Helvískir ræningjar....

  ...þessir andsk... Frónbúar!

  Hvernig í ósköpunum dettur okkur,  þessu rumpupakki og ruslaralýð að

  vaða í það að VEIÐA fiskinn, sem svamlar í sjónum í kringum

  land okkar.

  Mætti halda að við, þessir frónversku "þorskhausar" teldum

  fiskveiðar vera okkar aðal atvinnugrein, þegar ALHEIMUR veit,

  og sér í lagi norskir eðalsjómenn og evrópskir Makrílsnillar,

  að Frónbúar gera út á "Eldgos" og helvíska fylgikvilla þeirra, ergo truflanir á

 farþegaflugi, ásamt skyrframleiðslu og lopapeysudútli, þegar best lætur.

  Fiskveiðar bara "HOBBÝ" hjá þessu ruplandi og rænandi pakki uppi á litla Fróni.

  Og það er bara djö... kjaftæði, að Makríllinn hafi fundið upp á því sjálfur

  að synda inn í frónverska hafsögu.

  Fylli þar alla firði og já, hafnir,

  svo að nóg sé að skella út spún á stöng af bryggjusporði,

  og BINGÓ, Makríll mættur á steikarapönnuna.

  Króknaðir steinbítshausar og grámyglaðir skötukjaftar...þvílíkur vaðall.

  Ekkisens þjófahyskið upp á litla Fróni, sjálfsagt búið

  að uppgötva hvernig framleiða skal "Makríl-fermón" úr

  djö.... eldfjallaösku, hveravatni og "dassi" af skyri, sem þeir

  dúndra síðan í þúsunda tunnutali í hafið kringum litla Frón og...

  VOILA!  MAKRÍLLINN MÆTIR!

  Og þjófabálkur sá er kallar sig sjómenn á litla Fróni, vílar heldur

  ekki fyrir sér að gefa skít í atvinnugreinina.

  Þegar ALVÖRU fiskveiðimenn frá veldi norska kóngsins til dæmis, eru að veiðum,

  eru þeir allir uppáklæddir í skæran, níðsterkan og vatnsheldan hlífðarfatnað,

  á meðan þeir frónversku mæta jafnvel til sjós á gallabuxum, í

  duggarapeysum...og alverst, í andskotans frónversku lopapeysunum!

  Svo kallar þessi rummungalýður sig sjómenn og DIRFIST að veiða

  eðalfisk allra eðalfiska, sjálfan MAKRÍLINN!

  Sjá andskotans Frónbúarnir ekki, að Makríllinn er vel og vendilega

  MERKTUR Norsurum, Skotum og fleiri skelegum evrópuþjóðum?

  Afhverju halda Frónbúar til dæmis, að Makríllin sé með RÖND á rennilegum

  skrokknum?

  Þetta er að sjálfsögðu nýjasta "strikamerki" norska kóngsins,

  sem ber að virða og akta með bugti og beygingum, og er

  vinsamleg "konungleg ábending" til allra sem fiskveiðar stunda,

  en eru svo ólánsamir að hafa

  eigi fæðst undir evrópskri óskastjörnu eða á norskri grund,

  um að snáfa 170 sjómílur til hægri á veiðiskipum sínum,

  sjái þeir glitta á Makríl á svamli. (Þá skárra að hæ. hlið skips,

  snúi eigi að LANDI....hehehehe).

  Skiptir engu þótt veiðiskip ræningjalýðsins, séu í eigin

  fiskveiðilögsögu.

  Suman fisk MÁ ALLS EKKI VEIÐA!

  Norskir EIGA HANN!

  MAKRÍLINN.

  ÖLL HELVÍSK ÞÚSUNDIN AF MAKRÍLTONNUNUM, sem í kringum landið

  lóna, í staðinn fyrir að snauta heim að Noregsströndum.

  Svo SKAMM, frónversku Makrílveiðiþjófar og bófar.

  Þið eruð að RÆNA arma og fátæka olíufrændur okkar fiskinum.

  Ja, svei.

  Tarna er ljóta fréttin.

  Góðar stundir og megi föstudagssoðningin bragðast vel.

Kallar Íslendinga ræningjaþjóð

Athugasemdir

[xist (IP-tala skráð) 26.10.2012 kl. 10:44]

Fá, smá, liggjum vel við höggi + Enginn her, engin olía = Fyrirtaks "scape goat" fyrir hugleysingja.

[sigkja (IP-tala skráð) 27.10.2012 kl. 00:24]

Já hann er óþægur Makríllinn. Minnir svolítið á Norsk-Íslensku Síldina sem aðeins kemur hingað til okkar þegar stofninum er haldið svo stórum og sterkum að til vandræða horfir í Noregi þegar allir firðir fyllast af Síld og hún ákveður að synda framhjá Færeyjum til Íslands.

Og Laxinn okkar sem telur sig geta þvælst um allan sjó útaf Skotlandi, upp með Noregi og kringum Færeyjar áður en hann skilar sér í árnar okkar.

Eða Loðnan og Kolmunninn sem geta ómögulega haldið sig í landhelgi.

Og hvað er þetta með Karfann að vilja hanga rétt utan við 200 mílna línuna?

Það getur oft verið gott að eiga góða granna, en jafnvel þolinmóðustu grönnum rennur í skap þegar maður kúkar í heita pottinn þeirra.....Við mundum þá kalla það húmorslaust snobblið sem getur bara sjálft sótt sláttuvélina sem við fengum lánaða.

[Sigríður Sigurðardóttir, 31.10.2012 kl. 21:29]

Já herramenn, það er orðið fjári hart, EIGI aðrar þjóðir fiskinn sem svamlar inn í fiskveiðilögsögu okkar... hvort þurfi að setja "veiðikvðóta" á Makrílveiðar okkar er svo önnur saga, og okkar að meta.  En takk kærlega fyrir innlit og góð komment.