hálfan, frosinn og steindauðan.

  Sá frosni fer í skottið, en svo röltir hún bara með hina 8 í Bónus.

  Skiptir á 3 þeirra fyrir 10 rúllur af skeini, 2 fernur af mjólk (gulri),

  dollu af Smjörva, skyrdós, brauði og matarkexpakka frá Frón.

  Fer svo með hina fimm sem eftir eru á útsölurnar í Smáralindinni,

  fær úlpu á 9 ára djásnið, sokka á bóndann og pils á sjálfa sig í Debenham fyrir 2 þeirra,

  og kaupir bland í poka, örbylgjupopp og smávegis af gosi ásamt

  Vikunni, Séð og Heyrt og Lottó fyrir 1 sauð.

  Heill sauður fer svo í að fylla helvískan bensíntankinn,

  og kemur svo húsfreyja við hjá "skattmann" á heimleiðinni og skilar

  honum síðasta lifandi sauðnum.

  Sá hálfi frosni í skottinu er svo steiktur, sneiddur og étinn

  þegar heim er komið.

  Meeehheeee.

  Góðar stundir.

 

  P.S.  Verð að skella hér einni góðri í lokin:

    Það er dauði og djöfuls nauð

    að dygðasnauðir fantar

    safna auð með augun rauð

    en aðra brauðið vantar.

                                    Sigurður Breiðfjörð.

 

Gert að greiða vísunda í sekt fyrir hjúskaparbrot

Athugasemdir

[Árni Gunnarsson, 4.2.2010 kl. 10:16]

Það er nákvæmlega svona sem ég sé þetta fyrir mér.

Og þá mætti hugsa sér reiðhöllina í Víðidal sem viðskiptabanka. Þar gæti fólk komið sér upp góðri aðstöðu til hjúskaparbrota ásamt einhvers konar búfjársparisjóði til að eiga alltaf sektirnar handbærar.

[Sigríður Sigurðardóttir, 4.2.2010 kl. 17:25]

Aldeilis brilliant hugmynd, Árni....sé þegar fyrir mér "biðraðirnar" í "Víðidalsbanka" þegar landinn mætti skelþunnur að "taka út" fyrir sektum eftir "fjöruga helgi" á mánudagsmorgnum.

  Þakka þér kærlega innlitið.